កាលពីម្សិលមិញ សាលារាជធានីភ្នំពេញបានផ្អាកយុទ្ធនាការបោសសម្អាតអ្នកលក់ដូរ និងអ្នកសុំទាននៅតាមផ្លូវក្នុងរាជធានី ហើយបានលើកឡើងថា គម្រោងនេះនឹងមិនបន្តទៀតទេរហូតដល់ខ្លួនមានផែនការច្បាស់លាស់ក្នុងការផ្តល់ទីកន្លែងស្នាក់នៅសម្រាប់មនុស្សដែលត្រូវបានប្រមូលចាប់ទាំងនោះ។
កាលពីថ្ងៃច័ន្ទ សាលារាជធានីភ្នំពេញបានឲ្យដឹងថា ខ្លួននឹងប្រមូលចាប់អ្នកសុំទានយកទៅឲ្យរៀនមុខវិជ្ជាជីវៈ ប៉ុន្តែការភាន់ច្រឡំរវាងសាលារាជធានី និងអង្គការចំនួនពីរដែលបានព្រមព្រៀងជួយមនុស្សដែលត្រូវបានប្រមូលចាប់ទាំងនោះ បាននាំឲ្យមានការអាក់ខានកម្មវិធីនេះភ្លាមៗតែម្តង។
អង្គការក្រៅរដ្ឋាភិបាលទាំងពីរគឺអង្គការដើម្បីភាពញញឹមនៃកុមារ និងអង្គការមិត្តសំឡាញ់ បានយល់ព្រមជាមួយសាលារាជធានីដោយជឿថា ពួកគេអាចជួយដល់កិច្ចការជាប្រចាំ និងជួយរកដំណោះស្រាយជាលក្ខណៈបុគ្គលដល់អ្នកសុំទាននៅក្នុងទីក្រុង។
ផ្ទុយទៅវិញស្ត្រី កុមារ និងមនុស្សចាស់ត្រូវបានប្រមូលចាប់ដាក់រថយន្តទ្រុង ហើយដឹកយកទៅដាក់នៅអង្គការដើម្បីភាពញញឹមនៃកុមារ ដែលកាលពីយប់ថ្ងៃពុធបានស្នើឲ្យមានកិច្ចប្រជុំជាមួយមន្ត្រីសាលារាជធានី ដើម្បីសម្តែងការមិនពេញចិត្តរបស់ខ្លួន។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា ” ពិតមែនហើយ យើងបានធ្វើការពិភាក្សាតូចមួយជាមួយអង្គការជាដៃគូដើម្បីរិះរកវិធីអនុវត្តបទបញ្ជាបោសសម្អាតអ្នកលក់ដូរ និងអ្នកសុំទានតាមផ្លូវឲ្យបានជោគជ័យ”។ “ការប្រមូលចាប់នេះត្រូវបានផ្អាកជាបណ្តោះអាសន្នរហូតដល់មានកិច្ចប្រជុំធំមួយដើម្បីបង្កើតផែនការសកម្មភាពសម្រាប់ផ្តល់ជម្រើសឲ្យពួកគេ ដើម្បីធ្វើឲ្យពួកគេចាកចេញពីផ្លូវ។
លោក ពិន សារពេជ្រ ប្រធានកម្មវិធីអង្គការដើម្បីភាពញញឹមនៃកុមារបានមានប្រសាសន៍ថា លោកបានស្នើឲ្យមានកិច្ចប្រជុំ បន្ទាប់ពីមានចលាចលពីរថ្ងៃ ដែលក្រុមមន្ត្រីបានធ្វើឲ្យពួកគេភ័យខ្លាចរត់លាក់ខ្លួន ដោយធ្វើឲ្យបាត់បង់ការងារដែលខ្លួនបានធ្វើជាមួយមនុស្សនៅតាមផ្លូវទាំងនេះ។ លោកបានមានប្រសាសន៍ថា វិធីសាស្ត្រនៃការប្រមូលចាប់មនុស្សរបស់សាលារាជធានីមិនស្របតាមគោលបំណងរបស់អង្គការនេះទេ។
លោក សារពេជ្រ បានមានប្រសាសន៍ថា “នៅថ្ងៃទាំងពីរនោះយើងមិនដឹងថា មានអ្វីកើតឡើងទេ។ ពួកគេបាននាំកុមារដែលពួកគេប្រមូលចាប់បានមួយចំនួនមកឲ្យយើង ប៉ុន្តែ កុមារមួយចំនួនមានផ្ទះ និងឪពុកម្តាយ។ ដូច្នេះហើយបានជាយើងត្រូវការនិយាយជាមួយមនុស្សទាំងនោះ។ ការប្រមូលចាប់នេះគ្រាន់តែធ្វើឲ្យពួកគេភ័យខ្លាចប៉ុណ្ណោះ”។
ប្អូនប្រុស ចាន់ សុផេង អាយុ១៤ឆ្នាំដែលលក់កម្រងផ្កាម្លិះនៅតាមមហាវិថីព្រះមុនីវង្សត្រូវបានអាជ្ញាធររាជធានីចាប់អំឡុងការធ្វើយុទ្ធនាការពីរថ្ងៃនេះ។ ប្អូនបាននិយាយថា ខ្ញុំបានចំណាយពេលពីរបីម៉ោងជិះរថយន្តទ្រុងកាត់ទីក្រុង ពីរបីម៉ោងនៅអង្គការដើម្បីភាពញញឹមនៃកុមារ និងក្រោយមកត្រូវបាននាំទៅជួបឪពុកម្តាយនៅផ្ទះរបស់យើង។
កាលពីម្សិលមិញ ប្អូនប្រុសរូបនេះបានត្រឡប់មកកាន់ផ្លូវបំបែកដ៏មមាញឹកនៅតាមមហាវិថីព្រះមុនីវង្សនេះវិញ ដោយដើរលក់ផ្កាម្តងទៀត។
ប្អូនប្រុសបាននិយាយថា “គេបានចាប់ខ្ញុំនៅកន្លែងភ្លើងស្តុបកាលពីថ្ងៃអង្គារ ហើយក្រោយមកបាននាំខ្ញុំត្រឡប់ទៅជួបឪពុកម្តាយរបស់ខ្ញុំនៅផ្ទះជួលក្នុងខណ្ឌទួលគោកនៅថ្ងៃដដែល។ នៅថ្ងៃនេះខ្ញុំមិនឃើញមានរថយន្តមកចាប់មនុស្សទៀតទេ។ ម្តាយខ្ញុំបានសម្រេចឲ្យខ្ញុំមកលក់ផ្កានៅទីនេះ ពីព្រោះវាមិនមានអ្នកលក់ច្រើនដូចនៅកន្លែងផ្សេង”៕គឹមហឿន