26 C
Phnom Penh

គ្រឿងចក្ររបស់ក្រុមហ៊ុន​ត្រូវ​បាន​គេ​លួច​ដុត​

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយ​កាលពីម្សិលមិញ​ថា ត្រាក់​ទ័រ​ និង​ត្រាក់​ទ័រ​ឈូស​ឆាយ​ប្រាំមួយ​គ្រឿង​ ដែល​ជាកម្មសិទ្ធិ​របស់​ក្រុម​ហ៊ុន​ចិ​ន​មួយ​ត្រូវ​បានគេលួច​ដុត​នៅ​លើ​ដីសម្បទាន​សេដ្ឋ​កិច្ច​របស់​ក្រុម​ហ៊ុន​នេះ​ស្ថិត​ក្នុង​ខេត្ត​បន្ទាយ​មាន​ជ័យ​កាលពី​យប់​ថ្ងៃអាទិត្យ។

លោក ពេជ្រ វណ្ណថា នាយ​ប៉ុស្តិ៍ឃុំ​បន្ទាយ​ឆ្មារ បាន​មាន​ប្រសាសន៍​ថា ក្រុម​ហ៊ុន​ដែល​មាន​ដី​សម្បទាន​ទំហំ​៦.០០០​ហិកតានៅ​ក្នុង​ខេត្ត​បន្ទាយ​មាន​ជ័យនិ​ង​ខេត្ត​ឧត្តរ​មាន​ជ័យ​បាន​យក​ត្រាក់​ទ័រ​ និង​ត្រាក់​ទ័រ​ឈូស​ឆាយ​ចូល​មកកាន់ដីនេះ​កាលពី​ថ្ងៃ​សុក្រ ដើម្បី​ចាប់​ផ្ដើម​ភ្ជួរ​ដី​ដាំ​ដំឡូង​មី​។ លោក វណ្ណថា បាន​មាន​ប្រសាសន៍​ថា “មានគេ​យក​សាំង​​​ចាក់ដុតគ្រឿង​ចក្រ​របស់​ក្រុម​ហ៊ុន​នេះតែម្ត​ង។ យើង​មិនទាន់​ដឹង​ថា ជន​សង្ស័យ​ជា​នរណា​នៅឡើយ​ទេ”។

ក្រុ​ម​អ្នកភូមិ​មកពី​ខេត្ត​ទាំង​ពីរ​នេះ​បាន​ធ្វើការ​តវ៉ា​ជាច្រើន​លើក​ច្រើន​សា​ចាប់​តំាង​ពីដី​សម្បទាន​នេះ​ត្រូវ​បាន​ផ្ត​ល់ឲ្យ​កាលពី​ឆ្នាំ​២០០៩មក​ ដោយ​អះអាង​ថា ពួកគាត់​បាន​រស់​នៅ​ និង​ធ្វើ​ស្រែចម្ការ​លើ​ដីនេះ​ចាប់​តាំង​ពី​ទសវត្សរ៍​ឆ្នាំ​១៩៨០​មក​ម្លេ៉ះ។

នៅ​ក្នុងស្រុក​ថ្មពួកឯណោះវិញ ក្រុម​អ្នក​ភូមិ​ដែល​ជាប់​ពាក់​ព័ន្ធ​ក្នុង​វិវាទ​ដីធ្លី​ទទួ​ល​បាន​ដី​ទំហំ​២.៥០០​ហិកតា​កាលពី​ឆ្នាំ​២០១៣​តាម​រយៈ​គម្រោង​ផ្ដល់​ប័ណ្ណ​កម្មសិទ្ធិ​ដី​របស់​លោក​នាយក​រដ្ឋមន្ត្រី​ ហ៊ុន សែន។

លោក យ៉ត រ៉ៃ សមាជិក​ក្រុម​ប្រឹក្សា​ស្រុក​បាន​មាន​ប្រសាសន៍​ថា “ការ​ដុត​នេះ​មិន​ពាក់ព័ន្ធ​នឹង​​វិវាទ​​ដីធ្លី​ជាមួយ​អ្នក​ភូមិ​មូល​ដ្ឋាន​ឡើយ ពីព្រោះវិវាទ​នេះ​ត្រូវ​បាន​ដោះ​ស្រាយ​រួចហើយ​កាល​ពី​ឆ្នាំមុន​។ មាន​ការ​សង្ស័យ​អំពី​វិវាទ​ផ្ទៃក្នុង​នៅ​ក្នុង​ក្រុម​ហ៊ុន​នេះ​”។

លោក យ៉ត រ៉ៃ បាន​មាន​ប្រសាសន៍​ថា ដីទំហំ​ប្រហែល​២.០០០​ហិកតា​ត្រូវ​បាន​ដាំដំឡូង​មី​រួច​ហើយ ហើយ​ការដុត​នេះកើតឡើងនៅលើដីសម្បទានមួយផ្នែក​ដែល​ក្រុម​ហ៊ុន​បាន​ព្យាយាម​ភ្ជួរ​​​ដើម្បី​ដាំបន្ថែម​ទៀត។

លោក សារិន រី​ អ្នក​ភូមិ​ម្នាក់​ដែល​ជាប់​ពាក់​ព័ន្ធ​វិវាទ​ដីធ្លី​ក្នុង​ខេត្ត​បន្ទាយ​មា​ន​ជ័យ បាន​បញ្ជាក់​ថា វិវាទ​ដីធ្លី​ក្នុង​ខេត្ត​របស់​លោក​ត្រូវ​បាន​ដោះ​ស្រាយ​រួច​ហើយ ប៉ុន្តែ​លោក​បាន​និយាយ​ថា អ្នក​ភូមិ​ក្នុង​ខេត្ត​ឧត្តរ​មាន​ជ័យ​កំពុង​តវ៉ា​​​នឹង​​​ក្រុម​ហ៊ុននេះ​នៅឡើយ​។

លោក រី បាន​និយាយ​ថា ” ទាក់ទង​នឹង​ការ​ដុ​ត​គ្រឿង​ចក្រ​របស់​ក្រុម​ហ៊ុន​ យើង​សោក​ស្ដាយ​ណាស់​ចំពោះការ​បាត់​បង់​គ្រឿង​ចក្រទាំង​នោះ ហើយ​យើង​ចង់​ឲ្យ​ចាប់​អ្នក​ប្រព្រឹត្ត​ឲ្យ​បាន​ឆាប់​ដើម្បី​បង្ហាញ​ថា អ្នក​ភូមិ​ដែល​ធ្លាប់​​​តវ៉ា​​​នឹង​ក្រុម​ហ៊ុន​ពាក់​ព័ន្ធវិវាទដីធ្លី​គឺ​គ្មាន​កំហុស​ទេ”។ គេមិនអាច​ទាក់​ទង​បុគ្គលិក​ក្រុម​ហុ៊ន​ដើម្បីសុំអត្ថាធិប្បាយ​បានទេ​៕ សារុន​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស