28 C
Phnom Penh

អ្នកត​វ៉ាជាង​១.០០០នាក់​ប្រមូល​ផ្តុំគ្នា​នៅ​មុខ​ការិយាល័យ​អភិបាលខេត្ត​​​

ដោយ ឌឹ ខេមបូឌា ដេលី

បទវិភាគ

ក្នុង​​​កា​​​រ​​​បង្ហាញ​​​សាមគ្គី​​​ភាព​​​ដ៏​​​កម្រ​​​មួយ​​​នៅ​​​ខាង​​ក្រៅ​​​រាជ​​​ធានី​​​ភ្នំពេញ​​​ ប្រជាពល​​​រដ្ឋ​​​ជាង​​​១.០០០នាក់​​​ដែល​​​កើត​​​ទុក្ខ​​​មិន​​​សុខ​​​ចិត្ត​​​ទាក​​​់​​​ទង​​​​​​នឹង​​​វិវាទ​​​ដី​​​ធ្លី​​​ផ្សេង​​​ៗ​​​គ្នា​​​នៅ​​​ទូទាំង​​​​​​ខេត្ត​​​សៀ​​​ម​​​រាប​​​ បាន​​​ប្រមូល​​​ផ្តុំ​​​គ្នា​​​​​​នៅ​​​ខាង​​​ក្រៅ​​​ការិយាល័យ​​​លោក​​​អភិបាល​​​ខេត្ត​​​កាល​​​ពី​​​ថ្ងៃ​​​អង្គារ ដើម្បីទាម​​​ទារ​​​ឲ្យ​​​មាន​​​ការ​​​ចាត់​​​វិធាន​​​ការ​​​ ហើយ​​​ពួកគាត់​​​បាន​​​ចាក​​​ចេញ​​​ទៅ​​​វិញ​​​ដោយ​​​មាន​​​ការ​​​សន្យា​​​ជួយ​​ពី​​​លោក​​​អភិបាល​​​ខេត្ត។

អ្នក​​​ស្រី​​​ ឆែក​​​ សំបូ ជា​​​សកម្ម​​​ជន​​​បាន​​​និយាយ​​​កាល​​​ពី​​​ម្សិលមិញ​​​ថា អ្នក​​​ស្រី​​​បាន​​​ជួយ​​​រៀប​​​ចំ​​​សម្រាប់​​អ្នកតវ៉ាទាំងនោះ​​​ ហើយ​​​ជា​​​តំណាង​​​ម្នាក់​​​ក្នុងចំណោម​​​​​​អ្នក​​​តំណាង​​​១៨​​​នាក់​​​មក​​​ពី​​​សហ​​​គមន៍​​​ជាច្រើន​​​ដើម្បី​​​ជួប​​​ប្រជុំ​​​ជាមួយ​​​លោក ឃឹម ប៊ុនសុង អភិបាល​​​ខេត្ត​​​សៀម​​​រាប​​​។

អ្នកស្រី សំបូ បាន​​​និយាយ​​​ថា ក្រុម​​​អ្នក​​​តវ៉ា​​​រួមមាន​​​អ្នក​​​ដែល​​​ជាប់​​​ពាក់​​​ព័ន្ធ​​​វិវាទ​​​ដី​​​ធ្លី​​​ជា​​​មួយ​​​រដ្ឋបាល​​​ព្រៃ​​​ឈើ​​​ អ្នក​​​ដែល​​​​​​បាន​​​ស្នើ​​​សុំ​​​ឲ្យ​​​រដ្ឋាភិបាល​​​វាស់​​​វែង​​​ដី​​​របស់​​​ពួកគាត់​​​ ដោយ​​​សង្ឃឹម​​​ថា នឹង​​​ទទួល​​​​បាន​​​ប័ណ្ណ​​​កម្ម​​​សិទ្ធិ និង​​​អ្នក​​​ដែល​​​ត្រូវ​​​បាន​​​វាស់​​​វែង​​​ដីរួ​​​ច​​​ហើយ ប៉ុន្តែ កំពុង​​​រង់​​​ចាំ​​​ទទួល​ប័ណ្ណ​​​កម្ម​​​សិទ្ធិ​​​នៅ​​​ឡើយ​​​។ អ្នកស្រី​​​បាន​​​និយាយ​​​ថា ” លោក​​​អភិបាល​​​ខេត្ត​​​បាន​​​សន្យា​​​រក​​​ដំណោះស្រាយ​​​ជូន​​​ក្រុម​​​អ្នក​​​តវ៉ា​​​ក្នុង​​​រយៈពេល​​​ពីរ​​​សប្តាហ៍​​​”។

អ្នកស្រី​​​ សំបូ បាន​​​ពន្យល់​​​ថា អ្នក​​​ស្រី​​​ស្ថិត​​​ក្នុង​​​ចំណោម​​​អ្នក​​​កំពុង​​​រង់​​​ចាំ​​​ទទួល​​​ប័ណ្ណ​​​កម្ម​​​សិទ្ធ​​​​​​​​ិ​បន្ទាប់​​​ពី​​​ដី​​​អ្នកស្រី​​​ត្រូវ​​​បាន​​​វាស់​​​វែង​​​រួ​​​ចកាល​​​ពី​​​ឆ្នាំ​​​មុន​​​ ដោយ​​​​​ក្រុមនិស្សិត​​​​​សាកល​​​វ​​​ិទ្យាល័យ​​​ដែល​​​ត្រូវ​​​បាន​​​បញ្ជូន​​​ទៅ​​​វាស់​​​វែង​​​ដី​​​នៅ​​​ទូទាំង​​​ប្រទេស​​​ដោយ​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន ដើម្បី​​​ពន្លឿន​​​ដំណើរ​​​ការផ្ត​ល់​​​ប័ណ្ណ​​​កម្ម​​​សិទ្ធិ​​​ដី​​​ធ្លី​​​។

​​​អ្នកស្រី​​​ សំបូ បាន​​​និយាយថា កាល​​​ពីឆ្នាំ​​​២០០៨​​​ អាជ្ញាធរ​​​មូល​​​ដ្ឋាន​​​បាន​​​លក់​​​ដី​​​ទំហំ​​​៣​​​ហិក​​​តា​​​ទៅ​​​ឲ្យ​​​អ្នក​​​ផ្សេង​​​ ដែល​​​ដី​​​នោះ​​​អ្នកស្រី​​​បាន​​​ទិញ​​​កាល​​​ពី​​​ឆ្នាំ​​​១៩៩៧​​​ ហើយ​​​ថា អ្នកស្រី​​​បាន​​​ជាប់​​​ពន្ធនាគារ​​​រយៈ​​​ពេល​​​ប្រាំ​​​មួយ​​​ខែ​​​កាល​​​ពីឆ្នាំ​​​២០០៩​​​ បន្ទាប់ពី​​​សាលាដ​​​ំបូង​​​ខេត្ត​​​​​​បាន​​​កាត់​​​ឲ្យ​​​អ្នក​​​ស្រីជាប់ទោស​​​​ពី​​​បទ​​​លួ​​​ច​​​ដី​​​នេះ ។ អ្នក​​​ស្រី​​​បាន​​​និយាយ​​​ថា អ្នកស្រី​​​អាច​​​​​​បន្ត​​​កាន់​​​កាប់​​​ដី​​​នោះ​​​ទាល់​​​តែបាន​​​ ប៉ុន្តែ អ្នកស្រី​​​ចង់​​​បាន​​​ប័ណ្ណកម្ម​​​សិទ្ធិ​​ដើម្បីធានាសិទ្ធិកាន់កាប់របស់អ្នកស្រី​។

បើ​​​ទោះ​​​ណា​​​ជា​​​ចំនួន​​​អ្នក​​​តវ៉ា​​​ខុស​​​ពី​​​ធម្មតា​​​និង​ទំហំ​​​នៃទុក្ខ​​​លំបាក​​​ត្រូវ​​​​បាន​​​បង្ហាញក្នុង​​​ការ​​​ជួប​​​ជុំ​​​នោះ​​​ក៏​​​ដោយ ក៏​​​អ្នកស្រី​​​អះ​​​អាង​​​ថា​​​ មិន​​​មាន​​​អង្គការ​​​ណា​​​មួយ​​​នៅ​​​ពី​​​ក្រោយ​​​ពួកគាត់​​​ឡើយ​​​។

អ្នកស្រី កែវ សុភី ជា​​​អ្នក​​​តវ៉ា​​​ម្នាក់​​​ទៀត​​​បាន​​​និយាយ​​​ថា អ្នកស្រី​​​បាន​​​ទិញ​​​ដី​​​ស្រែ​​​ទំហំ​​​១៨៣​​​ហិកតា​​​កាល​​​ពី​​​ឆ្នាំ​​​១៩៩៨ ប៉ុន្តែ ​​​ត្រូវ​​​រដ្ឋបាល​​​ព្រៃ​​​ឈើ​​​បណ្តេញ​​​ចេញ​​​កាល​​​ពី​​​​​ឆ្នាំ​​​២០០៣​​​។ អ្នកស្រី​​​បាន​​​ត្រឡប់​​​មក​​​វិញ​​​កាល​​​ពីខែ​​​មិថុនា​​​ឆ្នាំ​​​មុន​​​ ហើយ​​​បាន​​​​​​កាន់​​​កាប់​​​ដី​​​ប្រហែល​​​ពាក់​​​កណ្តាល​​​វិញ ហើយ​​​​​​ត្រូ​​​វបាន​​​រដ្ឋបាល​​​ព្រៃ​​​ឈើ​​​ព្រមាន​​​កាល​​​ពី​​​ខែ​​​មុន​​​ថា អ្នកស្រី​​​នឹង​​​ត្រូវ​​​បណ្តេញ​​​ម្តង​​​ទៀត​​​ដោយ​​​បង្ខំ ប្រសិន​​​បើ​​អ្នក​​​ស្រី​​​មិន​​​ព្រម​​​ចេញ​​​ទេ​​​នោះ​​​។

អ្នកស្រី​​​បាន​​​និយាយ​​​ថា ” ខ្ញុំ​​​បាន​​​ចូល​​​រួម​​​តវ៉ា​​​ជាមួយ​​​អ្នក​​​ភូមិ​​​ដទៃ​​​ទៀត​​​ដើម្បី​​​ទាម​​​ទារ​​​ដី​​​ស្រែ​​​របស់​​​ខ្ញុំ​​​មក​​​វិញ​​​ ពី​​​ព្រោះ​​​រដ្ឋបាល​​​ព្រៃ​​​ឈើ​​​បាន​​​រឹប​​​អូស​​​យក​​​ដី​​​របស់​​​ខ្ញុំ​​​ ហើយ​​​បាន​​​រាន​​​ដី​​​នេះ​​​ដើម្បី​​​ដាំ​​​ដើម​​​អាកាស្យា​​​ទៅ​​​វិញ​​​”។

លោក ឃឹម ប៊ុន​​​សុង ជា​​​អភិបាល​​​ខេត្ត​​​បាន​​​និយាយ​​​ថា អាជ្ញាធរ​​​បាន​​​ដោះ​​​ស្រាយ​​​ទុក្ខ​​​លំបាក​​​របស់​​​អ្នក​​​តវ៉ា​​​មួយ​​​ចំនួន​​​រួច​​​ហើយ​​​ ប៉ុន្តែ​​​ លោក​​​បាន​​​បដិសេធ​​​មិន​​​និយាយ​​​លម្អិត​​​ឡើយ​​​។ លោក​​​បាន​​​ចោទ​​​ប្រកាន់​​​អ្នក​​​ផ្សេង​​​​ថា បាន​​​​​​រស់​​​នៅ​​​​​​ដោយ​​​​​ខុស​​​ច្បាប់​​​លើ​​​ដី​​​ដែល​​​ពួកគាត់​​​​​​កំពុង​​​ទាម​​​ទារ​​​សិទ្ធិ​​​កាន់​​​កាប់​​​ ហើយ​​​លោក​​​បាន​​​មាន​​​ប្រសាសន៍​​​ថា ការ​​​ដោះ​​​ស្រាយ​​​វិវាទ​​​ដី​​​ធ្លី​​​របស់​​​ពួកគាត់​​​​​​ត្រូ​​​វ​​​មាន​​​អន្តរាគមន៍​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ពី​​​មន្ត្រី​​​ថ្នាក់​​​លើ​​​។

លោក​​​បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា ” ខ្ញុំ​​​នឹង​​​បញ្ជូន​​​ករណី​​​នេះ​​​ទៅ​​​ស្ថាប័ន​​​ពាក់​​​ព័ន្ធ​​​ ជា​​​ពិសេស​​​ក្រសួង​​​កសិកម្ម​​​ ពីព្រោះ​​​បញ្ហា​​​ទាំ​​​ង​​​នេះ​​​ពាក់​​​ព័ន្ធ​​​នឹង​​​ក្រសួ​​​ងនេះ​​​។ ពួកគាត់​​​ចង់​​​បាន​​​​​​ដំណោះ​​​ស្រាយ​​​ឆាប់​​​ៗ​​​ ហើយ​​​យើង​​​កំពុង​​​ធ្វើ​​​ការ​​​លើ​​​រឿង​​​នេះ​​​ហើយ​​​”៕ សារុន​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស