នាយកក្រុមហ៊ុនជ្រើសរើសពលករមួយបាននិយាយថា ក្រុមមន្ត្រីក្រសួងការងារ និងបណ្ដុះបណ្ដាលវិជ្ជាជីវៈគ្រោងនឹងជួបប្រជុំនៅថ្ងៃនេះជាមួយក្រុមហ៊ុនជ្រើសរើសពលករក្នុងស្រុកប្រហែល៤០ក្រុមហ៊ុន ដើម្បីពិភាក្សាអំពីការបង្កើតនីតិវិធីសម្រាប់ការបញ្ជូនពលករចំណាកស្រុកទៅប្រទេសថៃ។
យោងតាមលោក អាន ប៊ុនហាក់ នាយកក្រុមហ៊ុន Top Manpower បានឲ្យដឹងថា កិច្ចប្រជុំនេះនឹងផ្ដោតលើវិធីដែលក្រុមហ៊ុននានាអាចជួយកម្មករចំណាកស្រុកឲ្យទទួលបានលិខិតអនុញ្ញាតឲ្យធ្វើការងារ និងឯកសារចាំបាច់ផ្សេងទៀតដើម្បីធ្វើការនៅប្រទេសថៃដោយស្របច្បាប់។ លោក ប៊ុនហាក់ បានមានប្រសាសន៍កាលពីម្សិលមិញថា ” យើងនឹងពិភាក្សាអំពីនីតិវិធី [នៃការបញ្ជូនកម្មករទៅប្រទេសថៃ] និងអំពីតម្លៃផងដែរ”។
លោក ពេជ្រ សុភ័ណ រដ្ឋលេខាធិការក្រសួងការងារបានបញ្ជាក់ថា កិច្ចប្រជុំជាមួយក្រុមហ៊ុនជ្រើសរើសពលករ នឹងធ្វើឡើង ប៉ុន្តែបានបដិសេធមិនអធិប្បាយច្រើនទេ។
ពលករចំណាកស្រុកខ្មែរនៅប្រទេសថៃបានត្រឡប់មកស្រុកវិញយ៉ាងគំហុកចាប់តាំងពីដើមខែមិថុនាមក ដោយគេចចេញពីការបង្ក្រាបដ៏គួរឲ្យខ្លាចលើកម្មករខុសច្បាប់ពីសំណាក់កងទ័ពថៃ ដែលបានដណ្ដើមអំណាចក្នុងរដ្ឋប្រហារមួយកាលពីចុងខែមុន។
យោងតាមលោក ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ បានឲ្យដឹងថា កម្មករច្រើនជាង២៣០.០០០នាក់បានត្រឡប់មកពីប្រទេសថៃវិញគិតត្រឹមពេលម្សិលមិញ។
កាលពីសប្ដាហ៍មុន រដ្ឋាភិបាលបានបង្កើតឲ្យមានប្រតិបត្តិការផ្ដល់ជំនួយនៅតាមព្រំដែនដើម្បីផ្ដល់អាហារ ការព្យាបាលជំងឺ និងការដឹកជញ្ជូនដល់កម្មករដែលត្រឡប់មកវិញទាំងនោះ។ ដោយពួកគេភាគច្រើនបំផុតត្រូវបានបញ្ជូនទៅខេត្តដែលជាស្រុកកំណើតរបស់ពួកគេវិញហើយនោះ ការផ្ដោតជាសំខាន់បានប្ដូរទៅជួយឲ្យមានការវិលត្រឡប់ទៅធ្វើការនៅប្រទេសថៃវិញឲ្យបានឆាប់តាមដែលអាចធ្វើទៅបាន។
ភាគច្រើននៃពលករចំណាកស្រុកខ្មែរក្នុងប្រទេសថៃធ្វើការនៅទីនោះដោយខុសច្បាប់ ដើម្បីគេចពីការបង់តម្លៃខ្ពស់សម្រាប់ការងារ និងឯកសារសម្គាល់ខ្លួន។
កាលពីសប្ដាហ៍មុន លោកនាយករដ្ឋមន្ត្រី ហ៊ុន សែន បានបញ្ចុះតម្លៃសម្រាប់កម្មករចំណាកស្រុកដើម្បីទទួលបានលិខិតឆ្លងដែន ពីតម្លៃ១២៤ដុល្លារ មកត្រឹម៤ដុល្លារ ហើយរដ្ឋាភិបាលកម្ពុជាបានឲ្យដឹងថា ខ្លួននឹងធ្វើការជាមួយអាជ្ញាធរថៃដើម្បីពន្លឿនការចេញលិខិតអនុញ្ញាតឲ្យធ្វើការងារនិងវិញ្ញាបនបត្រដែលចាំបាច់ ។
ក្រុមហ៊ុនជ្រើសរើសពលករកម្ពុជា ដែលភាគច្រើនមានទំនាក់ទំនងជិតស្និទ្ធនឹងនគរបាល និងមន្ត្រីក្រសួងការងារជាន់ខ្ពស់ ត្រូវបានអង្គការសិទ្ធិមនុស្សរិះគន់ចំពោះការរំលោភបំពានជាច្រើនលើកម្មករដែលពួកគេជ្រើសរើស ដោយមានទាំងការបង្ខាំងកម្មករដោយខុសច្បាប់ និងការបញ្ជូនពួកគេឲ្យទៅរងទុក្ខនៅបរទេសផង៕ មានិត