ប្រជាពលរដ្ឋរាប់រយគ្រួសារដែលត្រូវផ្លាស់ទីជម្រកដោយសារទំនប់វារីអគ្គិសនីស្ទឹងឆាយអារ៉ែងដែលមានកម្លាំង១០៨មេហ្គាវ៉ាត់ ត្រូវបានកោះហៅចូលរួមកិច្ចប្រជុំមួយកាលពីម្សិលមិញជាមួយអាជ្ញាធរខេត្ត ដែលបានបង្ហាញគម្រោងផ្លាស់ទីលំនៅមួយ ហើយបន្ទាប់មកចែកអំណោយជាកាពិនិងប៊ីចេង។
លោក ហេង សំណាង ដែលជាបុគ្គលិករបស់អង្គការក្រៅរដ្ឋាភិបាល Mother Nature ដែលបានចូលរួមកិច្ចប្រជុំនៅក្នុងស្រុកថ្មបាំងនោះដែរ បានមានប្រសាសន៍ថា លោកអភិបាលខេត្តបានចែកអំណោយឲ្យប្រជាពលរដ្ឋប្រមាណ១០០គ្រួសារដែលមានវត្តមានក្នុងកិច្ចប្រជុំនោះ។ លោក សំណាង បានមានប្រសាសន៍ថា ” មុនពេលចែកអំណោយជាកាពិនិងប៊ីចេង លោក ផៃធួន ប្លាំកេសន អភិបាលរងខេត្ត បានមានប្រសាសន៍ថា ” នេះជាអំណោយដែលអាជ្ញាធរផ្តល់ឲ្យដោយសុទ្ធចិត្ត វាមិនមែនសម្រាប់ការដោះដូរ ឬការបញ្ចុះបញ្ចូលបងប្អូនអ្នកភូមិនោះទេ”។
លោកបានមានប្រសាសន៍ថា នគរបាល កងរាជអាវុធហត្ថនិងទាហានប្រមាណ៣០នាក់ដែលខ្លះមកពីកងអនុសេនាតូចថ្មីមួយ ដែលត្រូវបានបង្កើតឡើងកាលពីថ្ងៃច័ន្ទ ដើម្បីការពារតំបន់នោះ ក៏បានចូលរួមព្រឹត្តិការណ៍នេះដែរ។
លោកបានមានប្រសាសន៍ថា ទោះយ៉ាងណា អ្នកភូមិភាគច្រើន ដែលបានចូលរួមជំនួបប្រជុំនេះ ទំនងជានៅតែជំទាស់មិនព្រមរើចេញពីដី ដែលទុកផ្លូវសម្រាប់ការសាងសង់ទំនប់វារីអគ្គិសនីនោះឡើយ។
លោក ប្លាំកេសន និងមន្ត្រីផ្សេងទៀតនៅឯកិច្ចប្រជុំកាលពីម្សិលមិញមិនអាចទាក់ទងសុំការអត្ថាធិប្បាយបានទេ។ ទំនប់វារីអគ្គិសនីស្ទឹងឆាយអារ៉ែង ដែលកំពុងត្រូវសាងសង់ដោយក្រុមហ៊ុនវារីអគ្គិសនី ចិន ស៊ីណូហាយដ្រូ (Sinohydro) រំពឹងនឹងអាចជន់លិចដីប្រមាណ២០.០០០ហិកតា និងបង្ខំឲ្យអ្នកភូមិចំនួន១.៥០០នាក់ រាប់ទាំងសមាជិកជនជាតិដើមភាគតិចជង ជាច្រើននាក់ចាកចេញពីដីដូនតារបស់ខ្លួន។
អ្នកភូមិម្នាក់ឈ្មោះ ភុន ខាង ដែលនឹងទទួលរងប៉ះពាល់ដោយសារទំនប់នេះ បានមានប្រសាសន៍ថា លោកបានបដិសេធមិនទទួលអំណោយជាកាពិមួយគីឡូក្រាមនិងប៊ីចេងពីរខាំកន្លះទេ ដោយខ្លាចថា វាជាការប៉ុនប៉ងទិញទឹកចិត្តគាត់។
លោក ភុន ខាង ដែលបាននិងកំពុងតែធ្វើការប្តូរវេនគ្នាបិទផ្លូវ ចាប់តាំងពីខែមីនារួមជាមួយបុរសជនជាតិដើមភាគតិចជងប្រហែល១៥នាក់ទៀត ដើម្បីរារាំងវិស្វករចិនមួយក្រុមមិនឲ្យចូលដល់ទំនប់វារីអគ្គិសនីនេះ បានមានប្រសាសន៍ថា “ខ្ញុំមិនបានទទួលយកអំណោយនេះទេ ពីព្រោះខ្ញុំគិតថា វានឹងបញ្ចុះបញ្ចូលចិត្តខ្ញុំ។ ពួកគេចង់ដេញយើងចេញពីកន្លែងនេះ”។ លោក ខាង បានមានប្រសាសន៍ថា ” អ្នកភូមិស្ទើរតែទាំងអស់មិនចង់ឲ្យអាជ្ញាធរនិងក្រុមហ៊ុនមកសិក្សាគម្រោងដែលត្រូវបានស្នើនោះទេ”។ លោកពន្យល់ថា ការជំទាស់នឹងគម្រោងនេះរីកសុសសាយ។
កាលពីម្សិលមិញផងដែរ ក្រុមមន្ត្រីសាធារណការបានបញ្ជាក់ថា ផ្លូវថ្មីមួយខ្សែប្រវែង៣៥គីឡូម៉ែត្រ នឹងត្រូវស្ថាបនា ដោយភ្ជាប់ផ្លូវជាតិលេខ៤៨ទៅស្រុកថ្មបាំង។
លោក នី សារ៉ាត់ ប្រធានមន្ទីរសាធារណការខេត្តបានមានប្រសាសន៍ថា “យើងមិនដឹងថាត្រូវចំណាយប្រាក់ចំនួនប៉ុន្មាននៅឡើយទេ ពីព្រោះក្រសួង[សាធារណការ] កំពុងរៀបចំផែនការមេ”។ លោកបានបន្ថែមថា នាយកដ្ឋានវិស្វកម្មរបស់ក្រសួងការពារជាតិនឹងទទួកបន្ទុកការស្ថាបនាផ្លូវនេះ៕ ប៊ុននី