25 C
Phnom Penh

ប្រទេសកម្ពុជា​ទទួលបានអាសនៈ​​​នៅ​​​​ស្ថាប័ន​គ្រប់គ្រង​របស់​អង្គការ​ ILO ជាលើកដំបូង

ដោយ ឌឹ ខេមបូឌា ដេលី

បទវិភាគ

ប្រទេស​កម្ពុជា​ទទួល​​​បាន​អាសនៈ​នៅ​ស្ថាប័ន​គ្រប់​គ្រង​ដ៏មាន​ឥទ្ធិពល​របស់​អង្គការ​ពល​កម្ម​អន្តរជាតិ​ (ILO) ​ជាលើក​ដំបូង​កាលពី​សប្ដាហ៍មុន​ បើ​ទោះ​ជាមាន​ចលាច​ល​ក្នុង​​​វិស័យ​​​ការ​ងារ​ជាញឹក​ញាប់ នាពេលថ្មីៗ ដែល​​​បណ្តាល​​​ឲ្យ​​​មាន​​​ការ​​​​បង្ហូរឈាម​ និងពាក្យ​បណ្ដឹ​ង​អំពី​ការ​រំលោភ​សិទ្ធិ​ក្នុង​ឧស្សាហកម្ម​កាត់​ដេរ​ដ៏សំខាន់​​នេះក៏ដោយ​។

ប្រទេស​កម្ពុជា​ទទួល​បាន​សំឡេង​ឆ្នោត​គាំទ្រ​​​ភាគ​ច្រើនពីប្រទេស​ជា​​សមាជិកអង្គការ​​ ILO​ នៅឯ​សន្និសីទ​ពលកម្ម​អន្តរជាតិ​ប្រចាំ​ឆ្នាំ​ក្នុង​ទីក្រុង​ហ្សឺណែវ សម្រាប់​អាសនៈ​មួយ​ក្នុង​ចំណោ​ម​​អាសនៈ​ប្ដូរវេន​ចំនួន​១៨​ដែលបើក​​​ចំហ​​​សម្រាប់​រដ្ឋាភិបាល​​​នានា និង​ធ្វើ​ឡើង​រៀង​រាល់​បីឆ្នាំ​ម្ដង​។ ស្ថាប័ន​គ្រប់​គ្រង​ដែល​មាន​៥៦​អាសនៈ​នេះជា​​​អ្នក​​​​សម្រេច​អំពី​គោល​នយោបាយ​របស់​អង្គការ​ILO ​បោះ​ឆ្នោត​ជ្រើស​រើស​អគ្គ​លេខាធិការ ​ILO កំណត់​របៀប​វារៈ​សម្រាប់​រៀបចំសន្និសីទ​ប្រចាំ​ឆ្នាំ​និង​អនុម័ត​កម្មវិធីព្រាងនិង​ថវិកា​សម្រាប់​អង្គការ​ILO​មុនពេល​ឈាន​ដល់​ការ​រៀប​ចំ​សន្និសីទ។

បន្ទាប់ពី​វិលត្រឡប់ពី​ទីក្រុង​ហ្សឺណែវ​វិញ​កាលព​ី​ថ្ងៃ​ច័ន្ទ លោក អុិត សំហេង រដ្ឋមន្ត្រី​ក្រសួង​ការ​ងារ​បាន​​​ចាត់​​​ទុក​​​ការទទួលបាន​អាសនៈ​នេះ​ ថា​ជា​កិត្តិ​យស​ដ៏ធំធេង​សម្រាប់​ប្រទេស​កម្ពុជា និងជា​ការ​ទទួល​ស្គាល់​ចំពោះ​កា​រ​ខិត​ខំប្រឹង​ប្រែង​របស់កម្ពុជា​​​អំពីការ​​​គោរព​​​សិទ្ធិរបស់​​​កម្មករ​។

លោក​បាន​ប្រាប់​អ្នក​យក​ព័ត៌មាន​នៅ​អាកាស​យាន​ដ្ឋាន​អន្តរជាតិ​ភ្នំពេញ​ថា ” ប្រទេស​នានាក្នុង​​ពិភព​លោក​បា​ន​ទទួល​ស្គាល់​ថា ប្រទេស​កម្ពុជា​មាន​លក្ខខណ្ឌ​ការ​ងារ​ល្អ​ប្រសើរ​ក្នុង​ពិភព​លោក​ទាក់​ទង​នឹង​សេរីភាព ការ​បណ្ដុះ​បណ្ដាល​វិជ្ជាជីវៈ​ សិទ្ធិ​ក្នុង​ការ​ធ្វើ​កូដ​កម្ម និ​ង​ការ​តវ៉ា និង​​ការ​សម្ដែង​មតិ​របស់​កម្មករ និង​សិទ្ធិក្នុងការ​ចរចា​ជាដើម។

លោក​បាន​បន្ថែ​ម​ថា ចំណុច​ទាំង​អស់​នេះ​ហើយ​​ធ្វើ​ឲ្យ​យើង​ទទួល​បាន​ការ​គាំទ្រ​ពី​បណ្ដា​ប្រទេស​ភាគ​ច្រើន​នៅ​ក្នុង​ពិភព​លោក​ដែល​បាន​បោះ​ឆ្នោត​គាំទ្រ​យើង​។ វា​ជាដំណឹង​ល្អ​សម្រាប់​ប្រទេស​ជាតិរបស់យើង កម្មករ និង​និយោជក”។ ប៉ុន្តែ យោបល់​របស់​លោករដ្ឋមន្ត្រី​ គឺ​ផ្ទុយ​ពីយោបល់​របស់​អង្គការ​សិទ្ធិ​មនុស្ស​អន្តរ​ជាតិ​​ និង​សហជីព​ឯករាជ្យ​ក្នុង​ស្រុក​មួយ​ចំនួន​។

ទើបតែ​​ខែមុននេះទេ​​​ដែល​សហព័ន្ធ​សហជីព​ម​អន្តរជាតិ​បាន​ចាត់​ទុក​​​ប្រទេស​កម្ពុជា​​ជា​ប្រទេសមួយ​ក្នុង​ចំណោម​ប្រទេស​ដែល​មាន​លក្ខខណ្ឌការ​ងារ​អន់​បំផុត​ក្នុង​ពិភព​លោក​​​នៅ​​​ក្នុង​​​ការ​​​ចាត់​​​ចំណាត់​ថ្នាក់​ប្រចាំ​ឆ្នាំ​របស់​ខ្លួន ដោយសារ​តែ​មិន​​​មានការ​​​គោរព​​សិទ្ធិកម្មករ​ និង​មាន​​​ការ​រំលោភ​បំពាន​ពី​សំណាក់​និយោជក​។

នៅ​សិក្ខា​សាលា​មួយ​ក្នុង​រាជ​ធានី​ភ្នំពេញកាលពី​ខែ​មុន អង្គការ​ ILO បាន​លើក​ឡើង​ថា សេចក្ដី​ព្រាង​ច្បាប់​​ចុងក្រោយ​​របស់​ក្រសួង​ការ​ងារ​ស្ដីពី​សហជីពគឺអន់​ជាង​សេចក្ដី​ព្រាង​ច្បាប់​កាលពីលើក​មុនទៅទៀត ហើយ​មិន​ស្របតាម​អនុសញ្ញា​អង្គការ​ ILO ដែល​ប្រទេស​នេះបាន​ឲ្យ​សច្ចាប័ន។

កាលពីខែ​មករា ក​ង​រាជ​អាវុធ​ហត្ថ​បាន​បង្ក្រាប​ការ​តវ៉ា​ទាម​ទារ​ដំឡើង​ប្រាក់​ខែ​របស់​កម្មករ​រោចក្រ​កាត់​ដេរ​ ដោយ​ការ​បាញ់​កាំភ្លើង​ចូល​ទៅ​ក្នុង​ក្រុម​មនុស្ស ​​ធ្វើ​ឲ្យ​កម្មករ​យ៉ាង​ហោច​ណាស់​​ប្រាំនាក់ស្លាប់ និង​ច្រើន​នាក់​ទៀតរងរបួស​។

ទោះ​​​បី​​​ជា​​​មិន​​​មាន​កង​រាជ​អាវុធ​ហត្ថ​ ឬមន្ត្រី​រដ្ឋាភិបាល​ណាម្នាក​់​ចេញមុខ​ទទួល​ខុស​ត្រូវ​​​ក៏​​​ដោយ ក៏​សកម្មជន​សហជីពនិង​កម្មករ​២៣​នាក់​ដែល​ត្រូវ​បាន​ចាប់​ខ្លួន​ពាក់​ព័ន្ធ​នឹង​ហេតុការ​ណ៍​នោះ​ ត្រូវ​បាន​ផ្ដន្ទា​ទោស​កាលពីពេល​ថ្មីៗ​នេះដែរ និង​​​បាន​​​ទទួល​​​ការ​ព្យួរ​ទោស​បន្ទាប់ពី​សវនាការ​កាត់​ក្ដី​មិន​​​ត្រឹម​​​ត្រូវ​​​ដែលត្រូវ​បាន​​មជ្ឈដ្ឋានទូទៅ​ចាត់​​​ទុកថា ជា​​​រឿង​នយោបាយ​។ មួយថ្ងៃ​បន្ទាប់ពីការ​បាញ់​បណ្ដាល​ឲ្យមនុស្ស​ស្លាប់​ រដ្ឋមន្ត្រី​ក្រសួង​មហាផ្ទៃ​ក៏បាន​ចេញ​បម្រាម​ហាម​ឃាត់​មិន​ឲ្យ​ធ្វើ​បាតុកម្ម ដែល​បម្រាម​នោះ​នៅជាធរមាន​នៅឡើយ​។

លោក ទុន សុភ័ណ្ឌ អ្នក​សម្របសម្រួល​ថ្នាក់​ជាតិ​របស់​អង្គការ​ ILO បាននិយាយ​ការ​ពារ​​តួនាទី​ថ្មី​របស់​កម្ពុជា​​​នៅ​​​ស្ថាប័ន​គ្រប់​គ្រង​នេះ។ លោក​បាន​មាន​ប្រសាសន៍ថា ” ប្រទេស​កម្ពុជា​មាន​បញ្ហា​ទាំង​​​នេះ ហើយ​ប្រទេស​ដទៃ​ទៀត​ក៏មាន​បញ្ហា​ដែរ…​មិនមែន​មានតែ​​កម្ពុជា​នោះទេ​”។ លោក​បាន​បន្ថែម​ថា ” ខ្ញុំគិត​ថា នៅពេលថ្មីៗ​នេះ​ប្រទេស​កម្ពុជា​មាន​ការ​វិវឌ្ឍ​គួរ​ឲ្យ​កត់​សម្គាល់​ ដោយ​លោកលើក​ឡើង​អំពី​សេចក្ដី​សម្រេច​របស់​តុលាការក្នុង​ការ​​ដោះ​លែង​មនុស្ស​២៣​នាក់​ ព្រាង​ច្បាប់​ស្តី​​​ពី​សហជីព​ ហើយ​រដ្ឋាភិបាល​ធ្វើការ​ជាមួយ​សហជីព​ ឧស្សាហកម្ម​កាត់​ដេរ និង​និយោជក​​​រិះ​រក​វិធី​ថ្មី​ៗ​ដើម្បី​កំណត់​ប្រាក់​ខែ​គោល​របស់​វិស័យ​នេះ​។

លោក អាត់ ធន់ មេដឹកនាំ​សហជីព​ឯករាជ​្យ​បាន​មាន​ប្រសាសន៍​ថា ប្រទេស​កម្ពុជាទំនង​ជា​ទទួល​បាន​ការ​គាំទ្រច្រើន​​ក្នុង​ចំណោម​ប្រទេស​ជា​សមាជិក​អង្គការ​ ILO ដោយ​​​សារ​​​មាន​​​ការ​​​គោរព​អនុសញ្ញា​ជា​ច្រើន​របស់​អង្គការ​ ILO ដែល​ខ្លួន​បាន​ចុះ​ហត្ថលេខា។ លោក​បាន​បន្ថែម​ថា តួនាទី​ថ្មី​របស់​កម្ពុជា​នៅ​​​ស្ថាប័ន​គ្រប់​គ្រង​នេះ​អាច​ជំរុញ​ឲ្យ​រដ្ឋាភិបា​ល​ធ្វើការ​ងារ​កាន់​តែ​ល្អ​ប្រសើរ​ក្នុង​​​ការ​អនុវត្ត​​​អនុសញ្ញា​​​ទាំង​​​នេះ​។

ទោះជាយ៉ាងណា​ លោក ប៉ាវ ស៊ីណា មេដឹកនា​ំ​សហជីព​បាន​មាន​ប្រសាសន៍​ថា ប្រទេស​កម្ពុជា​មិន​សម​នឹង​​​អាសនៈ​នេះទេ ហើយ​លោក​បារម្ភ​ថា រដ្ឋា​ភិបាល​អាច​ប្រើ​ប្រាស់​វាដើម្បី​ប្រឆាំង​សហជីព​។ លោក​បានមាន​ប្រសាសន៍​ថា ” កម្មករ​ និង​សហជីព​មាន​បញ្ហា​ច្រើន​ដែល​មិន​ទាន់​ត្រូវ​បាន​ដោះ​ស្រាយ​នៅ​ឡើយ រួមមាន​ការ​ចាប់​ខ្លួន​ និង​ការ​សម្លាប់​កម្មករ​ ការ​គំរាម​កំហែង​​សហជីព​ និ​ង​ការ​បណ្តេញ​​​កម្មករ​​​ចេញ​​​ពី​​​ការងារ​ជាដើម​”។ លោក​បាន​បន្ថែម​ថា “​នៅពេល​កម្ពុជា​ក្លាយ​ជា​សមាជិក​នៃ​ស្ថាប័ន​គ្រប់​គ្រង​នេះ វា​ជា​ការ​ងាយ​ស្រួល​សម្រាប់​រដ្ឋាភិបាល​កម្ពុជា​ក្នុង​ដាក់​សម្ពាធ​ឲ្យ​អង្គកា​រ​ ILO ធ្វើ​តាម​អ្វី​ដែល​ខ្លួន​ចង់​បាន​៕ សារុន​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស