ធនាគារ​កាណាឌីយ៉ា​ស៊ើបអង្កេត​អំពីលុយ​ក្រដាស១០០ដុល្លារ​ក្លែង​ក្លាយ

កាល​ពីម្សិលមិញ​ធនាគារ​កាណាឌីយ៉ា​បាន​ឲ្យដឹង​ថា ខ្លួន​កំពុង​ស៊ើបអង្កេត​ថាតើ​គេ​បើក​ក្រដាស​១០០ដុល្លារ​​ក្លែង​ក្លាយ​ពីរ​សន្លឹក​ទៅឲ្យ​អតិថិជន​​ដែលមក​​បើកលុយ​​តាម​មូលប្បទាន​បត្រដោយ​របៀបណា។

ក្រដាស​​ប្រាក់​១០០​ដុល្លារ​ក្លែង​ក្លាយ​ខាង​លើ​ "លុយ​ខ្មោច​” ដែល​តាម​ទំនៀម​ទម្លាប់ចិន​ត្រូវ​គេ​​​ដុត​អំឡុ​ង​ពិធី​សាស​នា​​​ ខាង​ក្រោម​ជា​ក្រដាស​​ប្រាក់​ពិត​ប្រាកដ​។ ​ស៊ីវ​ ចាន់​ណា/ ខេមបូឌា​ ដេលី
ក្រដាស​​ប្រាក់​១០០​ដុល្លារ​ក្លែង​ក្លាយ​ខាង​លើ​ជា “លុយ​ខ្មោច​” ដែល​តាម​ទំនៀម​ទម្លាប់ចិន​ត្រូវ​គេ​​​ដុត​អំឡុ​ង​ពិធី​សាស​នា​​​ ខាង​ក្រោម​ជា​ក្រដាស​​ប្រាក់​ពិត​ប្រាកដ​។ ​ស៊ីវ​ ចាន់​ណា/ ខេមបូឌា​ ដេលី

អតិថិជន​ឈ្មោះ អៀម សុភាព ជា​អ្នក​គ្រប់​គ្រងធន​ធាន​មនុស្ស​នៅ​កាសែត ខេមបូឌា ដេលី បាន​មាន​ប្រសាសន៍​ថា លោក​ទទួល​បាន​ក្រដាស​​ប្រាក់​១០០​ដុល្លារ​ក្លែង​ក្លាយពី​រ​សន្លឹក​ពី​បេឡាករ​ម្នាក់​នៅ​ធនាគារ​កាណាឌីយ៉ាសាខាវិមាន​ឯករាជ្យ​​ ស្ថិត​នៅ​តាម​បណ្ដោយ​មហាវិថី​ព្រះ​នរោត្តម​ នៅពេល​ដែល​លោក​មក​បើក​ប្រាក់​តាម​មូលប្បទាន​បត្រ​ចំនួន​២៨៥​ដុល្លារ​។

លោក សុភាព មិន​បានចាប់អារម្មណ៍​ថា ក្រដាស​ប្រាក់នោះ​ក្លែង​ក្លាយ​ទេ លុះ​ពេលលោក​យក​ទៅ​បង់​នៅ​ក្រុម​ហ៊ុន​ទេសចរណ៍​ក្នុង​ស្រុក​មួយ​ក្នុង​រយៈ​ពេល​៣០​នាទី​​បន្ទាប់ពីការ​​ដក​ប្រាក់ទើប​លោក​ដឹង​។ លោក​បាន​មាន​ប្រសាសន៍​ថា “ពួកគេ​បាន​និយាយ​ថា វាជា​​លុយក្លែង​ក្លាយ​ មិន​មែន​ជា​លុយពិត​ឡើយ​”។

អ្នកស្រី ងួន វណ្ណីដា បុគ្គលិក​នៅ​ក្រុម​ហ៊ុន​អង្គរ​ខេមប្រ៊ូ ដែល​លោក​ សុភាព បានយក​ប្រាក់​ទៅបង​់​នោះ បាន​និយាយ​ថា អ្នកស្រី​សង្កេត​ឃើញបញ្ហាខុសប្រក្រតីភ្លាមៗ​។ អ្នកស្រី​​បាន​និយាយ​ថា ” គាត់​បាន​ឲ្យ​លុយនោះ​មក​ខ្ញុំ​ ហើយ​ខ្ញុំ​បាន​កាន់​វា​ ហើយ​លុយនោះដូច​ជា​ចម្លែក។ បន្ទាប់​មក​ខ្ញុំបាន​យក​ទៅជូន​ចៅហ្វាយ​របស់​ខ្ញុំដែល​បាន​និយាយ​ថា “វា​មើល​ទៅ​ដូច​​ក្រដាស​អ៊ីចឹង វា​មិន​មែន​ជា​ក្រដាស​ប្រាក់​ឡើយ”។

លោក សុភាព​ បាន​មាន​ប្រសាសន៍​ថា ” បន្ទាប់​មក​ លោក​បាន​ត្រឡប់​ទៅ​ធនាគារ​វិញ​ប្រាប់​បេឡាករ​នោះពី​ក្រដាស​ប្រាក់​ក្លែង​ក្លាយ ប៉ុន្តែត្រូវ​​គេ​​ប្រាប់​ថា មិន​អាច​ជួយ​បាន​ទេ​។ លោក​បាន​មាន​ប្រសាសន៍​ថា ” បេឡាកររូប​នោះ​បាន​និយាយ​ថា អ្នកស្រី​មិន​អាច​ជួយ​បាន​ទេ។ អ្នកស្រី​បាននិយាយ​ថា វាជា​កំហុស​របស់​ខ្ញុំ​ដែលមិន​​ពិនិត្យ​មើល​លុយនោះ​។

ក្រដាស​ប្រាក់​១០០​ដុល្លារ​ពីរ​សន្លឹក ដែល​គេ​ហៅថា “លុយ​ខ្មោច​”ដែលតាម​ទំនៀមទម្លាប់ត្រូវ​គេ​​​ដុត​អំឡុ​ង​ពិធីសាសនា​។ ក្រដាស​ប្រាក់​ទាំង​នេះ​មើលទៅ​ដូច​ក្រដាស​ប្រាក់​១០០​ដុល្លារ​បេះបិទ ហើយ​មាន​ខ្សែសយ​ពណ៌​ស្វាយ​ ប៉ុន្តែ​មាន​ភាព​ខុស​គ្នា​ច្បាស់​ក្រឡែតគឺ​ក្រដាស​ប្រាក់​ក្លែ​ង​ក្លាយ​មាន​សរសេរ​ពាក្យថា ” Hell Note” នៅ​​ខាង​ខ្នង ហើយ​ផ្ទៃវា​រលោង​​ជាង​ក្រដាសប្រាក់ពិត ហើយ​ក្រដាសប្រាក់នេះ​មាន​ស្នាមដាចនៅ​ត្រង់ជ្រុង។

នៅ​ក្នុង​សេចក្ដីថ្លែងការ​ណ៍ដែលបាន​បញ្ជូនដោយ​លោក​ ថមមី ប៊ូគ្រីស (Tommy Boukhris) អ្នក​គ្រប់​គ្រងគម្រោង​​នៅ​​ការិយាល័យ​របស់​លោក​ ម៉ៃឃើល ឡ (Michael Lor) នាយក​ប្រតិបត្តិ​ធនាគារ​ កាណាឌីយ៉ា ធនាគារ​កាណាឌីយ៉ា​​លើក​ឡើង​ថា ធនាគារ​មាន​ប្រព័ន្ធ​គ្រប់​គ្រង​ច្បាស់​លាស់​ ដូច្នេះ​នៅ​ក្នុង​ប្រតិបត្តិការ​របស់​យើង​ យើង​អាច​ត្រួត​ពិនិត្យ​ប្រកប​ដោយ​ប្រសិទ្ធភាព​ និង​ដោះ​ស្រាយ​ភាព​ខុស​ប្លែក និង​ខុស​ប្រក្រតី​ភ្លាមៗ​ទាក់​ទង​នឹង​ប្រាក់​”។

ទាក់​ទង​ករណី​លុយក្លែង​ក្លាយ​កាលពី​ម្សិលមិញ​នេះ ធនាគារ​កាណាឌីយ៉ា​លើក​ឡើង​ថា យើង​មិន​អាច​អត្ថាធិប្បាយ​ ឬ​បញ្ជាក់អំព​ី​បញ្ហា​នេះ​បាន​ទេ លុះណា​តែយើង​ធ្វើការ​ស៊ើប​អង្កេត​ឲ្យ​បាន​ត្រឹម​ត្រូវ​សិន”។

អតិថិជន​ធនាគារ​កាណាឌីយ៉ា​ប្រាំមួយនាក់​បាន​និយាយ​កាលពីម្សិលមិញ​ថា ពួកគេ​មិន​ដឹង​ថា​​​មាន​បញ្ហា​ស្រដៀង​គ្នា​នេះទេ ប៉ុន្តែ​បាន​បន្ថែម​ថា ពួកគេ​កម្រ​ពិនិត្យ​មើល​ ឬរាប់​លុយ​បន្ទាប់ពី​ដក​ពីធនាគារ​ តាម​បេឡាករ ឬម៉ាស៊ីន​អេធីអឹម​ណាស់​ ពីព្រោះ​ពួកគេ​ទុកចិត្ត​ថា វា​ជា​ក្រដាស​ប្រាក់ពិត​។

ពុធ ង៉ោ អាយុ​៤៨​ឆ្នាំ​បាន​និយាយ​ថា “ខ្ញុំ​បាន​ដក​ប្រាក់​មួយ​ចំនួន​ពី​ធនាគារ​នេះ ហើយ​ខ្ញុំមិនទាន់ដឹង​ថា តើ​វា​ជាលុយពិត​ឬក៏ក្លែង​ក្លាយនៅ​ឡើយទេ​។ ប៉ុន្តែ​ខ្ញុំ​នឹង​ពិនិត្យ​នៅពេល​ក្រោយ ពីព្រោះ​ខ្ញុំ​មិនដែលធ្លាប់​ឮថាមាន​​បញ្ហា​បែប​នេះ​កើត​ឡើង​ពីមុន​មក​នៅ​ធនាគារ​កាណាឌីយ៉ា​ឡើយ​”។

លោក សុភាព បា​ន​មាន​ប្រសាសន៍​ថា លោក​បន្ទោស​ខ្លួន​ឯងដែលខ្វះការ​​ប្រុង​ប្រយ័ត្ន​។ លោក​បាន​មាន​ប្រសាសន៍​ថា ” នេះ​ជា​កំហុស​របស់​ខ្ញុំ​ ពីព្រោះ​ខ្ញុំទុកចិត្តធនាគារ​”៕ សារុន​​​​​​​​​​

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.