27 C
Phnom Penh

ប្អូន​ស្រី​របស់​លោក​ ហ៊ុន សែន ត្រូវ​បាន​ភ្ជាប់​ទៅ​នឹងក្រុម​ហ៊ុន​ទិញ​ដី​នៅ​បឹង​កក់

ដោយ ឌឹ ខេមបូឌា ដេលី

បទវិភាគ

ក្រុម​ហ៊ុន​អភិវឌ្ឍន៍​របស់​លោក ឡៅ ម៉េងឃិន សមាជិក​ព្រឹទ្ធសភា​មក​ពី​គណបក្ស​ប្រជាជន​កម្ពុជា​ ដែល​រង​ការ​ចោទ​ប្រកាន់​ថា បាន​បណ្ដេញ​ប្រជាជន​រាប់​ពាន់គ្រួសារ​ដោយ​ខុស​ច្បាប់​ចេញ​ពី​កណ្ដាល​ក្រុង​ភ្នំពេញ​នោះ​ នៅពេលថ្មីៗ​នេះ​បាន​លក់​ដី​មួយ​ក្បាល​តូច​នៅ​ក្នុង​គម្រោង​របស់​ខ្លួន​ក្នុងតម្លៃ​១៤​,៩​លាន​ដុល្លារ​​ទៅ​ឲ្យក្រុម​ហ៊ុន​មួយ​ដែល​មាន​ទំនាក់​ទំនង​ជាមួយ​ប្អូន​ស្រី​ម្នាក់​របស់​លោក​នាយក​រដ្ឋមន្ត្រី ហ៊ុន សែន។

អង្គការ​សិទ្ធិមនុស្ស​នានា​លើក​ឡើង​ថា ការ​លក់​ដីនេះ​បំពាន​លក្ខខណ្ឌនៃ​កិច្ច​សន្យា​ជួល​រយៈ​ពេល​៩៩​ឆ្នាំ ដែល​ក្រុម​ហ៊ុន​ស៊ូកាគូ របស់​លោក ឡៅ ម៉េង​ឃិន បាន​ចុះ​ហត្ថលេខា​ជាមួយ​រដ្ឋាភិបាល​ក្នុង​ឆ្នាំ​២០០៧​។ គ្រួសារ​នៅ​តំបន់​នេះកំពុង​ពិចារណា​ធ្វើ​ពាក្យ​បណ្តឹង​ទៅ​អង្គភាព​ប្រឆាំង​អំពើ​ពុក​រលួយ​។

ក្រុម​ហ៊ុន​ស៊ូកាគូ បាន​បង់​លុយ​ចំនួន​៧៩​លាន​ដុល្លារ​សម្រាប់​កិច្ច​សន្យា​ជួល​ដី​ចំនួន​១៣៣​ហិកតា​នៅ​តំបន់​បឹង​កក់​ក្នុង​ក្រុង​ភ្នំពេញ ហើយ​ក្រោយ​មក​បាន​បណ្ដេញ​ប្រជាជន​ប្រហែល​៣.០០០​គ្រួសារ​ចេញពី​តំបន់នោះ​ ដែល​ជាការ​បំពាន​ច្បាប់​ភូមិបាល​របស់​កម្ពុជា​។ ដោយ​មាន​ការ​គាំទ្រ​ពីវិនិយោគិន​ជនជាតិ​ចិន​ម្នាក់ ក្រុម​ហ៊ុន​នេះ​បាន​ចាប់​ផ្ដើម​គម្រោង​អចលន​ទ្រព្យ​ដ៏ធំ​កាលពីពាក់​កណ្ដាល​ឆ្នាំ​២០១១​ ប៉ុន្តែ​បាន​ឈប់​ទៅវិញ​ភ្លាមៗ​ ហើយ​បា​ន​ទុក​តំបន់​នេះ​ឲ្យ​នៅទំនេរ​ចាប់​តាំង​ពីពេលនោះមក​។

កាលពីថ្ងៃសុក្រ ក្រុម​ហ៊ុន HLH Group​​​​​​​ ដែល​មាន​មូល​ដ្ឋាន​នៅ​ប្រទេស​សិង្ហបុរី​បាន​ផ្សព្វ​ផ្សាយនៅ​លើទីផ្សារ​ភាគហ៊ុន​នៅ​ប្រទេស​សិង្ហបុរី​ថា ក្រុម​ហ៊ុន​ D’Lotus Development Limited បាន​ទិញ​ដីចំនួន​១,៣៥​ហិកតា​ពីក្រុម​ហ៊ុន​ស៊ូកាគូ និង​មាន​ផែន​ការ​សាង​សង់អគារ​ការិយា​ល័យ ខុនដូ​ប្រណីតៗ និងពុះ​កាត់​ដី​នោះ​សម្រាប់​លក់។

ទីស្នាក់​ការ​កណ្ដាល​របស់​ក្រុម​ហ៊ុន​ HLH នៅ​ក្នុ​ង​ប្រទេស​សិង្ហបុរី​បាន​បង្វែរសំណួ​រទាំង​អស់​អំពីកិច្ច​ព្រម​ព្រៀង​នេះ​​ទៅការិយាល័យ​របស់​ក្រុម​ហ៊ុន​កសិកម្ម​ HLH នៅ​ក្នុង​ទីក្រុង​ភ្នំពេញ ហើយ​មន្ត្រី​ក្រុម​ហ៊ុន​នេះ​មិន​ទទួល​សំណើ​ជាច្រើ​ន​លើក​សុំការ​អត្ថាធិប្បាយ​ទេ។ យោង​តាម​ឯកសារ​ចុះបញ្ជី​នៅ​ក្រសួង​ពាណិជ្ជកម្ម​នៃ​ប្រទេស​កម្ពុជា​ ក្រុម​ហ៊ុន​កសិកម្ម​ HLH កាន់​កាប់​ទំាង​ស្រុង​ដោយ​ក្រុម​ហ៊ុន​ HLH Agri International​​​​​​​ ជាផ្នែក​មួយ​នៃ​ក្រុម​ហ៊ុន​ HLH Group​​​​​​​ ។

យោងតាម​អ្នកភូមិ និង​បុគ្គលិក​សិទ្ធិមនុស្ស​បាន​ឲ្យ​ដឹង​ថា ក្រុម​ហ៊ុន​កសិកម្ម​ HLH មាន​ចម្ការ​មួ​យ​នៅ​ដែន​ជម្រក​សត្វព្រៃ​ភ្នំឱរ៉ាល់​នៅ​ខេត្ត​កំពង់​ស្ពឺ។ កាលពីខែកុម្ភៈ ឆ្នាំ​២០១០ ប្អូន​ស្រី​ម្នាក់​របស់​លោក​នាយក​រដ្ឋមន្ត្រី ហ៊ុន សែន គឺ​អ្នកស្រី ហ៊ុន សេង​នី បាន​ចុះទៅមើល​តំបន់​នោះ​ដើម្បី​ជួយ​សម្រាល​ដល់​កង្វល់​របស់​ប្រជាជន​មូល​ដ្ឋាន​ដែល​ថា ចម្ការ​េនះ​រំលោភ​ចូលដី​កសិកម្ម​របស់​ពួក​គាត់​ ហើយ​ក្រុម​មន្ត្រី​បាន​ចាត់​ទុក​ក្រុម​ហ៊ុន HLH ថាជាក្រុមហ៊ុន​របស់​អ្នកស្រី។

ក្រោយមក​នៅ​ខែ​ដដែល​នោះ ស្ត្រីម្នាក់​ដែលធ្វើការ​នៅ​ការិយាល័យ​ប្រចាំទីក្រុង​ភ្នំពេញ​របស់​ក្រុមហ៊ុន​កសិកម្ម HLH បាននិយាយ​ថា អ្នកស្រី សេងនី គឺ​ជា​ប្រធាន​ក្រុម​ហ៊ុន​នេះ​។

យោងតាម​អង្គការ​លីកាដូ បាន​ឲ្យ​ដឹង​ថា កាលពី​ខែ​ឧសភា ឆ្នាំ​២០១២ អ្នកស្រី សេងនី បាន​ទៅមើល​ចម្ការ​នៅ​ខេត្ត​កំពង់ស្ពឺ​របស់​ក្រុម​ហ៊ុន​នេះ ដែល​មិនទាន់​បាន​ចរចា​រក​ដំណោះ​ស្រាយ​​សម្រាប់​ជម្លោះដីធ្លីជាមួយ​ប្រជា​ជន​មូលដ្ឋាន។

មន្ត្រីជាន់​ខ្ពស់​បីនាក់​នៅ​ក្រុម​ហ៊ុន​ស៊ូកាគូ សុទ្ធតែ​បា​ន​បដិសេធ​មិនធ្វើអត្ថាធិប្បាយ​អំពី​ការ​លក់​ដីទៅ​ឲ្យ​ក្រុម​ហ៊ុន HLH កាលពីម្សិលមិញ។

គេមិនទាន់​ដឹង​ច្បាស់​ថា តើ​ដី​១,៣៥​ហិកតា​ ដែល​ក្រុម​ហ៊ុនស៊ូកាគូ​បាន​លក់​នេះ​ស្ថិត​នៅ​ក្នុង​តំបន់​១២,៤៤​ហិកតា​ដែល​ត្រូវ​បាន​កាត់​ចេញ​ពីដី​ជួល​ឲ្យ​ក្រុម​ហ៊ុន​នេះ​ទុក​សម្រាប់​ប្រជាជន​ជាច្រើន​រយ​គ្រួសារ​រស់​នៅ​នោះ​ឬយ៉ាង​ណា​ទេ​។

ទោះបីជាដី​កាត់​ចេញ​នេះ​ទុក​សម្រាប់​ឲ្យ​ប្រជាជន​ទាំង​នេះ​រស់​នៅ​ក៏ដោយ ក៏លោក ឡៅ ម៉េងឃិន ទទួល​បាន​ប័ណ្ណ​កម្មសិទ្ធិ​ដី​មួយ​ចំនួន​នៅទីនោះដែរ​។

លោក អំ សំអាត អ្នកគ្រប់​គ្រង​បច្ចេកទេស​នៅអង្គការ​លីកាដូ បាន​និយាយ​ថា ការ​លក់​ដី​នេះ​បង្ហាញ​ថា ក្រុម​ហ៊ុន​ស៊ូកាគូ​គ្មាន​បំណង​អភិវឌ្ឍ​តំបន់​នេះទេ​។ លោក​បាន​និយាយ​ថា ” វា​គ្រាន់​តែ​ជាលេស​មួយ​បង្ហាញ​ថា ដីនេះ​ប្រើ​សម្រាប់​ការ​អភិវឌ្ឍ​ហើយពួកគេ​បាន​លក់​ដីនេះ​។ វប្បធម៌នៃការ​លក់​ និង​ការ​ដោះដូរ​ដីនៅ​តែមាន​ នេះ​ជា​វិធី​ផ្សេង​មួយ​ទៀត​ក្នុងការ​យក​ដី​របស​់​ប្រជាជន​”។

អ្នកស្រី ទេព វន្នី ប្រជាជន​នៅ​បឹង​កក់ និង​ជា​តំណាង​របស់​គ្រួសារ​មួយចំនួន​នៅ​ទីនោះ ​ដែល​កំពុងទាម​ទារ​ប័ណ្ណកម្មសិទ្ធិ​ដី​​បា​ន​និយាយ​ថា គ្រួសារ​ទំាង​នេះ​ប្រហែល​ជា​ធ្វើ​ពាក្យ​បណ្ដឹង​នៅពេល​ឆាប់ៗ​នេះ​ប្ដឹង​លោក ឡៅ ម៉េងឃិន ទៅអង្គភាព​ប្រឆាំង​អំពើពុក​រលួយ​ពាក់​ព័ន្ធ​នឹង​ការ​លក់​ដីនេះ​។

លោក ឡុង ឌីម៉ង់ អ្នកនាំពាក្យ​សាលា​រាជធានីភ្នំពេញ​ បាន​និយាយថា លោក​មាន​ការ​ភ្ញាក់​ផ្អើ​ល​ចំពោះ​ព័ត៌មាន​អំពីការ​លក់​ដីនេះ ហើយ​លោក​មិ​ន​ធ្វើ​អត្ថាធិប្បាយ​អំពី​ភាព​ស្រប​ច្បាប់​នៃការ​លក់​ដីនេះទេ​។ លោក​បាននិយាយ​ថា ” ខ្ញុំមិន​អាច​និយាយ​អំពី​រឿង​នេះ​បាន​ទេ ខ្ញុំត្រូវ​ពិនិត្យ​មើល​ឯក​សារ​សិន”៕ គឹមហឿន

(រាយការណ៍បន្ថែម​ដោយ Zsombor Peter)​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស