29 C
Phnom Penh

រថយន្ត​ដឹក​កម្មកររោង​ចក្រ​កាត់​ដេរ​​ជួប​គ្រោះ​ថ្នាក់​បុក​ដើម​ឈើ​បណ្តាល​ឲ្យ​កម្មករ​៤៥​នាក់​រង​របួស​

ដោយ ឌឹ ខេមបូឌា ដេលី

បទវិភាគ

នគរបាល​​​មូល​​​ដ្ឋាន​​​បាន​​​និយាយ​​​ថា រថយន្ត​​​មួ​​​យ​​​គ្រឿង​​​ដឹក​​​កម្មករ​​​រោង​​​ចក្រ​​​កាត់ដេរ​​​ប្រហែល​​​​​​៦០​​​នាក់​​​បាន​​​ជ្រុល​​​ទៅ​​​បុក​​​ដើម​​​ឈើ​​​មួយ​​​ដើម​​​នៅ​​​ក្នុង​​​ខេត្ត​​​កំពង់​​​ចាម​​​កាល​​​ពី​​​ម្សិលមិញ ហើយ​​​បាន​​​ធ្វើ​​​ឲ្យកម្មករ​​​៤០​​​នាក់​​​រង​​​របួស​​​ស្រាល និង​​ប្រាំ​​​នាក់​​​រង​​​របួស​​​ធ្ងន់​​​។

គ្រោះ​​​ថ្នាក់​​​នេះ​​​ គឺ​​​ជា​​​គ្រោះ​​​ថ្នាក់​​​ថ្មី​​​បំផុត​​​នៅ​​​ក្នុង​​​ចំណោម​​​គ្រោះ​​​ថ្នាក់​​​ចរាចរណ៍​​​ជាច្រើន​​​ករណី​​​ស្រដៀង​​​គ្នា​​​នេះ ដែល​​​បាន​​​ធ្វើ​​​ឲ្យ​​​ប៉ះ​​​ពាល់​​​ដល់​​​ឧស្សាហ​​​កម្ម​​​កាត់​​​ដេរ​​​ដែល​​​មាន​​​ទឹក​​​ប្រាក់​​​៥​​​ពាន់​​​លាន​​​ដុល្លារ​​​នៅ​​​កម្ពុជា​​​ ដោយ​​​កម្មករ​​​រាប់​​​រយ​​​ពាន់​​​នាក់​​​ត្រូវ​​​ជិះ​​​ប្រជ្រៀត​​​គ្នា​​​នៅ​​​លើ​​​រថ​​​យន្ត​​​​​ទៅ​​​​​​និង​​​មក​​​ពី​​​ធ្វើ​​​ការ​​​នៅ​​​តាម​​​រោង​​​ចក្រ​​​នៅ​​​ពេល​​​ព្រលឹម​​​ និង​​​នៅ​ពេល​ជិត​​ព្រលប់។

លោក សំ ណាល់ អធិការ​​​នគរបាល​​​ស្រុក​​​បាន​​​ឲ្យដឹង​​​ថា ” កង់​​​រថយន្ត​​​នោះ​​​បាន​​​បែក​​​ ហើយ​​​បាន​​​ជ្រុល​​​ទៅ​​​បុក​​​ដើម​​​ឈើ​​​មួយ​​​ដើម​​​ធ្វើ​​​ឲ្យ​​​​​កម្មករ​​​៤០​​​នាក់​​​រង​​​របួសស្រាល និង​​​ប្រាំ​​​នាក់​​​រង​​​របួស​​​ធ្ងន់​​នៅ​​​ពេល​​​ដែល​​​កម្មករ​​​ផ្សេង​​​ទៀត​​​សង្កត់​​​លើ​​​ពួក​​​គេ​​​”។ លោក​​​បាន​​​មាន​​​ប្រសាសន៍​​​ថា កម្មករ​​​ទាំង​​​នោះ​​​កំពុង​​​ធ្វើ​​​ដំណើរ​​​ទៅ​​​រោង​​​ចក្រ​​​មូស៊ីន​​​យួន នៅ​​​ក្នុង​​​ស្រុក​​​ជើង​​​ព្រៃ​​​នៅ​​​ជាប់​​​គ្នា​​​នោះ​​​។ លោក ណាល់ បាន​​​បន្ថែម​​​ថា ” បន្ទាប់​​​ពី​​​រថយន្ត​​​នោះ​​​បាន​​​បុក​​​ដើម​​​ឈើ​​​ហើយ ដំបូល​​​រថយន្ត​​​បាន​​​​​​បាក់ ហើយ​​​កម្មករ​​បាន​​​ធ្លាក់​​​ចេញ​​​ពី​​​រថយន្ត​​​នោះ​​​”។

អ្នក​​​បើក​​​បរ​​​មិន​​​បាន​​​រត់​​​គេច​​​ខ្លួន​​​ទេ​​​នៅ​​​ពេល​​​ដែល​​​ឧបទ្ទវហេតុ​​​នេះ​​​កើត​​​ឡើង​​​។ គាត់​​​បាន​​​ព្យាយាម​​​បញ្ជូន​​​កម្មករ​​​ទៅ​​​មន្ទីរ​​​ពេទ្យ​​​។ ឥឡូវនេះ​​​រថយន្ត​​​នោះ​​​កំពុង​​​រក្សា​​​ទុក​​​នៅ​​​អធិការ​​​ដ្ឋាន​​​នគរ​​​បាល​​​ស្រុក រង់​​​ចាំ​​​អ្នក​​​បើក​​​បរ​​​ចូល​​​មក​​​​​​ដោះស្រាយ​​​បញ្ហា​​​។ គាត់​​​ធ្វេស​​​ប្រហែស​​​ មិន​​​ត្រួត​​​ពិនិត្យ​​​រថយន្ត​​​របស់​​​គាត់​​​”។

លោក ឡោ ច័ន្ទ​​​លី អភិបាល​​​ស្រុក​​​បាន​​​មាន​​​ប្រសាសន៍​​​ថា អ្នក​​​បើក​​​បរ​​​បាន​​​ដឹក​​​មនុស្ស​​​លើស​​​ចំណុះ។ លោក​​​បាន​​​មាន​​​ប្រសាសន៍​​​ថា ” មាន​​​កម្មករ​​​ម្នាក់​​​ដែល​​​បាន​​​បាក់​​​ដៃ​​​ បន្ទាប់​​​ពី​បាន​ធ្លាក់​ពី​លើ​រថយន្ត ហើយ​​​គេ​​​បាន​​​ដឹក​​​នាង​​​ទៅ​​​ព្យាបាល​​​នៅ​​​ទីក្រុង​​​ភ្នំពេញ​​​។ យើង​​​នឹង​​​ណែ​​​នាំ​​​មន្ត្រី​​​នគរ​​​បាល​​​ឲ្យ​​​ណែ​​​នាំ​​​អ្នក​​​បើក​​​បរ​​​ឲ្យ​​​គោរព​​​ច្បាប់​​​​​​ចរាចរណ៍​​​”។

លោកស្រី ជី​​​ល ថាក់​​​ឃើ ទីប្រឹក្សា​​​ជាន់​​​ខ្ពស់​​ផ្នែក​បច្ចេកទេស​​​នៅ​​​កម្មវិធី​​​រោង​​​​​​ចក្រ​​​ល្អ​​​ប្រសើរ​​​នៅ​​​កម្ពុជា ដែល​​​គ្រប់​​​គ្រង​​​ដោយ​​​​​​អង្គការ​​​ពល​​​កម្ម​​​អន្តរ​​​ជាតិ​​​បាន​​​មាន​​​ប្រសាសន៍​​​ថា គ្មាន​​​ចែង​នៅ​​​ក្នុង​​​ច្បាប់​​​ការងារ​​​ និង​​​គ្មាន​​​ច្បាប់​​​ពាក់​​​ព័ន្ធ​​​នឹង​​​ការ​​​ដឹក​​​​កម្មករ​​​ដោយ​​​ស​​​ុវត្ថិ​​​ភាព​​​ទេ។ លោក​​​ស្រី​​​បាន​​​មាន​​​ប្រសាសន៍​​​ថា ” មាន​​​រោង​​​ចក្រ​​​តិច​​​តួច​​​ណាស់​​​ដែល​​​ជួល​​​រថយន្ត​​​ក្រុង​ដឹក​​​កម្ម​​​ករ​​​។ វា​​​គឺ​​​ជា​​រឿង​ពិបាក ពីព្រោះ​​​កម្មករ​​​ជាច្រើន​​​មិន​​​រស់​​​នៅ​​​ក្នុង​​​តំបន់​​​តែ​​​មួយ​​​ទេ​​​”។

ដំណើរការ​​​នេះ​​​ក៏​មិន​​​មាន​​​ការ​​​គ្រប់​​​គ្រង​​​ និង​​​ពិបាក​​​ឃ្លាំ​​​មើល​​​ដែរ ដោយសារ​​​​​ថា ​នៅ​តាម​ផ្លូវ​ភាគ​ច្រើន​មាន​រោង​​​ចក្រ​​​តូច​​​ៗ​​​។ លោកស្រី ថាក់​​​ឃើ បាន​​​មាន​​​ប្រសាសន៍​​​ថា ” មនុស្ស​​​ដែល​​​មាន​​​​​​រថយន្ត​​​ទាំង​នេះ​បើក​​រថយន្ត​​​ដឹក​​​កម្មករ​​​ទៅ​​​មក​​​ពី​​​រោង​​​ចក្រ​​​។ វា​​​មិន​​​មែន​​​ការ​​​ដឹក​​​ជញ្ជូន​​​សាធារណៈ​​​ទេ វា​​​សម្រាប់​​​តែ​​​ដឹក​​​កម្មករ​​​ទៅ​​​រោង​​​ចក្រ​​​។ ពួក​គេ​​គឺ​​​ជា​​​អ្នក​​​បើក​​​បរ​​​ឯករាជ្យ​​​ ដែល​​​រក​​​លុយ​​​បាន​​​ពី​​​កម្មករ​​​”៕ គឹម​​​ហឿន (រាយការណ៍​​​បន្ថែម​​​ដោយ LaurenCrothers)​​​​​​​​​​​​​​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស