30 C
Phnom Penh

ហាងខារា៉អូខេ​ចំនួនប្រាំបួន​កន្លែង​ត្រូវបាន​បិទ​ទ្វារ បន្ទាប់​ពី​​មានការ​វាយតប់គ្នានៅតាម​ផ្លូវ​

ដោយ ឌឹ ខេមបូឌា ដេលី

បទវិភាគ

លោក ហែម ដារិទ្ធ ​​អភិ​បាល​ខណ្ឌ​​​ពោធិ៍​សែនជ័យ ​បានមាន​ប្រសាសន៍ថា ​ហាង​ខារា៉អូខេ​ចំនួន​ប្រាំ​​បួន​​កន្លែង​នៅក្នុងខណ្ឌពោធិ៍​សែន​​ជ័យ​​​​ត្រូវបាន​បិទ​​ទ្វារ​ដោយ​គ្មាន​​កំណត់​​ពេល​កាល​ពីម្សិល​មិញ​ បន្ទាប់ពី​ការ​វាយ​តប់​គ្នា​​នៅ​រំលងអធ្រាត្រ​​រវាង​​បុគ្គលិក​​​របស់​ហាងទាំង​នោះ​​​​​។

លោក ដារិទ្ធ ​បានមាន​ប្រសាសន៍ថា ​បុរសមួយ​ក្រុម​ធំ​​ដែល​ធ្វើការ​​​ឲ្យហាងផ្សេងៗគ្នានេះ​​បានវាយតប់គ្នា​ ដោយប្រើដុំថ្ម ដំបង​និងកាំបិតនៅវេលា​ម៉ោង​២រំលងអធ្រាត្រ​។

លោក ដារិទ្ធ ​​ដែល​បាន​បិទ​ហាងទាំង​នេះ​ ​ខណៈដែល​​កងរាជអា​វុធ​ហត្ថ​​ធ្វើការ​ស៊ើប​អង្កេត​ការ​​វាយ​តប់គ្នាមួយប្រាវនោះ ​បានមាន​ប្រសាសន៍ថា ” ​​ពួកគេ​​ឈ្លោះគ្នា​​ដណ្តើម​មូ៉យ​ ជាហេតុ​​នាំ​ឲ្យ​​មាន​ការ​វាយ​តប់គ្នា​”។

លោក ដារិទ្ធ ​បានមាន​ប្រសាសន៍ថា កងរាជអាវុធ​ហត្ថ​​​​បាន​​ចាប់​ខ្លួន​​​បុរស​ចំនួន​​១៨នាក់​​​​អាយុ​​ពី​​២០ឆ្នាំ​​​ទៅ​៣០ឆ្នាំ​ និង​កំពុង​ឃាត់​ខ្លួន​​ពួកគេ ​ខណៈ​ដែល​ស៊ើប​អង្កេត​ករណីនេះ​។ គ្មាន​ការ​​ចោទប្រកាន់​​ទេ។ លោក ដារិទ្ធ ​បានមាន​ប្រសាសន៍ថា “​​យើងបាន​ចាប់​ពួក​គេ​​​មក​​អប់​រំ​។ ប្រសិនបើ​​​ពួកគេ​មិនស្តាប់​ ហាង​នេះ​នឹង​ត្រូវបិទ​រហូត​​”។

កាល​ពី​ខែ​ឧសភា គណៈ​​រដ្ឋមន្ត្រី​​បាន​អនុម័តអនុក្រឹត្យ​មួយ​ស្តីពីការ​គ្រប់​គ្រង​ក្លឹប​កម្សាន្ត​​ហាមមិនឲ្យ​​​បង្កើត​ហាង​ខារា៉អូខេថ្មីក្នុង​​​ចម្ងាយ​២០០ម៉ែត្រ​​​ពីសាលារៀន​ ​វត្ត​អារាម​ ស្ថានទូត​ឬ​ស្ថាប័ន​រដ្ឋាភិបាល​។

លោក ដារិទ្ធ បានមាន​ប្រសាសន៍ថា ​ហាង​ខារា៉អូខេ​​ជាច្រើន​កន្លែង​​បាន​បើក​កាល​​ពីឆ្នាំ​មុន​នៅក្នុងខណ្ឌ​​របស់លោក និង​បាន​និង​កំពុង​ដណ្តើម​ម៉ូយ​គ្នា។ លោកបានមាន​ប្រសាសន៍ថា ” ពីមុន ​​ពួកគេ​​ឈ្លោះ​ប្រកែកគ្នា​ និង​ចោល​របស់​របរ​​ដាក់គ្នា​នៅលើផ្លូវ”។ លោកបាន​បន្ថែមថា ​បុគ្គលិក​ដែល​ដណ្តើម​ម៉ូយ​គ្នានៅលើ​ផ្លូវ ក៏បានបង្កឲ្យ​មាន​គ្រោះ​ថ្នាក់​ចរាចរណ៍​ផងដែរ​។

លោកឧត្តមសេនីយ៍​​ទោ រ័ត្ន ស្រៀង មេបញ្ជាការ​កង​​រាជ​អា​វុធ​ហត្ថរាជធានី​​ភ្នំពេញ​បាន​មាន​ប្រសាសន៍​​​ថា ជនសង្ស័យ១៨នាក់​ត្រូវ​ឃាត់​​ខ្លួន​​នៅ​ឡើយ ​ពីព្រោះ​​នគរបាល​​ត្រូវ​កំណត់​អ្នកបង្កហេតុក្នុង​ការ​វាយ​តប់គ្នា​នេះ​។ គ្មាន​នរណាម្នាក់​​​រង​របួស​ធ្ងន់ធ្ងរ​​ក្នុងការ​វាយតប់​គ្នា​​​ទេ។

ឈ្មោះ​ ហន វាសនា បុគ្គលិក​​ហាង​ខារា៉អូខេ 7 STARKaraoke ​​ដែល​ស្ថិតក្នុងចំណោម​​ហាង​​កម្សាន្តចំនួន​ប្រាំបួនកន្លែង​​​ត្រូវបាន​បិទទ្វារ​​ ​បានមានប្រសាសន៍ថា បុគ្គលិក​បីនាក់​​​និងថៅកែ​​​របស់​គាត់​ត្រូវបាន​ចាប់​​ខ្លួន​ដោយ​មិនត្រឹមត្រូវ​។

ហន វាសនា បានមាន​ប្រសាសន៍ថា ” ពួកគេ​វាយ​​តប់គ្នា​នៅតាមផ្លូវ​ ហើយ​​ដុំថ្ម​បាន​ធ្លាក់​នៅ​មុខ​ហាង​​​របស់​យើង​។ យើងមិន​​​​​ពាក់​​ព័ន្ធ​​ក្នុងការ​វាយ​តប់គ្នា​នោះ​ទេ។ យើង​​បាន​បិទទ្វារ​ហាង​នៅ​ម៉ោង​​២​រំលង​​អធ្រាត្រ​ ហើយយើងទាំងអស់​គ្នា​នៅក្នុង​ហាង​នោះ​”។

វាសនា ​បាន​អះអាង​​​ថា មាន​តែ​ហាង​​ខារា៉អូខេ​​ពីរ​ក្នុងចំណោម​ហាង​​ខារា៉អូខេ​ចំនួន​ប្រាំបួន​​កន្លែង​​​ប៉ុណ្ណោះមានការ​ពាក់​ព័ន្ធ​ក្នុងការ​វាយតប់​គ្នា​។ លោកបាន​ឲ្យដឹងថា “​យើង​មិន​បាន​ធ្វើ​អ្វី​ខុសទេ ប៉ុន្តែ​​ពួក​គេ​ចាប់ខ្លួន​​​យើង​ដែរ​​”៕ ប៊ុននី​​​​​​​​

 

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស