តំណាងប្រហែល១២នាក់របស់អ្នកភូមិជនជាតិភាគតិចព្នងប្រមាណ២០០នាក់ដែលបានចោទប្រកាន់ក្រុមហ៊ុនចម្ការកៅស៊ូមួយថាបានរំលោភយកដីដូនតារបស់ពួកគាត់នៅក្នុងខេត្តក្រចេះបានមកដល់រាជធានីភ្នំពេញកាលពីម្សិលមិញដើម្បីសុំឲ្យលោកនាយករដ្ឋមន្ត្រី ហ៊ុន សែន និងអង្គការសហប្រជាជាតិជួយ។
ពួកគាត់បានប្រគល់ញត្តិទៅតំណាងខុទ្ទកាល័យលោកនាយករដ្ឋមន្ត្រី ហ៊ុន សែន និងលោក សុរិយា ស៊ូបេឌី ប្រេសិតសិទ្ធិមនុស្សអង្គការសហប្រជាជាតិដែលមកបំពេញទស្សនកិច្ចនៅប្រទេសកម្ពុជា។
គ្រួសារអ្នកភូមិលើកឡើងថា ពួកគាត់បានប្រើប្រាស់ដីដែលមានវិវាទទំហំ១៥០ហិកតាច្រើនជំនាន់មកហើយដើម្បីធ្វើស្រែចម្ការនិងសម្រាប់ជាកន្លែងកប់សព ហើយបានចោទប្រកាន់ក្រុមហ៊ុន Dau TuSaigon-Binh Phuoc ពីបទឈូសឆាយដីនេះកាលពីខែមីនា។
លោក ខុម ញ៉ោម តំណាងអ្នកភូមិម្នាក់បាននិយាយថា អាជ្ញាធរក្នុងស្រុកចិត្របុរីសុខចិត្តផ្តល់ប័ណ្ណកម្មសិទ្ធិដីរួមដល់គ្រួសារទាំងនេះនៅជាប់នឹងដីទំហំ៤៥០ហិកតា ប្រសិនបើពួកគាត់លះបង់តំបន់ដែលមានវិវាទនេះ ប៉ុន្តែគ្រួសារអ្នកភូមិបានបដិសេធ។
លោក ញ៉ោម បាននិយាយថា ការបាត់បង់ដីទំហំ១៥០ហិកតា “មានផលប៉ះពាល់យ៉ាងខ្លាំងដល់ប្រពៃណីរបស់យើង ពីព្រោះយើងប្រើប្រាស់តំបន់នេះសម្រាប់កប់សព និងផ្គត់ផ្គង់ជីវភាពរបស់យើង”។
អួន អុិន ជាតំណាងម្នាក់ទៀតបាននិយាយថា “យើងចង់ឲ្យពួកគេប្រគល់ដីឲ្យពួកយើងវិញដើម្បីគ្រាន់មានស្មៅទុកឲ្យសត្វពាហនៈស៊ី និងដើម្បីរក្សាប្រពៃណីរបស់យើង។ យើងគ្រាន់តែចង់បានដីយើងមកវិញប៉ុណ្ណោះ យើងមិនត្រូវការសំណងឡើយ”។
លោក គង់ ចំរើន តំណាងខុទ្ទកាល័យលោក ហ៊ុន សែន បានមកជួបអ្នកភូមិនៅសួនមុខវត្តបទុម ហើយបានទទួលយកញត្តិរបស់ពួកគាត់ដោយសន្យាថា នឹងពាំនាំការត្អូញត្អែររបស់ពួកគាត់ទៅប្រាប់ចៅហ្វាយរបស់ខ្លួន។
បន្ទាប់មក ក្រុមអ្នកភូមិបានទៅកាន់ទីស្នាក់ការប្រចាំប្រទេសនៃការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សដែលពួកគាត់ត្រូវបានអនុញ្ញាតឲ្យជួបលោក ស៊ូបេឌី មួយភ្លែត។
ក្រុមអ្នកភូមិបាននិយាយថា ប្រេសិតសិទ្ធិមនុស្សរូបនេះបានមានប្រសាសន៍ថា លោកនឹងលើកឡើងអំពីករណីរបស់ពួកគាត់អំឡុងជំនួបរបស់លោកនៅពេលខាងមុខជាមួយក្រុមមន្ត្រីរដ្ឋាភិបាល។
ក្រុមហ៊ុនបានបដិសេធថា មិនបានធ្វើអ្វីខុសលើគ្រួសារអ្នកភូមិទេ។ លោក ទិត្យ តាទៀ មន្ត្រីទំនាក់ទំនងនៅក្រុមហ៊ុន Dau TuSaigon បានមានប្រសាសន៍ថា ក្រុមហ៊ុនទទួលបានដីសម្បទានទំហំ៦.៤៣៤ហិកតាសម្រាប់ដាំកៅស៊ូកាលពីឆ្នាំ២០០៨។
លោកបានមានប្រសាសន៍ថា ក្រុមហ៊ុនបានប្រកាន់ខ្ជាប់តាមការសន្យាថា នឹងមិនអភិវឌ្ឍដីមួយផ្នែកទំហំ៥០០ហិកតាដែលទាមទារសិទ្ធិកាន់កាប់ដោយក្រុមអ្នកភូមិមូលដ្ឋានឡើយរហូតដល់ទំនាស់នេះត្រូវបានដោះស្រាយរួចរាល់ ហើយបានចោទប្រកាន់គ្រួសារអ្នកភូមិដែលឥឡូវនេះទាមទារសិទ្ធិកាន់កាប់ដីទំហំ១៥០ហិកតា ថាកំពុងព្យាយាមចង់បានដីលើសពីអ្វីដែលពួកគាត់មានសិទ្ធិកាន់កាប់។ លោកបានមានប្រសាសន៍ថា “យើងមិនបានបំផ្លាញឬឈូសឆាយដីស្រែរបស់ពួកគាត់ឡើយ”៕សារុន