31 C
Phnom Penh

​កម្មករ​ចំណាក​ស្រុក​ជាច្រើន​ឆ្លង​ព្រំដែន​ ខណៈដែល​កម្មករ​ប្រាំបួន​នាក់​ត្រូវ​គេ​សម្លាប់​នៅ​ថៃ​

ដោយ ឌឹ ខេមបូឌា ដេលី

បទវិភាគ

យោងតាម​អភិបាល​ក្រុង​ប៉ោយ​ប៉ែត​បាន​ឲ្យ​ដឹង​ថា ខណៈដែល​កម្មករ​ចំណាក​ស្រុក​​ប្រហែល​១០.០០០​នាក់​ទៀតបាន​ឆ្លង​ដែន​ពី​ប្រទេស​ថៃ​កាលពីម្សិលមិញ លោក​នាយក​រដ្ឋ​មន្ត្រី​ ហ៊ុន សែន បាន​បញ្ជា​ឲ្យ​យក​រថយន្ត​យោធា​១៥០​គ្រឿង​ដើម្បី​ដឹក​ពួកគេ​ទៅ​ស្រុក​កំណើត​វិញ។

កម្មករ​ចំណាក​ស្រុក​​ត្រូវ​បាន​អាជ្ញាធរ​ថៃ​ចាប់​បញ្ជួន​ស្រុកកំណើត​វិញ​តាម​ច្រក​ព្រំដែន​អន្តរជាតិ​ប៉ោយ​ប៉ែត​កាលពី​ម្សិល​មិញ​ ។ ស៊ុម ចាន់គា/អាដ​ហុក
កម្មករ​ចំណាក​ស្រុក​​ត្រូវ​បាន​អាជ្ញាធរ​ថៃ​ចាប់​បញ្ជួន​មកស្រុកកំណើត​វិញ​តាម​ច្រក​ព្រំដែន​អន្តរជាតិ​ប៉ោយ​ប៉ែត​កាលពី​ម្សិល​មិញ​ ។ ស៊ុម ចាន់គា/អាដ​ហុក

ក្នុង​ពេល​ជាមួយ​គ្នា​នេះ​ អង្គការ​សិទ្ធិមនុស្ស​មួយ​បា​ន​រាយការណ៍​ថា កម្មករ​ខ្មែរ​ដល់​ទៅ​ប្រាំបួន​នាក់​ប្រហែល​ត្រូវ​បានសម្លាប់​ អំឡុង​ការ​ឆ្មក់​ចាប់​ដោយ​របប​យោធាថៃ​ ដែល​នៅ​សប្ដាហ៍នេះ​បាន​ចាប់​ផ្ដើម​បញ្ជូន​កម្មករ​ចំណាក​ស្រុក​ខុស​ច្បាប់​យ៉ាង​ច្រើន​ចេញពី​ប្រទេស​ ដោយ​កៀង​ប្រមូល​ពួកគេ និង​ញាត់​ពួកគេ​ចូល​រថយន្ត​ទ្រុង​ ហើយ​បើក​មក​ព្រំដែន​។

លោក ង៉ោ ម៉េង​ជ្រុន អភិបាល​​ក្រុង​ប៉ោយ​ប៉ែត បាន​មាន​ប្រសាសន៍​ថា អាជ្ញាធរ​ខ្មែរ​មាន​ការ​ភ្ញាក់​ផ្អើល​ដោយសារ​​​មាន​កម្មករ​ចំណាក​ស្រុក​ដ៏ច្រើន​ត្រឡប់​មក​ប្រទេស​វិញ។ លោក​បាន​មាន​ប្រសាសន៍​ថា “កម្លាំង​របស់​យើង​កំពុង​ត្រៀមជួយ​កម្មករ​ចំណាក​ស្រុក​របស់​យើង​ ប៉ុន្តែ​ថ្ងៃ​នេះ​កម្មករ​ចំណាក​ស្រុក​ច្រើន​ណាស់​ត្រូវ​បាន​គេ​បញ្ជូន​ឆ្លង​ច្រក​ព្រំដែន​អន្តរជាតិ​ប៉ោយ​ប៉ែត​។ ឥឡូវ​លោក​នាយក​រដ្ឋមន្ត្រី​ ហ៊ុន សែន បាន​បញ្ជា​ឲ្យ​បញ្ជូន​រថយន្ត​យោធា​១៥០​គ្រឿង​ទៅ​ជួយ​ដឹក​កម្មករ​ចំណាក​ស្រុក​របស់​យើង​”។

លោក​ ម៉េងជ្រុន បាន​ប្រមាណ​ថា កម្មករ​យ៉ាង​ហោច​ណាស់​១០.០០០​នាក់​បាន​មកដល់​តែ​មួយ​​ថ្ងៃ​ម្សិលមិញ។ អាជ្ញាធរ​ខេត្ត​បាន​ផ្ដល់​រថយន្ត​ក្រុង​២០​គ្រឿង​ជួយ​ដឹក​កម្មករ​ត្រឡប់​ទៅ​ស្រុក​វិញ ហើយ​កំពុង​ចែក​ចាយ​អាហារ​ និង​ទឹក​។ លោក​បា​ន​និយាយ​ថា ” កម្លាំង​របស់​យើង​ទាំងអស់​មមា​ញឹក​ណាស់​ក្នុង​ការ​ជួយ​ពួកគេ​”។

អង្គការសិទ្ធិមនុស្ស​អាដ​ហុក​បាន​ឲ្យ​ដឹង​កាលពីម្សិលមិញ​ថា មាន​សេចក្ដី​រាយការណ៍​ជា​​ច្រើន​ថា កម្មករ​ចំណាក​ស្រុក​ដល់​ទៅ​ប្រាំបួន​នាក់​ត្រូវ​បាន​ទាហាន​ថៃ​សម្លាប់​ ហើយ​កម្មករ​យ៉ាង​ហោច​ណាស​​់​ម្នាក​់ទៀត​ តាម​សេចក្ដី​រាយការណ៍​ថា ត្រូវ​បានគេ​វាយ​ធ្វើ​បាប​។ សេចក្ដីថ្លែង​ការណ៍​មួយ​ពី​អង្គការ​អាដ​ហុក​បាន​ឲ្យ​ដឹង​ថា ” អ្នក​ត្រឡប់​មក​វិញ បា​ន​រាយ​ការណ៍​អំពី​ការ​ឆ្មក់​ចូល​ចាប់​ដ៏ហិង្សា​តាម​ផ្ទះ​ដែល​ជន​អន្តោ​ប្រវេសន៍​ខុស​ច្បាប់​ត្រូវ​គេ​សង្ស័យ​ថាស្នាក់​នៅ​ និង​ការ​ហែក​ឯកសារដែល​ពល​រដ្ឋខ្មែរ​ទទួល​បាន​ ដើម្បីធ្វើការ​ដោយ​ស្រប​ច្បាប់​នៅ​ប្រទេស​ថៃ​”។

លោក​ ស៊ុម ចាន់គា អ្នក​សម្រប​សម្រួល​របស់​អង្គការ​អាដ​ហុក​នៅ​ខេត្ត​បន្ទាយ​មាន​ជ័យ បាន​និយាយ​ថា លោក​បាន​និយាយ​ទៅកាន់​កម្មក​រ​ជា​ច្រើន​ដែល​បាន​និយាយ​ថា ពួកគេ​ត្រូវ​បាន​គេ​បាញ់​ និង​បាន​ឃើញ​អ្នក​ផ្សេង​ទៀត​ត្រូវ​គេ​សម្លាប់​ផ្ទាល់​ភ្នែក​។ លោក​បាន​មាន​ប្រសាសន៍​ថា ក្នុង​ករណី​មួយ​នោះ​ ស្ត្រីពីរ​នាក់​ត្រូវ​បាន​គេ​បាញ់​ស្លាប់​បន្ទាប់​ពីពួកគាត់​ព្យាយាម​ដណ្ដើម​មកវិញ​នូវ​ឯកសារ​ធ្វើការ​ស្រប​ច្បាប់​ ដែល​ពួក​ទាហាន​បាន​ហែក​ចោល​។ លោក​បាន​ឲ្យ​ដឹង​ទៀត​ថា ” ឥឡូវ​នេះ​យើង​កំពុង​ស៊ើប​អង្កេត​ករណីទាំង​នេះ​”។

យោង​តាម​ក្រុម​មន្ត្រី​នៅ​ច្រក​ព្រំដែន​ប៉ោយ​ប៉ែត​បាន​ឲ្យ​ដឹង​ថា កាលពីថ្ងៃ​អង្គារ កម្មករ​ចំណាក​ស្រុក​ច្រើន​ជាង​៦.៥០០​នាក់​បាន​ឆ្លង​កាត់​ច្រក​អន្តរជាតិ​ប៉ោយ​ប៉ែត ហើយ​ជិត​៧.៧០០​នាក់​បាន​មក​ដល់​នៅ​ថ្ងៃបន្ទាប់​។ ចំនួន​នេះ​ផ្ទុយ​គ្នា​ជា​ខ្លាំង​ទៅនឹង​ចំនួន​ផ្ដល់​ដោយ​ក្រសួង​ការ​បរទេស​ ដែល​បាន​ឲ្យ​ដឹង​កាលពីថ្ងៃពុធ​ថា កម្មករ​៧.៥០៧​នាក់​បាន​មក​ដល់​នៅ​ចន្លោះ​ថ្ងៃ​ទី១ និងថ្ងៃច័ន្ទ ខែ​មិថុនា​នេះ។

លោក​មេឃុំ​ ផង់ សំអាត បាន​មាន​ប្រសាសន៍​ថា កម្មករ​៦០០​នាក់​ទៀត​បាន​មក​ដល់​ច្រក​ព្រំដែន​អន្តរជាតិ​អូរស្មាច់​ ក្នុ​ង​ខេត្ត​ឧត្តរមានជ័យ។ មន្ត្រី​ខេត្ត​ និង​កាក​បាទ​ក្រហម​កម្ពុជា​នៅ​ទីនោះ​ បាន​ជួយ​ក្នុង​ការ​ដឹក​ជញ្ជូន​កម្មករ​ទៅ​ស្រុក​វិញ​។

​នាយ​នគរ​បាល​ប៉ុស្តិ៍​ព្រំដែន លោក អ៊ុំ ករុណា បាន​និយាយ​ថា នៅ​ច្រក​អន្តរជាតិ​ព្រំ ក្នុង​ខេត្ត​ប៉ៃលិន កម្មករ​៧៧២​នាក់​បាន​ត្រឡប់​មក​វិញ​ ដែល​ចំនួន​នេះ​បាន​កើន​ឡើង​បីដង​ពី​មួយ​ថ្ងៃមុន​នេះ​។

យោងតាម​វរសេនីយ៍​ឯក ឈុន លុន​ ប្រធាន​ការិយាល័យ​ទំនាក​់ទំនង​ព្រំដែន​បាន​ឲ្យ​ដឹង​ថា កម្មករ​ចំណាក​ស្រុក​៧៦០​នាក់​ផ្សេង​ទៀត​បាន​ធ្វើ​ដំណើរ​មក​ដល់​​ច្រកព្រំដែន​អន្តរជាតិ​ភ្នំ​ដី​ ក្នុង​ខេត្ត​បាត់​ដំបង ធ្វើ​ឲ្យ​ចំនួន​សរុប​រយៈពេល​បីថ្ងៃ​ឡើង​ដល់​ច្រើនជាង​៣.០០០​នាក់​។

លោក​បា​ន​មាន​ប្រសាសន៍​ថា ” យោងតាម​កម្មករ​ចំណាក​ស្រុ​ក​បាន​ឲ្យ​ដឹង​ថា ពួកគេ​ត្រូវ​ពួក​ទាហាន​ថៃ​ចាប់​ខ្លួន​ ដោយ​សារ​ច្បាប់​អាជ្ញាសឹក​។ [ក្រុ​ម​យោធា​កាន់អំណាច​] បាន​បញ្ជា​ឲ្យ​ម្ចាស់​ហាង​ទាំងអស់​ឈប់​ប្រើ​កម្មករ​ចំណាក​ស្រុក​ខុស​ច្បាប់​ ដូច្នេះ​ហើយ​កម្មករ​ចំណាក​ស្រុក​របស់​យើង​គ្មាន​កា​រងារ​ធ្វើ​ទេ ហើយ​ពួកគេ​ត្រូវបាន​​ទាហាន​ថៃ​ចាប់​ខ្លួន​បញ្ជូន​មក​បន្ទាយ​ទាហាន​មុនពេល​បណ្ដេញ​ចេញ​”។

លោក អាន ប៊ុនហាក់ ប្រធាន​ក្រុមហ៊ុន​ជ្រើស​រើស​ពល​ករ​ Top Manpower និង​ជា​អតីត​​ប្រធាន​សមាគម​នៃ​ទីភ្នាក់​ងារ​ជ្រើស​រើស​ពល​ករ​ខ្មែរ​ បាន​រិះគន់​ការ​ចាប់​ប្រមូល​បញ្ជូន​ចេញ​នេះ​ ដោយ​លោក​បាន​និយាយ​ថា វា​បាន​ធ្វើ​ឡើង​ដោយ​គ្មាន​ការ​ព្រមាន​ ហើយ​ធ្វើ​ឲ្យ​រដ្ឋាភិបាល​គ្មា​នពេល​ត្រៀម​ជាមុន​។ លោក​បាន​មាន​ប្រសាសន៍ថា ” យើង​សោក​ស្ដាយ​ណាស់​ ដែល​របប​យោធា​ធ្វើ​ភ្លាមៗ​ដូច្នេះ​…​រដ្ឋាភិបាល​របស់​យើង​ពិបាក​ជួយ​ពួកគេ​ណាស់​”។ ប៉ុន្តែ​លោក​បាន​ទទួល​ស្គាល់​ថា ​មិនមែន​​​មនុស្សទាំង​​​អស់​​​​សុទ្ធ​​​តែ​​​មិន​ចូល​ចិត្ត​​​ការ​​​ប្រមូល​​​ចាប់​​​កម្មករ​​​ឲ្យ​​​ត្រឡប់​​​មក​​​វិញ​​​នេះទេ​។ លោក​បាន​និយាយ​ថា ” ខ្ញុំបាន​ជួប​ម្ចាស់​រោងចក្រ​មួយ​ចំនួន​ដែល​ប្រើ​កម្មករ​ចំណាក​ស្រុក​ស្រប​ច្បាប់​ ពួកគេ​បា​ន​គាំទ្រ​សកម្មភាព​របស់​ក្រុម​យោធា​”។

លោក សាល ភាព អាយុ​១៩​ឆ្នាំ​ បាន​ធ្វើការ​នៅ​ភោជនីយដ្ឋានមួយ​កន្លែង​អស់រយៈពេល​១​ឆ្នាំ ពេល​ទាហាន​ចូល​ឆែក​ឆេរ​នៅ​ដើម​សប្ដាហ៍នេះ​ ដើម្បី​ប្រមូល​ជន​អន្តោ​ប្រវេសន៍​ខុស​​ច្បាប់​។ ជាអ្នក​និយាយ​ភាសា​ថៃ​រអិល​ លោក ភាព បាន​គេច​ពីពួកគេ​យ៉ាង​ងាយ​មួយ​រយៈ​ពេលខ្លី​ ទម្រាំ​ពួកគេ​រក​ឃើញ​ថា គាត់​គ្មា​ន​កាតសម្គាល់​ខ្លួន​។ លោក​បាន​និយាយ​ថា ” ពួកគេ​ចាប់​យើង​ទាំង​អស់​គ្នា​ ហើយ​អូស​យើង​ចូល​តំបន់​ដ៏ធំមួយ​ បន្ទាប់​មក​ពួកគេ​បង្ខំ​យើង​ឲ្យ​ឡើង​ឡាន​”។ ក្រុម​ដែល​ត្រូវ​គេ​ចាប់​​​នេះ​ចែក​ចេញជាពីរ អ្នកដែល​មាន​លុយ​សូក​ក្រុម​មន្ត្រី​ ត្រូវ​គេ​ដឹក​ចេញ​ភ្លាម​។ អ្នក​ដែល​នៅ​សល់​ត្រូវ​រង់ចាំ​យ៉ាង​តិច​កន្លះ​ថ្ងៃ​៕ មានិត​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស