មន្ត្រីកងរាជអាវុធហត្ថម្នាក់ដែលរថយន្តរបស់លោកបានជាប់ពាក់ព័ន្ធក្នុងគ្រោះថ្នាក់ចរាចរណ៍បុកហើយរត់ បណ្តាលឲ្យមនុស្សស្លាប់កាលពីខែមុននោះ បាននិយាយកាលពីម្សិលមិញថា ឥឡូវនេះលោកកំពុងចរចាអំពីការផ្តល់សំណងជាមួយជនរងគ្រោះដើម្បីចៀសវាងការចោទប្រកាន់ពីបទព្រហ្មទណ្ឌ។
វរសេនីយ៍ទោ ឱ សឹុម ជាមន្ត្រីកងរាជអាវុធហត្ថបានអះអាងថា សន្តិសុខម្នាក់បានបើករថយន្តរបស់លោកម៉ាក តូយ៉ូតា ទុនដ្រា ហើយបានជ្រុលទៅបុកម៉ូតូពីរគ្រឿងបណ្តាលឲ្យមនុស្សពីរនាក់ស្លាប់កាលពីថ្ងៃទី៣០ ខែឧសភា។
អ្នកស្រី ឃៀម នារី អាយុ៤១ឆ្នាំ និង ស៊ាន វាសនា អាយុ២៣ឆ្នាំបានស្លាប់ដោយសារគ្រោះថ្នាក់ចរាចរណ៍នៅត្រង់ចំណុចប្រសព្វនៃមហាវិថីព្រះនរោត្តម និងមហាវិថីម៉ៅសេទុង ចំណែក ងួន ឧស្សាហ៍ អាយុ២៦ឆ្នាំត្រូវបានបញ្ជូនទៅមន្ទីរពេទ្យកាល់ម៉ែតដោយសាររងរបួសធ្ងន់។
នគរបាលចរាចរបានសើុបអង្កេតករណីនេះ ហើយបានបញ្ជូនសំណុំរឿងទៅសាលាដំបូងរាជធានីភ្នំពេញ ហើយរឿងនេះបានជាប់គាំងនៅទីនោះ។ អ្នកបើកបររថយន្តដែលមិនទាន់ស្គាល់អត្តសញ្ញាណនៅមានសេរីភាពពេញលេញនៅឡើយ ហើយមិនទាន់ត្រូវបានចោទប្រកាន់ទេ។
វរសេនីយ៍ទោ ឱ សឹុម បាននិយាយថា លោកកំពុងចរចាអំពីសំណងជាមួយក្រុមគ្រួសារជនរងគ្រោះ ហើយកាលពីម្សិលមិញបានជួបជាមួយជនរងគ្រោះម្តងទៀតដោយមានវត្តមានក្រឡាបញ្ជីម្នាក់ផង។ លោកបាននិយាយថា “តុលាការនឹងមិនធ្វើការចោទប្រកាន់ទៀតទេ ពីព្រោះយើងនឹងដោះស្រាយបញ្ហានេះ។ ហេតុដូច្នេះហើយយើងព្យាយាមដោះស្រាយបញ្ហានេះនៅក្រៅតុលាការ”។
លោកស្រី ឡាយ បុប្ផា ក្រឡាបញ្ជីដែលមានវត្តមាននៅជំនួបកាលពីម្សិលមិញ បានមានប្រសាសន៍ថា វរសេនីយ៍ទោ ឱ សឹុម យល់ច្រឡំថា ការផ្តល់សំណងអាចរួចផុតពីបទព្រហ្មទណ្ឌ។ លោកស្រីបានមានប្រសាសន៍ថា ” យោងតាមច្បាប់ អ្នកបើកបរនឹងត្រូវចោទប្រកាន់ពីបទព្រហ្មទណ្ឌដដែល បើទោះណាជាមានការផ្តល់សំណងហើយក៏ដោយ”។ លោកស្រី បុប្ផា បានមានប្រសាសន៍ថា លោកស្រីបានចូលរួមក្នុងជំនួបនោះ ពីព្រោះលោកស្រី ” គ្រាន់តែចង់ជួយ” ដល់ភាគីទាំងពីរចរចាសម្របសម្រួលគ្នាតែប៉ុណ្ណោះ។
លោក ស៊ាន ប្រុស ត្រូវជាបងប្រុសរបស់ជនរងគ្រោះ ស៊ាន វាសនា បាននិយាយថា លោកបានទាមទារសំណងជាប្រាក់ចំនួន៦.០០០ដុល្លារ និងម៉ូតូប្រើហើយមួយគ្រឿងចំពោះការស្លាប់ប្អូនប្រុសរបស់លោក។ លោកបាននិយាយថា ” តំណាងខាងរថយន្តបានប្រាប់ខ្ញុំថា គាត់នឹងយកសំណើរបស់ខ្ញុំទៅពិចារណា”។ លោកបានបន្ថែមថា ក្រុមគ្រួសាររបស់លោកមិន ” ខ្វល់អំពីរឿងក្តីនៅតុលាការទេ”។ លោកបាននិយាយថា ” យើងនឹងដកពាក្យបណ្តឹងប្រសិនបើយើងទទួលបានសំណងសមរម្យ”។
វរសេនីយ៍ទោ ឱ សឹុម បាននិយាយអំពីជំនួបកាលពីម្សិលមិញថា ជាការបោះជំហានទៅមុខមួយជំហាន “ពីព្រោះក្រុមគ្រួសារជនរងគ្រោះបានទាមទារសំណងច្រើនពេក”៕សារុន