31 C
Phnom Penh

ប្តីប្រពន្ធ​ពីរនាក់​ត្រូវ​បាន​ផ្តល់​សំណង​ចំនួន​១០.០០០ដុល្លារ​ប​ន្ទាប់ពី​ដាក់ញត្តិទៅ​លោក​ ហ៊ុន សែន

ដោយ ឌឹ ខេមបូឌា ដេលី

បទវិភាគ

យោង​​តាម​ក្រុមអ្នកភូមិ​បាន​ឲ្យ​ដឹងថា កាល​ពីសប្ដាហ៍មុន​សមាជិក​សភា​គណបក្ស​ប្រជាជនកម្ពុជា​មួយ​រូប​បាន​ធ្វើ​អន្តរាគមន៍​នៅ​ក្នុង​វិវាទ​ដីធ្លី​ដ៏អូស​បន្លាយមួយ​រវាង​អ្នក​ភូមិ​ក្នុង​ខេត្ត​កំពង់ឆ្នាំង និង​ភរិយា​លោក​ ស៊ុយ សែម រដ្ឋមន្ត្រីក្រសួង​រ៉ែ និង​ថាមពល​។​អ្នក​ភូមិ​ទាំង​នេះ​​បាន​លើក​ឡើង​ថា សមាជិក​សភា​រូប​នេះ​បាន​សន្យា​ផ្ដល់​​សំណង​​ច្រើន​ដល់​អ្នក​ភូមិ​ដែលនិយាយ​​ឥត​សំចៃពីរ​នាក់​​។

តំណាង​អ្នកភូមិ​៥២​គ្រួសារ​ដែលជាប់​ពាក់​ព័ន្ធ​ក្នុង​វិវាទ​ដីធ្លីជាមួយ​ក្រុម​ហ៊ុន​ ខេឌីស៊ី​ របស់​អ្នកស្រី​ ជា ខេង ភរិយា​លោក​ ស៊ុយ សែម នោះ​បាន​មក​រាជ​ធានី​ភ្នំពេញ​កាលពី​សប្ដាហ៍​មុន ដើម្បី​ដាក់​ញត្តិ​ជូន​លោក​នាយក​រដ្ឋមន្ត្រី ហ៊ុន សែន ឲ្យ​ជួយ​ដោះ​ស្រាយ​វិវាទ​ដីធ្លី​របស់​ពួកគាត់​ ដែល​មាន​រយៈពេល​ប្រាំពីរ​ឆ្នាំ​មក​ហើយ​។

យោងតាម​លោក ស្ងួន ញឿន ដែល​មក​ជាមួយ​ភរិយា​របស់​លោក កាលពី​ថ្ងៃ​ពុធ​បាន​ជួប​ជាមួយ​លោកស្រី ឡោ ខេង សមាជិក​សភា​គណបក្ស​ប្រជា​ជន​កម្ពុជា​ដែល​ក៏​ជា​អនុ​ប្រធាន​សាខា​កាក​បាទ​ក្រហម​រាជធានីភ្នំពេញដែរនោះបាន​ឲ្យ​ដឹង​ថា ​សំណើ​របស់​ពួកគាត់​ត្រូវ​បាន​ទទួលយក​​ហើយ។

លោក ញឿន បាន​មាន​ប្រសាសន៍​ថា ” [លោកស្រី​ ឡោ ខេង] បាន​ណែនាំ​ខ្លួនគាត់​​ប្រាប់​ខ្ញុំថា គាត់​ជា​សមាជិក​សភា​គណបក្ស​ប្រជា​ជន​កម្ពុជា​មួយ​រូប ដែល​លោក​នាយក​រដ្ឋមន្ត្រី ហ៊ុន សែន បាន​ចាត់​តាំង​ឲ្យមក​ជួយ​ដោះ​ស្រាយ​វិវាទ​ដីធ្លី​រវាង​យើង​និង​ក្រុម​ហ៊ុន​ ខេឌីស៊ី”។

យោងតាមលោក ញឿន បាន​ឲ្យ​ដឹង​ថា ប៉ុន្តែ​ខណៈ​ដែល​សមាជិក​សភា​រូប​នេះ​​សុខ​ចិត្ត​ផ្ដល់​ប្រាក់​ចំនួន​១០.០០០​ដុល្លារ​ជា​ថ្នូរ​នឹង​ដី​របស់​ប្ដី​ប្រពន្ធរូប​នេះ​ លោកស្រី​ក៏​បាន​ប្រាប់​ពួក គាត់​ឲ្យ​ឈប់​តតាំង​ជាមួយ​អ្នកស្រី ជា ខេង ទៀត។លោក​បាន​បន្ថែម​ថា លោក​និង​ប្រពន្ធ​របស់​លោក​បាន​ច្រាន​ចោល​សំណងនេះ​។

លោក ញឿន បាន​និយាយ​ថា ” សំណង​នេះ​គឺ​តិច​តួច​ណាស់​ បើ​ប្រៀប​ធៀប​ទៅ​នឹង​អ្វី​ដែល​ខ្ញុំ​បាន​បាត់​បង់ រួម​មាន​ផ្ទះ​សំបែង ដីស្រែ និង​សាច់​ញាតិ​របស់​ខ្ញុំ។ ប៉ុន្តែ​លោកស្រី​​បាន​បំភិត​បំភ័យ​ខ្ញុំ ដោយ​និយាយ​ថា ខ្ញុំ​មិន​អាច​គេច​ខ្លួន​រួចឡើយ បើទោះ​ជា​ខ្ញុំ​មាន​ស្លាប​ហើរ​ក៏ដោយ ដែលខ្ញុំ​គិតថា ​ជា​ការ​គំរាម​កំហែង​ដល់​អាយុ​ជីវិត​របស់​ខ្ញុំ​”។

អ្នកស្រី អ៊ុំ សុភី ប្រពន្ធ​របស់​លោក ញឿន ជា​តំណាង​​អ្នក​ភូមិ​មកពី​ឃុំតាជេស ស្រុក​កំពង់​ត្រឡាច​ដែល​និយាយឥតសំចៃ ហើយ​កាលពី​សប្ដាហ៍​មុន​ក៏ស្ថិត​ក្នុង​ចំណោម​អ្នកភូមិ​ចំនួន​២២​គ្រួសារ​ដែល​បាន​ស្នើ​ឲ្យ​សាលា​ដំបូង​ខេត្ត​ទុក​ជា​មោឃៈ​នូវ​​ការ​ព្រម​ព្រៀង​ផ្ដល់​សំណង​ជា​មួយ​អ្នកស្រី ជា ខេង កាលពី​ដើម​ឆ្នាំ​នេះ ដោយ​អះអាង​ថា ការ​ព្រម​ព្រៀង​នេះ​ត្រូវបាន​ធ្វើ​ឡើង​ដោយ​ការ​គំរាម​កំហែង​។

លោក រាជ សីមា តំណាង​អ្នកភូមិ​ម្នាក់​ទៀត​ដែល​និយាយ​ឥតសំចៃ​ដែរ​បាន​និយា​យ​ថា លោក​បាន​ជួប​ជាមួយ​លោកស្រី ឡោ ខេង កាលពីថ្ងៃសៅរ៍ ហើយ​បាន​លើក​ឡើង​ថា លោក​សុខ​ចិត្ត​ទទួល​យក​សំណង​ជា​ប្រាក់​ចំនួន​២.០០០​ដុល្លារ និង​ផ្ទះ​ថ្មីមួយ​ខ្នង​នៅ​លើ​ដី​ទំហំ​៤០០​ម៉ែត្រក្រឡា។

លោក​បាន​និយាយ​ថា ក្នុង​នាម​ខ្ញុំ​ជាតំណាង​អ្នកភូមិ​ ខ្ញុំ​នឹង​យក​រឿង​នេះ​ទៅពិគ្រោះ​ជាមួយ​អ្នកភូមិ​ដែលបាន​​យល់​ព្រមថា ​ខ្ញុំគួរ​ទទួល​យក​សំណង​ ដើម្បី​ចៀស​ពី​គ្រោះ​ថ្នាក់​ដល់​អាយុ​ជីវិត​របស់ខ្ញុំ​ បន្ទាប់ពី​ក្រុមហ៊ុន​បាន​ដាក់ពាក្យ​បណ្ដឹង​បំភិត​បំភ័យ​ខ្ញុំ​ជាច្រើន​លើក និង​មាន​ការ​គំរាម​កំហែង​ពីសមាជិក​សភារូបនេះ​ទៀត​។ លោក រាជ សីមា បាន​និយាយ​ថា ការ​ដោះ​ដូរ​នឹង​ធ្វើ​ឡើង​ជា​ផ្លូវ​ការ​នៅ​ថ្ងៃ​ពុធ នៅ​សាលា​ស្រុក​កំពង់ត្រឡាច។

ទាំង​លោកស្រី ឡោ ខេង និង​អ្នកស្រី ជា ខេង មិន​អាច​ទាក់​ទង​សុំអត្ថាធិប្បាយ​បាន​ទេ​។ ប៉ុន្តែ​លោក ហ៊ុល ចាន់ថូ អតីត​អភិបាល​ស្រុក​ដែល​ឥឡូវ​េនះ​ជា​ប្រធាន​ក្រុម​ប្រឹក្សា​ស្រុក បាន​មាន​ប្រសាសន៍​ថា ការ​អន្តរាគមន៍​របស់សមាជិក​សភា​រូប​នេះ​បង្ហាញ​ថា វិវាទ​ដីធ្លី​ដែល​មាន​រយៈ​ពេល​ប្រាំពីរ​ឆ្នាំ​នោះ​ជិត​បញ្ចប់​ហើយ​។ លោក​បានមាន​ប្រសាសន៍​ថា “ប្រសិន​បើ​មាន​អន្តរាគមន៍​ពី​លោក​នាយក​រដ្ឋមន្ត្រី ខ្ញុំ​មាន​ជំនឿ​ថា ករណី​នេះពិត​ជា​បញ្ចប់”៕ សារុន​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស