34 C
Phnom Penh

អ្នកភូមិ​តំបន់បឹងកក់តវ៉ានៅការិយាល័យ​ធនាគារពិភពលោក

ដោយ ឌឹ ខេមបូឌា ដេលី

បទវិភាគ

អ្នក​ភូមិ​មក​ពី​សហគមន៍បឹង​កក់​ប្រហែល​៥០​នាក់​បាន​ជួប​ជុំគ្នានៅ​ខាង​ក្រៅ​ការិយាល័យ​ធនាគារ​ពិភព​លោក​ក្នុង​រាជធានីភ្នំពេញ​ កាលពី​​​ម្សិលមិញ ដោយយកឈាម​​​មាន់​​​ចាក់​​​លើ​​ក្រដាស់​ប្រាក់​១០០ដុល្លារ​ក្លែង​ក្លាយ ជា​​​ការប្រឹងប្រែង​ដើម្បី​រារាំងកុំឲ្យ​ធនាគារ​នេះ​​បន្ត​ផ្ដល់មូល​និធិ​ដល់​គម្រោង​នានា​ក្នុង​ប្រទេស​កម្ពុជា​ទៀត​។

អ្នក​ភូមិ​មក​ពី​សហគមន៍បឹង​កក់យកឈាម​​​មាន់​​​ចាក់​​​លើ​​ក្រដាស់​ប្រាក់​១០០ដុល្លារ​ក្លែង​ក្លាយ​​​នៅ​ខាង​ក្រៅ​ការិយាល័យ​ធនាគារ​ពិភព​លោក​ក្នុង​រាជធានីភ្នំពេញ​ ដើម្បី​រារាំងកុំឲ្យ​ធនាគារ​នេះ​​បន្ត​ផ្ដល់មូល​និធិ​ដល់​ គម្រោង​នានា​ក្នុង​ប្រទេស​កម្ពុជា​ទៀត ។ ល័ររិន គ្រុធឺរ/ខេមបូ ដេលី​​
អ្នក​ភូមិ​មក​ពី​សហគមន៍បឹង​កក់យកឈាម​​​មាន់​​​ចាក់​​​លើ​​ក្រដាស់​ប្រាក់​១០០ដុល្លារ​ក្លែង​ក្លាយ​​​នៅ​ខាង​ក្រៅ​ការិយាល័យ​ធនាគារ​ពិភព​លោក​ក្នុង​រាជធានីភ្នំពេញ​ ដើម្បី​រារាំងកុំឲ្យ​ធនាគារ​នេះ​​បន្ត​ផ្ដល់មូល​និធិ​ដល់​ គម្រោង​នានា​ក្នុង​ប្រទេស​កម្ពុជា​ទៀត ។ ល័ររិន គ្រុធឺរ/ខេមបូ ដេលី​​

ដោយ​ពាក់​អាវ​កាក់មាន​សរសេរ​ពាក្យ​ថា ” World Bank=World Bad” និង​​​ពាក្យ ” ធនាគារ​ពិភព​លោក​បាន​បំផ្លាញ​គ្រួសារ​របស់​ខ្ញុំ​” សកម្មជន​សិទ្ធិលំនៅ​ដ្ឋាន​បាន​យកម្រាម​ដៃ​ជ្រលក់​ឈាមទៅផ្តិត​នៅលើ​​លុយ​ក្លែ​ង​ក្លាយ​ក្រដាស១០០​ដុល្លារ​ទាំង​នោះ ហើយ​យក​​​ទៅ​​​បិទ​នៅ​លើ​ខ្លោង​ទ្វារ​មុខ​របស់អង្គការ​នេះ​។

នៅ​ពេល​ចប់​ពិធី​បានយកលុយ​ក្លែង​ក្លាយ​នោះ​ទៅ​ជ្រលក់​ឈាម​។ អ្នកស្រី ទេព វន្នី តំណាង​សហគមន៍​បឹង​កក់​បាន​និយាយ​ថា ” នេះ​គឺ​ជាសារ​ដែល​យើង​ផ្ញើ​ទៅ​ធនាគារ​ពិភព​លោក​”។

អ្នក​ស្រី​បាន​និយាយ​ថា ” យើង​មក​ទីនេះ​ដើម្បីជំរុញ​ឲ្យ​ធនាគារ​ពិភព​លោក​បញ្ចប់​បញ្ហា​នៅ​បឹង​កក់​ ពីព្រោះ​យើង​បាន​ទទួល​ព័ត៌មាន​កាលពីពេល​ថ្មីៗ​នេះ​ថា ពួកគេ​នឹង​ចាប់​ផ្ដើម​សហការ​ជាមួយ​រដ្ឋាភិបាល​ម្តងទៀត ដើម្បី​ផ្ដល់ជំនួយ​ដល់​ប្រទេស​កម្ពុជា បើ​ទោះ​ណា​ជា​កម្ពុជា​មិនទាន់​បាន​បញ្ចប់​បញ្ហារបស់អ្នកភូមិ​ក៏ដោយ​”។

បន្ទាប់ពី​ទទួល​ស្គាល់​ថា ខ្លួន​បាន​បរាជ័យ​ក្នុង​គម្រោង​ផ្ដល់​ប័ណ្ណ​​កម្មសិទ្ធិ​ដីធ្លី​ក្នុង​ប្រទេស​កម្ពុជា ដែល​បានប៉ះពាល់​ដល់​អ្នក​ភូមិ​បឹង​កក់​ ធនាគារ​ពិភពលោក​បាន​បង្កក​ការ​ផ្ដល់ប្រាក់កម្ចី​ថ្មីទាំង​អស់​ដល់​ប្រទេស​កម្ពុជា​កាលពី​ឆ្នាំ​២០១១ រហូត​ដល់​រដ្ឋាភិបាល​អាចឈានដល់កិច្ច​ព្រម​ព្រៀងជាមួយ​សហគមន៍នេះ​។

ចាប់​តាំ​ងពី​ពេល​នោះមក អ្នក​ភូមិ​ប្រហែល​៣.០០០​គ្រួសារ​នៅ​តំបន់​បឹង​កក់​ត្រូ​វបាន​បង្ខំ​ឲ្យ​ចាក​ចេញពីផ្ទះ​សំបែង​របស់​ខ្លួន ដើម្បី​បើក​ផ្លូវសម្រាប់​គម្រោង​អចលន​ទ្រព្យ​របស់​សមា​ជិក​ព្រឹទ្ធសភា​គណបក្ស​ប្រជា​ជន​កម្ពុជា​។

មុនពេល​ចាក​ចេញ​កាលពីម្សិលមិញ ក្រុម​អ្នក​តវ៉ា​បាន​ដាក់​ញត្តិ​ទៅ​ធនាគារ​ពិភព​លោក​ ដោយលើក​ឡើង​ដដែល​អំពី​ការ​ជំទាស់​របស់​ពួកគាត់​ចំពោះ​ការ​បន្តផ្តល់ប្រាក់កម្ចីនេះ។

ញត្តិ​នោះ​មាន​ខ្លឹម​សារ​ថា ” ប្រសិន​បើ​ធនាគារ​ពិភព​លោក​មិន​គោរព​គោល​ជំហរ​របស់​ខ្លួន​ក្នុង​ការ​ឆ្លើយ​តប​ចំពោះ​ប្រជា​ពល​​រដ្ឋ​ដែល​រង​ផល​ប៉ះពាល់ទេនោះ​ យើង​ថ្កោល​ទោស​ធនាគារ​ពិភព​លោក​ដែល​បាន​ជញ្ជក់​ឈាម​ពល​រដ្ឋខ្មែរ ហើ​យ​ឃុប​ឃិត​ជាមួយ​រដ្ឋាភិបាល​ប្រព្រឹត្ត​អំពើ​ពុក​រលួយ​ និង​រំលោភ​សិទ្ធិមនុស្ស​ធ្ងន់ធ្ងរ”។

លោក ប៊ូ សារឿន អ្នក​នាំពាក្យ​ធនាគារ​ពិភព​លោក​បានសរសេរ​​​​តាម​អុីម៉េល​បន្ទាប់​​ពី​ការ​តវ៉ា​ថា ធនាគារ​ពិភព​លោកប្តេជ្ញាបន្ត​ការ​​បង្កក​មូល​និធិ​របស់​ខ្លួន​កាលពី​ឆ្នាំ​២០១១។​ លោក​បាន​មាន​ប្រសាសន៍​ថា ” ធនាគារ​ពិភព​លោក​​​នៅ​​​តែ​ជំរុញ​​​ឲ្យ​​​មាន​​​ដំណោះ​ស្រាយ​ចំពោះ​បញ្ហា​ដែលនៅ​សេស​សល់​ក្នុងការ​ផ្ដល់​ប័ណ្ណ​កម្មសិទ្ធិ​ដី​ដល់​អ្នកភូមិនៅ​តំបន់​បឹង​កក់​បច្ចុប្បន្ន​។ ធនាគារ​ពិភ​ព​លោក​មិន​បាន​យល់​​​ព្រម​​​ផ្តល់​មូល​និធិ​ថ្មី​ដល់​ប្រទេស​កម្ពុជាចាប់​តាំង​ពី​ខែធ្នូ​ ឆ្នាំ​២០១០​មក”៕ សារុ​ន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស