28 C
Phnom Penh

អាដហុកបាត់​​​ទំនាក់​​​ទំនង​​​ជាមួយ​​​មនុស្ស​​​បី​​​នាក់​​​ដែល​​​អះ​​​អាង​​​ថា រដ្ឋាភិបាល​​​យោធា​​​ថៃ​​​ សម្លាប់​​​ពល​​​ករ​​​ខ្មែរ​​​

ដោយ ឌឹ ខេមបូឌា ដេលី

បទវិភាគ

អង្គការ​​​សិទ្ធ​​​ិ​​​មនុស្ស​​​ក្នុងស្រុក​​​មួយ​​​ ដែល​​​កាល​​​ពី​​​សប្តាហ៍​​​មុនបាន​​​ចុះ​​​ផ្សាយ​​​​​ការ​​​រាយ​​​ការណ៍​​​​​​របស់​​​សាក្សី​​​ដែល​​​​​អះអាង​​​ថា ពល​​​ករ​​​ខ្មែរ​​​ចំនួន​​​ប្រាំបួននាក់​​​ត្រូវ​​​យោធា​​​ថៃ​​​បាញ់​​​សម្លាប់​​​ បាន​​​និយាយ​​​កាល​​​ពីម្សិលមិញ​​​ថា ខ្លួន​​​បាន​​​បាត់​​​ទំនាក់ទំនង​​​ជា​​​មួយ​​​សាក្សី​​​ទាំង​​​នោះ​​​ហើយ​​​។

កាល​​​ពី​​ថ្ងៃ​​​ពុធសប្តាហ៍​​​មុន​​​ អង្គការ​​​អាដ​​​ហុក​​​បាន​​​លើក​​​ឡើង​​​នៅ​​​ក្នុង​​​សេចក្តី​​​ថ្លែង​​​ការ​​​ណ៍​​​ថា ខ្លួន​​​ “​​​មាន​​​ការ​​​ព្រួយ​​​បារម្ភ​​​យ៉ាង​​​ខ្លាំង​​​ចំពោះ​​​ការ​​​រាយការណ៍​​​របស់​​​សាក្សី​​​ប្រាប់​​​អ្នក​​​សើុប​​​អង្កេត​​​របស់​​​​​​អង្គការ​​​អាដ​​​ហុក​​​​​​អំពីការ​​​​​​សម្លាប់​​​ពល​​​ករ​​​ខ្មែរ​​​ចំណាក​​​ស្រុក​​​រហូត​​​ដល់ទៅ​​​ប្រាំបួន​​​នាក់​​​ពី​​​សំណាក់​​​កង​​​កម្លាំង​​​ប្រដាប់អាវុធ​​​ថៃ​​​ ដែល​​​ជា​​​ផ្នែក​​​មួយ​​​នៃ​​​យុទ្ធ​​​នាការ​​​​​របស់​​​រដ្ឋាភិបាល​​​យោធា​​​ ដើម្បី​​​បណ្តេញ​​​ពល​​​ករ​​​ចំណាក​​​ស្រុក​​​ខុស​​​ច្បាប់​​​ ដែល​​​ធ្វើ​​​ការ​​​នៅ​​​ក្នុង​​​ប្រទេស​​​នេះ​​​”។

ទោះ​​​ជា​​​យ៉ាង​​​ណា ​​​កាល​​​ពីម្សិលមិញ លោក ធន សារាយ​​​ ប្រធាន​​​អង្គការ​​​អាដ​​​ហុក​​​បាន​​​មាន​​​ប្រសាសន៍​​​ថា សាក្សី​​​ទាំង​​​បី​​​នាក់​​​នោះ​​​បាន​​​បាត់​​​ទំនាក់​​​ទំនង​​​ហើយ​​​។ លោក​​​មាន​​​ប្រសាសន៍​​​បន្ត​​​ទៀត​​​​​​ថា “ពួកគេ​​​បាន​​​ធ្វើ​​​ដំណើរ​​​ទៅ​​​ស្រុកកំណើត​​​​​​របស់​​​ខ្លួន​​​នៅ​​​តាម​​​បណ្តា​​​ខេត្ត​​​ហើយ​​​ហើយ​​​ពួកគេ​​​គ្មាន​​​សីុម​​​កាត​​​ទេ ​​​ដូច្នេះ​​​​​ហើយ​​​ធ្វើ​​​ឲ្យ​​​​​​មាន​​​ការ​​​ពិបាក​​​ទាក់​​​ទង​​​ទៅ​​​ពួកគេ​​​យ៉ាង​​​ខ្លាំង​​​។ ទន្ទឹម​​​នឹង​​​នេះដែរ ​​​អ្នក​​​ខ្លះ​​​ក្នុង​​​ចំណោម​​​ពួកគេ​​​ចង់​​​វិល​​​ត្រឡប់​​​ទៅ​​​ប្រទេស​​​ថៃ​​​វិញ ដូច្នេះ​​​ហើយ​​​ពួកគេ​​​មិន​​​ចង់​​​ឲ្យ​​​ផ្សព្វ​​​ផ្សាយ​​​រឿង​​​នេះ​​​ឡើយ​​​​​​”។

ពល​​​ករខ្មែរ​​​​​​ចំណាក​​​ស្រុក​​​ជាង​​​១៥០.០០០នាក់​​​បាន​​​ភៀស​​​ខ្លួន​​​ពី​​​ប្រទេស​​​ថៃ​​​ ដោយ​​​ឆ្លង​​​ដែន​​​មក​​​កាន់​​​កម្ពុជា​​​វិញ​​​ចាប់​​​តាំង​​​ពី​​​​​​យោធា​​​បាន​​​ឡើង​​​កាន់​​​អំណាច​​​កាល​​​ពី​​​ចុង​​​ខែ​​​ឧសភា​​​មក​​​។

ខណៈ​​​ដែល​​​គ្មាន​​​ជន​​​រងគ្រោះ​​​ណា​​​ម្នាក់​​​ក្នុង​​​អំពើ​​​ហិង្សា​​​បង្ក​​​ដោយ​​​រដ្ឋាភិបាល​​​យោធា​​​ថៃ​​​មិន​​​បាន​​​ចេញ​​​មុខ​​​បក​​​ស្រាយ​​​នោះ​​​ កាកបាទក្រហម​​​កម្ពុជា​​​បាន​​​​​ធ្វើ​​​សេចក្តី​​​រាយការណ៍​​​កាល​​​ពីម្សិលមិញ​​​ថា ខ្លួន​​​ក៏​​​ទទួល​​​បាន​​​ដំណឹង​​​ដែរ​​​ថា ពល​​​ករ​​​ខ្មែរ​​​ចំណាកស្រុក​​​បាន​​​ប្រឈម​​​តតាំង​​​ជា​​​មួយ​​​ទាហាន​​​ថៃ​​​។

លោក​​​ អ៊ុយ​​​ សំអាត​​​ ប្រធាន​​​នាយក​​​​​​ដ្ឋាន​​​គ្រប់​​​គ្រង​​​គ្រោះ​​​មហន្ត​​​រាយ​​​នៃ​​​កាក​​​បាទ​​​ក្រហម​​​កម្ពុជា​​​បាន​​​មាន​​​ប្រសាសន៍​​​ថា បន្ទាប់​​​ពី​​​ពល​​​ករ​​​ខ្មែរ​​​ចាប់​​​ផ្តើម​​​រត់​​​ភៀសខ្លួន​​​ពី​​​ប្រទេស​​​ថៃ​​​ ម្ចាស់​​​រោង​​​ចក្រ​​​មួយ​​​ចំនួន​​​​​បាន​​​ចាប់​​​បង្ខាំង​​​កម្មករ​​​​​​របស់​​​ខ្លួន​​​។

លោក​​​បាន​​​មាន​​​ប្រសាសន៍​​​ទៀត​​​ថា “ពេល​​​ខ្លះ​​​យោធា​​​ថៃ​​​ចុះ​​​ឆែក​​​ឆេរ​​​តាម​​​រោង​​​ចក្រ​​​រក​​​មើល​​​ពល​​​ករ​​​​​​ខ្មែរ​​​ ហើយ​​​បង្ខំ​​​ឲ្យ​​​ពួក​​​គេ​​​ចាក​​​ចេញ​​​។ នេះ​​​គឺ​​​ជា​​​ពេល​​​ដែល​​​ពួកគេ​​​វៃ៉គ្នា​​​។ ខ្ញុំ​​​មិន​​​ដឹង​​​អំពី​​​ការ​​​រង​​​របួស​​​របស់​​​ពល​​​ករ​​​ខ្មែរ​​​ទេ ប៉ុន្តែ ពួកគេ​​​ពិត​​​ជា​​​បាន​​​វ៉ៃ​​​គ្នា​​​មែន​​​”។​​​

លោក​​​ ផាក​​​ឌី ទូឆៃ​​​យុទ្ធ​​​ ឯក​​​អគ្គ​​​រាជ​​​ទូត​​​ថៃ​​​ប្រចាំ​​​កម្ពុជា​​​បាន​​​មាន​​​ប្រសាសន៍​​​ថា លោក​​​កំពុង​​​រង់ចាំ​​​​​​របាយ​​​ការណ៍​​​លម្អិត​​​​​​​​​​​​​​​​ពី​​​​​​អង្គការ​​​អាដ​​​ហុក​​​ មុន​​​ពេល​​​ចាត់​​​វិធានការ​​​បន្ថែម​​​ទៀត។

លោក​​​មាន​​​ប្រសាសន៍​​​ថា ” ខ្ញុំ​​​បាន​​​ទាក់​​​ទង​​​ទៅ​​​អាជ្ញាធរ​​​ថៃ​​​រួច​​​ហើយ​​​ ហើយ​​​គ្មាន​​​សេចក្តី​​​រាយការណ៍​​​អំពី​​​រឿង​​​នោះ​​​ [ពល​​​ករ​​​ខ្មែរ​​​ប្រាំបួន​​​នាក់​​​ស្លាប់​​​​​​​​​]​​​ ទេ”។ លោក​​​បាន​​​មាន​​​ប្រសាសន៍​​​ទៀត​​​ថា របាយ​​​ការណ៍​​​លម្អិត​​​ពី​​​អង្គការ​​​អាដ​​​ហុក នឹង​​​ជួយ​​​ធ្វើ​​​ឲ្យ​​​ការ​​​សើុប​​​អង្កេត​​​របស់​​​លោក​​​លើ​​​សេចក្តី​​​រាយការណ៍​​​អំពី​​​ការ​​​ស្លាប់​​​នេះ​​​កាន់​​​តែ​​​ច្បាស់។

ពាក់​​​ព័ន្ធ​​​នឹង​​​សេចក្តី​​​រាយការណ៍​​​ដែល​​​ថា​​​ ពល​​​ករ​​​ខ្មែរ​​​ដែល​​​ត្រូវ​​​បាន​​​ចាប់​​​បង្ខាំង​​​នៅ​​​តាម​​​រោង​​​ចក្រ​​​ត្រូវ​​​​​​យោធា​​​ប្រមូល​​​ផ្តុំ​​​ចាប់​​​ខ្លួន ​​​លោក​​​ ផាក​​​ឌី ទូឆៃយុទ្ធ បាន​​​មាន​​​ប្រសាសន៍​​​ថា “យើង​​​មិន​​​ធ្វើ​​​រឿង​​​បែប​​​នោះ​​​ទេ។ ពល​​​ករ​​​ខ្មែរ​​​មាន​​​សារៈសំខាន់​​​ចំពោះ​​​សេដ្ឋ​​​កិច្ច​​​ថៃ​​​”។

លោក ធន សារាយ​​​ បាន​​​មាន​​​ប្រសាសន៍​​​ថា អង្គការ​​​អាដហុក​​​នឹង​​​ដាក់​​​ជូន​​​របាយការណ៍​​​ពេញ​​​លេញ​​​ដែល​​​មាន​​​ខ្សែ​​​អាត់​​​សំឡេង​​​របស់​​​សាក្សី​​​ ទោះ​​បី​​​ជា​​​ស្វែង​​​រក​​​សាក្សី​​​ទាំង​​​នោះ​​​ឃើញ​​​ ឬមិន​​​ឃើញ​​​ក៏​​​ដោយ​​​។​​​

លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា ” យើង​​​មិន​​​ចង់​​​បង្ក​​​បញ្ហា​​​រវាង​​​ប្រទេស​​​ទាំង​​​ពីរ​​​ទេ ​​​ប៉ុន្តែ ទាំង​​​នេះ​​​គឺជា​​​ការ​​​លើក​​​ឡើង​​​របស់​​​សាក្សី​​​។ ហើយ​​​នៅ​​​ក្នុង​​​សេចក្តី​​ថ្លែង​​​ការណ៍​​​នេះ​​​យើង​​​មិន​​​បញ្ជាក់​​​ថា វា​​​ពិត​​​ជា​​​បាន​​​កើត​​​ឡើង​​​មែន​​នោះ​​​ទេ​​​ យើង​​​គ្រាន់​​​តែ​​​និយាយ​​​ថា យើង​​​ទទួល​​​បាន​​​ព័ត៌មាន​​​នេះ​​​ពី​​​សាក្សី​​​ប៉ុណ្ណោះ”​​​៕សុខុម​​​

​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស