សាលាដំបូងរាជធានីភ្នំពេញបានផ្ដន្ទាទោសស្ត្រីនីហ្សេរីយ៉ាម្នាក់ឲ្យជាប់ពន្ធនាគាររយៈពេល២៥ឆ្នាំកាលពីម្សិលមិញ ពីបទប៉ុនប៉ងរត់ពន្ធគ្រឿងញៀនមេតំហ្វេតាមីនចូលក្នុងប្រទេសកម្ពុជា។
ឈ្មោះ កូលលីន សេនីអូឡា បូសេដ (Collin Seniola Bosede) អាយុ៣៦ឆ្នាំ ត្រូវបានចាប់ខ្លួនកាលពីខែសីហា ជាមួយនឹងគ្រឿងញៀន១,៥គីឡូក្រាមនៅក្នុងវ៉ាលិសរបស់ខ្លួននៅឯអាកាសយានដ្ឋានអន្តរជាតិភ្នំពេញ។
អ្នកស្រី បូសេដ បានអះអាងអំឡុងពេលសវនាការជំនុំជម្រះទោសអ្នកស្រីថា បុរសម្នាក់នៅប្រទេសកាតាបានស្នើឲ្យអ្នកស្រីយកកុំព្យូទ័រមួយគ្រឿងមកប្រទេសកម្ពុជា ហើយថា គាត់មិនដឹងថា គ្រឿងញៀនត្រូវបានលាក់នៅក្នុងកុំព្យូទ័រនោះទេ។
អ្នកស្រីបានស្រែកយំនៅឯតុលាការកាលពីម្សិលមិញថា “ខ្ញុំមិនដឹងទេ ខ្ញុំមិនដឹងទេ”។ អ្នកស្រីនិយាយថា “ខ្ញុំមិនយល់ថា ហេតុអ្វីបានជាតុលាការផ្ដន្ទាទោសខ្ញុំឲ្យជាប់ពន្ធនាគារ២៥ឆ្នាំ ហើយខ្ញុំនឹងស្លាប់។ ប្រសិនបើខ្ញុំដឹងថា កុំព្យូទ័រនោះមានគ្រឿងញៀន ខ្ញុំមិនយកវាមកទេ”។
លោក សួស សំអាត ចៅក្រមប្រធានក្រុមប្រឹក្សាជំនុំជម្រះបានប្រាប់អ្នកស្រី បូសេដ ថា អ្នកស្រីមានសិទ្ធិប្ដឹងឧទ្ធរណ៍សាលក្រមមិនឲ្យហួស៣០ថ្ងៃ។ ចេញពីតុលាការ អ្នកស្រីមិនព្រមនិយាយជាមួយអ្នកយកព័ត៌មានទេ នៅពេលសួរថា តើអ្នកស្រីនឹងប្ដឹងឧទ្ធរណ៍ការផ្ដន្ទាទោសអ្នកស្រី ឬយ៉ាងណា៕ ប៊ុននី