27 C
Phnom Penh

គណបក្សប្រជាជនកម្ពុជា​ត្រូវបានចោទ​ថា​ធ្វើសកម្មភាពនយោបាយ​នៅព្រំដែន​​ប៉ោយប៉ែត

ដោយ ឌឹ ខេមបូឌា ដេលី

បទវិភាគ

រយៈពេលមិន​ដល់​មួយសប្តាហ៍ផង បន្ទាប់ពី​អាជ្ញាធរ​​បាន​រារាំងលោក កឹម សុខា ​មេដឹកនាំ​គណ​បក្សសង្គ្រោះជាតិមិនឲ្យមានការ​​ជួប​ជុំគ្នា និង​ផ្តល់ប្រាក់​ឲ្យពលករ​ ពល​ការិនី​ចំណាក​ស្រុក​​​ដែល​​ភៀស​ចេញ​ពីប្រទេស​ថៃ​ ​សមាជិក​សភាគណបក្សប្រឆាំង​ម្នាក់​​និង​បុគ្គលិក​សិទ្ធិ​មនុស្សម្នាក់​​បាន​អះអាង​​កាល​ពីម្សិលមិញថា ​សកម្មជន​​​របស់​គណបក្ស​ប្រជាជន​កម្ពុជា​​បាន​និងកំពុង​តែ​​ចែក​ខិត្តប័ណ្ណ​រិះគន់​ថា គណ​​​បក្ស​គណ​សង្គ្រោះជាតិ​​មិនបាន​​ជួយ​អ្វី​ដល់​ពលករ​ ពល​ការិនី​ដែល​ត្រឡប់​មក​​កាន់ស្រុកកំណើតវិញទេ។

ការខិតខំប្រឹងប្រែង​​របស់​លោក កឹម សុខា ​ដើម្បី​​ជួប​ពលករ​ ពល​ការិនី​ចំណាក​ស្រុក​​កាល​ពី​​​ថ្ងៃ​ព្រហស្បតិ៍ ត្រូវបាន​​មន្ត្រី​មូល​ដ្ឋាន​​រារាំង​ ហើយ​​លោក​ ង៉ោ ម៉េង​ជ្រួន អភិបាល​ក្រុង​ប៉ោយ​ប៉ែត​ បាន​​​បង្គាប់​ឲ្យមាន​ការ​ចែក​​អំណោយ​តែ​​នៅ​ស្នាក់ការ​គណ​បក្ស​​ខេត្ត​របស់​បក្ស​ប្រឆាំង​​​ប៉ុណ្ណោះ។

រូបថតខិត្តប័ណ្ណមួយ​​​ដែល​បង្ហោះ​នៅលើ​គេហទំព័រ​​បាន​បង្ហាញសារមួយ​មាន​ខ្លឹមសារថា​មានតែ​លោក ហ៊ុន សែន និងគណបក្សប្រជាជនកម្ពុជា​​របស់លោក​ប៉ុណ្ណោះ​​ បាន​ផ្តល់​ឱសថ ការ​ដឹក​ជញ្ជូន អាហារនិងជំនួយ​ផ្សេងៗទៀត​ដល់​ពលករ​ ពល​ការិនី​ចំណាកស្រុក​​​ដែល​ត្រឡប់​មកកាន់​ស្រុក​កំណើតវិញ​។

ខិត្តប័ណ្ណនេះ​ឲ្យដឹងថា ” គណបក្សសង្គ្រោះ​​ជាតិ​មិនផ្តល់​ជំនួយ​​ដល់​​ពលករ​​​ ពលកា​រិនី​ទេ។ សូមបងប្អូនប្រុសស្រី​​ គិត ហើយ​​ឈប់​គាំទ្រ​គណបក្សសង្គ្រោះ​​ជាតិ​។ ពួកគេ​​គ្រាន់តែ​និយាយ​ ប៉ុន្តែ​មិនបាន​ធ្វើ”។

លោក ស៊ុម ចាន់គា ​អ្នកសម្របសម្រួល​​​របស់​​អង្គការ​សិទ្ធិមនុស្ស​​អាដ​ហុក​​ប្រចាំ​ខេត្ត​​បន្ទាយមាន​ជ័យ​ បានមាន​ប្រសាសន៍ថា ​ខិត្តប័ណ្ណ​ត្រូវបាន​ប្រមូល​​ទូទំាង​ក្រុង​ប៉ោយ​ប៉ែត។

លោក ឡុង រី តំណាង​រាស្ត្រ​​ជាប់​ឆ្នោតរបស់​​គណបក្ស​​សង្គ្រោះ​​ជាតិ​​ប្រចាំ​ខេត្ត​​នេះ​​បាន​មាន​ប្រសាសន៍ថា លោកបាន​សង្កេតឃើញ​​សកម្មជ​ន​​​របស់​គណ​បក្សប្រជាជន​កម្ពុជា​​ចែក​ខិត្ត​ប័ណ្ណ​​ទូទាំង​ក្រុងនេះ​​កាល​​ពី​ចុងសប្តាហ៍មុន​។

លោក ឡុង រី ​​បានមាន​​ប្រសាសន៍ថា “ ខិត្តប័ណ្ណនេះ​​​ត្រូវបាន​ចែក​ឲ្យ​​ពលករ​​ ពល​ការិនី​ចំណាកស្រុក​​​ដែល​វិល​ត្រឡប់​​​ពី​ប្រទេស​​​ថៃ​ បន្ទាប់​​ពី​អាជ្ញាធរ​​មិនអនុញ្ញាត​ឲ្យយើង​ចែក​​​អំ​ណោយ​ដល់​​ពលករ​ ពល​ការិនី​”។

សំដៅដល់ក្រុម​យុវ​ជន​ដែល​មិន​ចាប់អារម្មណ៍​រឿងនយោបាយ​​ដឹកនាំ​ដោយ​កូន​ប្រុស​​​របស់​​នាយក​រដ្ឋមន្ត្រី លោកបាន​ពន្យល់ថា ” ​ខ្ញុំបានឃើញ​ក្រុម​យុវជន​​របស់​លោក ហ៊ុន ម៉ានី និង​សកម្មជន​​​​របស់​​គណ​បក្សប្រជាជនកម្ពុជា​កំពុងចែក​​អំណោយ​ដល់​​ពលករ​ ពល​ការិនី។ យើងចង់់​​ថត​រូប​​ ប៉ុន្តែ​ក្រុមមន្ត្រីមូល​ដ្ឋាន​​ស្គាល់​យើង​ និងមិន​​អនុញ្ញាត​ឲ្យ​យើង​ថត​ឡើយ​”។

​លោក ម៉េងជ្រួន ​ដែល​​ជា​​អភិបាល​​ក្រុង​ប៉ោយ​ប៉ែត​ បាន​បដិសេធ​​ថា​ គ្មាន​គណបក្សណា​​ត្រូវបាន​​​អនុញ្ញាត​ឲ្យ​ចែក​ខិត្តប័ណ្ណនយោបាយ​នៅព្រំដែន​​ទេ​។ លោក ម៉េងជ្រួន ​បានមាន​ប្រសាសន៍ថា ” យើងមិនបាន​​​ឃើញមាន​ការ​ចែក​ខិត្តប័ណ្ណ​​នៅ​ជុំវិញនេះទេ​ ហើយ​ខ្ញុំ​​​​ឈរ​​ជើង​នៅទីនេះ​​រយៈពេល​​២៤ម៉ោង​​​”។

លោក គោស៊ុំ សារឿត អភិបាល​ខេត្តបន្ទាយ​មាន​ជ័យ​​បានមាន​ប្រសាសន៍ថា ​លោកមិន​​បាន​ដឹង​អំពី​ខិត្ត​ប័ណ្ណ​នេះទេ​។

លោក​ សារឿត ​បានមាន​ប្រសាសន៍ថា ” ខ្ញុំ​ឆ្ងល់ថាហេតុអ្វី​​បាន​ជា​​គេនិយាយ​ដូច្នេះ​ ពីព្រោះ​វាមិនបាន​កើតឡើងទេ​​។ គណ​បក្ស​ប្រជាជន​កម្ពុជា​ ​មិនបាន​ធ្វើ​ដូច្នោះទេ​។ ហេតុអ្វី​​​លោកអ្នក​ជឿ​​​​អង្គការ​​​អាដហុក​ ​បែរ​​ជាមិន​ជឿ​​​អាជ្ញាធរ​​ទៅ​វិញ​?”។

លោក អ៊ុក សុផល ​​អធិការ​នគរបាល​ក្រុង​ប៉ោយ​ប៉ែត​​ បានមាន​ប្រសាសន៍ថា លោកនឹង​មិន​ស៊ើបអង្កេត​​ខិត្តប័ណ្ណ​ដែល​គ្មាន​ការ​​អនុញ្ញាត​​ ប្រសិន​បើគ្មាន​ការប្តឹង​តវ៉ា​​​ផ្លូវការ​​ណា​មួយ​នោះទេ​៕​ប៊ុុននី​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស