កាលពីម្សិលមិញកងទ័ពបានបង្កើតកងអនុសេនាតូចថ្មីមួយ ដើម្បីការពារតំបន់នៅជិតស្ទឹងអារ៉ែង នៅក្នុងខេត្តកោះកុង ដែលអ្នកភូមិជនជាតិដើមភាគតិចរាប់រយនាក់បានតវ៉ាយ៉ាងខ្លាំងចំពោះផែនការរបស់ក្រុមហ៊ុនចិនមួយក្នុងការសាងសង់ទំនប់វារីអគ្គិសនី ដែលអាចធ្វើឲ្យទឹកជន់លិចដីដូនតារបស់ពួកគេ។
ការបង្កើតកងអនុសេនាតូចដែលមានទាហាន៣០នាក់នេះធ្វើឡើងមួយថ្ងៃមុនពេលមន្ត្រីមូលដ្ឋានគ្រោងជួបអ្នកភូមិប្រហែល១.៥០០នាក់ ដែលនឹងរងផលប៉ះពាល់ដោយសារទំនប់វារីអគ្គិសនីស្ទឹងឆាយអារ៉ែង កម្លាំង១០៨មេហ្គាវ៉ាត់ និងដើម្បីបង្ហាញពីផែនការផ្លាស់ទីលំនៅដល់ពួកគេ។
ឧត្តមសេនីយ៍ត្រី យន់ មិន មេបញ្ជាការកងយោធពលខេមរភូមិន្ទខេត្តកោះកុង បាននិយាយថា ” យើងបានបង្កើតកងអនុសេនាតូចមួយនៅព្រឹកនេះនៅក្នុងស្រុកថ្មបាំង ដែលមានចម្ងាយប្រហែល១០គីឡូម៉ែត្រពីជ្រលងភ្នំអារ៉ែង ដើម្បីការពារសុវត្ថិភាព និងសន្តិសុខរបស់ប្រជាជន។លោកបានបន្ថែមថា “យើងបានបង្កើតកងអនុសេនាតូចនេះ ដើម្បីការពារប្រជាជន និងការពាររដ្ឋាភិបាល”។
ទោះជាយ៉ាងណា បុគ្គលិកសិទ្ធិមនុស្ស និងតំណាងអ្នកភូមិជនជាតិដើមភាគតិចជង បាននិយាយថា ពួកគេបារម្ភថា ការដាក់ទាហានថ្មីនេះគឺដើម្បីបំភិតបំភ័យអ្នកភូមិមូលដ្ឋានមិនឲ្យធ្វើការតវ៉ា។
លោក អុិន គង់ចិត្រ អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះបាននិយាយថា ” ការបង្កើតកងអនុសេនាតូចដើម្បីការពារសន្តិសុខ និងសុវត្ថិភាពរបស់ប្រជាជន នេះគឺជាលេស។ ហេតុអ្វីបានជាពួកគេបង្កើតកងអនុសេនាតូចពេលនេះ? អ្នកភូមិកំពុងរស់នៅដោយសុខសាន្ត”។
យោងតាមលោក អាឡិច ហ្គន់ហ្សាឡេស ដាវីដសុន ប្រធានអង្គការ Mother Nature ដែលធ្វើការជាមួយអ្នកភូមិនៅជ្រលងភ្នំអារ៉ែងនោះ បានឲ្យដឹងថា កងអនុសេនាតូចថ្មីនេះធ្វើឲ្យចំនួនកងទ័ពដែលឈរជើងនៅក្នុងស្រុកថ្មបាំងកើនឡើងទ្វេដង។ លោកបាននិយាយថា “ការបង្កើតកងអនុសេនាតូចនេះមួយថ្ងៃមុនពេលមានជំនួបដើម្បីដោះស្រាយសំណង គឺជាការគាប់ជួនណាស់។ នេះគឺជាការបំភិតបំភ័យ”។
លោកឧត្តមសេនីយ៍ត្រី យន់ មិន បានច្រានចោលការអះអាងរបស់បុគ្គលិកសិទ្ធិមនុស្ស ហើយបានបញ្ជាក់ថា ទាហានទំាងនេះគ្រាន់តែទៅទីនោះដើម្បីការពារអ្នកភូមិនៅស្ទឹងអារ៉ែងប៉ុណ្ណោះ។ លោកបាននិយាយថា “យើងមិនខ្វល់ទេទោះបីជាពួកគេនិយាយអ្វីក៏ដោយ”។
នៅឯកិច្ចប្រជុំនៅថ្ងៃនេះ ក្រុមការងារថ្មីរបស់រដ្ឋាភិបាលដែលទទួលបន្ទុកទំនប់នេះ រួមទំាងមន្ត្រីថាមពលថ្នាក់ជាតិ និងថ្នាក់ខេត្ត ព្រមទាំងតំណាងក្រុមហ៊ុនចិនស៊ីណូហាយដ្រូ នឹងបង្ហាញពីផែនការផ្លាស់ទីលំនៅដល់អ្នកភូមិ។
ទោះបីជារដ្ឋាភិបាលបាននិយាយថា ខ្លួននឹងសាងសង់ផ្ទះថ្មីសម្រាប់គ្រួសារនីមួយៗនៅលើដីទំហំ១.០០០ម៉ែត្រក្រឡា និងផ្ដល់ដីកសិកម្មចំនួនប្រាំហិកតាសម្រាប់គ្រួសារនីមួយៗក៏ដោយ ក៏គ្រួសារទាំងនេះនៅតែជំទាស់នឹងទំនប់ ដែលអាចធ្វើឲ្យទឹកជន់លិចដីដូនតា ព្រៃពិសិដ្ឋ និងកន្លែងកប់ខ្មោចរបស់ពួកគេដែរ។ អង្គការបរិស្ថាននានានិយាយថា ទំនប់នេះក៏រំខានដល់ប្រព័ន្ធអេកូឡូសីុនៃដីព្រៃនៅជ្រលងភ្នំនេះ និងធ្វើឲ្យប៉ះពាល់ដល់ការបម្លាស់ទី និងការពងរបស់ត្រីដែរ។
ចាប់តាំងពីខែមីនាមក អ្នកភូមិជងប្រហែ១៥គ្រួសារដែលអាចបាត់បង់ផ្ទះរបស់ខ្លួនដោយសារទំនប់នេះបានប្ដូរវេនគ្នាឈរយាមនៅជិតចិញ្ចើមផ្លូវ ដើម្បីរារាំងវិស្វករជនជាតិចិនមួយក្រុមដែលក្រុមហ៊ុនស៊ីណូហាយដ្រូ នាំឲ្យមកពិនិត្យមើលទីតាំងនេះ។ ពួកគេបានបិទផ្លូវនោះបានជោគជ័យយ៉ាងហោចណាស់ពីរលើក ហើយរហូតមកទល់ពេលនេះវិស្វករមិនទាន់បានបញ្ចប់ការងាររបស់ខ្លួននៅទំនប់នេះទេ។
លោក វ៉ែន វ៉ន អ្នកភូមិម្នាក់ដែលឈរយាមនៅកន្លែងបិទផ្លូវនេះបាននិយាយថា លោកនិងជនរួមជាតិរបស់លោកគិតថា កងអនុសេនាតូចថ្មីនេះគឺជាការប៉ុនប៉ងបំភិតបំភ័យពួកគាត់ឲ្យបោះបង់ការតវា៉របស់ខ្លួន។ គាត់បាននិយាយថា ” ខ្ញុំគិតថា គេបង្កើតកងអនុសេនាតូចថ្មីនេះដើម្បីការពារក្រុមហ៊ុនចិន ដែលនៅពីក្រោយទំនប់វារីអគ្គិសនីថ្មីនេះ ហើយកំពុងបំភិតបំភ័យដល់ការតវ៉ារបស់អ្នកភូមិ”។
ទោះជាយ៉ាងណា លោកបានអះអាងថា ពួកគេនឹងមិនចុះញ៉មទេ ហើយអាចពិចារណាបន្តផែនការរបស់ខ្លួនដើម្បីរារាំងទាហានដែលនឹងចូលមកនៅក្នុងពេលខាងមុខ។ លោក វ៉ន បាននិយាយថា “ខ្ញុំមិនទាន់បានរៀបចំផែនការបិទផ្លូវរារាំងទាហានទេ ប៉ុន្តែយើងនឹងនៅតែព្យាយាមរារាំងបុគ្គលិកជនជាតិចិនដែលចង់មកសិក្សាអំពីផលប៉ះពាល់របស់ទំនប់វារីអគ្គិសនីនេះដដែល”៕ គឹមហឿន