កាលពីម្សិលមិញ សាលារាជធានីភ្នំពេញបានចាប់ផ្ដើមយុទ្ធនាការចុងក្រោយរបស់ខ្លួនដើម្បីធ្វើឲ្យដងផ្លូវនានានៅទីក្រុងលែងមានជនអនាថា ដោយប្រមូលអ្នកសុំទាន និងអ្នកលក់ដូរបានជាច្រើនរថយន្តនៅតាមភ្លើងស្តុប ហើយបានឃាត់ពួកគេទុកនៅការិយាល័យខណ្ឌ និងមន្ទីរសង្គមកិច្ចរាជធានី។
គេបានមើលឃើញជនអនាថានៅក្នុងរាជធានីត្រូវគេចាប់ដាក់ចូលរថយន្តទ្រុង ប៉ុន្តែសាលារាជធានី និងមន្ទីរសង្គមកិច្ចបានបដិសេធមិនឲ្យដឹងថា មនុស្សប៉ុន្មាននាក់ត្រូវបានប្រមូលនោះទេ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានមានប្រសាសន៍ថា “យើងបានចាប់ផ្ដើមប្រមូល[ជនអនាថា] នៅគ្រប់ខណ្ឌទាំងអស់ទូទាំងរាជធានី ហើយយើងនឹងបន្តនៅថ្ងៃស្អែក និងថ្ងៃទៅមុខទៀត”។ “យើងបានចាប់ផ្ដើមយុទ្ធនាការនេះ ដើម្បីប្រមូលជនអនាថាពីព្រោះយើងចង់បញ្ជូនពួកគេទៅអង្គការដៃគូនានា ដូចជា អង្គការមិត្តសំឡាញ់ ដែលមានកម្មវិធីបណ្ដុះបណ្ដាលវិជ្ជាជីវៈនៅទីនោះស្រាប់ឲ្យជួយពួកគេ”។
អង្គការមិត្តសំឡាញ់ និងអង្គការដើម្បីភាពញញឹមនៃកុមារ ជាអង្គការពីរមិនរកកម្រៃហើយជាដៃគូរបស់សាលាក្រុងក្នុងកម្មវិធីនេះ។ អង្គការទាំងពីរផ្ដល់ម្ហូបអាហារដល់ក្មេងអនាថា និងបានព្រមព្រៀងទទួលយកមនុស្សដែលសាលារាជធានីប្រមូលបាន ហើយផ្ដល់ការបណ្ដុះបណ្ដាលវិជ្ជាជីវៈដល់ពួកគេ។
នៅម៉ោង៥និង៣០នាទីល្ងាចម្សិលមិញ អង្គការ (Friends) ជាអង្គការមួយផ្សេងទៀតដែលជាដៃគូជិតស្និទ្ធជាមួយអង្គការមិត្តសំឡាញ់ មិនបានទទួលកុមារពីយុទ្ធនាការរបស់សាលារាជធានីនេះទេ។ អង្គការដើម្បីភាពញញឹមនៃកុមារ នឹងមិនចូលរួមកិច្ចប្រឹងប្រែងនេះទេ រហូតដល់ខែកក្កដា។ តំបន់ជាច្រើនដែលធ្លាប់តែមានអ្នកសុំទាន និងក្មេងៗលក់ផ្កាម្លិះ និងកាសែតនោះ បានស្ងប់ស្ងាត់ប្លែកពីធម្មតាកាលពីម្សិលមិញ។
បុរសអាយុ២៣ឆ្នាំម្នាក់ដែលប្រាប់ថា ខ្លួនឈ្មោះ ដាវុធ បានលាក់ខ្លួនពេលអាជ្ញាធរមកជិត។ “ខ្ញុំខ្លាចត្រូវគេប្រមូលចាប់…ខ្ញុំបានឃើញគ្នីគ្នារបស់ខ្ញុំ និងអ្នកផ្សេងទៀតដែលលក់កម្រងផ្កាម្លិះ និងអ្នកសុំទានត្រូវបានមនុស្សពីរបីនាក់អូសយកទៅដាក់ចូលរថយន្តមានរបាដែក”។
លោក សាបាស្ទៀន ម៉ារ៉ុត នាយកប្រតិបត្តិអង្គការ (Friends) បានមានប្រសាសន៍ថា ការមិនមានជនអនាថានៅតាមកន្លែងនានាជាធម្មតា ដោយសារតែយុទ្ធនាការធ្វើឡើងដោយអង្គការរបស់លោកមុនការប្រមូលចាប់នេះ។ លោកបានមានប្រសាសន៍ថា មុនសាលារាជធានីចុះតាមដងផ្លូវនានាមានទាំងរថយន្តទ្រុងផងនោះ ក្រុមជួយណែនាំមួយមកពីអង្គការរបស់លោកបានស្វែងរកពេញក្រុងដើម្បីរំឭកក្មេងៗ ដែលធ្វើការ រស់នៅ ឬសុំទាននៅទីនោះថា អង្គការ (Friends) ជាជម្រើសមួយសម្រាប់ពួកគេ។
លោក ម៉ារ៉ុត បានមានប្រសាសន៍បន្ថែមថា អង្គការរបស់លោកមិនជឿថា ការប្រមូលចាប់ជនអនាថានឹងអាចជួយដល់ស្ថានភាពរស់នៅរបស់ពួកគេ ឬលើកមុខមាត់សោភ័ណភាពរាជធានីក្នុងរយៈពេលយូរអង្វែងទេ ព្រោះថាភាគច្រើនបំផុតនៃកុមារទាំងនោះទំនងជានឹងត្រឡប់ទៅតាមដងផ្លូវវិញ ក្រោយពីពួកគេត្រូវបានដោះលែង។
លោកបានឲ្យដឹងទៀតថា “យើងយល់ថា សាលារាជធានីចង់បានលទ្ធផលរយៈពេលខ្លី ប៉ុន្តែវាជាបញ្ហាយូរអង្វែងដែលចាំបាច់ត្រូវមានដំណោះស្រាយរយៈពេលវែង”។
យោងតាម ស៊ូ សុធាវី សកម្មជនសិទ្ធិមនុស្សខ្ទើយ អ្នករកស៊ីផ្លូវភេទច្រើនជាង២០នាក់ត្រូវបានបុគ្គលិកសង្គមកិច្ចរាជធានីប្រមូលចាប់កាលពីយប់ថ្ងៃច័ន្ទ និងព្រឹកថ្ងៃអង្គារ ហើយឃាត់ទុកនៅមជ្ឈមណ្ឌលស្ដារនីតិសម្បទា ឱកាសរបស់ខ្ញុំ៕ មានិត