នគរបាលបានឲ្យដឹងថា ចោរប្លន់ម្នាក់ត្រូវបានបាញ់ស្លាប់ និងម្នាក់ទៀតរងរបួសកាលពីយប់ថ្ងៃអាទិត្យ អំឡុងពេលបាញ់តជាមួយនគរបាលនៅក្នុងខេត្តព្រៃវែង បន្ទាប់ពីបុរសអ្នកលេងប្រដាប់អាវុធមួយក្រុមមានគ្នាប្រាំមួយនាក់បានប្លន់នៅផ្ទះមួយក្នុងស្រុកព្រះស្តេច។
លោក សេង សាវ័ន្ត អធិការរងនគរបាលស្រុកព្រះស្តេចបានមានប្រសាសន៍ថា បន្ទាប់ពីអ្នកជិតខាងម្នាក់ទូរស័ព្ទប្រាប់ នគរបាលមួយចំនួនត្រូវបានបញ្ជូនទៅកាន់ផ្ទះនោះនៅក្នុងឃុំព្រះស្តេច ចំណែកមន្ត្រីផ្សេងទៀតបានឆែកឆេរតំបន់នៅជុំវិញនោះ និងបានប្រទះឃើញបុរសបីនាក់ដើរតាមវាលស្រែនៅក្នុងឃុំបន្ទាយចក្រី ចម្ងាយប្រហែល១០គីឡូម៉ែត្រពីកន្លែងកើតហេតុ។
លោកបានមានប្រសាសន៍ថា “យើងបានហៅពួកគេឲ្យឈប់ ហើយសួរពួកគេថា ទៅណា ប៉ុន្តែម្នាក់ក្នុងចំណោមពួកគេបានដកកំាភ្លើងAK និងចាប់ផ្ដើមបាញ់តែម្តង”។ ភ្លាមៗនោះ នគរបាលបានបាញ់តបវិញដោយធ្វើឲ្យជនសង្ស័យម្នាក់ស្លាប់ក្នុងចំណោមជនសង្ស័យទាំងនោះ និងម្នាក់ទៀតរងរបួស ប៉ុន្តែបុរសពីរនាក់ទៀតបានរត់គេចខ្លួន។
លោកបានមានប្រសាសន៍ថា “យើងបានស្គាល់អត្តសញ្ញាណចោរប្លន់ដែលស្លាប់នោះ ហើយពេលនេះកំពុងតែស៊ើបអង្កេតដើម្បីតាមចាប់ខ្លួនជនសង្ស័យដែលនៅសល់”។ លោកបានបន្ថែមថា បុរសប្រាំមួយនាក់នេះបានបំបែកគ្នាជាពីរក្រុម ខណៈដែលពួកគេបានគេចខ្លួនពីកន្លែងប្លន់។
លោក ប៉ោ សុវណ្ណ អាយុ៤៥ឆ្នាំ បានឲ្យដឹងថា នៅម៉ោងប្រមាណ៧និង២០នាទីយប់ ស្រាប់តែមានចោរប្លន់ពីរនាក់បានសម្រុកចូលផ្ទះរបស់គាត់ ដោយមានកាំភ្លើងមួយដើម និងរបាដែកមួយ ខណៈដែលគាត់និងសមាជិកប្រាំមួយនាក់ទៀតក្នុងគ្រួសាររបស់គាត់កំពុងតែមើលទូរទស្សន៍។
លោក សុវណ្ណ បានមានប្រសាសន៍ថា “សមាជិកគ្រួសាររបស់គាត់ភាគច្រើនបានគេចខ្លួនតាមក្រោយ ប៉ុន្តែពួកចោរប្លន់បានឃាត់ខ្លួនកូនប្រុសរបស់ខ្ញុំ និងខ្ញុំ និងបានបាញ់ភ្ជុចដី ហើយបន្ទាប់មកបានវាយយើងផ្ទួនៗនឹងដំបងដែក”។ លោកបានបន្តថា សមាជិកក្រុមអ្នកលេងបួននាក់បានឈរយាមផ្ទះរយៈពេល២០នាទី ចំណែកចោរពីរនាក់ទៀតនៅក្នុងផ្ទះបានប្លន់យកប្រាក់ចំនួន៤ម៉ឺនរៀលប្រហែល១០ដុល្លារ កាតATM មួយ អត្តសញ្ញាណប័ណ្ណមួយ និងចិញ្ចៀនមួយវង់។
លោក សុវណ្ណ បានមានប្រសាសន៍ថា លោករងរបួសច្រើនកន្លែង ត្រូវត្រង់ក្បាល ជើង និងត្រគាករបស់គាត់ ចំណែកកូនប្រុសអាយុ២០ឆ្នាំរបស់គាត់ឈ្មោះ ហន សារិទ្ធ ត្រូវបានវាយជាច្រើនដងនឹងរបាដែក ត្រូវក្បាល ស្មា និងដងខ្លួនរបស់គាត់ ហើយត្រូវបានបញ្ជូនទៅប្រទេសវៀតណាមដើម្បីព្យាបាល។ នគរបាលជឿថា ចោរប្លន់ទាំងនេះមានគោលដៅទៅលើផ្ទះនេះ ពីព្រោះផ្ទះនេះមានទ្រព្យសម្បត្តិច្រើនជាងផ្ទះនៅជុំវិញនោះ៕ ប៊ុននី