28 C
Phnom Penh

សាលារាជធានី​ភ្នំពេញហាមការ​សុំ​ទាន​នៅតាម​ចំណុចប្រសព្វ​សំខាន់ៗ

ដោយ ឌឹ ខេមបូឌា ដេលី

បទវិភាគ

យោងតាម​សេចក្តី​ប្រកាស​មួយ​បង្ហោះ​​នៅលើ​គេហទំព័រ​​របស់​សាលារាជធានី​កាល​ពីថ្ងៃ​​ច័ន្ទ បាន​ឲ្យ​ដឹងថា សាលារាជធានីភ្នំពេញ​មានផែនការ​​ហាម​ប្រាម​អ្នកសុំទាន​និ​ង​អ្នក​លក់​តាម​ផ្លូវ​​មិន​ឲ្យ​រកស៊ី​នៅតាម​ភ្លើងស្តុប​​​នៃ​​ចំណុច​ប្រសព្វសំខាន់ៗ​ចំនួន​ប្រាំមួយ​កន្លែង​នៅក្នុង​រាជ​ធានី។

សេចក្តីប្រកាសនេះ មាន​ខ្លឹមសារថា លោកស្រី ម៉ក់ វ៉ាន់ស៊ីថា អភិបាលរង​រាជធានី​ភ្នំពេញ​​​បាន​ជួប​ជាមួយ​​​អាជ្ញាធរមូលដ្ឋាន​​កាល​ពីថ្ងៃ​​​សុក្រ​ ដើម្បីពិភាក្សាអំពី​​​ការ​ហាមប្រាម​​​ដូច​ដែល​​បាន​គ្រោង​​​ទុក​ ​ដែលលោក​ស្រី​​​បាន​លើកឡើង​​ថាជា​ការ​ចាំបាច់​ ដោយសារ​សកម្មភាព​”អនាធិប​តេយ្យ”។

លោកស្រី​ វ៉ាន់ស៊ីថា ​​ត្រូវបា​ន​ដកស្រង់​សម្តី​​​នៅឯ​កិច្ចប្រជុំនោះថា ” ​សេចក្តីសម្រេច​ជ្រើស​រើស​ចំណុចប្រសព្វ​តាម​ភ្លើង​ស្តុប​ចំនួន​ប្រាំមួយកន្លែង ​នឹង​ត្រូវកំណត់​ជា​តំបន់គំរូ​[សម្រាប់​​ការ​ហាម​ប្រាម​ជនអនាថា និងអ្នកសុំទាន​នៅតាមផ្លូវ] គឺព្រោះតែ​យើង​​បាន​កត់​សម្គាល់​ថា សកម្មភាព​​​អនាធិបតេយ្យ​​បែបនេះ​កើតឡើង​ម្តង​ហើយម្តងទៀត​”។

លោកស្រីបានមាន​ប្រសាសន៍ថា “បញ្ហានេះកើតឡើង បើទោះជា​​​ពួកគេ​ត្រូវបាន​​អាជ្ញាធរ​​មូល​ដ្ឋានប្រមូលមក​អប់រំ ឬផ្តល់​ការ​បណ្តុះ​បណ្តាល​វិជ្ជា​​ជីវៈ​​ដើម្បី​ចាក​ផុត​​ពី​ការ​​ដើរ​សុំទាន​ និង​មាន​អនាគត​ល្អ​ក៏ដោយ​”។ លោកស្រី វ៉ាន់ស៊ីថា ​​មិនអាច​ទាក់​​ទងសុំការ​​អត្ថាធិប្បាយ​កាលពីម្សិលមិញបាន​​ទេ។

ការហាមប្រាមនេះ​នឹងធ្វើឡើង​នៅតាម​ចំណុច​ប្រសព្វ​ចំនួនប្រាំមួយ​​កន្លែង​នៅតាម​មហា​វិថីសហព័ន្ធ​រុស្ស៊ី ព្រះមុនីវង្ស ម៉ៅ សេទុង និង​មហាវិថី​ព្រះសីហនុ​។

វាកើតឡើង​បន្ទាប់ពី​ការ​ប្រមូល​​អ្នក​សុំ​ទាន​ថ្មីៗនេះ​​​​នៅតាម​ផ្លូវ​ក្នុង​រាជធានីភ្នំពេញកាល​ពីដើម​ខែនេះ​​ ​ដែល​ក្នុង​​ពេលនោះ​កុមារ​និង​ក្មេង​ជំទង់ត្រូវបាន​ប្រមូល​ញាត់​ចូល​ក្នុង​ឡាន​​ទ្រុង​ ហើយ​បញ្ជូន​​​ទៅ​មណ្ឌល​សង្គម​កិច្ច​រាជធានី​ព្រៃ​ស្ពឺ​ ​ឬ​​​បញ្ជូន​​ទៅ​អង្គការ​ក្រៅ​រដ្ឋាភិបាល ដែល​ភាគ​ច្រើន​​បដិសេធ​មិនទទួល​​ពួកគេ​។

លោក ឡុង ឌីម៉ង់ អ្នកនាំពាក្យ​​សាលារាជធានីភ្នំពេញ​បានមាន​ប្រសាសន៍ថា បទបញ្ជា​ហាមប្រាម​អ្នកសុំទាន​នៅតាម​ចំណុច​ប្រសព្វ​ នឹងត្រូវ​​អនុវត្ត​ បន្ទាប់ពី​គណៈ​​ក​ម្មាធិការ​​​ចម្រុះ​មួយ ត្រូវបាន​បង្កើតឡើង​​ដើម្បី​​ធ្វើជំរឿនអំពី​​​អ្នកសុំ​ទាននិងអ្នកលក់​ដូរតាម​ផ្លូវ។

លោក ឌីម៉ង់ ​បានមាន​ប្រសាសន៍ថា “គណៈ​កម្មាធិការចម្រុះនេះ​​​ដែល​រួម​សហការ​​ជាមួយ​​​អង្គការ​ក្រៅរដ្ឋាភិបាលជាដៃគូចំនួន​បួន​ នឹង​ត្រូវ​បង្កើតឡើង​​គិតត្រឹម​ដំណាច់​​​​​ខែនេះ​ ឬ​នៅដើមខែ​ក្រោយ ដើម្បីជួយ​​​ក្មេង​សំុទាន​តាមផ្លូវ​និ​ង​​​ជន​​អនាថា​​ផុតពីការកេងប្រវ័ញ្ច​​របស់​អ្នក​​​ជួញដូរមនុស្ស​ និង​ដើម្បីជួយ​​​ពួកគេ​​ឲ្យមាន​ជំនាញ​​ត្រឹមត្រូវ​​សម្រាប់​​អាជីព​ថ្មី​”។

​យោងតាម​មន្ទីរសង្គម​កិច្ច​រាជធានី​​បាន​ឲ្យដឹងថា កុមារ​សុំទាន​តាម​ផ្លូវ​ អ្នកលក់​តាម​ផ្លូវ និង​ជនអនាថា ចំនួន​​​២៣៩​​​នាក់​​​ត្រូវបាន​ប្រមូល​​ចាប់​​ពីខែ​មករា​ រហូត​ដល់​ខែ​មិថុនា និង​ត្រូ​វបាន​បញ្ជូន​ដើម្បី​បណ្តុះ​​បណ្តាលវិជ្ជា​​ជីវៈ​។

សាត សុខា ​​អ្នកលក់​ផ្កាម្លិះ​នៅ​តាម​មហាវិថី​ព្រះមុនីវង្ស​ បាននិយាយ​ថា ​​ខ្លួន​ត្រូវ​បាន​ប្រមូល​​​បួន​លើកហើយ​ និង​ត្រូវបាន​បញ្ជូន​​ទៅ​មណ្ឌល​សង្គមកិច្ច​រាជធានី​ព្រៃស្ពឺ​។

សុខា ​បាន​ឲ្យដឹងថា “ការ​លក់​ភួង​ផ្កាម្លិះ​នៅតាម​ភ្លើងស្តុប​សំខាន់ៗ​​ទំាងនេះ​ យើងអាច​រកប្រាក់​បាន​ខ្លះ​។ ខ្ញុំ​មិន​ឃើញ​​អនាគត​​​របស់​ខ្ញុំ​ទេ នៅពេល​​សាលា​ក្រុង​កំពុងព្យាយាម​​​ដេញ​យើង​មិនឲ្យលក់​​នៅតាម​ផ្លូវ​”៕ ប៊ុននី​​​​​

​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស