29 C
Phnom Penh

អ្នកភូមិ​រារាំង​ក្បួន​ហែសព​ជន​ជាតិ​វៀតណាម

ដោយ ឌឹ ខេមបូឌា ដេលី

បទវិភាគ

អ្នកភូមិ​ និង​មន្ត្រី​បា​ននិយាយ​ថា អ្នកភូមិ​ជាង​១០០​នាក់​ក្នុង​ខេត្ត​កំពង់ធំ បាន​រារាំង​ក្បួន​ដង្ហែ​សព​ក្នុង​ក្រុង​ស្ទឹង​សែន​​កាលពីថ្ងៃ​សៅរ៍ ដើម្បីទប់​ស្កាត់​​ការបញ្ចុះសព​បុរស​ជនជាតិ​វៀតណាម​ម្នាក់​នៅលើ​ដីដែល​គាត់​បាន​កាន់​កាប់​នៅជិត​សាលាបឋមសិក្សា​​មួយ​កន្លែង។

យោងតាម​លោក ឈុំ ផាន នាយ​ប៉ុស្តិ៍​សង្កាត់​ដំរីជាន់ខ្លាបាន​ឲ្យ​ដឹង​ថា ប៊ុន មាស អាយុ​៥៦​ឆ្នាំ​បាន​បើក​យាន​ដ្ឋាន​ជួស​ជុល​រថយន្ត​ និ​ង​ហាង​កាហ្វេ​មុន​ពេល​គាត់​ស្លាប់​កាលពី​សប្ដាហ៍មុន ដោយសារ​ជំងឺ​ថ្លើម​។ លោក​បាន​បន្ថែម​ថា ពីដំបូង​គាត់​បាន​ទិញ​ដីនេះ​ដើម្បី​សាង​​សង់​ផ្ទះ​។

លោក ហែម សោភ័ណ អាយុ៦១ឆ្នាំ​ជា​អ្នក​ភូមិ​បាន​និយាយថា មាតាបិតា​ គ្រូ​បង្រៀន​និង​សិស្សានុសិស្ស​នៅ​សាលា​បឋម​សិក្សា​រលួស បាន​តវ៉ាចំពោះ​ពិធីបញ្ចុះ​សពនេះ​កាល​ព​ីព្រឹក​ថ្ងៃសៅរ៍ បន្ទាប់ពី​ដឹង​ថា នៅ​ពេលគាត់ជិត​ស្លាប់​គាត់​ផ្តាំ​គេ​ឲ្យ​យក​គាត់​ទៅ​បញ្ចុះ​នៅ​ក្បែរ​សាលា​រៀននេះ ពីព្រោះ​ពួកគាត់​បារម្ភ​ថា វានឹងធ្វើឲ្យក្មេងៗនៅ​ក្នុង​សហគមន៍​ដែល​មាន​ទម្លាប់បូជាសព​នោះ​មាន​ការ​ភ័យ​ខ្លាច។

លោក​បានមាន​ប្រសាសន៍​ថា ” បើ​តាម​កូន​ស្រី​របស់​គាត់​ គាត់​បាន​ផ្ដាំ​កូន​ស្រី​របស់​គាត់​ឲ្យ​យក​គាត់​ទៅ​បញ្ចុះ​នៅ​លើ​ដីដែល​គាត់​បានទិញ​នៅ​ក្នុង​ភូមិ ពីព្រោះគាត់​មាន​សាច់​ញាតិ​ច្រើន​រស់​នៅទីនេះ។ ប៉ុន្តែ​កាលពី​គាត់​នៅរស់​ គាត់​បាន​និយាយ​ថា គាត់​ចង់​ទិញដីនេះ​ដើម្បី​សាង​សង់​ផ្ទះ​ មិនមែនទិញ​ដើម្បី​សង់​ផ្ទះ​ឲ្យ​ខ្មោច​ទេ​”។

ពុទ្ធសាសនិក​វៀតណាម​​មាន​ទម្លាប់​បញ្ចុះ​សព។​ទោះ​បី​ជា​ការ​បញ្ចុះ​សព​​មិន​ត្រូវ​បាន​ហាមឃាត់​នៅ​ក្នុង​ពុទ្ធសាសនា​ខ្មែរ​ក៏​ដោយ ក៏មាន​ការអនុវត្ត​បូជាសពភាគច្រើនដែរ ហើយ​​ជំនឿលើអារុក្ខអារក្ខអ្នកតាអាចធ្វើឲ្យមានការ​ខ្លាច​ខ្មោច​អ្នក​ស្លាប់។

ក្រុមអ្នកភូមិ​បាន​និយាយ​ថា គ្មាន​សាក​សព​ណា​ម្នាក់​ធ្លាប់ត្រូវ​បាន​គេ​កប់​នៅ​ខាង​ក្រៅ​វត្ត​អារាមទេ ហើយ​ការ​អនុញ្ញាត​ឲ្យកប់សពលើ​ដី​ចម្ងាយ​តែ​២០​ម៉ែត្រ​ពីរបង​សាលានោះ​ នឹង​ធ្វើឲ្យ​ក្មេងៗ​ខ្លាច​មិន​ហា៊នទៅរៀន​ ពីព្រោះពួកគេ​ត្រូវដើរ​កាត​់ដី​នៅ​តាម​ផ្លូវ​ស្ងាត់​ទៅកាន់​សាលា​រៀន​។

លោក សោភ័ណ បាន​បន្ថែម​ថា ” សាលា​រៀន​នេះ​ត្រូវ​បាន​សាង​សង់​កាលពី​ឆ្នាំ​១៩៧៩​ ដើម្បី​ឲ្យ​សិស្សានុសិស្ស​​បាន​រៀន​សូត្រ​និង​ជា​កន្លែង​សប្បាយ​រីករាយ​ ហើយ​កន្លែង​នេះ​អាច​ជា​កន្លែង​រីក​រាយ​សម្រាប់​កូន​ៗ​របស់​យើ​ង​ មិនមែន​ជា​កន្លែង​ភ័យ​ខ្លាច​ឡើយ​”។

លោក សោម ធី ចៅសង្កាត់​ និង​លោក ចិត្រ ជៀក មេភូមិ​បាន​មាន​ប្រសាសន៍​ថា បន្ទាប់ពី​មាន​ការ​ពិភាក្សា​អស់​រយៈពេល​ជិត​២ម៉ោង​កាលពីម្សិលមិញ​ជាមួយ​ក្រុមអ្នកភូមិ​ នគរ​បាល​ និង​អាជ្ញាធរ​មូល​ដ្ឋានមក ក្រុម​គ្រួសារ​សព​បានយល់ព្រម​ប្តូរ​កន្លែង​បញ្ចុះ​សព​ទៅ​បញ្ចុះនៅ​វត្ត​រលួស​វិញ បន្ទាប់ពី​ព្រះគ្រូចៅអធិការ​វត្ត​បាន​ផ្ដល់​ដី​មួយ​កន្លែង​។ លោក ជៀក បាន​មាន​ប្រសាសន៍​ថា ” ទីបំផុត​ សព​ត្រូវ​បាន​បញ្ចុះ​នៅ​ក្នុង​បរិវេណវត្ត​ជំនួស​ឲ្យ​ដីដែលគាត់​បាន​ទិញ​”៕ សារុន​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស