កម្មកររោងចក្រកាត់ដេរប្រហែល៤០០នាក់ដែលបានបាត់បង់ការងារនៅពេលដែលរោងចក្ររបស់ពួកគេបានបិទទ្វារភ្លាមៗកាលពីដើមខែនេះ បានបិទផ្លូវនៅសួនឧស្សាហកម្មកាណាឌីយ៉ាកាលពីថ្ងៃសៅរ៍ដើម្បីទាមទារប្រាក់បំណាច់ការងារ។
កម្មករមកពីរោងចក្រហុងកុងយូហ្វេង (Hongkong Yufeng) ដែលបានបិទទ្វារដោយមិនបានដឹងជាមុនកាលពីថ្ងៃទី៩ ខែមិថុនា កំពុងទាមទារឲ្យគណៈគ្រប់គ្រងសួនឧស្សាហកម្មកាណាឌីយ៉ាទទួលខុសត្រូវចំពោះលុយដែលនៅជំពាក់ពួកគេ ពីព្រោះម្ចាស់រោងចក្រនេះបានគេខ្លួនបាត់ហើយ។
យោងតាមសហជីព និងតំណាងកម្មករនៅសួនឧស្សាហកម្មកាណាឌីយ៉ាបានឲ្យដឹងថា សួនឧស្សាហកម្មកាណាឌីយ៉ា បានបើកប្រាក់ខែសម្រាប់ខែមេសាឲ្យកម្មករប្រហែល១០០.០០០ដុល្លារ និងប្រាក់សម្រាប់សប្តាហ៍១នៃខែមិថុនា។
លោក ជ័រ រ៉ុង អាយុ៣៦ឆ្នាំ អតីតអ្នកគ្រប់គ្រងផ្នែកម៉ាស៊ីននៅរោងចក្រហុងកុងយូហ្វេង បាននិយាយថា “មូលហេតុដែលយើងតវ៉ា និងបិទផ្លូវនៅសួនឧស្សាហកម្មកាណាឌីយ៉ានេះ គឺពីព្រោះយើងមិនបានទទួលលុយបំណាច់នេះ”។ លោក រ៉ុង បាននិយាយថា រោងចក្រជំពាក់ប្រាក់បំណាច់ការងាររបស់គាត់ប្រហែល៥០០ដុល្លារ ហើយនឹងបន្តតវ៉ារហូតដល់បានសម្រេច។
ក្រោយពីបានបិទផ្លូវនៅសួនឧស្សាហកម្មនេះអស់រយៈពេលប្រហែល២ម៉ោងកាលពីព្រឹកថ្ងៃសៅរ៍ បង្កឲ្យមានការលំបាកដល់ការដឹកជញ្ជូនរបស់រថយន្តធំៗនោះ កម្មករបានជួបជាមួយតំណាងសួនឧស្សាហកម្មនេះ ប៉ុន្តែមិនទទួលបានដំណោះស្រាយទេ។
លោក ដុក សំអាត តំណាងកម្មករបាននិយាយថា សួនឧស្សាហកម្មកាណាឌីយ៉ាកំពុងអះអាងថា គេមិនមានលុយគ្រប់គ្រាន់សម្រាប់បើកប្រាក់បំណាច់ការងារនេះទេ។លោក សំអាត បាននិយាយថា ” ខ្ញុំទាមទារឲ្យម្ចាស់សួនឧស្សាហកម្មនេះគិតពីការទាមទាររបស់យើង”។
លោក ឡុង គឹមស៊ីន ដែលជាជំនួយការប្រធានរដ្ឋបាលនៅរោងចក្រហុងកុងយូហ្វេងបាននិយាយថា រោងចក្រមិនអាចបើកប្រាក់ខែឲ្យកម្មករបានទេ ដូច្នេះហើយម្ចាស់រោងចក្របានគេខ្លួនបាត់។ លោក គឹមស៊ីន បាននិយាយថា “យើងមិនដឹងថា ត្រូវធ្វើដូចម្ដេចទេ ពីព្រោះថៅកែរោងចក្របានគេខ្លួនបាត់ហើយ។ ថៅកែរបស់យើងបានគេចខ្លួន ពីព្រោះគាត់មិនមានលុយបើកប្រាក់ខែឲ្យកម្មករ”។
យោងតាមបញ្ជីរោងចក្ររបស់សមាគមរោងចក្រកាត់ដេរនៅកម្ពុជា រោងចក្រហុងកុងយូហ្វេង ផលិតខោខូវប៊យ និងខោក្រណាត់ ហើយហ៊ុន៧០ភាគរយកាន់កាប់ដោយជនជាតិជប៉ុន ហើយហ៊ុនផ្សេងទៀតកាន់កាប់ដោយវិនិយោគិនចិន។
គេហទំព័ររបស់រោងចក្របង្ហាញរូបថតកម្មករញញឹម និងសរសេរថា “យើងចាប់ផ្ដើមបង្កើតបរិយាកាសឲ្យកម្មកររបស់យើងធ្វើការដោយរីករាយ ពីព្រោះយើងគិតថា បរិយាកាសការងារល្អជួយបង្កើនផលិតភាពការងារ”។
យោងតាមសហជីពរបស់កម្មករឲ្យដឹងថា រោងចក្រនេះផលិតសម្លៀកបំពាក់ឲ្យក្រុមហ៊ុនGap និងក្រុមហ៊ុន Adidas។ កម្មករបាននិយាយថា ក្នុងរយៈពេលប៉ុន្មានសប្ដាហ៍នេះមុនការបិទទ្វារភ្លាមៗនេះហាក់ដូចជាមានការបញ្ជាទិញជាធម្មតា ។
លោក សៀង សម្បត្តិ ប្រធានសហព័ន្ធសហជីពមិត្តភាពកម្មករ ជាសហជីពមួយក្នុងចំណោមសហជីពដែលតំណាងឲ្យកម្មករបាននិយាយថា ការតវ៉ានឹងបន្តធ្វើទៀតនៅថ្ងៃនេះ រហូតដល់មានការបើកប្រាក់បំណាច់ការងារបានគ្រប់ចំនួន។ លោក សម្បត្តិ បាននិយាយថា ” រោងចក្រគួរតែបើកប្រាក់ដែលនៅជំពាក់កម្មករ។ កម្មករទាំងនោះមិនអាចរស់នៅបានយូរដោយគ្មានលុយដែលជំពាក់ពួកគេបានទេ”។ តំណាងសួនឧស្សាហកម្មកាណាឌីយ៉ា ដែលមិនប្រាប់ឈ្មោះនៅពេលទាក់ទងតាមទូរស័ព្ទបាននិយាយថា សួនឧស្សាហកម្មនេះកំពុងចរចាដោះស្រាយញ្ហាជាមួយកម្មករ។ តំណាងរូបនេះបាននិយាយថា ” យើងមានគោលជំហរដោះស្រាយបញ្ហានេះ។ យើងមិនអាចនិយាយលើសពីនេះបានទេ”៕ គឹមហឿន