29 C
Phnom Penh

អង្គភាព​ប្រឆំាងអំពើ​ពុក​រលួយ​ស៊ើបអង្កេត​ប្រធាន​មន្ទីរ​រតនាគារ​ខេត្ត​កំពង់​ចាម​ពីបទ​គំរាម​ទារ​ប្រាក់​

ដោយ ឌឹ ខេមបូឌា ដេលី

បទវិភាគ

យោងតាម​សេចក្តីប្រកាស​​មួយ​​ចេញ​ពី​អង្គភាព​​ប្រឆាំង​អំពើ​ពុក​រលួយ​​បាន​ឲ្យដឹងថា ​​អង្គ​ភាព​ប្រឆាំង​អំពើ​ពុក​រលួយ​​បាន​បញ្ចេញ​ឲ្យដឹង​​កាល​ពីម្សិល​មិញថា ​លោកស្រី កុល ធារិន ប្រធាន​មន្ទីរ​​រតនាគារ​ខេត្ត​កំពង់​ចាម និង​មន្ត្រីក្រោម​ឱវាទ​លោកស្រី កំពុង​ត្រូវបាន​ស៊ើប​អង្កេត​​ពីបទ​កិប​កេង​ប្រាក់​ពីគម្រោង​អភិវឌ្ឍន៍​ក្នុងស្រុក​ និង​​ពីបទ​គំរាម​​ទារ​សំណូក​​​ពី​ក្រុមហ៊ុន​​​​អភិ​វឌ្ឍន៍។

លោក ឱម យុិនទៀង ប្រធាន​​អង្គភាព​ប្រឆាំង​អំពើ​ពុក​រលួយ​​បាន​​ផ្ញើ​លិខិត​ជូនលោក​ស្រី ​ធារិន កាល​ពីថ្ងៃ​​ទី​១៤ ខែ​មីនា ដោយ​​ជូន​ដំណឹង​​ប្រាប់​លោកស្រី​​ថា ​​អង្គភាព​នេះ​​បាន​ទទួល​​​ពាក្យ​បណ្តឹង​​មួយ​​កាល​ពីក្នុង​ខែ​ធ្នូ ​​ដែល​​អះអាង​ថា ​លោកស្រី​និង​មន្ត្រី​​​មន្ទីរ​រតនាគារ​​ខេត្ត​ បាន​ទាមទារ​ប្រាក់​សគុណ​​ពីក្រុមហ៊ុន​អភិវឌ្ឍន៍​គម្រោង​ នេះបើយោងតាម​​សេចក្តីប្រកាស​​បង្ហោះ​នៅ​លើគេហទំព័រ​របស់​​អង្គភាព​ប្រឆាំង​​អំពើ​​ពុក​រលួយកាល​ពីថ្ងៃ​ច័ន្ទ។

​ចំណោម​ភាព​មិនប្រក្រតី​​ផ្សេងៗ​ គឺថា ​មន្ទីរនេះ​​បាន​បង្កើត​ក្រុម​ការងារ​​ផ្ទាល់ខ្លួន​​ដើម្បី​ចូល​រួម​ដំណើរការ​ដេញ​ថ្លៃ​​ទទួលបាន​កិច្ច​សន្យា​​សម្រាប់​ការ​​អភិវឌ្ឍ។ ​សេចក្តីប្រកាស​​នេះ​​​មាន​ខ្លឹម​សារថា “រតនាគារ​ខេត្តកំពង់​ចាម​[ត្រូវបាន​ចោទថាបាន]​បង្កើត​ក្រុមការ​ងារ​​របស់​ខ្លួន​ផ្ទាល់​ដើម្បីចូល​រួម​​ដំ​ណើរការ​​ដេញ​ថ្លៃ​ស្ទើរតែ​ទាំង​​អស់​​សម្រាប់​គម្រោង​​អភិវឌ្ឍន៍​សម្រាប់​ភូមិ​ ឃុំ និងស្រុក​ ដោយមាន​បំណង​​ទាម​ទារ​ប្រាក់​​ទឹក​តែ​​ចាប់​​ពី​២.០០០ដុល្លារ​ទៅ​៣.០០០ដុល្លារ​[ក្នុងគម្រោង​នីមួយៗ​]”។​

ដោយមិន​បញ្ជាក់​អំពី​គម្រោង​ណាមួយ​ សេចក្តីប្រកាសនេះ​បន្ថែមថា “ប្រសិនបើ​ម្ចាស់​គម្រោង​បដិសេធ ពួកគេ​​ត្រូវ​​ប្រឈម​នឹង​ផល​ពិបាក​ពីមន្ទីរ​រតនាគារ​(ជាពិសេស​ពីលោក​ ស៊ី ថន) “។ នៅក្នុងសេចក្តីប្រកាស​​​ដោយ​ឡែកមួយទៀត ​លោក ស៊ី ថន ​ត្រូវ​បាន​គេស្គាល់​ថា​ជា​អនុប្រធាន​មន្ទីរ​រតនាគារ​ខេត្ត​។

ក្រុម​មន្ត្រី​មន្ទីរ​រតនាគារនេះ​ក៏ត្រូវបាន​ចោទប្រកាន់​ផងដែរ​​ពីបទ​”ដកប្រាក់​សម្រាប់​ថ្លៃ​ឈ្នួល​រដ្ឋបាល​​​​ជាមុន​សម្រាប់​​ការ​ចាប់​ផ្តើមការងារ​នៅតាម​ឃុំ​និងស្រុក​” ដោយទាមទារ​ប្រាក់​​​ពី១០០ដុល្លារ​ទៅ​១៥០ដុល្លារ​សម្រាប់​​គម្រោង​​​ជួស​ជុល​និង​សាងសង់​នៅមូល​ដ្ឋាន​។

បង្ហោះនៅលើ​គេហ​​ទំព័រ​របស់​​អង្គភាព​ប្រឆាំង​​អំពើ​ពុក​រលួយ​ផងដែរ គឺ​លិខិតកា​រ​​ពារ​ខ្លួន​​​​​មួយ​ច្បាប់​​​ពី​លោកស្រី ធារិទ្ធ ដែល​​បាន​បដិសេធ​​ថាលោកស្រី​មិនបាន​ធ្វើអ្វី​ខុស​​ទេ ហើយ​​បាន​លើកឡើងថា ការ​ចោទប្រកាន់នេះ​ គឺ​ដើម្បី​យក​ចំណេញ​នយោបាយ។

លិខិត​របស់​លោកស្រីចុះ​ថ្ងៃទី​២១ខែមីនា មាន​ខ្លឹមសារថា “ជួសមុខឲ្យថ្នាក់​ដឹកនាំ​​​ផ្នែក​គ្រប់​គ្រង​ ខ្ញុំ​សូម​បញ្ជាក់​​ចំណុចទី១​​ថា មន្ទីរ​រតនាគារ​ខេត្ត​មិន​បាន​បង្កើត​ក្រុមការងារ​ណាមួយ​ដើម្បីចូល​រួមការ​​ដេញ​ថ្លៃ​​​ទេ​”។ លោកស្រី​បានមាន​ប្រសាសន៍ថា “ការចោទប្រកាន់​​​ពីបទ​គំរាមទារប្រាក់​​​​ពី២.០០០​ដុល្លារ​ទៅ​៣.០០០ដុល្លារ​ គឺគ្រាន់​តែ​​ជា​វិធី​មួយ​ដើម្បី​បង្ខូចឈ្មោះ​ថ្នាក់​ដឹកនាំនិងមន្ត្រីរតនាគារ​ប៉ុណ្ណោះ​”។

លោក ឆាយ​ សាវុធ អនុប្រធាន​​អង្គភាព​ប្រឆាំង​អំពើ​​ពុករលួយ​​បានមាន​ប្រសាសន៍ថា ការ​បង្ហោះចម្លើយ​តប​​របស់​ជន​ជាប់​ចោទ​មិនមែន​ជា​ការ​បញ្ជាក់​ណា​មួយ​ថា ករណី​នេះ​ត្រូវ​បាន​បិទ​នោះ​ទេ​ ប៉ុន្តែ​ដើម្បី​បង្ហាញ​ប្រាប់​សាធារណជន​ថា ករណី​នេះ​កំពុង​ដំណើ​រការ​ដោយ​មាន​ការ​អញ្ជើញ​ដើម​ចោទ​ និង​ចុង​ចោទ​ដើម្បី​បង្ហាញ​ភ័ស្តុ​តាង​។

លិខិត​ទី​២​ចុះ​ហត្ថ​លេខាដោយ​លោក ឱម យិុន​ទៀង​ ចុះ​ថ្ងៃទី​៣​ ខែ​កុម្ភៈ​ត្រូវ​បាន​បង្ហោះ​នៅ​លើ​គេ​ហទំព័រ​របស់​អង្គភាព​ប្រឆាំ​ងអំពើ​ពុក​រលួយ​ ដោយ​ស្នើ​ឲ្យ​លោក ម៉ៅ សុចិត្រា ប្រធាន​នាយ​ក​ដ្ឋាន​បុគ្គ​លិក​​របស់​ក្រសួ​ងទេស​ចរណ៍​ ឲ្យ​ឆ្លើយ​តប​ទៅ​នឹង​ការ​ចោទ​ប្រកាន់​ថា លោក​បាន​គំរាម​ទារ​ប្រាក់​ពី៣០០​ដុល្លារ​ទៅ​៥០០​ដុល្លារ​ពី​ប្រធាននិ​ង​អនុ​ប្រធាន​​មន្ទីរ​ទេសចរណ៍​តាម​តំបន់​​​មុន​ពេល​រុះ​រើ​មន្ត្រី​រាជ​ការ​ក្នុង​ខែ​មិថុនា ឆ្នាំ​២០១៣​។ លោក សុចិត្រា បាន​ឆ្លើយ​តប​យ៉ាង​ខ្លី​ដោយ​ប្រកាស​ថា ការ​ចោទ​ប្រកាន់​នេះ​ “មិន​ពិត​” និង​ “មិន​ត្រឹម​ត្រូវ​” ទេ​៕ ប៊ុន​នី​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស