នគរបាលបានឲ្យដឹងកាលពីម្សិលមិញថា មនុស្សចំនួនបួននាក់ដែលគេចោទថាបានវាយអ្នកក្បែរខាងមា្នាក់របស់ខ្លួនដោយព្រនង់ឈើ និងបង្ខំឲ្យគាត់ផឹកថ្នាំសម្លាប់សត្វល្អិតជុំវិញជម្លោះព្រំដីនៅក្នុងខេត្តត្បូងឃ្មុំ ត្រូវបានចាប់ខ្លួន។
លោក ប៉េង អេងហាក់ អធិការនគរបាលស្រុកមេមុត បានមានប្រសាសន៍ថា ជនរងគ្រោះឈ្មោះ ជា សុផុន អាយុ៣១ឆ្នាំ បានស្លាប់ក្នុងមន្ទីរពេទ្យមួយនៅប្រទេសវៀតណាមកាលពីយប់ថ្ងៃច័ន្ទ ដោយសារតែការវាយប្រហារនេះ។
ជនសង្ស័យទាំងអស់នេះ មកពីគ្រួសារតែមួយ។ឈ្មោះ ឌឿន ព្រាម អាយុ២៧ឆ្នាំ និងប្រពន្ធឈ្មោះ សឿន ណន អាយុ៣៤ឆ្នាំ ប្អូនប្រុសរបស់ប្រពន្ធរូបនេះឈ្មោះ សឿន មៀន អាយុ២៣ឆ្នាំ និងឪពុករបស់ស្ត្រីរូបនេះឈ្មោះ ប៉ាចុង សឿន អាយុ៥៥ឆ្នាំ ត្រូវបានចាប់ខ្លួនកាលពីថ្ងៃអាទិត្យនៅក្នុងចម្ការកៅស៊ូរបស់ពួកគេ។ សមាជិកគ្រួសារនេះត្រូវបានចោទថាបានវាយប្រហារ ជា សុផុន បន្ទាប់ពីគាត់ឈ្លោះប្រកែកជាមួយអ្នកស្រី ណន នៅថ្ងៃនោះ។
លោក អេងហាក់ បានមានប្រសាសន៍ថា “ក្រោយមក ស្ត្រីរូបនេះបានហៅប្តី ប្អូនប្រុសនិងឪពុករបស់ខ្លួន។ ពួកគេបានយកព្រនង់ឈើព្រួតគ្នាវាយលើរាងកាយរបស់ជនរងគ្រោះរហូតដល់គាត់របួសធ្ងន់”។ បន្ទាប់នោះ ពួកគេបានយកខ្សែចងដៃនិងជើងរបស់ជនរងគ្រោះជាប់នឹងខ្ទមតូចមួយនៅក្នុងចម្ការកៅស៊ូ។ ក្រោយមក ពួកគេបានបង្ខំឲ្យជងរងគ្រោះផឹកថ្នាំសម្លាប់សត្វល្អិតក្នុងការប៉ុនប៉ងសម្លាប់ជនរងគ្រោះ”។
លោក បេង ឫទ្ធី នាយនគរបាលឃុំជាំក្រវៀន បានមានប្រសាសន៍ថា ជម្លោះនេះបានកើតមានរយៈពេលជាងមួយឆ្នាំមកហើយ នៅពេលជងរងគ្រោះដាំដើមដំឡូងមីនៅតាមព្រំដីរបស់ពួកគេ។ លោក ឫទ្ធី បានបន្ថែមថា បន្ទាប់ពីការវាយប្រហាររួច ជនរងគ្រោះត្រូវបានអ្នកភូមិផ្សេងទៀតប្រទះឃើញ និងបញ្ជូនទៅមន្ទីរពេទ្យបង្អែកស្រុក។ លោកបានមានប្រសាសន៍ថា ” បន្ទាប់ពីនគរបាលមូលដ្ឋានទទួលបានសេចក្តីរាយការណ៍ពីអ្នកភូមិ នគរបាលមូលដ្ឋានបានចុះទៅដល់កន្លែងកើតហេតុ និងបានឃើញជងរងគ្រោះកំពុងតែក្អួត”។
“លក្ខណៈបែបនេះនាំឲ្យពួកគេជឿថា ជនរងគ្រោះពុលថ្នាំសម្លាប់សត្វល្អិត។ នៅជិតកន្លែងកើតហេតុនគរបាលក៏បានរកឃើញព្រនង់ឈើប្រឡាក់ឈាម និងដបថ្នាំសម្លាប់សត្វល្អិតទទេ។ជនរងគ្រោះរងរបួសធ្ងន់នៅត្រង់ក្បាលរបស់ខ្លួន និងមានស្នាមជាំលើរាងកាយផងដែរ”។
លោក អេងហាក់ បានមានប្រសាសន៍ថា បើទោះជាបញ្ជូនទៅប្រទេសវៀតណាមដើម្បីព្យាបាលក៏ដោយ ក៏ជនរងគ្រោះបានស្លាប់ដោយសារអ្វីដែលវេជ្ជបណ្ឌិតជឿថាពុលដោយសារការផឹកថ្នាំសម្លាប់សត្វល្អិត។
លោក អេងហាក់ បានមានប្រសាសន៍ថា “បន្ទាប់ពីពួកគេត្រូវបានចាប់ខ្លួននិងសាកសួរនៅអធិការដ្ឋាននគរបាលស្រុក ជនសង្ស័យទំាងអស់បានសារភាពថា ខ្លួនពិតជាបានធ្វើឲ្យជនរងគ្រោះរបួសធ្ងន់ធ្ងរមែន ហើយថា ពួកគេបានយកខ្សែចងដៃនិងជើងគាត់”។ទោះជាយ៉ាងណា ពួកគេបានបដិសេធថាមិនបានបំពុលជងរងគ្រោះទេ។
លោក កែវ សំនៀង អធិការរងនគរបាលស្រុកបានមានប្រសាសន៍ថា ជនសង្ស័យត្រូវបានបញ្ជូនទៅកាន់ស្នងការដ្ឋាននគរបាលខេត្តកាលពីម្សិលមិញដើម្បីធ្វើការសាកសួរបន្ថែមទៀត។
លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាមបានមានប្រសាសន៍ថា ឯកសារទាក់ទងនឹងសំណុំរឿងនេះ បានមកដល់សាលាដំបូងខេត្តហើយកាលពីរសៀលម្សិលមិញ ហើយជនសង្ស័យនឹងត្រូវបញ្ជូនទៅតុលាការនាថ្ងៃនេះដើម្បីប្រឈមនឹងការចោទប្រកាន់៕ប៊ុននី