គណបក្សប្រជាជនកម្ពុជា និងគណបក្សសង្គ្រោះជាតិនឹងបន្តការចរចាថ្នាក់កណ្តាលនៅថ្ងៃនេះ ដើម្បីទម្លាយភាពទាល់ច្រកនយោបាយដ៏អូសបន្លាយ ដោយលើកយកបញ្ហាដែលនៅសេសសល់បន្ទាប់ពីអ្វីដែលបានព្រមព្រៀងគ្នាកាលពីខែមេសានោះ បានបរាជ័យទៅវិញ។
គណបក្សសង្គ្រោះជាតិបានធ្វើពហិការមិនចូលសភាចាប់តាំងពីការបោះឆ្នោតកាលពីខែកក្កដា ឆ្នាំ២០១៣ ដែលគណបក្សនេះចោទគណបក្សប្រជាជនកម្ពុជាថាបានលួចបន្លំ ហើយចង់ឲ្យគណបក្សប្រជាជនកម្ពុជាយល់ព្រមចំពោះកំណែទម្រង់មួយចំនួន មុនពេលខ្លួនទទួលយកអាសនៈ។
លោកនាយករដ្ឋមន្ត្រី ហ៊ុន សែន និងលោក សម រង្ស៊ី មេដឹកនាំគណបក្សប្រឆាំងហាក់ដូចជាបានដោះស្រាយភាពខ្វែងគំនិតគ្នាបានច្រើនកាលពីដើមខែមេសា មុនពេលកិច្ចព្រមព្រៀងចុងក្រោយបរាជ័យ ដែលទំនងជាដោយសារការមិនយល់ស្របថា តើត្រូវរំកិលកាលបរិច្ឆេទការបោះឆ្នោតជាតិលើកក្រោយត្រឹមណាដែលការបោះឆ្នោតនេះគ្រោងធ្វើនៅពាក់កណ្តាលឆ្នាំ២០១៨នោះ។
លោក ព្រំុ សុខា រដ្ឋលេខាធិការក្រសួងមហាផ្ទៃ ជាប្រធានក្រុមចរចាគណបក្សប្រជាជនកម្ពុជា បានមានប្រសាសន៍ថា ជំនួបនៅព្រឹទ្ធសភាថ្ងៃនេះនឹងលើកយកបញ្ហាដែលគណបក្សទាំងពីរនៅសេសសល់មកពិភាក្សា។
លោកបានមានប្រសាសន៍ថា “យើងនឹងជួបប្រជុំដើម្បីបង្ហើយឯកសារព្រាងនៃកិច្ចព្រមព្រៀងនយោបាយរវាងគណបក្សទាំងពីរ ដែលគណបក្សទាំងពីរបានព្រាងកាលពីថ្ងៃទី៩ ខែមេសា។ យើងប្រើប្រាស់សេចក្តីព្រាងច្បាប់់នោះ ពីព្រោះនៅពេលនោះមនុស្សគ្រប់គ្នាគិតថា យើងស្ទើរតែព្រមព្រៀងទៅហើយ ដូច្នេះយើងគិតថា យើងនឹងដំណើរការទៅមុខទៀតផ្អែកលើឯកសារនោះ”។
លោកបានមានប្រសាសន៍ថា ឯកសារនោះរួមមាន ឃ្លាមួយដែលធ្វើឲ្យគណៈកម្មាធិការជាតិរៀបចំការបោះឆ្នោត (គ.ជ.ប.) ដែលមជ្ឈដ្ឋានទូទៅចាត់ទុកថា លម្អៀងទៅគណបក្សប្រជាជនកម្ពុជានោះ ក្លាយជាស្ថាប័នអព្យាក្រឹតដែលបានចែងក្នុងរដ្ឋធម្មនុញ្ញ។ លោក ហ៊ុន សែន បានបញ្ជាក់អំពីសំណើនេះចំពោះគណបក្សសង្គ្រោះជាតិ អំឡុងសុន្ទរកថាជាសាធារណៈកាលពីថ្ងៃអង្គារ។
លោក ព្រុំ សុខា បានមានប្រសាសន៍ថា ក្រុមចរចាគណបក្សប្រជាជនកម្ពុជាដែលចូលរួមក្នុងជំនួបនៅថ្ងៃនេះរួមមាន រូបលោក លោក សក់ សេដ្ឋា រដ្ឋលេខាធិការក្រសួងមហាផ្ទៃ និងលោក កើត រិទ្ធ រដ្ឋលេខាធិការក្រសួងយុត្តិធម៌។
លោក យ៉ែម បុញ្ញប្ញទ្ធិ មកពីគណបក្សសង្គ្រោះជាតិបានមានប្រសាសន៍ថា ក្រុមរបស់គណបក្សប្រឆាំងរួមមានរូបលោក លោក គួយ ប៊ុនរឿន និងលោក អេង ឆៃអ៊ាង សមាជិកសភាគណបក្សសង្គ្រោះជាតិ។ លោក យ៉ែម បុញ្ញប្ញទ្ធិ បានមានប្រសាសន៍ថា “ការចរចាបានជាប់គាំងនោះត្រង់ចំណុចដែលគណបក្សប្រជាជនកម្ពុជា មិនបានយល់ព្រមដាក់ គ.ជ.ប. ជាស្ថាប័នធម្មនុញ្ញ”។
លោកបានបន្ថែមថា “ដោយសារមានការព្រមព្រៀងគ្នាកាលពីម្សិលមិញ យើងនឹងបន្តពិភាក្សាឲ្យបានកាន់តែលម្អិតបន្ថែមទៀតស្តីពីការដាក់បញ្ចូល គ.ជ.ប.ទៅក្នុងរដ្ឋធម្មនុញ្ញហើយយើងនឹងពិនិត្យមើលអំពីសមាសភាព និងភារកិច្ចរបស់ស្ថាប័ននេះ ពិនិត្យមើលការចុះបញ្ជីអ្នកបោះឆ្នោត និងបញ្ជីឈ្មោះបោះឆ្នោត និងពិនិត្យមើលស្ថាប័នដោះស្រាយវិវាទបោះឆ្នោត”៕សារុន