នគរបាលខេត្តកំពតបានដោះលែងអ្នកភូមិពីរនាក់កាលពីម្សិលមិញបន្ទាប់ពីឲ្យពួកគាត់ចុះហត្ថលេខាលើកិច្ចសន្យាថា នឹងបញ្ឈប់ការតវ៉ាប្រឆាំងក្រុមហ៊ុនដែលពួកគាត់លើកឡើងថា បានប្លន់យកដីដូនតារបស់ពួកគាត់នោះ។
អ្នកភូមិពីរនាក់ត្រូវបានចាប់ខ្លួននៅក្នុងស្រុកកំពង់ត្រាចកាលពីថ្ងៃពុធ នៅពេលដែលពួកគាត់បានរារាំងត្រាក់ទ័រជាកម្មសិទ្ធិរបស់ក្រុមហ៊ុនសំណង់ វណ្ណ វណ្ណា ដែលកំពុងរានដីដើម្បីអភិវឌ្ឍ។
អ្នកស្រី ហ៊ិន ទ្រី អាយុ៦៧ឆ្នាំ ជាតំណាងអ្នកភូមិបាននិយាយថា នគរបាលក៏បានយកខ្នោះដៃវាយអ្នកតវ៉ាពីរនាក់ដែលតម្រូវឲ្យមានការព្យាបាល ជាការចោទប្រកាន់ដែលលោក ម៉ៅ ច័ន្ទមធុរិទ្ធ ស្នងការនគរបាលខេត្តបានបដិសេធ។ លោកបានមានប្រសាសន៍ថា “យើងបានឲ្យពួកគាត់ទាំងពីរនាក់ធ្វើកិច្ចសន្យាថា មិនរារាំងការរានដីរបស់ក្រុមហ៊ុននេះ ហើយយើងបានដោះលែងពួកគាត់នៅថ្ងៃនេះបន្ទាប់ពីអប់រំរួច”។
លោក ច័ន្ទមធុរិទ្ធ បានមានប្រសាសន៍ថា នគរបាល៣០នាក់បានឈរយាមដីនោះដើម្បីធ្វើឲ្យប្រាកដថា អ្នកភូមិនឹងមិនត្រឡប់មកវិញហើយដុតសម្ភាររបស់ក្រុមហ៊ុន។
លោក ឯក ឆេងហួត ព្រះរាជអាជ្ញាអមសាលាដំបូងខេត្តបានមានប្រសាសន៍ថា ក្រុមហ៊ុនមានសិទ្ធិស្របច្បាប់ក្នុងការអភិវឌ្ឍដីនេះ។ លោកបានមានប្រសាសន៍ថា “ខ្ញុំបានចេញអធិបញ្ជាឲ្យការពារដីរបស់ក្រុមហ៊ុន ពីព្រោះក្រុមហុ៊នមានប័ណ្ណកម្មសិទ្ធិ ហើយអ្នកភូមិមិនមានភ័ស្តុតាងបង្ហាញថា ដីនេះជាកម្មសិទ្ធិរបស់ពួកគាត់ឡើយ”។
អ្នកស្រី ហ៊ិន ទ្រី បាននិយាយថា “យើងមិនមានប័ណ្ណកម្មសិទ្ធិដីធ្លីទេ ប៉ុន្តែដីនេះគឺជាដីដូនតារបស់យើងតាំងពីមុនសម័យអាណានិគមបារាំងម៉្លេះ៕សារុន