តំណាងអ្នកភូមិ៣០១គ្រួសារ ដែលត្រូវបានផ្តល់ដីសម្បទានសង្គមកិច្ចនៅក្នុងខេត្តក្រចេះ ដើម្បីដោះស្រាយវិវាទដីធ្លីដ៏អូសបន្លាយនោះ បាននិយាយកាលពីម្សិលមិញថា ពួកគាត់បានរាយការណ៍ទៅអាជ្ញាធរកាលពីថ្ងៃសៅរ៍ អំពីពីគ្រួសារចំណូលថ្មីដែលបានមកចូលរួមជាមួយពួកគាត់ចាប់តាំងពីពេលនោះមក ដោយសង្ឃឹមថា នឹងទទួលបានដីផងដែរ។
អាជ្ញាធរបានផ្ដល់ដីសម្បទានទំហំ៧៥០ហិកតាដល់គ្រួសារទាំងនេះកាលពីដើមខែនេះ បន្ទាប់ពីអ្នកភូមិមួយចំនួនក្នុងចំណោមអ្នកភូមិ៣០១គ្រួសារបានចំណាយពេលជិតពីរសប្ដាហ៍ក្នុងរាជធានីភ្នំពេញតវា៉ពីការដែលក្រុមហ៊ុនប៊ិញភួក២ (BinhPhuoc 2) បានបង្ខំឲ្យពួកគាត់ចាកចេញពីដីស្ថិតនៅក្នុងស្រុកស្នួល ប៉ុន្តែដំណឹងនេះបានផ្សព្វផ្សាយយ៉ាងលឿន ហើយក្រុមអ្នកឱកាសនិយមបានមកដល់ភ្លាមៗតែម្ដង។
លោក ងួន វិបុល តំណាងម្នាក់ក្នុងចំណោមតំណាងប្រាំពីរនាក់មកពីឃុំឃ្សឹម ដែលផ្ទះរបស់ពួកគាត់ត្រូវបានបំផ្លាញដើម្បីបើកផ្លូវឲ្យក្រុមហ៊ុននេះធ្វើចម្ការកៅស៊ូនោះ បានមានប្រសាសន៍ថា ” យើងបានចុះឈ្មោះអ្នកភូមិ ហើយបានរកឃើញថា អ្នកភូមិ៧៩២គ្រួសារកំពុងរស់នៅក្នុងជម្រកលើដីទំហំ៧៥០ហិកតានេះ និងអ្នកភូមិដែលរស់នៅលើផ្លូវលំក្បែរនោះ”។
តួលេខចំនួន៧៩២គ្រួសារនេះ គឺខ្ពស់ជាងតួលេខកាលពីសប្ដាហ៍មុនទៅទៀត ដែលនៅពេលនោះអ្នកភូមិ៤៤៩គ្រួសារបានលើកឡើងថា ពួកគាត់បានចូលរួមជាមួយអ្នកភូមិ៣០១គ្រួសារដំបូងចុះឈ្មោះទទួលដីសម្បទានសង្គមកិច្ចនេះ។
លោក វិបុល បានមានប្រសាសន៍ថា សេចក្តីរាយការណ៍នេះស្នើឲ្យអាជ្ញាធរដោះស្រាយបញ្ហាទាក់ទងនឹងអ្នកភូមិ៣០១គ្រួសារជាមុនសិន។ ប៉ុន្តែលោកបានមានប្រសាសន៍ថា របាយការណ៍នេះក៏ស្នើឲ្យអាជ្ញាធរជួយរកដីឲ្យគ្រួសារចំណូលថ្មី៤៩១គ្រួសារផង ពីព្រោះពួកគាត់ក៏ជាអ្នកគ្មានផ្ទះសំបែងដែរ។
លោក ស ចំរ៉ុង អភិបាលខេត្តក្រចេះបានមានប្រសាសន៍ថា អាជ្ញាធរកំពុងពិចារណា ថាតើត្រូវដោះស្រាយជាមួយនឹងគ្រួសារចំណូលថ្មីដោយរបៀបណា។ លោក ចំរុ៉ុង បានមានប្រសាសន៍ថា “យើងមានគោលនយោបាយផ្ដល់ដីសម្បទានសង្គមកិច្ចដល់គ្រួសារក្រីក្រ ប៉ុន្តែយើងសង្ឃឹមថា នឹងស្វែងរកការពិតទាក់ទងនឹងកំណើននៃគ្រួសារទាំងនេះ”។
លោក ហេង ភារក្ស អ្នកស៊ើបអង្កេតនៅអង្គការសិទ្ធិមនុស្សអាដហុក បានមានប្រសាសន៍ថា ឥឡូវនេះអ្នកភូមិ៣០១គ្រួសារកំពុងរស់នៅក្នុងជម្រកលើដីសម្បទានសង្គមកិច្ច ចំណែកគ្រួសារចំណូលថ្មីបានបោះតង់បណ្ដោះអាសន្នលើដីចិញ្ចើមផ្លូវក្បែរនោះ។
លោក ភារក្ស បានបន្ថែមថា ភាគច្រើននៃគ្រួសារចំណូលថ្មីទាំងនេះមកពីកន្លែងដែលមានវិវាទដីធ្លីពាក់ព័ន្ធនឹងក្រុមហ៊ុនវៀតណាមមួយទៀត ឈ្មោះ ដឹក យ៉ុង (DeukYong) ហើយពួកគាត់មកពីឃុំជាមួួយគ្នានឹងអ្នកភូមិ៣០១គ្រួសារដំបូងដែរ។
លោក ភារក្ស បានមានប្រសាសន៍ថា “ឥឡូវនេះអាជ្ញាធរកំពុងប្រឈមនឹងការលំបាកថា តើត្រូវរកដំណោះស្រាយឲ្យគ្រួសារទាំងអស់នេះដោយវិធីណា ពីព្រោះដីមានទំហំតូចណាស់មិនអាចផ្ដល់ឲ្យគ្រួសារដែលបានចុះឈ្មោះទាំងអស់បានទេ” ៕ សារុន