29 C
Phnom Penh

លោក ស៊ូបេឌី​​ លើកឡើង​​អំពី​ពលករ​ចំណាកស្រុក ប្រាក់ខែគោល និង​ច្បាប់សហជីព

ដោយ ឌឹ ខេមបូឌា ដេលី

បទវិភាគ

ពេញ​មួយថ្ងៃដំបូង​នៃ​បេសកកម្ម​លើកទី​១១​របស់លោកមក​កាន់​ប្រទេស​កម្ពុជា​ លោក សុរិយា ស៊ូបេឌី ប្រេសិត​សិទ្ធិមនុស្ស​អង្គការ​សហ​ប្រជាជាតិ​ បាន​ជួប​លោក អុិត សំហេង រដ្ឋមន្ត្រី​ក្រសួង​ការ​ងារ​ ដើម្បីពិភាក្សា​អំពី​បញ្ហា​បន្ទាន់​​មួយ​ចំនួន​ដែល​កម្លាំង​ពល​កម្ម​នៅ​ប្រទេស​កម្ពុជាកំពុងជួបប្រទះ​។

យោងតាម​លោក ហេង សួគ៌ អ្នក​នាំពាក្យ​ក្រសួង​ការ​ងារ​បាន​ឲ្យ​ដឹង​ថា លោក ស៊ូបេឌី លើក​យក​បួន​​ចំណុច​​មក​ពិភាក្សា​អំឡុង​ជំនួប​នោះ។ លោក​បាន​មាន​ប្រសាសន៍​ថា “លោក​ទាំង​ពីរ​បាន​ពិភាក្សា​អំពី​ព​ល​ករ​ខ្មែរ​ ដែល​ត្រូវ​បាន​​បញ្ជូន​ពី​ប្រទេស​ថៃមកវិញ​។ លោក ស៊ូបេឌី ក៏ចង់​ដឹង​ផង​ដែរ​អំពី​ការ​វិវឌ្ឍ​នៃ​សេចក្ដី​ព្រាង​ច្បាប់​សហជីព​ ពីព្រោះ​វា​ហាក់​ដូច​ជា​ប៉ះពាល់​ដល់​សេរីភាព​របស់​សហជីព។

លោក ហេង សួគ៌ បាន​មាន​ប្រសាសន៍​ថា “លោក​ចង់​ដឹ​ង​អំពី​ប្រាក់​ខែ​គោល និង​ចង់​ពិភាក្សាអំពីរបាយការណ៍​ដែល​លោក​ទទួល​បាន​ពី​អ្នក​ដែល​បា​ន​ចូល​រួម​ធ្វើ​កូដកម្ម​ និង​មេដឹកនាំ​សហជីព​មួយ​ចំនួន​ដែល​ត្រូវ​បាន​ចាប់​ខ្លួន​​​កាលពីខែ​មករា ដែល​មិនអាច​ត្រឡប់​មកធ្វើការ​វិញ​នោះ”។

ជាការ​ឆ្លើយ​តប​ លោក អិុត សំហេង ដែល​បាន​ធ្វើ​ដំណើរ​ទៅ​ក្រុង​ប៉ោយ​ប៉ែត​កាលពី​ចុង​សប្ដាហ៍​ ដើម្បី​វាយ​តម្លៃ​អំពីស្ថានភាព​ពលករ​ចំណាក​ស្រុក បាន​ជម្រាប​លោក ស៊ូបេឌី ថា អាជ្ញាធរ​កំពុង​ប្រឈម​មុខ​នឹង​បញ្ហា​ពីរ​យ៉ាង​ក្នុង​ការ​បញ្ជូន​ពល​ករ​ចំណាក​ស្រុក​​មក​វិញ គឺ​តាម​រយៈបណ្តាញការ​ទូត​ជាមួយ​ប្រទេស​ថៃ និង​តាមរយៈ​ការ​ផ្ដល់ការយកចិត្តទុកដាក់បន្ទាន់​​នៅ​នឹង​កន្លែង​។

ទាក់ទង​ទៅនឹង​សេចក្ដី​ព្រាង​ច្បាប់​សហជីព​ ដែល​ស្ថាប័ន​ការ​ងារ​របស់​អង្គការ​សហ​ប្រជាជាតិ បាន​លើក​ឡើង​ នឹង​ជា​ជំហាន​ថយ​ក្រោយ​ចំពោះ​សិទ្ធិ​កម្មករ​នៅ​ក្នុង​ប្រទេ​ស ប្រសិន​បើ​​សេចក្តី​ព្រាង​ច្បាប់​នេះ​នៅ​តែ​ដដែល​។ តាម​ព័ត៌មាន​ថា លោក អុិត សំហេង បាន​លើក​ឡើង​ថា វា​ឆាប់​ពេក​ហើយ​ មិន​អាច​និយាយ​អំពី​បញ្ហា​នេះ​បានទេ។

លោក អុិត សំហេង បាន​បញ្ជាក់​អំឡុង​ជំនួប​នោះ​ថា ដំណើរ​ការ​ថ្មី​ចំពោះ​ការ​កំណត់​ប្រាក់​ខែ​គោល​ក្នុង​វិស័យ​កាត់​ដេរ​ ត្រូវ​បាន​ពិភាក្សា​អំឡុង​ជំនួប​នៅ​ក្រសួង​ការ​ងារ​កាល​ពី​ម្សិល​មិញ។

យោង​តាម​លោក ហេង សួគ៌ បាន​ឲ្យដឹង​ថា លោករដ្ឋមន្ត្រី​ក៏បាន​ជម្រាបលោក ស៊ូបេឌី ផង​ដែរ​ថា ក្រសួង​នឹង​ធ្វើ​ឲ្យ​ប្រាកដ​ថា រោង​ចក្រ​ទាំង​អស់​បាន​អនុវត្ត​តាម​ច្បាប់​ការ​ងារ​ក្នុង​ការ​ជ្រើស​រើសកម្មករ​​ និង​ការ​បញ្ឈប់​​កម្មករ​។

​ កាលពីម្សិលមិញ លោក ស៊ូបេឌី ក៏បាន​ធានា​អះ​អាង​នឹង​​អ្នក​ភូមិ​ដែល​គ្មាន​ផ្ទះ​សំបែង​មក​ពី​សហគមន៍​បុរីកីឡា​ ដែល​បាន​ប្រមូល​ផ្ដុំគ្នា​នៅ​ខាង​ក្រៅការិយាល័យ​ឧត្តម​ស្នង​ការ​សហ​ប្រជាជាតិ​ទទួ​ល​បន្ទុក​សិទ្ធិមនុស្ស​ដែរ​ថា លោកមិន​​​បាន​ភ្លេច​លើក​ឡើង​អំពីការ​អំពាវ​នាវ​របស់​ពួក​គាត់​ឲ្យ​ដោះ​ស្រាយ​វិវាទ​ដីធ្លីរបស់ពួកគាត​់ឡើយ​។ លោក​បានមាន​ប្រសាសន៍​ថា ” ខ្ញុំ​នឹង​លើកឡើង​​បញ្ហានេះ​ម្ដង​ទៀត​តា​ម​ដែល​ខ្ញុំ​អាច​ធ្វើ​បាន​ ដើម្បី​ដោះស្រាយ​បញ្ហា​ដែល​បង​ប្អូន​កំពុង​ប្រឈ​ម​មុខ​នេៅពេល​នេះ​”៕ សារុន​

(រាយការណ៍​បន្ថែម​ដោយ Lauren Crothers និង ឃួន ណារីម​)​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស