កម្មករចំណាកស្រុកខ្មែរប្រមាណ១០.០០០នាក់បានឆ្លងកាត់ច្រកព្រំដែនអន្តរជាតិប៉ោយប៉ែតចូលក្នុងខេត្តបន្ទាយមានជ័យរយៈពេលបីថ្ងៃមកនេះ បន្ទាប់ពីត្រូវបានបង្ខំឲ្យចេញពីប្រទេសថៃដោយយោធារបស់ប្រទេសនេះ ដែលបានផ្តួលរំលំរដ្ឋាភិបាលថៃនិងបានប្រកាសច្បាប់អាជ្ញាសឹក។
យោងតាមលោក ង៉ោ ម៉េងជ្រុន អភិបាលក្រុងប៉ោយប៉ែត បានឲ្យដឹងថា ចាប់តាំងពីថ្ងៃអាទិត្យមក អាជ្ញាធរថៃបាននិងកំពុងតែដឹកជញ្ជូនកម្មករខ្មែរជាច្រើនរថយន្តមកព្រំដែន ជាហេតុនាំឲ្យអាជ្ញាធរនៅទីនេះរូតរះរៀបចំបង្កើតកន្លែងស្នាក់នៅបណ្តោះអាសន្នឲ្យពួកគេ។
លោកបានមានប្រសាសន៍តាមទូរស័ព្ទកាលពីម្សិលមិញថា ថា “នេះជាលើកដំបូងហើយដែលទាហានថៃបានបញ្ជូនកម្មកររបស់យើងត្រឡប់មកវិញ ហើយវាមានចំនួនប្រហែល១០.០០០នាក់ ច្រើនជាងធម្មតា”។
លោកបានមានប្រសាសន៍បន្ថែមថា “យើងបានសង់ជំរំសម្រាប់ពួកគេដើម្បីស្នាក់នៅ ដែលមានទាំងការផ្គត់ផ្គង់ទឹកនិងបង្គន់ ហើយយើងកំពុងតែព្យាយាមជួយពួកគេស្វែងរករថយន្តវ៉ែន រថយន្តក្រុងនិងរថយន្តតូច ដែលនឹងដឹកពួកគាត់ត្រឡប់ទៅស្រុកកំណើតវិញក្នុងតម្លៃសមរម្យ”។
លោក ស៊ុំ ចាន់គា អ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា អាជ្ញាធរថៃបាននិងកំពុងធ្វើការឆែកឆេរតាមរោងចក្រ ដោយចាប់ខ្លួនពលរដ្ឋខ្មែរភ្លាមៗនិងដឹកពួកគេមកចោលនៅព្រំដែន ហើយមិនទទួលស្គាល់ពាក្យសុំឯកសារធ្វើការងារ។ សូម្បីកម្មករស្របច្បាប់ក៏បានរាយការណ៍ថា ទាហានបានបំផ្លាញឯកសាររបស់ខ្លួនដែរ។ លោកបានមានប្រសាសន៍ថា ” នៅក្នុងប្រទេសថៃ មានរដ្ឋប្រហារយោធាមួយ ដូច្នេះកម្មករចំណាកស្រុកខុសច្បាប់របស់យើង ត្រូវបានទាត់ធាក់ វាយដំនិងបាញ់ប្រហារ ពីព្រោះថៃកំពុងប្រើច្បាប់អាជ្ញាសឹក”។ លោកបានបន្ថែមថា លោកបានទទួលសេចក្តីរាយការណ៍អំពីកម្មករមួយចំនួន ដែលបានលាក់ខ្លួននៅប្រទេសថៃ ពីព្រោះពួកគាត់ត្រូវគេចាប់ខ្លួន៕ ប៊ុននី