31 C
Phnom Penh

ពលករ​ខ្មែរ​ចំណាកស្រុក​វិល​ត្រឡប់មក​ដល់ស្រុក​កំណើត​​​វិញមាន​​​ចំនួន​​​​​ប្រហែល​១៨០.០០០នាក់

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រីនៅតាមព្រំដែនថៃ​បាន​និយាយ​កាលពីម្សិលមិញ​ថា ឥឡូវ​នេះ​ពលករខ្មែរ​​ចំណាក​​ស្រុក​​​ប្រហែល​១៨០.០០០នាក់​បាន​វិល​ត្រឡប់​មកដល់​ស្រុក​កំណើត​របស់​ខ្លួ​ន​វិញ​ហើយ ចាប់តាំង​ពី​ការចាប់ផ្តើម​​សម្រុក​ចាកចេញរបស់​ពល​ករ​ចំណាក​ស្រុក​ក្នុង​ចំនួន​ដ៏ច្រើន​ពី​ប្រទេស​ថៃកាលពី​សប្ដាហ៍មុន ប៉ុន្តែ​គេបានកត់​សម្គាល់ថា ការ​ឆ្លង​ព្រំដែន​បាន​ថយ​ចុះ​ច្រើន​។

កម្មករ​ខ្មែរ​ត្រូវ​បាន​យោធា​ថៃ​ចាប់​បញ្ជួន​មក​ច្រក​​​ទ្វារ​​​ព្រំដែន​អន្តរ​ជាតិ​ ប៉ោយ​ប៉ែត​ជា​បន្ត​បន្ទាប់​តាំង​ពីសប្តាហ៍មុន​។ សំាង​ សុឥន្ទរិទ្ធ/ ខេម​បូឌា​ ដេលី​
កម្មករ​ខ្មែរ​ត្រូវ​បាន​យោធា​ថៃ​ចាប់​បញ្ជួន​មក​ច្រក​​​ទ្វារ​​​ព្រំដែន​អន្តរ​ជាតិ​ ប៉ោយ​ប៉ែត​ជា​បន្ត​បន្ទាប់​តាំង​ពីសប្តាហ៍មុន​។ សំាង​ សុឥន្ទរិទ្ធ/ ខេម​បូឌា​ ដេលី​

អ្នកដែលវិលត្រឡប់មកវិញភាគ​ច្រើន​​និយាយ​ថា ពួកគេ​បាន​រត់ចោល​កា​រងារ​ក្នុង​ប្រទេស​ថៃ​​ដោយ​​មាន​ពាក្យ​ចចាមអារ៉ាម​ថា ពួកគេ​គឺ​ជា​គោល​ដៅ​នៃការ​ចាប់​ខ្លួន​ពី​សំណាក់​​ទាហាន​ថៃ​​ ដែល​បាន​ចាប់​ផ្ដើម​ប្រមូលពល​ករ​ចំណាក​ស្រុក​ខុស​ច្បាប់​បន្ទាប់ពីកា​រផ្ដួល​រំលំ​រដ្ឋាភិបាល​ក្រុង​បាង​កក កាលពីខែមុន​ ហើយ​បាន​ប្រកាស​ច្បាប់​អាជ្ញាសឹក។

លោក​ គោស៊ុំ សារឿត អភិបាល​ខេត្ត​បន្ទាយ​មាន​ជ័យ​ បានមាន​ប្រសាសន៍​ថា ” រហូត​មក​ទល់​​ពេល​នេះ​មាន​ពល​ករ​ចំណាក​ស្រុក​ជាង​១៨០.០០០​នាក់​ត្រូវ​បាន​និរទេស​​​​ដោយ​រដ្ឋា​ភិបាល​​យោធាថៃ​ឆ្លង​កាត់​ច្រក​ទ្វារ​អន្តរជាតិប៉ោយ​ប៉ែត ចាប់​តាំងពី​ថ្ងៃ​ទី​៦ ខែមិថុនាមក​”។

ច្រកឆ្លង​កាត់ជាច្រើន​​ហាក់ដូច​ជា​បាន​កើន​ឡើង​កាលពីថ្ងៃអាទិត្យ នៅ​ពេល​ដែល​ពល​រដ្ឋ​ខ្មែរ​ជាង​៤០.០០០​នាក់​បាន​ចាក​ចេញពី​ប្រទេស​ថៃ​​តាម​ច្រកទ្វារ​អន្ត​រជាត​ិប៉ោយប៉ែត។

យោងតាម​តួលេខ​ដែល​បាន​ពី​រដ្ឋាភិបាល អង្គការ​សិទ្ធិមនុស្ស និង​សាក្សី​បាន​ឲ្យ​ដឹង​​ថា យ៉ាង​ហោច​ណាស់​ពល​រដ្ឋ​ខ្មែរចំនួន​​១០​នាក់​​បានស្លាប់​ ក្នុង​នោះ​ភាគច្រើន​គឺ​ស្លាប់​ដោយ​គ្រោះ​ថ្នាក់​ចរាចរណ៍ ចាប់តាំង​ពី​ថ្ងៃអាទិត្យ អំឡុង​ការ​​ប្រមូល​​ និងការ​ខិត​ខំប្រឹង​ប្រែង​​ត្រឡប់​មក​ស្រុកកំណើត​​វិញ។ លោក សែម មករា អនុ​ប្រធាន​ច្រកទ្វា​រ​អន្តរជាតិ​ប៉ោយ​ប៉ែត បានមាន​ប្រសាសន៍​ថា ឥឡូវ​នេះ​សាក​សព​ចំនួន​ប្រាំពីរនាក់​​ត្រូវ​បាន​បញ្ជូនមកដល់​​កម្ពុជា​ហើយ​។

យោងតាម​អង្គការសិទ្ធិមនុស្ស​អាដ​ហុក​បាន​ឲ្យ​ដឹង​ថា ពួកគេ​បាន​រាប់​បញ្ចូល​សាក​សព​បុរស​ម្នាក់និង​ស្ត្រីពីរនាក់ដែលបាន​ស្លាប់​បន្ទាប់ពី​រថយន្ត​ទួរីស​ដែល​ពួកគេ​ជួល​ជិះ​មកស្រុក​កំណើត​ បាន​ផ្ទុះកង់​នៅ​ក្នុង​ខេត្ត​ច័ន្ទបុរី ហើយ​បាន​ក្រឡាប់​។

អ្នកស្រី មួន ភៀយ ដែល​រង​របួស​ស្រាល​ក្នុង​គ្រោះថ្នាក់​ចរាចរណ៍​បាន​និយាយ​ថា រថយន្ត​ទួរីស​បាន​មក​ដល់​កន្លែង​ដែលទាហានថៃបិទផ្លូវ​​ នៅពេលនោះ​ទាហាន​ម្នាក់​បាន​បាញ់​ឡើង​លើ​ដើម្បី​ឲ្យ​រថយន្ត​ទួរីស​នោះ​ឈប់​។ អ្នកស្រីបាននិយាយ​ថា អ្នក​បើក​បរ​រថយន្ត​ជន​ជាតិថៃ​បាន​បត់រថយន្ត​ត្រឡប់​ក្រោយ​ភ្លាម ហើយ​បើកយ៉ាងល្បឿន​ចេញពីកន្លែង​បិទ​ផ្លូវនោះ​ ស្រាប់​រថយន្ត​បាន​ផ្ទុះកង់​ហើយ​ក្រឡាប់តែម្ដង។

អ្នកស្រី​បាននិយាយ​តាម​ទូរស័ព្ទ​កាលពីម្សិលមិញ​ពីផ្ទះ​របស់អ្នកស្រី​នៅ​ក្នុង​ខេត្ត​បន្ទាយ​មានជ័យ​ថា ” ខ្ញុំ​និង​ប្រពន្ធ​អ្នក​បើក​បរ​រថយន្ត​បាន​អង្វរ​ឲ្យគាត់​ឈប់​ ប៉ុន្តែ​អ្នក​បើក​បរ​មិនព្រម​ឈប់​ទេ ហើយ​បន្ទាប់មករថយន្ត​ក្រឡាប់​តែម្ដង​​”។

អ្នកស្រី​បាន​និយាយ​ថា បុរស​ម្នាក់​បាន​ស្លាប់​នៅ​កន្លែង​កើត​ហេតុ ហើយ​ស្ត្រីពីរ​នាក់​បាន​ស្លាប់ដោយសារ​រង​របួស​បន្ទាប់ពី​ដឹក​តាម​រថយន្ត​សង្គ្រោះបន្ទាន់ទៅកាន់មន្ទីរ​ពេទ្យ​ក្នុង​ប្រទេស​ថៃ។ អ្នកស្រី ភៀយ បាននិយាយ​ថា ប្ដី​របស់អ្នកស្រីនិង​អ្នក​ដំណើរ​មួយ​ចំនួនទៀត​ដែល​បា​ន​រង​របួស​ក្នុង​គ្រោះថ្នាក់​ចរាចរណ៍នោះបា​ន​ធូរស្រាលវិញ​ហើយ​នៅ​ក្នុង​ប្រទេស​ថៃ។ អ្នក​​​ស្រី​បាន​និយាយ​ថា ” ខ្ញុំអំពាវ​នាវ​ឲ្យ​ស្ថាន​ទូត​កម្ពុជា​ជួយ​បញ្ជូនគាត់​ទៅ​ប្រទេស​កម្ពុជាវិញ ពីព្រោះគាត់​រង​របួ​ស​ ហើយ​មិនទាន់ជា​សះស្បើយនៅឡើយ​ទេ។

លោក ស៊ុម ចាន់គា អ្នកឃ្លាំមើល​នៅ​អង្គការ​អាដហុក​ ប្រចាំខេត្ត​បន្ទាយ​មានជ័យ​បាន​មាន​​ប្រសាសន៍ថា អង្គការ​របស់​លោក​​បាន​បញ្ជូនបុគ្គលិក​មួយក្រុម​​ទៅ​ប្រទេស​ថៃ​ដើម្បី​​ស៊ើប​អង្កេត​ករណីនេះ។

កាលពីថ្ងៃអង្គារ លោក ស ខេង រដ្ឋមន្ត្រី​ក្រសួង​មហាផ្ទៃ​បានមាន​ប្រសាសន៍​ថា ប្រទេស​ថៃ​ត្រូវ​ទទួល​ខុស​ត្រូវ​ចំពោះបញ្ហាទាំងអស់​ដែល​កើត​ចេញពី​ការ​សម្រុក​ចាក​ចេញ​របស់​ពល​រដ្ឋ​ខ្មែរ​ក្នុង​ចំនួន​ដ៏ច្រើន​រួមទាំង​អ្នកស្លាប់​ផង​ដែរ​។

ពលរដ្ឋខ្មែរ​ប្រាំមួយនាក់​បាន​ស្លាប់​ក្នុង​គ្រោះ​ថ្នាក់​ចរាចរណ៍ដាច់​ដោយ​ឡែក​ពីគ្នា​ នៅ​ពេល​ដែល​រថយន្ត​ទួរីស​ដែលពួកគេ​ជិះបាន​ផ្ទុះកង់​ ខណៈ​​ធ្វើ​ដំណើ​រមក​ព្រំដែន​ ហើយ​បាន​ក្រឡាប់​។ អាជ្ញាធរថៃ​បាន​ជូនដំណឹងមក​ប្រទេស​កម្ពុជា​ថា បុរស​ម្នាក់​ទៀត​បាន​ស្លាប់​កាល​ពីថ្ងៃសុក្រ បន្ទាប់ពីលោត​ចេញពីទូក​នេសាទ​ ដែលគាត់​បាន​ធ្វើការ​ដោយ​ខុស​ច្បាប់​ដើម្បី​គេច​ពីការ​ចាប់​ខ្លួន។

រដ្ឋាភិបាល​យោធា​ថៃ​បានទទួល​ស្គាល់​ថា ពិត​ជាបាន​បង្ក្រាប​ទៅលើ​ពល​ករ​ចំណាក​ស្រុក​នៅ​ក្នុង​ប្រទេស​ដោយ​ខុស​ច្បាប់​មែន​ ប៉ុន្តែ​បាន​បដិសេធ​ថា មិនមានគោល​នយោបាយ​ណាមួយ​បង្ខំ​ឲ្យ​ពល​ករ​ខ្មែរ​ចំណាក​ស្រុក​​ចាក​ចេញពី​ប្រទេស​ថៃ​ទេ។

យោងតាម​របាយការ​ណ៍ពី​ប្រព័ន្ធផ្សព្វផ្សាយព័ត៌មាន​ថៃ​បាន​ឲ្យដឹង​ថា បន្ទាប់ពី​ជំនួ​ប​នៅ​ក្រុង​បាង​កក​កាលពីថ្ងៃអង្គារ រវាង​រដ្ឋមន្ត្រីការ​បរទេស​ថៃ និង​ឯក​អគ្គ​រាជទូត​កម្ពុជា​ប្រចាំ​ប្រទេស​ថៃ​ រដ្ឋាភិបាល​ថៃ​លើក​ឡើង​ថា ខ្លួន​ស្វាគមន៍ពល​ករ​ចំណាក​ស្រុក​ពីប្រទេសកម្ពុជា​ត្រឡប់​មក​វិញ ឲ្យ​តែ​ពួកគេ​មាន​លិខិត​ស្នាម​ត្រឹម​ត្រូវ​។

បើទោះជា​ការ​ភ័យ​ខ្លាច​ជា​កត្តា​​ធ្វើ​ឲ្យពួកគេ​ចាក​ចេញក៏ដោយ ក៏ពលករ​ដែល​វិល​ត្រឡប់មកវិញ​និយាយ​ថា ពួកគេ​សង្ឃឹម​ថា នឹង​បាន​ទៅ​ប្រទេស​ថៃវិញ​កន្លែង​ដែលពួកគេ​អាច​រក​ការងារ​ធ្វើច្រើន​និ​ង​មាន​ប្រាក់ខែខ្ពស់​នៅពេល​ឆាប់ៗតាមដែល​អាចធ្វើទៅបាន​៕ សារុន​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស