កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះរឿងក្តីរបស់សមាជិកខុទ្ទកាល័យម្នាក់របស់លោក ស ខេង រដ្ឋមន្ត្រីក្រសួងមហាផ្ទៃ ដែលជាប់ចោទពីបទឆបោកចំពោះការទទួលយកប្រាក់ចំនួន៣៨.០០០ដុល្លារ ពីអ្នកតំណាងរបស់ជនជាតិតៃវ៉ាន់ម្នាក់ ជាថ្នូរនឹងឯកសារចូលសញ្ជាតិដែលមិនត្រូវបានប្រគល់ឲ្យ។
លោកវរសេនីយ៍ឯក សួង វាសនា ធ្វើការនៅក្នុងនគរបាលជាតិ បានប្រាប់តុលាការថា លោកបានយល់ព្រមក្នុងឆ្នាំ២០១១ជួយឲ្យ ឈ្មោះ ហ៊ូ យឹន (HuYen) ដែលមានសញ្ជាតិតៃវ៉ាន់និងកាណាដា ចូលសញ្ជាតិកម្ពុជា ពីព្រោះលោកបានជួយអ្នកជំនួញចិនរបៀបនេះជាច្រើនលើកមកហើយ ប៉ុន្តែបែរជាមានបញ្ហាដោយមិននឹកស្មានដល់ នៅពេលលោកបានរត់ការឯកសារ។
លោក កោ វណ្ឌី ចៅក្រមប្រធានក្រុមប្រឹក្សាជំនុំជម្រះ បានមានប្រសាសន៍ថា លោកវាសនា បានបំពានតួនាទីរបស់ខ្លួននៅក្នុងក្រសួងមហាផ្ទៃ ដើម្បីបោកប្រាស់ដើមចោទ ឈ្មោះ តាំង ហេងស៊ា ដែលបានបង់ប្រាក់ជួសមុខលោក យឹន។
លោកចៅក្រម វណ្ឌី បានប្រាប់លោក វាសនា ថា ” តុលាការកំពុងជំនុំជម្រះរឿងក្តីនេះ បន្ទាប់ពីលោកត្រូវបានចោទប្រកាន់ពីបទឆបោក ពីព្រោះលោកបានប្រើតួនាទីរបស់លោក ជាទីប្រឹក្សារបស់រដ្ឋមន្ត្រីក្រសួងមហាផ្ទៃ ដើម្បីទទួលយកប្រាក់ចំនួន៣៨.០០០ដុល្លារពីជនរងគ្រោះ”។
លោក វាសនា បានមានប្រសាសន៍ថា “ខ្ញុំមិនបានបោកប្រាស់ជនរងគ្រោះទេ ហើយខ្ញុំពិតជាបានយកប្រាក់ចំនួន៣៨.០០០ដុល្លារពីលោក យឹន ដើម្បីរត់ការការចូលសញ្ជាតិរបស់គាត់មែន”។ លោកបានពន្យល់ថា នៅពេលការដាក់ពាក្យត្រូវបានច្រានចោល លោកសុខចិត្តប្រគល់ប្រាក់ឲ្យលោក យឹន វិញ។
ទោះជាយ៉ាងណា លោកស្រី វ៉ា សាក់ដា ព្រះរាជអាជ្ញារងអមសាលាដំបូងរាជធានីភ្នំពេញ បានផ្តល់អនុសាសន៍ឲ្យចោទប្រកាន់ លោក វាសនា ពីបទបោកប្រាស់ ដាក់ទោសជាប់ពន្ធនាគារចាប់ពីប្រាំមួយខែ ដល់បីឆ្នាំ និងពិន័យជាប្រាក់ចំនួន១.៥០០ដុល្លារ និងបានស្តីបន្ទោសគាត់ថាមិនគោរពការគាំទ្ររបស់រដ្ឋាភិបាលចំពោះនយោបាយចិនតែមួយ។
លោកស្រី សាក់ដា បានប្រាប់លោក វាសនា ថា ” អ្នកត្រូវដឹងថា រដ្ឋាភិបាលមិនទទួលស្គាល់តៃវ៉ាន់ ជារដ្ឋឯករាជ្យទេ”។
លោក ហេង ស៊ា ដែលជាដើមចោទ បានប្រាប់តុលាការថា ក្នុងឆ្នាំ២០១១ លោកបានយល់ព្រមបង់ប្រាក់ចំនួន៣៨.000ដុល្លារជាមុន និងប្រាក់ចំនួន១០.០០០ដុល្លារទៀតនៅពេលប្រគល់ឯកសារចូលសញ្ជាតិរបស់លោក យឹន។ ក្នុងឆ្នាំ២០១២ លោកបានសួនាំរឿងឯកសារ ចូលសញ្ជាតិនេះ ហើយត្រូវបានប្រាប់ថា ឯកសារទាំងនោះស្ថិតនៅក្នុងដៃខុទ្ទកាល័យព្រះបរមរាជវាំងហើយ។
លោក ហេង ស៊ា បានមានប្រសាសន៍ថា លោក វាសនា ត្រូវបានទាមទារប្រាក់សងជំងឺចិត្ត២០.០០០ដុល្លារ លើប្រាក់៣៨.០០០ដុល្លារដែលជំពាក់គាត់។ ចៅក្រម វណ្ឌី បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី១ ខែកក្កដា៕ ប៊ុននី