មន្ទីរអប់រំ យុវជន និងកីឡាខេត្តសៀមរាប បានច្រានចោលការសម្រេចចិត្តរបស់នាយកសាលាគរុកោសល្យ និងវិក្រឹត្យការខេត្តសៀមរាប ក្នុងការហាមឃាត់គរុសិស្សពីរនាក់ដែលរិះគន់មិនសំចៃមាត់ មិនឲ្យចូលរួមប្រឡងបញ្ចប់ថ្នាក់ក្នុងពេលដ៏ខ្លីខាងមុខ បន្ទាប់ពីមានការតវ៉ាពីសំណាក់មិត្តៗគរុសិស្សប្រហែល២៥០នាក់កាលពីម្សិលមិញ។
កញ្ញា វិន សាវី អាយុ២១ឆ្នាំ និងកញ្ញា សិញ លីហុង អាយុ២០ឆ្នាំ ដែលបានចុះឈ្មោះសិក្សាក្នុងកម្មវិធីគរុកោសល្យរយៈពេលពីរឆ្នាំ បាននិយាយរិះគន់លោក នាវ ឱរ៉ា នាយកសាលាគរុកោសល្យ និងវិក្រឹត្យការរបស់ពួកគេកាលពីខែកុម្ភៈ ដោយចោទប្រកាន់លោក នាវ ឱរ៉ា តាមវិទ្យុថា លោកបានបង្ខំឲ្យគរុសិស្សធ្វើជាសន្តិសុខយាមពេលយប់នៅសាលានេះ។
កញ្ញា វិន សាវី និយាយថា ចាប់តាំងពីពេលនោះមក លោក នាវ ឱរ៉ា បានធ្វើបាបពួកគេម្ដងហើយម្ដងទៀត ហើយកាលពីថ្ងៃទី២៦ ខែមិថុនា បានប្រាប់ពួកគេថា ពួកគេត្រូវបានហាមឃាត់មិនឲ្យចូលរួមប្រឡងបញ្ចប់ថ្នាក់ ដែលធ្វើឡើងនៅថ្ងៃទី៤ ខែកក្កដាឡើយ ដែលជាដំណាក់កាលប្រឡងចុងក្រោយដើម្បីក្លាយខ្លួនជាគ្រូបង្រៀន។
កញ្ញានិយាយទៀតថា ” លោកនាយកមិនសប្បាយចិត្តទេ នៅពេលយើងនិយាយជាមួយប្រព័ន្ធផ្សព្វផ្សាយ។ ដូច្នេះហើយគាត់ក៏ចោទប្រកាន់យើងថា យើងមិនស្លៀកពាក់ឯកសណ្ឋានឲ្យបានសមរម្យ ដើម្បីហាមឃាត់ពួកយើងមិនឲ្យប្រឡង។ វាមិនត្រឹមត្រូវទេ”។
មិត្តៗគរុសិស្សប្រហែល២០០នាក់បានធ្វើការតវ៉ាជំទាស់នឹងការសម្រេចចិត្តរបស់លោក នាវ ឱរ៉ា នៅខាងក្រៅសាលាគរុកោសល្យ និងវិក្រឹត្យការនេះកាលពីម្សិលមិញ ជាហេតុបង្ខំឲ្យលោក អុ៊ង សិរីឌី ប្រធានមន្ទីរអប់រំ យុវជន និងកីឡា កោះហៅលោក នាវ ឱរ៉ា ទៅជួប។
លោក អ៊ុង សិរីឌី បានមានប្រសាសន៍ថា ” យើងបានសម្រេចបញ្ចូលឈ្មោះពួកគេទៅក្នុងបញ្ជីប្រឡងវិញហើយ ដោយសារតែក្រោយពីយើងពិនិត្យកំហុសរបស់សិស្សទាំងនេះរួច យើងឃើញថា វាជាកំហុសតូចតាច។ ខ្ញុំនៅតែបន្តពិនិត្យតានដានថា តើនាយកសាលា [លោក នាវ ឱរ៉ា] ពិតជាបានដាក់ទណ្ឌកម្មសិស្សទាំងនេះដោយសារតែពួកគេនិយាយជាមួយប្រព័ន្ធផ្សព្វផ្សាយមែនឬក៏អត់”។
លោក នាវ ឱរ៉ា នៅតែមានះនៅពេលទាក់ទងកាលពីម្សិលមិញ ដោយលោកនិយាយការពារវិធានការរបស់ខ្លួន និងរិះគន់មន្ទីរអប់រំ យុវជន និងកីឡាខេត្ត ចំពោះការច្រានចោលសេចក្ដីសម្រេចរបស់លោក។ លោក នាវ ឱរ៉ា មានប្រសាសន៍ថា ” សិស្សទាំងនោះ មានទម្លាប់មិនល្អពាក់ព័ន្ធនឹងឯកសណ្ឋានរបស់ពួកគេ ហើយពួកគេមិនគោរពបទបញ្ជាផ្ទៃក្នុងរបស់សាលាទេ”។ លោកបានបន្ថែមទៀតថា គរុសិស្សទាំងពីរនាក់នេះមិនបានស្ដាប់ការរំឭកដាស់តឿនរបស់លោកម្ដងហើយម្ដងទៀតចំពោះការបំពានបទបញ្ជាផ្ទៃក្នុងពាក់ព័ន្ធឯកសណ្ឋានរបស់ពួកគេ។
លោកមានប្រសាសន៍ថា គរុសិស្សទាំងនេះពាក់ស្បែកជើងផ្ទាត់នៅក្នុងសាលា ដែលគេតម្រូវឲ្យពាក់ស្បែកជើងប៊ូ ជាការអះអាងមួយដែលគរុសិស្សទាំងនេះច្រានចោល។ លោកបានលើកឡើងទៀតថា ” ខ្ញុំបានធ្វើការអស់រយៈពេលជាង៣០ឆ្នាំមកហើយនៅក្នុងវិស័យអប់រំ។ ខ្ញុំអប់រំសិស្សជាច្រើន ហើយខ្ញុំដឹងពីចរិតរបស់សិស្ស”៕ សុខុម