29 C
Phnom Penh

ព្រះសង្ឃនិង​អ្នកភូមិ​ត​វ៉ា​​ចំពោះ​ការ​រំលោភយកដី​វត្ត​ទៅសាងសង់​លំនៅដ្ឋានសម្រាប់លក់

ដោយ ឌឹ ខេមបូឌា ដេលី

បទវិភាគ

ព្រះសង្ឃនិង​អ្នកភូមិ​ប្រហែល៤០០អង្គ-នាក់បានធ្វើការ​តវ៉ាកាល​ពី​ម្សិលមិញនៅ​ខាងក្រៅ​វត​្ត​កោះពោធិវង្ស ស្ថិត​ក្នុង​ខណ្ឌសែនសុខ រាជធានី​ភ្នំពេញចំពោះអ្វីដែល​ព្រះសង្ឃនិង​អ្នកភូមិ​លើក​ឡើងថា ក្រុមហ៊ុន​អចលនទ្រព្យ​មួយ​បាន​រំលោភយក​ដី​វត្ត​ រួមទាំង​កោះ​មួយ​ដែលព្រះ​សង្ឃ​ចាត​់​ទុកជា​កន្លែង​ស័ក្តិសិទ្ធិ។

អ្នក​តវ៉ាម្នាក់​កំពុង​វៃ​កម្ទេច​របង​អាគារមួយ​កន្លែង​ ដែល​ក្រុមហ៊ុន​អចលនទ្រព្យ​បាន​រំលោភ​លើ​​ដី​វត្ត​ស្ថិត​ក្នុង​ខណ្ឌសែនសុខ រាជធានី​ភ្នំពេញ កាល​ពី​ម្សិល​មិញ​​ ។​ ម៉ិច ដារ៉ា​/ខេមបូឌា ដេលី​
អ្នក​តវ៉ាម្នាក់​កំពុង​វាយកម្ទេច​របង​អាគារមួយ​កន្លែង​ ដែល​ក្រុមហ៊ុន​អចលនទ្រព្យនេះ​បាន​រំលោភ​លើ​​ដី​វត្ត​ស្ថិត​ក្នុង​ខណ្ឌសែនសុខ រាជធានី​ភ្នំពេញ កាល​ពី​ម្សិល​មិញ​​ ។​ ម៉ិច ដារ៉ា​/ខេមបូឌា ដេលី​

អំឡុង​ការ​តវ៉ា យុវជន​ជាច្រើន​នាក់​​បាន​ប្រើ​ញញួរធំៗ​វាយ​កម្ទេច​របងមួយ​ផ្នែក​​របស់​ក្រុមហ៊ុន​សាងសង់​លំនៅដ្ឋានសម្រាប់​​​លក់​ដ៏ធំមួយ មុនពេលបាញ់​ថ្នាំ​កំណត​់​ព្រំ​ប្រទល់​​​ដី​​​វត្ត។

ព្រះតេជគុណ ពឿយ មេត្តា ជាព្រះគ្រូចៅអធិការ​បាន​មាន​សង្ឃដីកាថា “ប្រសិនបើ​យើង​មិន​ចាត​់​វិធានការ​ទេនោះ យើង​​នឹង​បាត​់​បង់ដីនេះមិន​ខាន ពីព្រោះ​ក្រុមហ៊ុន​បាន​បន្ត​សាងសង់ បើទោះ​ជា​ដឹងថា ដីនេះមាន​វិវាទ​ជាមួយ​វត្ត​ក៏ដោយ”។ ព្រះតេជគុណ ពឿយ មេត្តា បាន​មាន​សង្ឃដីកា​ថា ដីទំហំ​៥.១០០​ម៉ែត្រក្រឡា​ដែល​មាន​វ​ិវាទនេះ ត្រូវ​បាន​កាត​់ចេញពីវត​្ត​កាលពីឆ្នាំ២០១៣ ដោយ​អាជ្ញាធរមូលដ្ឋានដែលបាន​លើក​ឡើង​ថា នឹង​សាងសង់​អាងស្តុកទឹក​ដោយការ​ពង្រីក​បឹង​តូច​ដែលមាន​ស្រាប់​។ ផ្ទុយទៅវិញ បឹង​នេះ​ត្រូវ​បាន​ចាក់​ដី​លុប ហើយ​ បុរី ប៉េង ហួត​​ បាន​ចាប់​ផ្តើម​សាងសង់​នៅ​កន្លែង​នេះ។

ព្រះគ្រូចៅអធិការ​បានមាន​សង្ឃដីកាថា វត្ត​បាន​ដាក់ពាក្យ​បណ្តឹង​ទៅ​លោកនាយក​រដ្ឋមន្ត្រី ហ៊ុន សែន កាលពី​ខែ​មេសា ប៉ុន្តែ​មិន​បានទទួលការ​ឆ្លើយ​តប​ទេ។​ ព្រះតេជគុណ​​​មាន​សង្ឃដីកាថា “​ដំបូង ពួកគេ​បាន​បង្ខំព្រះសង្ឃឲ្យ​ចុះ​ហត្ថលេខា​ដើម្បី​សាងសង់​អាងស្តុកទឹក ប៉ុន្តែ​ពួកគេ​បែរ​​​ជា​​​ចាក់​ដី​លុប​កាន់តែ​ច្រើន​ឡើង​ៗ ហើយ​សាង​សង់​លំនៅដ្ឋានទៅវិញ​​​។ ហេតុដូចនេះហើយ យើង​មិន​សប្បាយចិត្ត​ឡើយ ហើយ​បាន​អំពាវ​​នាវ​ឲ្យ​លោក​នាយក​រដ្ឋ​មន្ត្រីរក​យុត្ត​ិធម៌ជូន​ពួកយើង​ដើម្បីរក្សា​ទុកដីសម្រាប់កូនចៅជំនាន់ក្រោយ”។

តាមរឿង​ដំណាលថា មុន​ពេល​ចាក់ដីខ្សាច់លុបបឹង​នេះ កោះ​​តូចមួយ​ស្ថិត​នៅ​ចំកណ្តាល​ដែលព្រះសង្ឃនិង​អ្នក​ស្រុក​ចាត​់ទុកថា ជាកន្លែង​ស័ក្ត​ិសិទ្ធិ និង​បាន​យក​តង្វាយ​ទៅដាក់នៅ​ចេតិយ​​ដែលត្រូវ​បាន​សាងសង់នៅទីនោះដោយ​ទាហាន​ម្នាក់​ដែលបាន​លាក់ខ្លួន​ក្នុង​តំបន់នោះ មុនពេល​ចេញមកវាយយកឈ្នះសត្រូវ​របស់ខ្លួន។

នៅក្នុង​ពាក្យ​បណ្តឹង​ផ្ញើជូន​លោក ហ៊ុន សែន ព្រះសង្ឃ​បាន​ចោទ​លោក ជា ខេមា អភិ​បាល​រង​ខណ្ឌសែន​សុខ ថាបាន​ឃុបឃិត​ជាមួយ​ឈ្មួញ​ម្នាក់​ឈ្មោះ ឈាង ប៉ាក់សួរ លក់ដីនេះ​ទៅ​ឲ្យ​បុរី ប៉េង ហួត។លោក ខេមា បាន​បដិសេធ​មិន​ធ្វើអត្ថាធិប្បាយ។

យោងតាម​គេហទំព័រ​របស់បុរី ប៉េង ហួត​ បាន​ឲ្យ​ដឹង​ថា ការ​អភិវឌ្ឍ​ថ្មីនេះ​ឈ្មោះថា ឌឺស្តារ ខ្វតធឺរៀ ហើយ​ក្រោយ​មក​បាន​សាងសង់វីឡាទោល វីឡាភ្លោះ និង​ផ្ទះល្វែង ជាមួយនឹង​កន្លែង​កម្សាន្តនានា​ដូច​ជា​សួន​កម្សាន្ត​ អាងហែលទឹក និង​ “ស្ទីម សូណា និងអាងងូត​ទឹកក្តៅជាដើម​”។

អ្នកស្រី ស មាស អាយុ​៤០ឆ្នាំ​ ជាអ្នកភូមិ​ម្នាក់ដែលបាន​ចូលរួមក្នុងការ​​តវ៉ាកាលពី​ម្សិលមិញដើម្បី​គាំទ្រ​ព្រះសង្ឃបាន​និយាយថា អ្នកភូមិមិន​សប្បាយចិត្ត​ដោយ​សារ​អាជ្ញាធរ​មិន​យក​ចិត្ត​ទុក​ដាក់​ចំពោះ​ការអំពាវនាវ​ឲ្យ​​ជួយ​សង្គ្រោះ​ដីវត្តនេះ។ អ្នកស្រីបាន​និយាយថា “​យើង​នឹង​បន្តតវ៉ា​ជាមួយ​ព្រះសង្ឃ​ដើម្បី​យក​ដីមកវិញ។ យើង​​មិន​​អាច​បណ្តោយ​ឲ្យ​គេ​យក​ដីវត​្ត​ឡើយ”។

អ្នកស្រី ជាវ សម្បត្តិ ប្រធានផ្នែក​បម្រើ​អតិថិជន​នៅបុរី ប៉េង​ ហួត​​ បាន​និយាយថា​ ក្រុមហ៊ុន​មាន​ឯកសារ​ស្របច្បាប់និង​លិខិត​អនុញ្ញាត​ត្រឹមត្រូវ​ក្នុង​ការ​សាងសង់​លំនៅដ្ឋាន​លើដីដែលមាន​វិវាទនេះ។ អ្នកស្រី​បាន​បដិសេធមិន​ធ្វើ​អត្ថាធិប្បាយបន្ថែមឡើយ៕សារុន

 

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស