កម្មកររោងចក្រកាត់ដេរប្រហែល៤០០នាក់ មកពីរោងចក្រមួយដែលបានបិទទ្វារភ្លាមៗកាលពីដើមខែនេះបានព្រមព្រៀងកាលពីថ្ងៃម្សិលមិញ ឈប់ធ្វើការតវ៉ា និងបិទផ្លូវទៅកាន់សួនឧស្សាហកម្មកាណាឌីយ៉ា ជាថ្នូរនឹងការទទួលបានប្រាក់បំណាច់ការងារពាក់កណ្តាលដែលរោងចក្រនេះជំពាក់ពួកគេ។
កម្មករមកពីរោងចក្រ ហុងកុង យូហ្វេង ដែលបានបិទទ្វារកាលពីខែមិថុនា កំពុងទាមទារប្រាក់បំណាច់ការងារពីសួនឧស្សាហកម្មកាណាឌីយ៉ា ពីព្រោះម្ចាស់រោងចក្រនេះដែលជាជនជាតិជប៉ុនបានបិទទ្វាររោងចក្រភ្លាមៗ ហើយបានគេចខ្លួនបាត់។ កម្មករបានធ្វើការតវ៉ា និងបិទផ្លូវកាលពីថ្ងៃសៅរ៍ ហើយបានធ្វើដូច្នេះម្តងទៀតកាលពីម្សិលមិញ ថ្វីបើមានការបញ្ជូនទាហានឲ្យទៅ ឃ្លាំមើលការតវ៉ាេនះក្តី។ អំឡុងការចរចាជាមួយតំណាងកម្មករកាលពីម្សិលមិញ ខណៈដែលនៅតែមានការបិទផ្លូវនោះ សួនឧស្សាហកម្មកាណាឌីយ៉ាបានព្រមព្រៀងបើកប្រាក់បំណាច់ការងារពាក់កណ្តាលឲ្យកម្មករ។
លោក អឹុង តារា តំណាងរោងចក្រ ហុងកុង យូហ្វេង បាននិយាយថា “បន្ទាប់ពីមានការចរចាជាមួយដៃគូរពាក់ព័ន្ធទាំងអស់ សួនឧស្សាហកម្មកាណាឌីយ៉ាបានយល់ព្រមបើកប្រាក់បំណាច់៥០ភាគរយឲ្យកម្មករ។ យើងបានប្រគល់ឧបករណ៍នៅរោងចក្រនេះទៅឲ្យសួនឧស្សាហកម្មកាណាឌីយ៉ាសម្រាប់បើកប្រាក់បំណាច់ឲ្យកម្មករ”។លោក តារា បានប្រាប់ថា ម្ចាស់រោងចក្រនេះឈ្មោះ វ៉ាតាណាបេ យូតាកា ។
លោក អឹុម ផស្ស អាយុ២៧ឆ្នាំជាអតីតកម្មករដែលបានចូលរួមការតវ៉ាេនះបាននិយាយថា គាត់និងកម្មករដែលធ្វើការជាមួយគាត់គ្មានជម្រើសក្រៅពីទទួលយកប្រាក់បំណាច់៥០ភាគរយនេះទេ។ លោក ផស្ស បាននិយាយថា ” ខ្ញុំបង្ខំចិត្តទទួលយកប្រាក់បំណាច់នេះថ្វីបើបាត់បង់អស់ពាក់កណ្តាលក៏ដោយ”។ គាត់បានពន្យល់ប្រាប់ថា គាត់មិនអាចបន្តការតវ៉ាដោយគ្មានដំណោះស្រាយបានទេ។ “ខ្ញុំគ្មានជម្រើសឡើយ” ។
លោក លីវ ថារិន ប្រធានសហជីពយុវជនប្រជាធិបតេយ្យឯករាជ្យ ជាសហជីពមួយក្នុងចំណោមសហជីពដែលតំណាងឲ្យកម្មករបាននិយាយថា កម្មករយល់ព្រមឈប់បិទផ្លូវទៅកាន់សួនឧស្សាហកម្មកាណាឌីយ៉ា ដោយការទទួលយកប្រាក់បំណាច់៥០ភាគរយ។
លោក ហាក់ ម៉ៅ មេបញ្ជាការរងកងពលតូចលេខ៧០បាននិយាយថា អង្គភាពរបស់លោកបានបញ្ជូនទាហានប្រដាប់អាវុធទៅសួនឧស្សាហកម្មកាណាឌីយ៉ាដើម្បីឲ្យរក្សាសន្តិសុខអំឡុងពេលតវ៉ាកាលពីម្សិលមិញ។ លោកបាននិយាយថា ” យើងបានបញ្ជូនទាហានឲ្យទៅរក្សាសណ្តាប់ធ្នាប់ និងសន្តិសុខសាធារណៈនៅទីនោះ បន្ទាប់ពីមានសំណើពីសួនឧស្សាហកម្មកាណាឌីយ៉ា។ យើងមិនបានទៅបង្ក្រាបពួកគេទេ”៕ គឹមហឿន