30 C
Phnom Penh

កំណាត់​មហាវិថី​​​សុធា​​រស​នឹង​ត្រូវពង្រីក​សម្រាប់​ផ្សារ​ទំនើប អុីអន​

ដោយ ឌឹ ខេមបូឌា ដេលី

បទវិភាគ

ក្រុមមន្ត្រី​បាននិយាយ​កា​ល​ពីម្សិល​មិញថា ​សាលារាជធានីភ្នំពេញ​​មាន​ផែនការ​​ពង្រីក​​កំណាត់ផ្លូវមហាវិថីសុធា​រស​​នៅ​ខាង​ក្រៅ​ច្រកទ្វារ​ធំ​​ចូល​​​ទៅកាន់​​ផ្សារ​​ទំនើប​ អុី​អនថ្មី​​ ដើម្បី​​ជួយ​សម្រួល​​ការ​កក​ស្ទះ​​ចរាចរណ៍​ នៅពេល​​​ផ្សារ​កម្ពស់​បួន​​ជាន់​នេះ​​បើក​ជាផ្លូវ​ការ​​នៅ​​ថ្ងៃ​ច័ន្ទ។aeon

លោក សំ ពិសិដ្ឋ ប្រធានមន្ទីរ​​សាធារណការ​និងដឹក​ជញ្ជូន​រាជធានី​​ភ្នំពេញ​​ បានមាន​ប្រសាសន៍ថា​ “យើងមាន​ផែនការ​ពង្រីកផ្លូវ​​​ទទឹង​បួនម៉ែត្រ។ ប្រវែង​បីម៉ែត្រនឹង​ពង្រីក​​ផ្នែក​​ខាង​កើត​​​ផ្លូវនិង​មួយ​​ម៉ែត្រទៀត​នឹងពង្រីក​​​​​ផ្នែក​​​ខាង​លិច​ផ្លូវ”។ លោក ​ពិសិដ្ឋ ​បាន​បដិសេធ​មិន​ផ្តល់​​សេចក្តីលម្អិត​​ថែមទៀត​ ​ឬ​និយាយថា ​ពេល​ណា​គម្រោង​នេះ​នឹង​ចាប់ផ្តើមទេ។ ប៉ុន្តែគ្រាន់តែឲ្យដឹងថា ​ផ្លូវនេះ​​ក៏នឹង​​ត្រូវ​​ដាក់ភ្លើងស្តុប​ថ្មីផង​ដែរ​”នៅ​ឆ្នាំ​២០១៥”។

ផ្សារ​ទំនើប​ ​អុីអន ដែល​សាងសង់​​អស់​ប្រាក់​ចំនួន​​២០៥លាន​ដុល្លារមាន​១៩០​តូប​​​និង​ហាង​នឹង​បើក​​សម្រាប់​សាធារណជន​​នៅថ្ងៃ​ច័ន្ទនេះហើយ។ ផ្សារ​​ទំនើបនេះ​មានច្រក​ចូល​ធំ​ៗចំនួន​ពីរ មួយ​នៅ​តាម​មហាវិថី​សុធារស និងមួយ​ទៀត​ស្ថិតនៅ​តាម​ផ្លូវ​តូចមួយ​​នៅ​តាម​បណ្តោយ​ទន្លេបាសាក់​។

លោក ឡុង ឌីម៉ង់ ​​អ្នកនាំពាក្យ​​របស់​សាលារាជធានី​​បានមាន​ប្រសាសន៍ថា បច្ចុប្បន្ននេះ​សាលារាជធានី​​កំពុងសិក្សា​​អំពី​ចរាចរណ៍​​​នៅ​តាមមហាវិថី​​​សុធារស​ ហើយថា កា​រ​​ពង្រីក​មិន​បន្ទាន់ទេ​។ លោកបានមាន​ប្រសាសន៍ថា “យើងបារម្ភខ្លាំងណាស់​​​អំពីបញ្ហា​កកស្ទះ​ចរាចរណ៍​នេះ​។ យើង​កំពុង​​ពិនិត្យលទ្ធភាព​​ដើម្បីជួយ​​ដោះស្រាយ​​បញ្ហា​នេះ​។ ​ការ​ពង្រីក​ផ្លូវ​​ពិតជាមិន​សំខាន់​ទេ​ ពីព្រោះ​យើងមិនដឹងថាអាចពង្រីក​ប៉ុន្មាន​ម៉ែត្រទេ​?”។

លោក ឌីម៉ង់ ​បានមាន​ប្រសាសន៍ថា ​​អាជីវ​កម្មដែលមាន​ស្រាប់​​​នៅតាម​ផ្លូវ មិន​អាច​ឲ្យ​យើង​​​ពង្រីក​ធំជាងពីរម៉ែត្រទេ​ ហើយ​​សាលារាជធានីភ្នំពេញ​​​ពេលនេះ​កំពុងផ្តោតលើ​​ការ​ពង្រីកផ្លូវតូច​ នៅ​ចិញ្ចើម​ផ្សារទំនើបតាម​​ទន្លេបាសាក់​។ លោក ឌីម៉ង់ ​បានមានប្រសាសន៍ថា ​”នឹងមាន​ការ​​​​ចូលរួមចំណែក​ពី​ម្ចាស់​សណ្ឋាគារ​​សូហ្វីតែល និង​ម្ចាស់​ផ្សារ​ទំនើបអុីអន ដើម្បីស្ថាបនា​ផ្លូវនេះ​​ពីផ្នែកខាង​កើត”។

លោក ឆាល ហេនរី ចេវេត (Charles-Henri Chevet) អ្នក​គ្រប់គ្រង​​ទូទៅ​​របស់​សណ្ឋាគារ​សូហ្វីតែល​ ដែល​ស្ថិតនៅ​ជិត​ផ្សារទំនើប​ អុីអន ​បានមាន​ប្រសាសន៍ថា សាលារាជធានី​បាន​ទាក់​​ទង​​សណ្ឋាគារនេះ​កាល​ពី​ឆ្នាំ​ទៅអំពីលទ្ធភាព​ពង្រីក​មហាវិថី​សុធារស​។ លោកបានលើកឡើងថា “​សាលារាជធានី​បានទាក់ទង​យើង​ច្រើន​លើក​ហើយកាល​ពីឆ្នាំ​មុន​ ដើម្បី​ពង្រីក​មហាវិថី​សុធារស ​ដោយសង្ឃឹមទុក​​ថានឹង​មានការ​បើក​​ផ្សារ​​ទំនើប ​​អុីអន​។ គួរឲ្យស្តាយ​ មិនបានធ្វើអ្វីទេ តាំង​ពីពេលនោះមក ​​ហើយយើង​សោកស្តាយ​ណាស់។ យើងបាន​​សាកសួរ​សាលារាជធានី​ច្រើនលើកហើយ​។ យើងជឿថា ចាំបាច់​ត្រូវតែ​ពង្រីក​មហាវិថី​​សុធារស​”។

លោក ស៊ីណូប៊ូ វ៉ាស៊ីហ្សាវ៉ា (Shinobu Washizawa) នាយកគ្រប់គ្រង​ផ្សារទំនើប ​អុីអន​​បានមាន​ប្រសាសន៍ថា​ លោក​ដឹង​អំពីបញ្ហា​កកស្ទះ​ចរាចរណ៍​ ហើយថា ផ្សារទំនើប​​ អុីអន ​បាន​និងកំពុង​​ពិភាក្សា​​​ជាមួយសាលារាជធានី​​​អំពី​កា​រ​ពង្រីក​មហាវិថី​សុធារស​។ លោក វ៉ាស៊ីហ្សាវ៉ា ​បានលើកឡើងថា ” យើងនឹង​ពង្រីក​ផ្លូវ​​នៅទល់​មុខ​ផ្សារ​​ទំនើបនេះ​។​យើងចង់​ពង្រីក​ឲ្យបាន​ឆាប់​”។

លោក ពិសី ស៊ិន ​​ជំនួយការ​​របស់​លោក វ៉ាស៊ីហ្សាវ៉ា ​បានមាន​ប្រសាសន៍ថា ផ្សារទំនើប​​អុីអន ​នឹង​​ជួល​សន្តិសុខ​​ជួយ​សម្រួល​ចរាចរណ៍​រថយន្ត​ដែល​ចង់​ចូល​​ផ្សារទំនើបនេះ​។ លោក​បាន​ថ្លែងថា “យើងកត់​សម្គាល់ថា ផ្លូវនៅជុំវិញ​​ផ្សារ​​របស់​យើង​ តូចណាស់​ ហើយយើង​​មាន​ផែនការ​​​ពង្រីកវា​។ យើងនឹង​ប្រើកម្លាំង​ដើម្បីគាំទ្រ និង​​ជួយ​​​សម្រួល​​អតិថិជន​​របស់​យើង​​ចេញ​ចូល​​ផ្សារ​ទំនើបនេះ​​​”។

អ្នកស្រី​ ហន ផល្លីន ​អាយុ​៣២ឆ្នាំ ​​ដែលមាន​ហាង​លក់​ទូរ​​ទឹកកក​​នៅ​​ទល់​មុខ​ផ្សារ​ទំនើប​​អុីអន ​បាន​មាន​ប្រសាសន៍ថា អ្នកស្រី​ព្រួយបារម្ភ​​អំពី​ការ​​បាត់​បង់​​អាជីវកម្ម​របស់​អ្នក​ស្រី​ ប្រសិនបើ​ដោះស្រាយឲ្យបាន​ឆាប់ៗ អំពី​​កំណើនចរាចរណ៍​​នៅតាម​ផ្លូវនេះ​។ អ្នកស្រី​ ផល្លីន ​បានមាន​ប្រសាសន៍ថា ” ពីមុនវាស្រួល ប៉ុន្តែ​​ពេលនេះ​​មានកា​រ​ស្ទះ​ចរាចរណ៍​​​ ដូច្នេះ​ប្រជាជន​មិន​ចង់​បើកបរតាម​តំបន់​នេះទេ​”៕ ប៊ុននី​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស