អាជ្ញាធរបានឲ្យដឹងកាលពីម្សិលមិញថា មន្ត្រីកងនាវាកម្ពុជាម្នាក់ត្រូវបានចាប់ខ្លួនកាលពីថ្ងៃច័ន្ទក្នុងរាជធានីភ្នំពេញ និងត្រូវបានចោទប្រកាន់ពីបទរំលោភលើសេចក្តីទុកចិត្ត ដោយសារបោកប្រាស់មនុស្សពីរនាក់ក្នុងកិច្ចព្រមព្រៀងទិញលក់ដីតម្លៃជិត៤០០.០០០ដុល្លារ។
លោក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីបានមានប្រសាសន៍ថា លោកវរសេនីយ៍ទោ ចាន់ ថន អាយុ៤៤ឆ្នាំ បានប្រាប់មនុស្សពីរនាក់នៅក្នុងខេត្តព្រះសីហនុថា ខ្លួននឹងលក់ដីឲ្យពួកគេនៅជិតក្រុងតម្លៃ៣៩០.០០០ដុល្លារ។បន្ទាប់ពីគេបង់លុយឲ្យលោកវរសេនីយ៍ទោ ចាន់ ថន មិនបានធ្វើតាមកិច្ចព្រមព្រៀងទេ។
លោក សត្យា បានមានប្រសាសន៍ថា នាយទាហានរូបនេះ ដែលត្រូវបានចាត់តាំងទៅធ្វើការនៅមូលដ្ឋាននាវាជើងទឹករាម ត្រូវបានចាប់ខ្លួនកាលពីព្រឹកថ្ងៃច័ន្ទ ខណៈកំពុងបើកបររថយន្តម៉ាក ឡិចសុីសរបស់លោក និងត្រូវបានចោទប្រកាន់នៅថ្ងៃដដែលនោះ។
លោកបានបន្ថែមថា កាំភ្លើងខ្លីមួយដើមត្រូវបានរកឃើញនៅក្នុងរថយន្តរបស់លោកវរសេនីយ៍ទោ ចាន់ ថន។ លោកបានមានប្រសាសន៍ថា “បន្ទាប់ពីសាកសួរ លោក ហេង កេសារ៉ូ ចៅក្រមសាលាដំបូងរាជធានីបានចោទប្រកាន់គាត់ពីបទរំលោភសេចក្តីទុកចិត្ត។ជនសង្ស័យត្រូវបានបញ្ជូនខ្លួនទៅឃុំខ្លួនជាបណ្តោះអាសន្ននៅពន្ធនាគារព្រៃសកាលពីល្ងាចថ្ងៃច័ន្ទដើម្បីរង់ចាំសវនាការជំនុំជម្រះទោសគាត់”។
លោក ហ៊ីង ពុធ សារ៉ា មេបញ្ជាការរងនៅមូលដ្ឋានកងនាវារាម បានមានប្រសាសន៍ថា លោកបានទទួលព័ត៌មានអំពីរឿងក្តីនេះ ប៉ុន្តែលោកមិនស្គាល់វរសេនីយ៍ទោ ចាន់ ថន ទេ។ លោកបានមានប្រសាសន៍ថា ” យើងបានទទួលព័ត៌មានអំពីការចាប់ខ្លួននេះ ប៉ុន្តែយើងមិនស្គាល់នាយទាហានរូបនេះទេ”៕ ប៊ុននី