31 C
Phnom Penh

តុលាការ​សាកសួរ​ជន​ជាប់​ចោទ​​​​លួចព្រះសារីរិកធាតុ និង​កសិករម្នាក់​​ដែលបាន​សារភាព​

ដោយ ឌឹ ខេមបូឌា ដេលី

បទវិភាគ

មន្ត្រី​តុលាការ​ម្នាក់​​បាន​ឲ្យដឹង​កាល​ពីម្សិលមិញថា កាល​ពី​សប្តាហ៍មុន សាលាដំបូង​​ខេត្ត​កណ្តាល​​បាន​សាក​សួរ​​បុរស​ប្រាំនាក់​​ ដែល​ត្រូវបាន​​​ឃុំ​ខ្លួន​ ចាប់​តាំង​ពី​​ខែ​ធ្នូ​​​ ជុំវិញការ​លួច​ព្រះ​សារីរិកធាតុ​ពី​ភ្នំ​ឧត្តុង្គ រួម​ជាមួយ​​​ជនសង្ស័យ​ ដែល​កាលពី​ខែ​កុម្ភៈ​ បាន​សារភាព​​​ថា​បាន​លួចតែម្នាក់ឯង។

​កាល​ពីដើម​ខែនេះ ​លោក លឹម ​សុគន្ធា ​ចៅក្រម​​ស៊ើប​​អង្កេត​ បានមាន​ប្រ​សាសន៍ថា ​តុលាការ​នេះ​​បាន​ឃាត់ខ្លួន​បុរស​ប្រាំ​នាក់​ ​ដែល​តុលាការ​ចាប់​ខ្លួន​​កាល​ពីខែ​​ធ្នូ ​ដើម្បីធានា​​ថា អ្នក​ដែល​​​​ពាក់​ព័ន្ធ​​ជាមួយ​ការ​លួចនេះ នឹង​ត្រូវ​​ផ្តន្ទាទោស។លោក​​បាន​មាន​ប្រសាសន៍​កាល​ពី​ម្សិលមិញថា ​វា​ឆាប់​ពេកហើយ​​​មិនអាច​ប្រកាស​​សេចក្តី​សម្រេច​​​របស់​តុលាការ​បានទេ។

លោកចៅក្រម សុគន្ធា ​បានមាន​ប្រសាសន៍ថា “ខ្ញុំបាន​សាក​សួរ​ពួកគេ​ទល់​មុខគ្នា​កាល​ពី​ថ្ងៃ​ពុធ ថ្ងៃ​​ទី​១១ ខែ​មិថុនា​។ ខ្ញុំ​មិន​​អាច​​បញ្ចេញ​​​ព័ត៌មាន​បាន​ទេ​ ​ត្រូវតែ​រក្សា​ការសម្ងាត់​ព្រោះ​ត្រូវធ្វើការ​ស៊ើបអង្កេត​បន្តិច​បន្តួច​ទៀត​។

ការ​លួច​ព្រះ​សារិរិកធាតុ ដែល​ប្រទេស​ស្រីលង្កាប្រគល់ឲ្យ​ប្រទេស​កម្ពុជា​ និង​បាន​យក​ទៅ​តម្កល់ទុក​​នៅ​ក្នុង​សក្សមុនីចេតីនៅលើ​កំពូល​ភ្នំឧដុង្គ​​ក្នុង​ឆ្នាំ​២០០២ បាន​នាំឲ្យមានការ​​ខឹង​សម្បា​​ពី​មជ្ឈដ្ឋាន​ទូទៅ ជា​ពិសេស​​ក្នុងចំណោមបព្វជិត​ ​ដែល​បាន​ចោទ​​រដ្ឋា​ភិបាលថា​​មិនបាន​ខិតខំប្រឹង​ប្រែង​​ស្វែង​រក​វត្ថុបុរាណនេះ​​មកវិញ។

ជាការ​ឆ្លើយ​តប​ នគរបាល​បាន​ចាប់​ខ្លួន​សន្តិ​សុខ​យាម​ភ្នំ​ឧដុង្គ​បី​នាក់ ឈ្មោះ ចម ថៃ អាយុ​៥៧​ឆ្នាំ​ សៀង សារិន អាយុ​៥៨​ឆ្នាំ និង​ឈ្មោះ កា សាក់​ អាយុ​៤៦​ឆ្នាំ និង​ប្រធាន​សន្តិសុខ​នៅ​ព្រះសក្យ​មុនី​ចេតី​ ឈ្មោះ ផា សុខែម អាយុ​៥៩​ឆ្នាំ រួម​ជាមួយ​នឹង​ឈ្មោះ កាន់​ សុភក្តិ​ អាយុ​៣៩​ឆ្នាំ​ជា​អ្នក​រត់​ម៉ូតូ​ឌុប​។ ជន​ទាំង​ប្រាំ​នាក់​នេះ​ត្រូវ​បាន​ចោទ​ប្រកាន់ពី​បទលួចព្រះ​សារីរិកធាតុ។

កាល​ពី​ខែ​កុម្ភៈ​ ឈ្មោះ កែវ រស្មី​ អាយុ​២៤​ឆ្នាំ​ដែល​មាន​ប្រវត្តិ​លួចរបស់​របរកំបុិកកំប៉ុក​​ ត្រូវ​បាន​ចាប់​ខ្លួន​ និង​ចោទ​ប្រកាន់​ពី​បទលួច​ព្រះសារីរិកធាតុ។ ក្រោយ​មក​ជន​នេះ​បាន​សារភាព​ថា ខ្លួន​ពិត​ជា​បាន​លួច​រតន​សម្បត្តិ​នេះ​មែន​ ដោយ​លប​ចូល​នៅ​ពេល​ដែល​សន្តិសុខ​ពេល​យប់​កំពុង​តែ​ដេក​ និង​បានប្រើ​ញញួរ និង​ទួណឺវីស​ ទម្លាយ​សក្យ​មុនី​ចេតី​ដែល​ត្រូវ​ចំណាយ​ទឹក​ប្រាក់​៤,៥​លាន​ដុល្លារ​ក្នុងការសាងសង់​​។

សមាជិក​គ្រួសារ​របស់​ជនជាប់​ចោទ​​ទាំង​ប្រាំនាក់​នេះ​បាន​ទៅ​តុលាការ​កាល​ពី​សប្តាហ៍​មុន​ និង​បាន​​លើក​ឡើង​កាល​ពីម្សិលមិញ​ថា ពួកគេ​សង្ឃឹម​ថា ទុក្ខ​វេទនា​រយៈ​ពេល​ប្រាំ​មួយ​ខែ​របស់​ពួក​គេនៅ​ក្នុង​ពន្ធ​នាគារ​នឹង​បញ្ចប់​ឆាប់​ៗ​នេះ​។

ឈ្មោះ រឿន ផល្លា ជា​កូន​ស្រី​របស់​ ចម ថៃ បាន​និយាយ​ថា ” ជន​សង្ស័យ​បាន​​សារភាព​ ប្រាប់​តុលាការ​ថា ខ្លួនគេ​បាន​ប្រព្រឹត្ត​បទ​ល្មើ​ស​នេះ​ដោយ​ខ្លួន​ឯង​”។

ឈ្មោះ សៀង​ ចំរើន​ ជា​កូន​ស្រី​របស់​ សៀង សារិន បាន​ឲ្យដឹង​ថា ឪពុក​របស់​នាង​បាន​សុំ​ឲ្យរដ្ឋាភិបាល​ជួយ​ធានា​ឲ្យ​មានការ​ដោះ​លែង​រូប​គាត់​ និង​បុរស​បួ​ននាក់ទៀត​។ នាង​បាន​ឲ្យដឹង​ថា “គាត់​អំពាវ​នាវ​ដល់​តុលាការ​ និងសុំ​រដ្ឋាភិបាល​ឲ្យ​ដោះ​លែង​ពួកគាត់​ពីព្រោះ​ពួកគាត់​មិន​បាន​ប្រព្រឹត្ត​បទល្មើសនេះ​ឡើយ​។ ខ្ញុំ​សង្ឃឹម​ថា ពួកគាត់​នឹង​ត្រូវ​លើក​លែង​ការ​ចោទ​ប្រកាន់​នៅ​ខែ​នេះ​”៕ ប៊ុននី​​​​​

​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស