បុគ្គលិកក្រុមហ៊ុន សោម៉ា គ្រុប និងក្រុមហ៊ុន ស៊ីភី អុីនធឺត្រេដ (CPI)បានឲ្យដឹងថា កាលពីម្សិលមិញ ក្រុមហ៊ុន សោម៉ា គ្រុប បានធ្វើការចុះហត្ថលេខាលើកិច្ចព្រមព្រៀងវិនិយោគរួមគ្នាជាមួយក្រុមហ៊ុន ស៊ីភី អុីនធឺត្រេដ ក្នុងការសាងសង់រោងម៉ាស៊ីនកិនស្រូវនិងកែច្នៃទ្រង់ទ្រាយធំនៅក្នុងប្រទេសកម្ពុជា ដែលគេរំពឹងថានឹងមានសមត្ថភាពផលិតអង្ករច្រើនជាងម៉ាស៊ីនកិនស្រូវធំៗភាគច្រើន ប្រាំមួយដងក្នុងមួយម៉ោង។
លោក សុខ ពុទ្ធីវុធ អគ្គនាយកក្រុមហ៊ុន សោមា៉ា គ្រុប បានលើកឡើងនៅសន្និសីទសារព័ត៌មានមួយដោយប្រកាសឲ្យដឹងអំពីការផ្តួចផ្តើមនេះថា “គម្រោងមានទឹកប្រាក់៥០លានដុល្លារ រំពឹងនឹងចាប់ដំណើរការនៅក្នុងត្រីមាសទី១ឆ្នាំក្រោយនេះ ហើយនឹងត្រូវសាងសង់នៅលើដីទំហំ៣០ហិកតានៅក្នុងខេត្តកំពង់ស្ពឺ។
លោកបានមានប្រសាសន៍ថា “មូលនិធិវិនិយោគភាគច្រើន រួមចំណែកដោយដៃគូរបស់យើងក្នុងគោលបំណងបង្កើនសមត្ថភាពផលិតនិងការនាំចេញអង្ករគុណភាពខ្ពស់ទៅកាន់ទីផ្សារពិភពលោក ខណៈដែលមានតម្រូវការខ្ពស់ក្នុងពិភពលោក”។
លោក ពុទ្ធីវុធ ដែលជាកូនប្រុសរបស់លោកឧបនាយករដ្ឋមន្ត្រី សុខ អាន ថ្មីៗនេះជាប់ឆ្នោតជាប្រធានសហព័ន្ធស្រូវអង្គរកម្ពុជា ដែលមានគោលបំណងភ្ជាប់ភាគីក្នុងសង្វាក់ផ្គត់ផ្គង់និងកាត់បន្ថយភាពមិនទុកចិត្តគ្នានៅក្នុងវិស័យនេះ។
លោក ពុទ្ធីវុធ បានមានប្រសាសន៍ថា នៅពេលសាងសង់រួច មា៉ស៊ីនកិនស្រូវនេះនឹងមានសមត្ថភាពផលិតអង្ករមានគុណភាពខ្ពស់បាន៤០០តោនទៅ៦០០តោនក្នុងមួយថ្ងៃ ឬ៦២,៥តោនក្នុងមួយម៉ោង។ជាមធ្យម ម៉ាស៊ីនកិនស្រូវភាគច្រើននៅក្នុងប្រទេសកម្ពុជាបច្ចុប្បន្នកិនបានពីប្រហែល៣តោនទៅ១០តោនក្នុងមួយម៉ោង។
លោក ពុទ្ធីវុធ បានពន្យល់ថា ក្រុមហ៊ុន សោម៉ា នឹងចុះកិច្ចសន្យាជាមួយប្រជាកសិករនិងឈ្មួញកណ្តាលដើម្បីផ្តល់តម្លៃខ្ពស់ជាងមុនដល់ប្រជាកសិករ។ លោកបានមានប្រសាសន៍ថា ” យើងនឹងផ្តល់ឲ្យពួកគេនូវតម្លៃខ្ពស់ ដែលនាំមកនូវប្រាក់ចំណេញខ្ពស់ជាងនេះដល់ពួកគាត់”។
លោក ប្រាសិទ្ធ ដាមរ៉ុងជីថានន់ ប្រធាន CPI បានមានប្រសាសន៍ថា ក្រុមហ៊ុនទាំងពីរនេះនឹងផ្តោតលើការនាំចេញអង្ករទៅកាន់ប្រទេសជាច្រើនទៀត។ លោកបានមានប្រសាសន៍ថា ” ការវិនិយោគរួមគ្នានេះ គឺជាជោគជ័យមួយថ្មីទៀតក្នុងវិស័យស្រូវ-អង្ករកម្ពុជា ដោយក្រុមហ៊ុន ស៊ីភី អុីនធឺត្រេដ នឹងនាំយកមកនូវបច្ចេកទេសថ្មីរបស់ខ្លួនក្នុងការកិននិងកែច្នៃអង្ករ សម្រាប់ធ្វើការនាំចេញទៅកាន់ទីផ្សារជាង១០០ប្រទេសនៅទូទាំងពិភពលោក”។
លោក ប្រាសិទ្ធ ដាមរ៉ុងជីថានន់ បានមានប្រសាសន៍ថា ម៉ាស៊ីនកិនស្រូវនិងកែច្នៃអង្ករដែលមានតម្លៃពី១៥លានដុល្លារទៅ២០លានដុល្លារ នឹងត្រូវនាំចូលពីប្រទេសជប៉ុននិងសហរដ្ឋអាមេរិកសម្រាប់គម្រោងនេះ។
យោងតាមលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបានឲ្យដឹងថា បរិមាណអង្ករនាំចេញពីប្រទេសកម្ពុជាក្នុងរយៈពេលប្រាំខែដំបូងនៃឆ្នាំនេះ ក៏មានការកើនឡើងដល់ជាង១.៤០០តោន បើធៀបនឹងរយៈពេលដូចគ្នាក្នុងឆ្នាំ២០១៣ កើនពី១៤៦.៨៥៤តោនទៅ១៤៨.២៦២តោន។
ក្រុមមន្ត្រីឧស្សាហកម្មបានឲ្យដឹងថា មានការកើនឡើងតិចតួចប្រហែល១ភាគរយ ពីព្រោះប្រទេសថៃលក់អង្ករតម្លៃថោកជាងអង្ករកម្ពុជា។ ឧទាហរណ៍ អង្ករសចម្រុះគ្រាប់វែងគុណភាពអន់ពីប្រទេសថៃ លក់នៅទីផ្សារអន្តរជាតិតម្លៃប្រហែល៣៣៥ដុល្លារក្នុងមួយតោន ចំណែកអង្ករកម្ពុជាប្រភេទដូចគ្នាលក់ក្នុងតម្លៃ៤១០ដុល្លារក្នុងមួយតោន។
លោក វ៉ាន់ ដេវីត អគ្គនាយកសហព័ន្ធស្រូវ-អង្ករកម្ពុជា និងជានាយកប្រតិបត្តិក្រុមហ៊ុននាំចេញអង្ករ BoostRiche បានមានប្រសាសន៍ថា ” ប្រទេសថៃបានបញ្ចេញស្តុកអង្ករគុណភាពអន់យ៉ាងច្រើនក្នុងតម្លៃថោកជាងអង្ករកម្ពុជា”៕ប៊ុននី