28 C
Phnom Penh

អ្នក​ភូមិ​​នៅ​ជ្រោយ​ចង្វា​គំរាម​វាយ​បំផ្លាញ​បំពង់​បូម​ខ្សាច់​ក្រុម​ហ៊ុន​ OCIC

ដោយ ឌឹ ខេមបូឌា ដេលី

បទវិភាគ

សន្តិសុខ​ខណ្ឌ​ត្រូវ​បានគេ​យក​មក​ដាក់​នៅ​ជ្រោយ​ចង្វា​កាល​​​ពីម្សិលមិញ ដើម្បី​ស្ទាក់​ឃាត់​ក្រុម​អ្នកភូមិដែល​បាន​ត្រៀម​វាយ​បំផ្លាញ​បំពង់​ ដែល​បាន​និង​កំពុង​បូម​ខ្សាច់​ចូល​ដី​របស់​ខ្លួន​អស់​រយៈពេល​មួយ​ឆ្នាំ​មក​ហើយ​។

អ្នកភូមិ​ប្រហែល​៤០​គ្រួសារ​កាន់​កាប់​ដី​នៅ​ជ្រុង​​ភាគឦសាន​​​នៃ​ផ្ទៃ​ដី​សើម​៣៨៧​ហិកតា​ ដែល​ត្រូវ​បាន​ប្រគល់​ឲ្យ​ក្រុម​ហ៊ុន​វិនិយោគ​ OCIC ក្នុងកិច្ច​សន្យា​ជួល​រយៈ​ពេល​៩៩​ឆ្នាំ​កាលពី​ឆ្នាំ​២០០១​។

លោក យ៉ា លួ​ង​ហួង អាយុ​៦៨​ឆ្នាំ​បាន​និយាយ​ថា ” នេះ​ជា​ដី​របស់​យើ​ង​។ យើង​បាន​រស់​​​នៅ​ទីនេះ​តាំង​ពី​របប​ ប៉ុល ពត ​ដួល​រលំ ហើយ​យើង​មាន​បង្កាន់​ដៃ​បញ្ជាក់​។ បើ​ពួកគេ​ព្យាយាម​បូម​ខ្សាច់​ចូល​ដីយើង​ យើង​នឹង​​​​យក​​​ពូថៅ​វាយ​បំបែក​បំពង់​​​បូម​ខ្សាច់​”។

ក្រុម​អ្នកភូមិ​កំពុង​ការ​ពារ​ដី​៧​ហិកតា​ចុង​ក្រោយ​ ដែល​ត្រូវ​គេ​ប្រគល់​ទៅ​ឲ្យ​ក្រុម​ហ៊ុន​ OCIC សម្រាប់​គម្រោង​អភិវឌ្ឍអចលនទ្រព្យ​តម្លៃ​៣.០០០​លាន​ដុល្លារ​ ដែល​មាន​ឈ្មោះ​ថា ” ទីក្រុង​ជ្រោយ​ចង្វា​ ទីក្រុង​អនាគត​”។ ក្រុម​ហ៊ុន​ OCIC បាន​បូម​ខ្សាច់​​​រាប់​លាន​ម៉ែត្រគូប​រួច​ហើយចូល​តំបន់​ដីសើម​ដែល​ធ្លាប់​តែ​មាន​រុក្ខជាតិ​នេះ​។

កាលពីព្រឹក​ម្សិលមិញ លោក​ លួង​​​ហួង បាន​ភ្ញាក់​ឡើង​ឃើញ​ខ្សាច់​ហៀរ​ចូល​ដី​ផ្ទះ​របស់​គាត់​ប្រហែល​៥ម៉ែត្រ​ ហើយ​បាន​ហៅ​អ្នក​​​ជិត​ខាង​របស់​លោក​ឲ្យ​មាន​វិធាន​ការ​។

ប៉ុន្តែ​ក្រុម​អ្នកភូមិ​មិន​ទាន់​បាន​បំផ្លាញ​បំពង់​លើ​ដី​ដែល​បូម​ខ្សាច់​ពី​សាឡង់​បូម​ខ្សាច់​នៅ​ទន្លេ​សាប​ផង សន្តិសុខ​ខណ្ឌ​​​មួយ​ក្រុម​មាន​គ្នា​២០​នាក់​ក៏បាន​ម​ក​ដល់​។

បុរស​ម្នាក់​ដែល​បាន​ប្រាប់​ថា ឈ្មោះ ផាន់នី ជា​ប្រធាន​សន្តិសុខ​ខណ្ឌ​ជ្រោយ​ចង្វា បាន​និយាយ​ថា ” យើង​ការ​ពារ​ដី​របស់​ក្រុម​ហ៊ុន​ ពីព្រោះ​ពួកគេ​ទទួលបាន​​ការ​អនុញ្ញាត​បូម​ខ្សាច់​ដាក់​លើ​ដីនេះ​”។ ការ​ប្រកែក​តឹង​មាត់​តឹង​ក​រវាង​ភាគី​​​ទាំង​ពីរ​បា​ន​កើត​​​ឡើង​ ដោយ​សន្តិសុខ​ម្នាក់​បាន​ប្រាប់​ក្រុម​អ្នក​ភូមិ​ថា ” ទៅ​ផ្ទះ​​​ទៅ​​​ បើ​​ចង់​យក​បំពង់​នេះ​ចេញ​ វា​មិន​ងាយ​ស្រួល​​​ទេ​”។

អ្នកភូមិ​ម្នាក់​បាន​ស៊ក​ទៅវិញ​ថា ” វា​មិនពិបាក​ទេ យើង​មាន​ពូថៅ​ និង​កន្ត្រៃ​កាត់​ដែក​”។ លោក​ ផាន់នី បាន​ស្នើ​​​សុំឲ្យ​អ្នកភូមិ​​​​ដែល​​​មាន​​​ចំនួន​រាប​​​់រយ​គ្រួសារ​ចុង​ក្រោយ​នេះ​ឲ្យ​គេ​បូ​ម​ខ្សាច់​ដាក់​ដី​របស​់​ខ្លួន​ ឲ្យ​ចា​ក​ចេញ​ដើម្បី​ជា​ប្រយោជន៍​ដល់​ការ​អភិវឌ្ឍប្រទេស​។

មុន​ពេល​យល់​ព្រម​សម្រប​សម្រួល​ឲ្យ​មាន​ជំនួប​មួយ​នៅ​ថ្ងៃ​នេះ​រវាង​មន្ត្រី​ខណ្ឌ​ ក្រុម​ហ៊ុន OCIC និងអ្នក​ភូមិ​ លោក​ ផាន់នី បាន​និយា​យ​ថា ” មើល​ទំព័រ​ហ្វេស​ប៊ុក​សម្ដេច​ [ហ៊ុន សែន​] ទៅ​ អ្នក​នឹង​ឃើញ​អ្វី​ដែល​គាត់​​កំពុង​ខិត​ខំ​ធ្វើ​ហើយ​ គាត់កំពុង​ព្យាយាម​អភិវឌ្ឍ​ប្រទេស​សម្រាប់​អ្នក​គ្រប់​គ្នា​”។ តាម​សំណើ​របស់​លោក ផាន់នី ជា​ប្រធាន​សន្តិសុខ​ គេ​បាន​បញ្ឈប់​ការ​បូម​​ខ្សាច់​​​នៅ​តំបន់​លិច​ទឹក​ភូមិកៀន​ឃ្លាំង នៅ​​​ពេល​រសៀល​​​ម្សិលមិញ។

លោក​ ជ្រៀង​ សុផាន់ អភិបាល​រង​រាជ​ធានី​​​ភ្នំពេញ បាន​មាន​ប្រសាសន៍​ថា លោក​ លួងហួង និង​អ្នក​ផ្សេង​ទៀត​ដែល​រារាំង​ដំណាក់​កាល​ចុង​ក្រោយ​នៃ​គម្រោង​បូម​ខ្សាច់​របស់​ក្រុម​ហ៊ុន OCIC អាច​មាន​សិទ្ធិ​​​ទទួល​បាន​ប័ណ្ណ​កម្មសិទ្ធិ​ដី​។

លោក​បាន​មាន​ប្រសាសន៍​ថា “ប្រសិន​បើ​ពួកគេ​មាន​បង្កាន់ដៃ​ពិត​ប្រាកដ​ ដើម្បី​បង្ហាញ​ថា ពួកគេ​បាន​កាន់​កាប់​ដី​នេះ​តាំង​ពី​ឆ្នាំ​១៩៨០​មក​​មែន​នោះ ពួកគេ​អាច​ស្នើ​សុំ​ប័ណ្ណ​កម្មសិទ្ធិ​ដី​។ ប៉ុន្តែ​ជួន​កាល​បង្កាន់​ដៃ​តែ​ប៉ុណ្ណឹង​មិន​គ្រប់​គ្រាន់​ទេ​”៕ មានិត​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស