29 C
Phnom Penh

ពលករខុសច្បាប់​ត្រូវបាន​​​ចាប់​​ខ្លួន​ ហើយប្រឈមនឹង​ការ​​​កាត់​​ទោស​​នៅក្នុង​ប្រទេស​​​ថៃ​

ដោយ ឌឹ ខេមបូឌា ដេលី

បទវិភាគ

លោក កុយ គួង អ្នកនាំពាក្យ​ក្រសួងការ​បរទេស​ និងសហ​ប្រតិបត្តិការ​​​អន្តរជាតិ​​ បាន​បញ្ជាក់​​កាល​​​​ពី​ថ្ងៃ​សុក្រ​​ថា ​អាជ្ញាធរ​ថៃ​​បាន​ចាប់​ខ្លួន​និង​​កំពុង​រៀប​ចំ​​ជំនុំ​ជម្រះ​​ពល​ករ​​ចំណាក​ស្រុក​ខ្មែរ​​ចំនួន​១៣នាក់​ ​ដែល​ត្រូវបាន​ចាប់​ខ្លួន​​ដោយ​​សារ​មាន​បោះ​ត្រា​​ក្លែង​ក្លាយ​​នៅ​លើ​សំណុំ​​ឯកសារ​របស់​​ពួកគេ​ ​ខណៈ​ពួកគេ​ព្យាយាម​​ត្រឡប់​​មកកាន់​​ស្រុក​កំណើត​វិញ​។

​រដ្ឋា​ភិបាល​ក៏បាន​ប្រកាស​​គម្រោង​ការ​​មួយ​ផងដែរ​​ ដើម្បី​ចេញ​ថ្លៃ​​លិខិត​ឆ្លង​ដែន​​ឲ្យពល​ករ​​ចំណាក​ស្រុក​និង​សិស្ស និស្សិត។ ចំណុចនេះ​​​មាន​ន័យថា ​ពេលនេះ​ឯកសារ​ធ្វើ​លិខិត​ឆ្លង​​ដែន​នឹង​ត្រូ​វ​​ចំណាយ​តែ​បួន​ដុល្លារ​ប៉ុណ្ណោះ​ មិន​មែន​​១២៤​ដុល្លារ​ដូច​​ធម្មតានោះទេ។

យោងតាម​ក្រុម​មន្ត្រី​បាន​ឲ្យដឹងថា ពល​ករ​​​ដែលត្រូវបាន​ចាប់​​ខ្លួន​ ​ស្ថិត​ក្នុង​ចំណោម​​​ជន​​ជាតិ​ខ្មែរ​​ជាង​​២០០.០០០​​នាក់​ ​ដែល​ភាគ​ច្រើន​ចំណោមពួកគេ​​​ជា​​ពលករ​គ្មាន​ឯក​សារ​គ្រប់គ្រាន់​ឬ​​ខុស​ច្បាប់​ ​ដែល​ភៀស​ខ្លួន​​​​ពី​ប្រទេស​​ថៃ​ ចាប់​តាំង​​ពី​​​រដ្ឋា​ភិបាល​​គ្រប់​គ្រង​ដោយ​យោធា​​ឡើងកាន់​​អំ​ណាច​​កាល​​ពី​ខែ​មុន​ ជាហេតុ​បណ្តាល​​ឲ្យមាន​ការ​ភ័យខ្លាច​​អំពីកា​រ​​ប្រើ​​អំពើ​ហិង្សា​ និង​កា​រ​​​ចាប់​ខ្លួន​។ មកទល់​​ពេល​នេះ ពល​ករ​​យ៉ាង​តិច​​២២៥.០០០នាក់​​បាន​ឆ្លងដែន​ត្រឡប់​​​មក​កម្ពុជា​វិញ​។

លោក កុយ គួង ​បាន​មាន​ប្រសាសន៍​តាម​ទូរស័ព្ទ​​កាល​ពីព្រឹក​​​ថ្ងៃ​សុក្រ​​ថា”ពលករ​​ចំណាក​ស្រុក​ចំនួន​​៣៨នាក់​​​ត្រូវបាន​ចាប់​​ខ្លួន​នៅ​ក្នុង​​​ខេត្ត​ស្រះកែវ​ ​ប្រទេស​ថៃ​​ កាល​ពី​សប្តាហ៍​មុន​​”។ ប៉ុន្តែ ក្រោយ​មក​ភ្លាមនោះ លោក​បាន​​កែ​ប្រែ​តួលេខ​នេះមក​ចំនួន​១៣នាក់​​​វិញ ដោយ​ផ្អែក​លើ​​ព័ត៌មាន​ថ្មី​។ ​លោកបាន​​​ឲ្យដឹងទៀត​ថា ពល​ករ​ទាំង​នេះ​​​បាន​ប្រើ​ប្រាស់​លិខិត​ឆ្លងដែន​ពិត​។ លោកបានមាន​ប្រសាសន៍ថា “គ្មាននរណាម្នាក់​​ចំណោម​​ពួកគេ​​ដឹងថា​ ទិដ្ឋាការ​ធ្វើការ​​ងារ​​​របស់​ខ្លួន​ក្លែងកា្លយ​ទេ​ ដោយសា​រតែពួកគេ​​មិនបាន​​​ទៅ​ពន្យារ​​​លិខិត​ឆ្លង​ដែន​​​របស់​​ខ្លួន​​​ដោយ​​​ខ្លូន​ឯង​”។

ពួកគេ​​បាន​ឲ្យមេខ្យល់​​ទៅ​ពន្យារ​​​ទិដ្ឋា​កា​រ​​ធ្វើការ​​​​របស់​​ខ្លួន ដូច្នេះ​យើងត្រូវ​​តាម​​​រក​មេខ្យល់​នោះ​ ក៏ប៉ុន្តែ​យើង​មិនទាន់​ដឹងទេថា ​មេខ្យល់នោះ​​​ជា​​ជនជាតិខ្មែរ​ ​ឬ​​ជនជាតិ​ថៃ​នៅឡើយ​​​ទេ។​ខ្ញុំ​ឮថា ​អាជ្ញាធរថៃ​កំពុង​​រៀបចំ​​បញ្ជូន​​ពួក​គេទៅ​​​តុលាការ​ហើយ”។ លោក​បាន​ឲ្យ​​ដឹង​បន្ថែម​​ទៀតថា​ មន្ត្រី​កម្ពុជា​​នៅប្រទេស​​ថៃ​កំពុង​ខិតខំ​រកមេធាវី​​ឲ្យ​ការពារ​​ក្រុម​នេះ​។

​កាល​​ពីខែ​​ធ្នូ​ឆ្នាំ​​២០១២ ​​អាជ្ញាធរ​ថៃ​បាន​ចាប់​ផ្តើម​ចេញ​អត្តសញ្ញាណ​ប័ណ្ណឲ្យពល​ករ​​ខ្មែរ​​ដែល​មិនទាន់មាន​ឯកសារ​ត្រឹមត្រូវ​ ដើម្បី​ឲ្យ​​ពួកគេ​​អាចធ្វើ​ការ​​នៅ​ប្រទេស​ថៃ​​ដោយ​ស្រប​ច្បាប់​។ ​​ពីរខែ​ក្រោយ​មក ​ស្ថានទូត​កម្ពុជា​ប្រចាំ​នៅ​​ទីក្រុង​បាងកក​​បាន​ឲ្យដឹងថា ​​ខ្លួន​​​នឹង​ចេញ​​លិខិត​ឆ្លង​ដែន​​ក្នុងតម្លៃ​៧៤ដុល្លារ​ ​មិនមែន​១២៤ដុល្លារ​ ​ដែល​ប្រជាជន​​ត្រូវចំណាយ​លើ​​​លិខិត​ឆ្លង​ដែន​​ទាំង​នោះ​ក្នុងរាជ​​ធានី​ភ្នំពេញទេ​។

ក៏ប៉ុន្តែ​ក្រសួងការ​បរទេស​និង​សហ​ប្រតិបត្តិកា​រ​អន្តរជាតិ​បាន​ប៉ាន់​ស្មាន​ថា ក្នុងចំណោម​ពលករ​​ចំណាក​​ស្រុក​ខ្មែរ​៤០០.០០០នាក់ មាន​​តែ​ប្រហែល​​៩០.០០០នាក់​ប៉ុណ្ណោះ​​ដែល​មាន​ឯកសារ​ត្រឹមត្រូវ​សម្រាប់​ធ្វើការនៅទីនោះ​។

នៅក្នុងអនុក្រឹត្យ​​​ដែល​លោកនាយក​រដ្ឋ​មន្ត្រី ហ៊ុន ​សែន បាន​ចុះ​ហត្ថលេខា​​ ហើយ​ចេញ​ដោយ​​​ទីស្តី​កា​រ​គណៈ​រដ្ឋ​មន្ត្រីកាល​​ពី​ថ្ងៃ​សុក្រ មាន​​ដំណោះស្រាយ​មួយផ្សេងទៀត​ត្រូវបាន​បង្ហាញ​។ រដ្ឋា​ភិបាល​​នឹង​យកថ្លៃ​លិខិត​ឆ្លង​ដែន​តែ​បួន​ដុល្លារ​ប៉ុណ្ណោះ​​ពីពល​ករចំណាក​ស្រុក​និងសិស្ស​និស្សិត​ជាប់​អាហារូបករណ៍​ ហើយ​ឯកសារ​ផ្សេងៗ​នឹងត្រូវបាន​រៀប​ចំរួចរាល់​ក្នុងរយៈ​ពេល​២០​ថ្ងៃ​ បន្ទាប់​​ពី​ពួកគេ​​បាន​ដាក់​​ពាក្យ​ស្នើ​សុំ។

មាត្រា១នៃ​​អនុក្រឹត្យនេះ​ចែងថា​ “ត្រូវបាន​ផ្តល់លិខិត​ឆ្លងដែន​ធម្មតាជូនពល​ករ​ ពលការិនីខ្មែរ ដែល​ត្រូវ​ទៅធ្វើការ​​​​​ដោយ​ស្រប​ច្បាប់​នៅបរទេស​ ​ដោយអាករជាបន្ទុក​របស់​រដ្ឋ​ ក៏ប៉ុន្តែ​ពលករ ពលការិនី ​​ត្រូវ​បង់​ប្រាក់​ចំនួន​៤(បួន​ដុល្លារ​)អាមេរិកសម្រាប់​ថ្លៃថត​រូប​”។ លោក ​ទិត្យ សុធា អ្នកនាំ​​ពាក្យ​​​អង្គភាព​​ព័ត៌មាន​និងប្រតិកម្ម​រហ័ស​​បាន​ឲ្យដឹងថា ​សេចក្តី​សម្រេចនេះ​​មាន​គោល​បំ​ណង​កាត់​បន្ថយ​បន្ទុក​​របស់​ពលករ​និង​និស្សិត​ដែល​ចង់​​ទៅក្រៅ​ប្រទេស​។

យោងតាមលោក ស ខេង ​រដ្ឋមន្ត្រី​ក្រសួង​មហាផ្ទៃ​បាន​ឲ្យដឹងថា ប្រជាជន​​ខ្មែរ​យ៉ាង​តិច​ប្រាំបី​នាក់​ត្រូវបានសម្លាប់​ និង​១៩​ឲនាក់​រងរបួស​​ ​​ដោយសារ​​គ្រោះ​ថ្នាក់​ចរាចរណ៍​នៅពេល​ព្យាយាម​ចាកចេញពី​ស្ថានភាព​ដែល​​អាច​កើតមាន​ភាពចលាចល ហើយទោះបី​​​​ជាអាជ្ញាធរ​ថៃ​បាន​បដិសេធ​ថា មិនមាន​គោល​នយោបាយ​បណ្តេញ​ពលករ​ចំណាក​ស្រុក​ខុស​ច្បាប់​ក៏ដោយ​ ក៏​ប្រជាជន​ខ្មែរ​​ដែល​បាន​ត្រឡប់​មក​វិញ​​បាន​និយាយ​​អំពី​​ប្រតិបត្តិការ​ឆ្មក់​​ចាប់​ ការ​ចាប់​ជម្រិត​​ការ​ចាប់​​ខ្លួន​ ការ​គំរាម​កំហែង​ និង​ការ​បាញ់​ប្រហារ​។

​នៅក្នុងសេចក្តី​ថ្លែងការណ៍មួយ​​ ដែល​ចេញ​ផ្សាយកាល​​ពី​ថ្ងៃ​សុក្រ​​ស្រប​ពេល​មាន​កិច្ច​ប្រជុំ​​មួយ ដែល​ត្រូវបាន​ប្រារព្ធ​ឡើង​ដើម្បី​ពិភាក្សា​​​អំពី​ស្ថាន​ភាព​មិនសូវស្រួល​​នៅ​​តំបន់​ព្រំដែន​ អង្គការ​សិទ្ធិមនុស្ស​​អាដហុក​​បាន​ឲ្យដឹងថា ​ខ្លួន​​យល់ឃើញថា អាជ្ញាថៃមាន​សិទ្ធិ​បញ្ជូន​ពលករ​​​ដែលមិនមាន​ឯកសារ​ត្រឹមត្រូវ​មកប្រទេស​​​របស់​​ខ្លួន​វិញ​។

អង្គការ​អាដ​​ហុក​​​បាន​លើកឡើងថា “ទោះជាយ៉ាងណា រដ្ឋាភិបាល​យោធា​ថៃ​គួរតែ​​បាន​​ធ្វើ​បែបនេះ​ដោយ​មនុស្សធម៌ និង​​​ដោយ​ក្តី​គោរព​​សេចក្តី​ថ្លៃ​ថ្នូរ​​របស់​ប្រជាជនខ្មែរ​”។

អង្គការ​សិទ្ធិមនុស្សបាន​លើកឡើង​បន្ថែម​​ទៀតថា “​រដ្ឋាភិបាល​យោធា​ថៃ​​គួរតែបាន​រៀប​ចំ​​និងបង្កើត​ផែនការសម្រាប់​​បញ្ជូន​ពលករកម្ពុជា​មក​ប្រទេស​ខ្លួន​វិញ ដោយប្រកាស​​ផែនការ​​​ទាំង​នេះ​ឲ្យបាន​​ទៀងទាត់ ​និងរៀបចំការ​បញ្ជូន​មក​ប្រទេសវិញ​ឲ្យបាន​ត្រឹមត្រូវ​ មិនមែន​​យកពួកគេ​​​ទៅ​ដាក់​នៅលើ​​ឡាន​​ដូច​​សត្វ​ធាតុ​នោះទេ​។ រដ្ឋាភិបាល​យោធា​ថៃ​​គួរតែបាន​សហ​កា​រ​​​ជាមួយ​​រដ្ឋា​ភិបាល​កម្ពុជា​​ក្នុងកា​រ​​អនុវត្ត​​​និង​សម្រេច​​ជោគ​​ជ័យ​ក្នុង​ផែនកា​រ​​​ទាំង​នេះ​”។

នៅក្នុងការជួប​ជុំ​​គ្នារបស់​ពលករ​​ចំណាក​ស្រុក​ខុស​ច្បាប់​​ដែល​បានត្រឡប់មកវិញនោះ ពលករមួយរូប​​ដែល​បាន​បដិសេធ​មិនប្រាប់​ឈ្មោះ​​របស់​ខ្លួន ដោយសារតែ​ព្រួយ​​​បារម្ភ​អំពី​​ កា​រ​សង​សឹក បាន​ឲ្យដឹងថា លោក​បានធ្វើការ​នៅប្រទេស​ថៃ​​ជា​កម្មករ​សំ​ណង់​អស់​រយៈពេល​មួយឆ្នាំ​ ក៏ប៉ុន្តែ​​បាន​​ចាក​ចេញមកវិញ​ បន្ទាប់​ពីមាន​ហេតុការណ៍​បាញ់ប្រហារ​មួយកើតឡើង​។

លោកបានមាន​ប្រសាសន៍ថា “កាល​ពីថ្ងៃទី១០ ខែ​មិថុនា នៅពេល​​ព្រឹក ខ្ញុំបាន​ឮសំឡេង​បាញ់​កាំភ្លើង​​បីគ្រាប់ ហើយប្រហែល​២០នាទីក្រោយមក​ មាន​កម្មករ​មួយ​ចំនួន​បាន​មក​ការដ្ឋាន​ ហើយ​បាន​ប្រាប់​យើងថា គេបាញ់​ប្រជាជន​ខ្មែរ​បីនាក់​”។

អង្គការ​ឃ្លាំមើល​សិទ្ធិមនុស្ស​កាល​ពីថ្ងៃ​សុក្រ បាន​​អំ​ពាវនាវ​ឲ្យ​រដ្ឋាភិបាល​យោធា​ថៃ​”ពង្រឹង​កិច្ចការ​​ពារ​សិទ្ធិ​មនុស្ស​​​របស់​ពល​ករ​ចំណាក​ស្រុក​ជា​​បន្ទាន់​ ដើម្បី​បញ្ចប់​សកម្មភាព​ត្រឡប់​មក​ប្រទេស​វិញ​ក្នុងទ្រង់​ទ្រាយ​ធំ​”។

សេចក្តី​ថ្លែង​កា​រណ៍​​របស់​អង្គការ​ឃ្លាំមើល​សិទ្ធិមនុស្សមាន​ខ្លឹម​សារថា” ពលករ​ខ្មែរ​​​ជាង​២០០.០០០​នាក់​បាន​ត្រឡប់​មកប្រទេស​កម្ពុជា​វិញ​ នេះ​បើ​យោងតាម​អង្គការ​អន្តោ​ប្រវេសន៍​អន្តរជាតិ និងនគរបាល​ខ្មែរ​”។

សេចក្តីថ្លែងការណ៍​ដដែល​មាន​ខ្លឹមសារ​​បន្ត​ទៀត​​ថា “​យ៉ាង​ហោចណាស់មាន​ពលករ​ចំណាក​ស្រុក​ប្រាំ​បីនាក់់ដែល​បាន​​វិលត្រឡប់​មកប្រទេសវិញនោះ​ បាន​ស្លាប់​​​​ដោយសារ​គ្រោះ​ថ្នាក់​ចរាចរណ៍​នៅតាម​ផ្លូវ​​នៅប្រទេស​ថៃ ហើយភាគ​ច្រើន​ក្នុងចំណោមពួកគេ​បាន​ឆ្លងដែន​មកប្រទេស​កម្ពុជា​ ក្នុង​ស្ថានភាពស្គម​ស្គាំង​និង​សុខភាព​មិនល្អ មុន​​ពេល​ធ្វើ​ចល័ត​ភាព​​​ទៅតំបន់​ផ្សេងៗ​នៃប្រទេស​”។ លោក​ ប៉ាក់ឌី ទូចចាយុត ឯក​​អគ្គ​រាជ​​ទូត​​ថៃប្រចាំ​កម្ពុជា​មិន​អាច​​​ទំនាក់​ទំនង​សុំធ្វើ​អត្ថាធិប្បាយ​បាន​​ទេ​៕ ប៊ុននី

(រាយការណ៍បន្ថែម​ដោយ គុច ណា​រ៉េន)​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស