32 C
Phnom Penh

បុរស​ម្នាក់​ដែល​ត្រូវ​បាន​ចាប់​ខ្លួន​នៅ​ក្នុង​ករណី​ព្រួត​​​វាយ​​​សម្លាប់​ជន​ជាតិវៀតណាម​ត្រូវ​បាន​ដោះ​លែង​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ សាលាដំបូង​រាជធានីភ្នំពេញ​បាន​ដោះ​លែង​បុរស​ម្នាក់​ដែល​ត្រូវ​បាន​​តុលាការ​បើក​សវនាការ​ជំនុំជម្រះ​ក្ដី​កាលពី​ចុង​ខែ​មុន ពាក់​ព័ន្ធ​នឹង​ការ​សម្លាប់​​​​បុរស​ជនជាតិ​វៀតណាម​ម្នាក់​ប្រព្រឹត្ត​​​ដោយ​​​​​​មនុស្ស​​​មួយ​​​ក្រុម​​​​កាលពីខែកុម្ភៈ។

ជន​​​រងគ្រោះ ង្វៀន វា៉ន់ចៀន អាយុ​៣០​ឆ្នាំ​ បាន​បើក​ម៉ូតូ​របស់​ខ្លួន​បុក​ពីក្រោយ​រថយន្ត​មួយ​គ្រឿង​នៅ​ក្នុង​សង្កាត់​ចាក់អង្រែលើ ខណ្ឌមានជ័យ នៅ​មុន​ម៉ោង​១០​យប់​កាលពី​ថ្ងៃទី​១៦ ខែកុម្ភៈ។ នៅ​ពេល​បុរសជនជាតិ​វៀតណាម​រូប​នេះ​រង​របួស​ មនុស្ស​ជា​​​ច្រើន​បាន​មកចោម​រោម​​​​គាត់ ហើយ​ចាប់​ផ្ដើម​វាយ​ក្បាល​​​គាត់​​​តែ​​​ម្តង​​​​ ដោយ​សា​រតែមាន​សម្រែក​​ថា “យួន​វ៉ៃ​​ខ្មែរ​”។ ក្រុម​មនុស្ស​បាន​កើន​ឡើង​រហូត​ដល់ប្រមាណ​២០​នាក់ ហើយ​ជន​រងគ្រោះ​បាន​ស្លាប់​នៅ​កន្លែង​កើត​ហេតុ​។

លោក ប៊ុន ចាន់វុត្ថា​​​ អាយុ​៥១​ឆ្នាំ​ ត្រូវ​បាន​ចាប់​ខ្លួន​ភ្លាមៗ​ពីបទ​ស្រែកពាក្យ​រើស​អើង​ពូជសាសន៍ និង​ត្រូវ​បាន​ចោទ​ប្រកាន់ពីបទ​បង្ក​អំពើហិង្សា​ដែល​មាន​ស្ថាន​ទម្ងន់​ទោស​។ សាក្សី​ចំនួន​ប្រាំបួន​នាក់បាន​ផ្ដល់​សក្ខីកម្ម​តំណាង​ឲ្យ​ជន​រងគ្រោះ​ និង​បីនាក​់​ផ្សេង​ទៀត​តំណាង​ឲ្យ​នគរ​បាល​ អំឡុង​ការ​បើក​សវនាការ​ជំនុំជម្រះក្ដី​កាលពីថ្ងៃទី៣០ ខែឧសភា។ កាលពីម្សិលមិញ តុលាការ​បាន​ប្រកាស​ថា គ្មាន​ភ័ស្តុ​តាង​គ្រប់​គ្រាន់​សម្រាប់​ដាក់​​​បន្ទុក​​​លើ​​​ជន​​​សង្ស័យ​​​​ឡើយ​។

លោក កោ វណ្ឌី ចៅក្រម​ប្រធានក្រុម​ប្រឹក្សា​ជំនុំជម្រះ​បាន​មាន​ប្រសាសន៍​ថា “តុលាការ​បាន​ដោះ​លែង​លោក ចាន់វុត្ថា​ ដែល​ត្រូវ​បាន​ចោទ​ប្រកាន់ពីបទ​ប្រើ​អំពើហិង្សា​ទាក់​ទិន​នឹង​ការ​ស្លាប់​របស់​បុរស​ជនជាតិវៀតណាម​ ពីព្រោះ​តុលាការ​មិន​អាច​រក​ឃើញ​ភ័ស្តុ​តាង​ដាក់​បន្ទុក​គាត់​បាននោះ​ទេ”។ លោក​មិន​បាន​និយាយ​ថា តើ​សំណុំរឿង​នេះ​នឹង​ត្រូវ​បញ្ជូន​ត្រឡប់​ទៅ​ស៊ើប​អង្កេត​វិញ​ឬយ៉ាង​ណា​ទេ​ តែទោះជាយ៉ាង​ណា​នគរ​បាល​បាន​ឲ្យ​ដឹង​ថា ការ​ស៊ើប​អង្កេត​ដើម្បី​ស្វែង​រក​ជន​សង្ស័យ​បន្ថែម​កំពុង​តែបន្ត​។

ឃាតកម្ម​​កាលពីខែកុម្ភៈ បាន​កើត​ឡើង​ប៉ុន្មាន​សប្ដាហ៍​បន្ទាប់ពី​កន្លែង​រក​ស៊ី​របស់​ជន​ជាតិ​វៀតណាមមួយ​ចំនួន​ត្រូវ​បានគេ​ដុត​និង​លួច​ អំឡុង​ការ​ធ្វើ​កូដកម្ម​របស់​កម្មករ​រោ​​​ង​ចក្រ​កាត់​ដេរ​ដែល​​​បណ្តាល​​​ឲ្យ​​​​ផ្ទុះ​អំពើ​ហិង្សា​ក្នុង​រាជធានីភ្នំពេញ និង​បន្ទាប់ពី​លោក សម រង្ស៊ី និង​លោក កឹម សុខា មេដឹកនាំ​គណបក្ស​សង្គ្រោះជាតិ​បាន​ប្រើ​ពាក្យ​ប្រឆាំង​វៀតណាម​នៅ​ក្នុង​ការ​ថ្លែង​ទៅកាន់​សាធារណជន​បាន​ប៉ុន្មានខែរួច​​​​មក។

ពេល​និយាយ​នៅ​ខាង​ក្រៅ​បន្ទប់​សវនាការ​កាលពីម្សិលមិញ លោក ចាន់វុត្ថា​​​ បាន​និយាយ​ថា គាត់​មាន​អារម្ម​​​ណ៍​ធូរស្រាល​នៅ​​​ពេល​ត្រូវ​បាន​គេ​ដោះលែង​ ប៉ុន្តែ​គាត់​​​​នៅ​​​មាន​​កំហឹង​ត្រង់​ថា គាត់​បាន​ចំណាយ​ពេល​បួន​ខែ​នៅ​ក្នុង​ពន្ធនាគារព្រៃស​​រង់​ចាំ​ពេល​បើក​សវនា​ការ​ជំនុំជម្រះ​ក្ដី។ លោក​បាន​និយាយ​ថា “ខ្ញុំ​គួរ​តែ​ត្រូវ​បាន​ដោះ​លែង​កាលពី​ខែកុម្ភៈ ពីព្រោះ​ខ្ញុំ​មិន​បាន​ធ្វើ​អ្វី​នោះទេ”។

គាត់​បាន​អះអាង​ថា គាត់​បាន​រត់​ចេញ​មក​ផ្លូវ​ជាតិ​លេខ២ កន្លែង​ដែល​គ្រោះ​ថ្នាក់​បាន​កើត​ឡើង បន្ទាប់ពី​ឃើញ​គ្រោះ​ថ្នាក់​ពី​ផ្ទះ​របស់​គាត់​មក​។ គាត់​បាន​និយាយ​បន្ថែម​ថា ” ប្រហែល​៥​នាទី​ក្រោយមក​ ជនជាតិ​វៀតណាម​ប្រហែល​១០​នាក់​ និង​ជនជាតិ​ខ្មែរ​ប្រហែល​១០​នាក់​ដែរ ​បាន​ចាប់​ផ្ដើម​វ៉ៃគ្នា​ទៅវិញ​ទៅមក​។ ខ្ញុំក៏ជា​ជន​រងគ្រោះ​ម្នាក់​ផង​ដែរ​ ហើយ​ខ្ញុំ​ក៏រង​ការ​វាយ​ដំ​ជាច្រើន​ដែរ​”។

តែ​​​ទោះ​ជា​​​យ៉ាង​ណា​ ប្រពន្ធ​របស់​ ង្វៀន វ៉ាន់ចៀន មិន​​​ពេញ​ចិត្ត​ចំពោះ​ការ​សម្រេច​របស់​តុលាការ​នេះ​ទេ។ប្រហែល​បីខែកន្លង​ទៅនេះ​ នាង​បាន​សម្រាល​កូន​​​​​ម្នាក់​ ហើយ​ឥឡូវ​នេះ​កំពុង​តែ​ជួប​ការ​លំបាក​ក្នុង​ការ​ចិញ្ចឹម​កូន​របស់​ខ្លួន​។

នាង​បាន​និយាយ​ថា ខ្ញុំ​កំពុង​ទាម​ទារ​ប្រាក់​សំណង​ ប៉ុន្តែ​ខ្ញុំ​​​មិន​ទទួល​បាន​អ្វី​​​សោះ​ពី​សំណុំ​រឿង​នេះ​​​។ ខ្ញុំ​​​ក្រ​ ហើយ​ត្រូវ​ខំ​​​ប្រឹង​​​ចិញ្ចឹម​កូន​អាយុ​បី​​​ខែ​ទាំង​គ្មាន​ឪពុក​ទៀត​។ ខ្ញុំ​មិន​​​ពេញ​ចិត្ត​ចំពោះ​​ការ​សម្រេច​នេះ​ទេ​”។

លោក ហួ​​​ត វណ្ណា នាយ​​​ប៉ុស្តិ៍​​នគរ​បាល​សង្កាត់​ចាក់​អង្រែលើ​ បាន​មាន​ប្រសាសន៍​ថា លោក ចាន់វុត្ថា​​​ ដំបូង​ឡើយ​ត្រូវ​បាន​សាក​សួរ​ជាមួយ​កូន​ប្រុស​របស់​គាត់​ឈ្មោះ ប៊ុន ចាន់សិទ្ធិ​វណ្ណ អាយុ​២១​ឆ្នាំ ដែល​រត់​គេ​ច​ខ្លួន​តាំង​ពីពេល​នោះ​មក​ម្លេ៉ះ​។ លោក​បាន​មាន​ប្រសាសន៍​ថា យើង​នៅ​មិន​ទាន់​បញ្ចប់​សំណុំរឿង​នេះ​ទេ ហើយ​នគរ​បាល​កំពុង​បន្ត​ស៊ើប​អង្កេត​ដើម្បី​ស្វែង​រក​ជន​សង្ស័យ​បន្ថែម​”។

លោក អាង​​​ ចាន់​​​រិទ្ធ នាយក​ប្រតិបត្តិ​​​​អង្គការ​សិទ្ធិ​ជនជាតិ​ភាគ​តិច​ (MIRO) បាន​អំពាវ​នាវ​ឲ្យ​អាជ្ញាធរ​បន្ត​ការ​ស៊ើប​អង្កេត​របស់​ខ្លួន​នៅ​ក្នុង​ករណី​​​ឃាត​កម្ម​នេះ​។ លោក​បាន​មាន​ប្រសាសន៍​ថា ” យើង​ខ្លាច​ក្រែង​សំណុំរឿង​នេះ​នឹង​ធ្វើ​ឲ្យ​មាន​និទណ្ឌភាព​​​កាន់តែ​​​ច្រើន​។ នៅ​ក្នុង​ប្រទេស​កម្ពុជា​ ករណី​​​នេះ​តែង​តែ​កើត​ឡើង​មិន​ចំពោះ​តែ​ជន​ជាតិ​វៀតណាម​ប៉ុណ្ណោះទេ”។

លោក​បាន​បន្ថែម​ថា “អង្គការ​សិទ្ធិ​ជនជាតិ​ភាគ​តិច​ចង់​ផ្ញើ​សារ​ដល់​ពល​រដ្ឋ​ខ្មែរ​ទាំង​អស់​ឲ្យ​គោរព​គ្នា​ទៅវិញ​ទៅមក​។ ទោះបីជា​យើង​មាន​ជាតិ​​​សាសន៍​​​ខុស​គ្នា​ក៏ដោយ​ តែ​សូម​គោរព​គ្នា​ទៅ​វិញ​ទៅមក​ បើមិន​ដូច្នោះ​ទេ យើង​នឹង​មាន​ជម្លោះជាតិ​សាសន៍​ជា​មិន​ខាន​”៕ ស៊ុយឈាង​

(រាយការណ៍​បន្ថែម​ដោយ Lauren Crothers)​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស