នៅពេលការសាងសង់អាងស្តុកទឹកសម្រាប់ស្រោចស្រពដំណាំចំនួនពីរនៅក្នុងស្រុកភ្នំក្រវាញ ខេត្តពោធិ៍សាត់ជិតចប់រួចរាល់ ប្រជាពលរដ្ឋក្នុងមូលដ្ឋានដែលត្រូវរើចេញពីតំបន់នេះបានត្អូញត្អែរកាលពីម្សិលមិញថា នៅកន្លែងតាំងលំនៅថ្មីមានស្ថានភាពរស់នៅលំបាក។
លោក ពេជ្រ អីុលួន មេឃុំរកាត កន្លែងសាងសង់ទំនប់សម្រាប់ស្តុកទឹកទុកស្រោចស្រពដំណាំរដូវប្រាំងនៅក្នុងខេត្តពោធិ៍សាត់ និងខេត្តបាត់ដំបង បានមានប្រសាសន៍ថា ពេលនេះអាជ្ញាធរកំពុងបង្កើនការត្រៀមផ្លាស់ទីលំនៅប្រជាពលរដ្ឋ៤០គ្រួសារទៅកាន់ទីតាំងថ្មី មុនពេលដីនេះត្រូវទឹកជន់លិចនៅខែសីហា។
លោកមានប្រសាសន៍ថា “យើងកំពុងពន្លឿនជំហានទី១នៃការឈូសឆាយដីនៅកន្លែងតាំងលំនៅថ្មីសម្រាប់ប្រជាពលរដ្ឋដែលបាត់បង់លំនៅដ្ឋានរបស់ខ្លួន”។ លោកបានមានប្រសាសន៍ទៀតថា គម្រោងរបស់ក្រសួងធនធានទឹកនេះអនុវត្តដោយក្រុមហ៊ុនមួយរបស់ចិន ដែលលោកមិនចាំឈ្មោះ។
ប៉ុន្តែ ទោះបីជាមានផែនការតាំងលំនៅថ្មីក្តី ក៏អ្នកភូមិវាលវង់ ដែលត្រូវផ្លាស់ទីលំនៅដោយសារទំនប់ស្ទឹងពោធិ៍សាត់ទី៣ និងទំនប់ស្ទឹងពោធិ៍សាត់ទី៥ ដែលបានបើកការរដ្ឋានសាងសង់កាលពីឆ្នាំ២០១១ និយាយថា ពួកគាត់មិនពេញចិត្តនឹងការផ្តល់សំណងទេ។
ប្រជាពលរដ្ឋ៤០គ្រួសារដែលផ្ទះរបស់ពួកគាត់ស្ថិតនៅក្នុងតំបន់អាងស្តុកទឹកទំហំ៨០០ហិកតានេះ នឹងទទួលបានសំណងជាសាច់ប្រាក់ និងផ្ទះថ្មីនៅកន្លែងតាំងលំនៅថ្មីដែលស្ថិតនៅចម្ងាយពីទីតាំងចាស់៥គីឡូម៉ែត្រ។ចំណែកឯប្រជាពលរដ្ឋ១៤៥គ្រួសារទៀត ដែលដីកសិកម្មរបស់ពួកគាត់នឹងត្រូវទឹកលិចនៅខែសីហានោះ ត្រូវបានអាជ្ញាធរសន្យាផ្តល់សំណងតែសាច់ប្រាក់ប៉ុណ្ណោះ។
លោក ម៉ម សាមិន អាយុ៤០ឆ្នាំ ដែលនឹងត្រូវបាត់បង់ដីកសិកម្មទំហំ៦ហិកតា បាននិយាយថា គាត់បានផ្តិតមេដៃលើកិច្ចព្រមព្រៀងមួយកាលពីថ្ងៃច័ន្ទ ដើម្បីទទួលសំណង៤.០០០ដុល្លារចំពោះការបាត់បង់ផ្ទះ និងដីកសិកម្មរបស់ខ្លួន មុនពេលមកកាន់កន្លែងតាំងលំនៅថ្មីនេះ។
គាត់និយាយថា “ខ្ញុំបានទៅកន្លែងតាំងលំនៅថ្មីនៅថ្ងៃនេះ ហើយឃើញថា ដីនៅទីនោះគ្មានជីជាតិ ដែលអាចធ្វើកសិកម្មបានទេ វាសម្បូរដោយដីខ្សាច់”។គាត់បានលើកឡើងបន្តទៀតថា អ្នកភូមិនឹងមិនធ្វើការតវ៉ាទេ ពីព្រោះអាជ្ញាធរមូលដ្ឋានបានប្រាប់ពួកគាត់ថា ការតវ៉ាបែបនេះនឹងធ្វើឲ្យពួកគាត់បាត់បង់សំណង។
លោក ជិន វិត អាយុ៣២ឆ្នាំ ជាកសិករម្នាក់ដែលបានផ្លាស់ទៅរស់នៅកន្លែងតាំងលំនៅថ្មីទំហំ៦៧៥ហិកតារួចទៅហើយនោះ និយាយថា គ្មានសាលារៀនទេ និងគ្មានទឹកចម្ងាយជាងមួយគីឡូម៉ែត្រជុំវិញកន្លែងតាំងលំនៅថ្មី។ បុរសទាំងពីរនេះនិយាយថា ពួកគាត់មិនទាន់ទទួលបានសំណងជាប្រាក់នៅឡើយទេ។
លោកមេឃុំ ពេជ្រ អីុលួន បានមានប្រសាសន៍ថា គ្រួសារទាំងនេះនឹងទទួលបានសំណងចន្លោះពី៧០០ដុល្លារ ទៅ ៥.០០០ដុល្លារ នៅពេលការធ្វើលិខិតស្នាមនៅក្រសួងសេដ្ឋកិច្ច និងហិរញ្ញវត្ថុចប់រួចរាល់”៕សុខុម