29 C
Phnom Penh

កម្មករ​នេសាទខ្មែរ​ស្លាប់​ម្នាក់ទៀត​ហើយ​ពេលគេច​ខ្លួន​ពី​ប្រទេសថៃតាម​ខេត្ត​កោះកុង

ដោយ ឌឹ ខេមបូឌា ដេលី

បទវិភាគ

សាកសព​បុរសខ្មែរម្នាក់​ដែលបាន​ស្លាប់​នៅពេល​គាត​់​លោតចេញពី​ទូកនេសាទនៅក្នុង​ប្រទេស​ថៃដើម្បី​គេ​ចពី​ការ​ចាប់ខ្លួន​អំឡុងពេលមាន​ការ​​​បង្ក្រាប​​​លើ​ពលករ​ចំណាក​​​ស្រុកខុស​ច្បាប់​នោះ ត្រូវ​បាន​បញ្ជូន​មក​ដល់ប្រទេស​កម​្ពុជាតាម​ច្រកទ្វារ​អន្តរជាត​ិ​ចាំយាមនៅក្នុង​ខេត្ត​កោះ​កុងហើយ​​កាលពី​ថ្ងៃច័ន្ទ។

ការស្លាប់នេះ​បាន​ធ្វើ​ឲ្យ​ពលករ​ចំណាកស្រុក​ខ្មែរ​មាន​ចំនួន​រហូត​ដល់​៩នាក់ហើយ​​ដែលបាន​ស្លាប់​នៅក្នុង​ប្រទេស​ថៃចាប់​តាំងពី​ថ្ងៃអាទិត្យមក នៅពេល​ទាហានថៃ​ដាក់សម្ពាធ​ទៅលើ​ពលករ​ខុសច្បាប់ និង​ក្រុម​ហ៊ុន​នានា​ដែល​ជួល​ពួកគេ​ បន្ទាប់ពី​ការ​ផ្តួល​រំលំរដ្ឋាភិបាល​ថៃកាលពី​ខែមុន។

ទាហាន​ថៃ​បាន​បដិសេធថាមិន​បាន​ព្យាយាម​បណ្តេញ​ពលរដ្ឋ​ខ្មែរ​ចេញឡើយ។ ប៉ុន្តែ​​បើ​តាម​ការ​រាប់ចំនួន​ផ្លូវ​ការ​របស់​រដ្ឋាភិបាល​កម្ពុជា ពលករ​ជាង​១៥០.០០០នាក់​បានសម្រុក​ត្រឡប់​មក​​​ស្រុក​កំណើត​​វិញ​ចាប់តាំងពី​ចុង​សប្តាហ៍មុន គឺមាន​ចំនួន​ច្រើន​ជាង​​ឆ្នាំ​ធម្មតា។

លោក ដុំ សារ៉ន ប្រធាន​រដ្ឋបាល​ច្រកទ្វារ​អន្ត​រជាតិ​ចាំយាម​បាន​មាន​ប្រសាសន៍ថា ឯម អុឹម អាយុ​៣៩ឆ្នាំ និង​ពលករ​ខ្មែរ​ប្រាំនាក់ទៀត​ដែលធ្វើការ​ខុសច្បាប់​នៅលើ​ទូក​នេសាទ​ថៃ​បាន​លោត​ចេញពីទូកកាលពី​ថ្ងៃសុក្រ​ ដោយ​សង្ឃឹមថា នឹង​គេ​ចពីការ​ចាប់ខ្លួន​ដោយ​​​ទាហាន​ថៃ។ លោក​បាន​មាន​ប្រសាសន៍ថា ព័ត៌មាននេះគឺទទួលបាន​ពី​សេចក្តីរាយការ​ណ៍របស់​​​​នគរ​​​បាល​​​ថៃ​ដែលបាន​មក​ជាមួយ​សាកសព​ ឯម អុឹម ឆ្លង​ព្រំដែនកាលពីល្ងាច​ថ្ងៃច័ន្ទ។

លោក សារ៉ន បាន​ពន្យល់ថា សេចក្តីរាយការ​ណ៍នេះ​បាន​អះអាងថា ឯម អុឹម បាន​លង់​ទឹកស្លាប់ ប៉ុន្តែ​លោក​មិន​បានពន្យល់ថាដោយសារ​មូលហេតុអ្វីនោះទេ ហើយ​លោកបាន​បន្ថែមថា ពលករ​ប្រាំនាក់ទៀត​កំពុង​ត្រូវ​ឃុំខ្លួន​នៅក្នុង​ប្រទេសថៃនៅឡើយ។ លោក​បាន​មាន​ប្រសាសន៍ថា “ឯម អុឹម បាន​ស្លាប់​ដោយសារ​លោត​ចូលក្នុងទឹក​ ពីព្រោះ​គាត់​ខ្លាច​នគរបាល​ថៃចាប់ខ្លួន ពីព្រោះ​គាត់​បាន​ទៅធ្វើការ​នៅប្រទេសថៃ​ដោយខុសច្បាប់”។

លោក​បាន​បន្ថែម​ថា អាជ្ញាធរ​មូលដ្ឋាន​បាន​បូជា​សព​ ឯម អុឹម នៅថ្ងៃនោះ​តាម​សំណើ​របស់​ប្រពន្ធគាត់នៅក្នុងខេត្ត​កំពង់​ចាម ដែលបាន​ប្រាប់​ពួកគេ​ថា អ្នកស្រី​មិន​អាច​រក​ប្រាក់​ធ្វើបុណ្យ​​បាន​ឡើយ។

ខណៈដែល​ច្រក​ទ្វារ​អន្តរជាតិ​ប៉ោយ​ប៉ែត​ទៅទិស​​​​ខាងជើង​​​​មាន​ពលករ​សម្រុក​ចាកចេញច្រើន​ដោយ​សារតែ​ស្ថានការ​ណ៍ថ្មីៗនៅក្នុង​ប្រទេសថៃ ក៏មាន​ពលករ​ខ្មែរ​រាប់​រយ ឬអាច​រាប់ពាន់នាក់​មក​តាមច្រកទ្វារ​ចាំយាមដែរ។

លោក​ សារ៉ន មិនដឹង ថាតើ​មាន​ពលករ​ចំនួន​​ប៉ុន្មាននាក់​បានវិល​ត្រឡប់មក​តាម​ច្រកទ្វារ​នេះចាប់តាំងពី​ស្ថានការ​ណ៍នេះបាន​ចាប់ផ្តើម​កាលពី​​​​សប្តាហ៍មុនឡើយ​ ប៉ុន្តែ​លោក​បាន​មាន​ប្រសាសន៍ថា យ៉ាងហោចណាស់​ពលករ​១.៣០០នាក់​បាន​ឆ្លង​កាត់​ចាប់ពី​ថ្ងៃអាទិត្យ​ដល់​ព្រឹក​ម្សិលមិញ។

លោក នាង​ បូរ៉ាទីណូ អ្នកសម្របសម្រួល​អង្គការ​សិទ្ធិមនុស្ស​អាដហុក​ប្រចាំខេត្ត​កោះកុង​បាន​បូកសរុប​ពី​ថ្ងៃអាទិត្យ​ដល់ថ្ងៃម្សិលមិញគឺមាន​ចំនួន​​ជាង​​១.៥០០នាក់​ ហើយលោក​ប៉ាន់ប្រមាណថា ប្រហែល​១៥ភាគរយ​ជាអ្នកនេសាទ។

លោក​បាន​មាន​ប្រសាសន៍ថា ច្រកទ្វារ​អន្តរជាតិ​ចាំយាមនៅថ្ងៃធម្មតាគឺ​មាន​ពលករខ្មែរ​ប្រហែល​៥០នាក់​​ប៉ុណ្ណោះ​​​ឆ្លងកាត​់​។ លោក​បាន​មាន​ប្រសាសន៍ថា “ពួកគេ​មួយ​ចំនួន​និយាយថា ពួកគេ​បាន​ឃើញ​ទាហានថៃ ឬ​នគរបាល​ថៃ​សុំឲ្យ​ពួកគេ​ឡើងជិះរថយន្ត​ ហើយ​បញ្ជូន​ពួកគេ​មក​ព្រំដែន។ មួយ​ចំនួនទៀត​និយាយថា ពួកគេ​គ្រាន់តែឮពាក្យ​ចចាមអារ៉ាមថា ទាហានថៃ​នឹង​ចាប់ខ្លួន​ពួកគេ​ ដូច្នេះហើយ​​បាន​ជា​ពួកគេ​ត្រឡប់មក​វិញ​ដោយ​ខ្លួន​ឯង”។

នៅច្រកទ្វារ​អន្ត​រជាត​​ិ​ប៉ោយ​ប៉ែតឯណោះវិញ លោក​បាន​មាន​ប្រសាសន៍ថា អាជ្ញាធរ​មូលដ្ឋាន​បាន​ផ្ត​ល់​អាហារ និង​ជម្រក​បណ្តោះអាសន្ន​ដល់​ពលករដែល​វិលត្រឡប់មក​វិញ ហើយ​ជួយសម្រួលដល់ការ​វិលត្រឡប់ទៅ​ស្រុក​កំណើត​របស់ខ្លួន​វិញ៕សារុន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស