32 C
Phnom Penh

អ្នកភូមិ​​ខេត្តស្ទឹងត្រែង​​សម្រុក​ចូល​ការិយាល័យ​ព្រៃឈើ ដើម្បី​យក​​គោយន្តមកវិញ​

ដោយ ឌឹ ខេមបូឌា ដេលី

បទវិភាគ

អ្នក​ភូមិ​​​ដែល​ខឹង​សម្បាប្រហែល​២០០នាក់​​នៅក្នុង​ស្រុកមួយ​​​ដែលសម្បូរ​​ដោយឈើ​ក្នុង​​ខេត្តស្ទឹងត្រែង ​បាន​សម្រុក​ចូល​ការិយាល័យ​រដ្ឋ​បាល​ព្រៃ​​ឈើ​មូល​ដ្ឋាន​មួយ​​កាល​ពីម្សិល​មិញ​​និង​បាន​​យក​គោយន្តដែល​ក្រុម​មន្ត្រី​​ការិយាល័យ​នោះ​យក​​ទៅ​រក្សា​​ទុក​មកវិញ។

លោក ស៊ី សួន ​​​អភិបាល​ស្រុក​​ សៀម ប៉ាង ​​​បានមាន​ប្រសាសន៍ថា ​អ្នក​ភូមិ​​​មិនប្រដាប់​អាវុធ​មកពី​​ភូមិ​ តា ខេង និងភូមិ ​​ពង គ្រាល ​​ឃុំព្រែក មាស ​បាន​ទៅ​ដល់​ការិយាល័យ​នេះ នៅមុន​​​ថ្ងៃត្រង់បន្តិច និងបាន​វាយ​កម្ទេចសោ​នៅ​ខ្លោង​ទ្វារធំ​ មុន​​ពេល​ចូល​​ទៅ​យក​​គោយន្ត​ ដែល​ត្រូវបាន​ប្រើ​ដើម្បី​ដឹកឈើ​​កាប់​ខុស​ច្បាប់​មក​វិញ។ មន្ត្រី​នគរបាល​និង​កងរាជអា​វុធ​ហត្ថជាតិ​​នៅ​កន្លែងនោះ​មិនបាន​តបតអ្វី​​ទេ។

លោក ស៊ី សួន ​​បានមានប្រសាសន៍ថា “ខ្ញុំ​​បាន​ជួប​ពួកគេនៅទីនោះ និងបាន​ព្យាយាម​សុំ​ឲ្យពួកគេគោរពច្បាប់​។ ពួកគេ​មិនស្តាប់ខ្ញុំ​​ទេ មិនខ្វល់​អ្វី​ដែល​ខ្ញុំ​និយាយ​ឡើយ​។ ​ពួកគេ​​ឆ្លើយ​តប​មកខ្ញុំ​ថា ពួកគេនឹង​ទទួល​ខុសត្រូវ​ចំពោះ​​មុខ​ច្បាប់​ដោយ​ខ្លួនឯង​”។

ភាពតាន​តឹងនេះ​​កើតឡើង​​រយៈ​ពេល​ច្រើន​ខែ​មកហើយ​នៅក្នុងស្រុក​ សៀម ប៉ាង ដែល​ភាគ​ច្រើន​​ពាក់​ព័ន្ធ​​ក្នុង​សម្បទាន​​ដីសេដ្ឋកិច្ច​ ​ដែល​​អ្នក​ស្រុក​​ត្រូវ​ទទួល​ខុស​ត្រូវ​ចំពោះការ​កាប់​ឈើ​​តិចតួច​ ចំណែក​​ពួក​មហាសេដ្ឋី​​​រកស៊ី​​ឈើគេចវេះមិនទទួល​ខុសត្រូវ​ឡើយ​។

ក្រុម​មន្ត្រី​​​ព្រៃឈើ​​និង​កង​រាជ​អាវុធហត្ថ​​បាន​រឹប​​អូស​​គោយន្ត​ ដែល​​អ្នកភូមិ​ប្រើ​ដើម្បី​កាប់​ឈើ​ប្រណីត​ និង​រក្សាទុក​គោយន្ត​ទាំងនោះ​ ​ដើម្បី​ទារ​យក​ប្រាក់​លោះ​ ដោយ​ទាម​ទារ​ប្រាក់​ចំនួន​ច្រើន​លើស​លប់ និង​តាម​តែ​ទំនើង​ចិត្ត​​។ មន្ត្រី​ម្នាក់​នៅ​សាលា​ដំបូង​ខេត្ត​បាន​ឲ្យ​ដឹង​កាល​ពី​ខែ​មុន​ថា ទង្វើ​នេះ​គឺ​ជា​ការ​ខុស​ច្បាប់​។

​​​ កាល​ពី​សប្តាហ៍​មុន​ លោក លី កន ប្រធាន​រដ្ឋ​បាល​ព្រៃ​ឈើ​ស្រុក​សៀម​ប៉ាង​ ត្រូវ​បាន​ដក​ចេញ​ពី​តួ​នាទី​របស់​លោក​។ មិន​មាន​ការ​ផ្តល់​ហេតុ​ផល​ចំពោះ​ការ​ដក​តួ​នាទី​របស់​លោក​ឡើយ​។

លោក​ ទិត្យ សំណាង ដែល​ជំនួស​លោក​ លី កន បាន​បដិសេធ​មិន​ធ្វើ​អត្ថាធិប្បាយ​អំពី​ការ​សម្រុក​ចូល​របស់​អ្នក​ភូមិ​ឡើយ​។ ទោះ​ជា​យ៉ាង​ណា អនុ​ប្រធាន​របស់​លោក​ គឺ​លោក ស្រស់ សារិន​ បាន​បញ្ជាក់ថា រឿង​នេះ​បាន​កើត​ឡើង​មែន​។ លោក សារិន ក៏​មាន​ភារកិច្ច​ដោះ​ស្រាយ​​ផង​ដែរ​កាល​ពី​សប្តាហ៍​មុន​ នៅ​ពេល​កសិករ​ចំនួន​ប្រហែលគ្នានេះ​មក​ពី​ឃុំ​សេកុង បាន​​សម្រុក​ចូល​ការិយា​ល័យ​រដ្ឋ​បាល​ព្រៃ​ឈើ​ដដែល​​នេះ និង​បាន​នាំយក​ទូក​​មួយ​គ្រឿង​ និង​គោយន្ត​ពីរ​គ្រឿង​ដែល​ត្រូវ​បាន​រក្សា​ទុក​ទៅវិញ។

អ្នកស្រុក​ទាំង​នោះ​ក៏​បាន​ឲ្យដឹង​ផង​ដែរ​ថា ឧបករណ៍​របស់​ខ្លួន​ត្រូវ​បាន​រក្សា​ទុក​ដើម្បីទារ​ប្រាក់​លោះ​។ យោង​តាម​លោក​ ស៊ី សួន បាន​ឲ្យដឹង​ថា កាល​ពី​ថ្ងៃ​ច័ន្ទ​មុន​ អ្នកស្រុក​បាន​ឡោម​ព័ទ្ធ​ការិ​យា​ល័យ​អង្គការ​អភិរក្ស​មួយ​ឈ្មោះ BirdlifeInternational នៅ​ក្បែរ​ការិយាល័យ​ព្រៃ​ឈើ​ស្រុក ​សៀម ​ប៉ាង​ និង​បាន​ទាម​ទារ​គ្រឿង​ចក្រ​ដែល​​គេ​រឹប​អូសមកវិញ​​។ រណារ​​អារ​ឈើ​ចំនួន​បី​ត្រូវ​បាន​ប្រគល់​ឲ្យ​អ្នក​ភូមិ​វិញ​ ដើម្បី​បញ្ចប់​ជម្លោះ។

លោក ឈាង តុលា ប្រធាន​ខណ្ឌ​រដ្ឋបាល​ព្រៃ​ឈើ​ ខេត្ត​ស្ទឹង​ត្រែង ​បាន​មាន​ប្រសាសន៍​កាល​ពី​ម្សិលមិញ​ថា ការិយាល័យ​របស់​លោក​កំពុង​ដោះ​ស្រាយ​ករណី​នេះ​ និង​​សម្រេច ​ថាតើ​ត្រូវ​ចោទ​ប្រកាន់​កសិករ​ទាំង​នោះ​ ឬ​យ៉ាង​ណា​។

ឈ្មោះ ធឿង ប៉ាង អាយុ​២៣​ឆ្នាំ​ ដែល​​ជាអ្នក​ភូមិ​ម្នាក់​ក្នុង​ចំណោម​អ្នក​ភូមិ​ដែល​បាន​សម្រុក​ចូល​​ការិ​យាល័យ​ព្រៃឈើ​កាល​ពី​ម្សិល​មិញ​បាន​ឲ្យ​ដឹង​ថា គាត់​ចាំបាច់​ត្រូវ​តែ​ធ្វើ​ដូច្នេះ​។

ធឿង​ ប៉ាង បាន​ឲ្យ​ដឹង​ថា គាត់​ប្រឹង​​​រកបាន​ត្រឹមតែ​អង្ករច្រកឆ្នាំង​ ព្រោះគ្មាន​គ្រឿង​ចក្រ​កសិកម្ម​របស់​គាត់​​ ហើយមិន​អាចបង់​ប្រាក់​ចំនួន​១.៥៨០​ដុល្លារ​ ដែល​រដ្ឋបាល​ព្រៃ​ឈើ​​ទាម​ទារ​ជា​ថ្នូរ​នឹង​គោ​យន្ត​របស់​គាត់​ឡើយ​។ លោក​បាន​មាន​ប្រសាសន៍​ថា ” យើង​បារម្ភ​ថា យើង​នឹង​ត្រូវ​ចាប់​ខ្លួន​ [ដោយសារ​តែ​សម្រុក​ចូល​ការិយាល័យ​នេះ​] ប៉ុន្តែ​យើង​គ្មាន​ជម្រើស​ទេ​”៕ប៊ុន​នី​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស