តំណាងកម្មករបាននិយាយថា កម្មកររោងចក្រកាត់ដេរប្រហែល៤០០នាក់បានមកធ្វើការតាមវេនរបស់ខ្លួន និងមកបើកប្រាក់ខែនៅរោងចក្រកាត់ដេរ Hongkong Yufeng ក្នុងរាជធានីភ្នំពេញកាលពីម្សិលមិញ ស្រាប់តែឃើញរោងចក្របិទទ្វារ ហើយមិនឃើញថៅកែរោងចក្រ។
លោក លីវ ថារីន ប្រធានសហព័ន្ធសហជីពយុវជនឯករាជ្យ បានមានប្រសាសន៍ថា ” ថ្ងៃនេះគឺជាថ្ងៃបើកប្រាក់ខែរបស់កម្មករ ហើយដោយសារនិយោជកមិនមានលុយបើកឲ្យកម្មករ ដូច្នេះ គាត់បានរត់បាត់កាលពីល្ងាចម្សិលមិញ”។ លោកបានមានប្រសាសន៍ថា “កម្មករប្រហែល៤០០នាក់ត្រូវបង់ថ្លៃឈ្នួលផ្ទះ និងចំណាយថ្លៃម្ហូបអាហារ”។ លោកបានបន្ថែមថា រោចក្រកាត់ដេរនេះផលិតសម្លៀកបំពាក់ឲ្យក្រុមហ៊ុនយីហោល្បីៗ រួមមានក្រុមហ៊ុន Gap និង Adidas ជាដើម។
លោក ថារីន បានមានប្រសាសន៍ថា កម្មករដែលរោងចក្ររបស់ពួកគេស្ថិតក្នុងសួនឧស្សាហកម្មកាណាឌីយ៉ា កន្លែងដែលកងរាជអាវុធបាញ់អ្នកតវ៉ាដែលជាកម្មកររោងចក្រកាត់ដេរស្លាប់យ៉ាងហោចណាស់ប្រាំនាក់កាលពីខែមករានោះ បានចាប់ផ្ដើមធ្វើការតវ៉ានៅខាងក្រៅរោងចក្រនេះទាមទារបើកប្រាក់ខែពេញសម្រាប់ខែឧសភា។ “ យើងមិនដឹងអំពីមូលហេតុនៅពីក្រោយការរត់របស់ថៅកែរោងចក្រទេ ឬថាតើក្រុមហ៊ុន Gap ឬ Adidas ឈប់បញ្ជាទិញ ឬក៏បញ្ហាអ្វីឡើយ?”។ អ្នកគ្រប់គ្រងនៅរោងចក្រ Hongkong Yufeng មិនអាចទាក់ទងសុំអត្ថាធិប្បាយបានទេ។
កម្មករនៅរោងចក្រកាត់ដេរអូសេអង់ក្នុងរាជធានីភ្នំពេញក៏បានធ្វើការតវ៉ាកាលពីខែមុនផងដែរបន្ទាប់ពីត្រូវបានជូនដំណឹងថា រោងចក្រត្រូវបិទរយៈពេលមួយខែ ហើយនឹងបើកឲ្យកម្មករតែ១៥ដុល្លារប៉ុណ្ណោះអំឡុងពេលនោះ ដោយសារមិនមានការបញ្ជាទិញពីក្រុមហ៊ុនបញ្ជាទិញនានា រួមមានក្រុមហ៊ុន Gap ជាដើម។
ក្រុមហ៊ុនយីហោសម្លៀកបំពាក់ល្បីៗប្រហែល៣០ និងសហជីពពិភពលោកបានជួបប្រជុំជាមួយក្រុមមន្ត្រីរដ្ឋាភិបាលកាលពីចុងខែឧសភា ហើយបានលើកឡើងថា អនាគតនៃឧស្សាហកម្មកាត់ដេរគឺពឹងផ្អែកលើការបញ្ចប់ការប្រើអំពើហិង្សាទៅលើកម្មករ និងការអាក់ខានការផ្គត់ផ្គង់ដោយសារតែភាពចលាចលការងារ។ សមាគមរោងចក្រកាត់ដេរនៅកម្ពុជាលើកឡើងថា ក្រុមហ៊ុនមួយចំនួនបានចាប់ផ្ដើមកាត់បន្ថយការបញ្ជាទិញ។
នៅកន្លែងផ្សេងទៀតកាលពីម្សិលមិញ កម្មករបាននិយាយថា កូដកម្មនៅរោងចក្រកាត់ដេរ T&K ដែលបានចាប់ផ្ដើមកាលពីថ្ងៃទី៤ ខែមិថុនា បានបញ្ចប់ហើយកាលពីម្សិលមិញ បន្ទាប់ពីរោងចក្រកាត់ដេរនេះបានគំរាមកាត់ប្រាក់ខែកម្មករ។
កម្មករបានទាមទារប្រាក់ឧបត្ថម្ភថ្លៃអាហារថ្ងៃត្រង់ប្រចាំថ្ងៃចំនួន២.០០០រៀល។ ជី សុខន ជាកម្មករម្នាក់នៅរោងចក្រកាត់ដេរនេះបាននិយាយថា ” កម្មករ៩០ភាគរយនឹងត្រឡប់ទៅធ្វើការវិញពីព្រោះពួកគេខ្លាចបាត់បង់ប្រាក់ខែរបស់ខ្លួន។ ថៅកែរោងចក្របានបំបាក់ស្មារតីកម្មករដែលបន្តធ្វើកូដកម្ម”។ គេមិនអាចទាក់ទងបុគ្គលិកនៅរោងចក្រកាត់ដេរ T&K ដើម្បីសុំអត្ថាធិប្បាយបានទេ៕ សារុន