កាលពីថ្ងៃសុក្រ កងរាជអាវុធហត្ថបានសហការជាមួយរដ្ឋបាលជលផលខេត្តកំពង់ធំដើម្បីចាប់ខ្លួនបុរសប្រាំមួយនាក់ និងរឹបអូសត្រាក់ទ័រឈូសឆាយចំនួនបួនគ្រឿង ដែលត្រូវបានប្រើប្រាស់ដើម្បីរានព្រៃលិចទឹក ដែលត្រូវបានការពារស្ថិតក្នុងតំបន់អភិរក្សមច្ឆជាតិនៅក្នុងស្រុកស្ទោង។
លោក ឃុន ប៊ុនហូ មេបញ្ជាការកងរាជអាវុធហត្ថបានមានប្រសាសន៍ថា កាលពីរសៀលថ្ងៃសុក្រ កងរាជអាវុធហត្ថ និងមន្ត្រីមូលដ្ឋានបានឡោមព័ទ្ធត្រាក់ទ័រឈូសឆាយទាំងនោះ ដែលកំពុងរានដីយ៉ាងសកម្មនៅក្នុងតំបន់អភិរក្សមច្ឆជាតិមួយនៅក្នុងឃុំសំព្រោច។
លោកបានមានប្រសាសន៍ថា “យើងបានចាប់ខ្លួនមនុស្សប្រាំមួយនាក់ និងរឹបអូសត្រាក់ទ័រឈូសឆាយបានបួនគ្រឿង”។ លោកបានបន្ថែមថា ក្រុមអ្នកភូមិមូលដ្ឋានបានរាយការណ៍អំពីសកម្មភាពខុសច្បាប់នេះ។ លោក ប៊ុនហូ បានមានប្រសាសន៍ថា ” កន្លងមក យើងបានព្រមានប្រជាពលរដ្ឋច្រើនលើកច្រើនសាមកហើយថា ការរានព្រៃនៅក្នុងតំបន់នោះ គឺជាការខុសច្បាប់ ប៉ុន្តែពួកគាត់មិនស្ដាប់ទេ ហេតុដូច្នេះហើយយើងត្រូវតែចាត់វិធានការ”។
យោងតាមលោក ហង្ស ថុល មេបញ្ជាការកងរាជអាវុធហត្ថេខត្តបានឲ្យដឹងថា ជនសង្ស័យប្រាំនាក់ដែលមានឈ្មោះ ហង្ស ហេន អាយុ៣១ឆ្នាំ បែន សុភាព អាយុ២៥ឆ្នាំ សំ ថា អាយុ២២ឆ្នាំ ស៊ុំ គី អាយុ៣៧ឆ្នាំ និង កែវ គឿន អាយុ២៣ឆ្នាំ មកពីស្រុកសំពៅលូន ខេត្តបាត់ដំបង ចំណែក លី លឹម អាយុ៥១ឆ្នាំមកពីឃុំសំព្រោច។
លោកបានមានប្រសាសន៍ថា “បន្ទាប់ពីការចាប់ខ្លួន និងសាកសួររួចមក ជនសង្ស័យទាំងនេះបានសារភាពថា ពួកគេមិនមែនជាម្ចាស់ដីនេះទេ ហើយបានជួលដីនេះពីអ្នកភូមិនៅក្នុងឃុំនេះ។ យើងកំពុងសាកសួរពួកគេដើម្បីរកឲ្យឃើញថា តើមានមនុស្សប៉ុន្មាននាក់ទៀតជាប់ពាក់ព័ន្ធ”។លោក ប៉ែន វណ្ណរិទ្ធ ប្រធានខណ្ឌរដ្ឋបាលជលផលខេត្តកំពង់ធំ មិនអាចទាក់ទងសុំការអត្ថាធិប្បាយបានទេ។
លោក គុច គឹមឡុង ព្រះរាជអាជ្ញារងអមសាលាដំបូងខេត្តបានមានប្រសាសន៍ថា កងរាជអាវុធហត្ថមិនទាន់បានបញ្ជូនករណីនេះទៅតុលាការនៅឡើយទេ។ លោកបានមានប្រសាសន៍ថា “នៅពេលករណីនេះមកដល់ដៃរបស់យើង យើងនឹងចាត់វិធានការចាំបាច់ ហើយសម្រេចថាតើត្រូវធ្វើអ្វីនៅពេលបន្ទាប់”។
បើទោះណាជាការនេសាទត្រូវបានហាមឃាត់នៅក្នុងតំបន់អភិរក្សនេះក៏ដោយ ក៏ព្រៃលិចទឹកនេះត្រូវបានញាំញីដោយការរានព្រៃខុសច្បាប់ដែរ។ កាលពីខែកក្កដា ឆ្នាំ២០១២មន្ត្រីមូលដ្ឋានប្រហែល២០នាក់ទទួលបានដីកាកោះហៅពីតុលាការពាក់ព័ន្ធការរានដីព្រៃមួួយផ្នែកធំដើម្បីធ្វើស្រែប្រាំង៕ សារុន