ប្រទេសកម្ពុជានិងប្រទេសចិនកំពុងធ្វើសេចក្ដីព្រាងអនុស្សរណៈនៃការយោគយល់ (MoU) មួយដើម្បីទប់ស្កាត់ការជួញដូរស្ត្រីខ្មែរទៅកាន់ប្រទេសចិន ទីដែលមានសេចក្ដីរាយការណ៍កាន់តែច្រើនឡើងៗថា ស្ត្រីខ្មែរត្រូវបានប្ដីជនជាតិចិនធ្វើបាប និងលក់ខ្លួនឲ្យធ្វើស្រីពេស្យា។
យោងតាមឧត្តមសេនីយ៍ទោ ប៉ុល ពិថី ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃបានឲ្យដឹងថា ការជំរុញឲ្យមានកិច្ចព្រមព្រៀងផ្នែកការទូតនេះ កើតឡើងក្រោយពីមានការចាប់ខ្លួនជនជួញដូរមនុស្សយ៉ាងច្រើននៅឯអាកាសយានដ្ឋានក្នុងប្រទេសទាំងពីរ។
លោក ប៉ុល ពិថី បានមានប្រសាសន៍ថា ” ចាប់តាំងពីការចាប់ខ្លួននៅតាមអាកាសយានដ្ឋានមានការកើនឡើងមក នៅពេលថ្មីៗនេះករណីបញ្ជូនស្ត្រីខ្មែរទៅកាន់ប្រទេសចិនមានសភាពស្ងប់ស្ងាត់ជាងធម្មតា។ ប៉ុន្តែ វាជាក្ដីបារម្ភដ៏ធំសម្រាប់យើង នេះហើយជាមូលហេតុដែលយើងធ្វើសេចក្ដីព្រាងMoU ជាមួយរដ្ឋាភិបាលចិនដើម្បីទប់ស្កាត់ និងបង្ក្រាបការជួញដូរមនុស្សប្រភេទនេះដើម្បីទៅរៀបការជាមួយបុរសចិន”។
របាយការណ៍ឆ្នាំ២០១៣របស់ក្រសួងមហាផ្ទៃបង្ហាញថា ខ្លួនបានដោះស្រាយករណីលក់ស្ត្រីខ្មែរឲ្យធ្វើជាកូនក្រមុំនៅក្នុងប្រទេសចិនចំនួន១២ករណី ចាប់ខ្លួនបានមនុស្ស២០នាក់ និងសង្គ្រោះជនរងគ្រោះបាន៣៦នាក់នៅតាមអាកាសយានដ្ឋាន មុនពេលពួកគេឡើងលើយន្តហោះ។ ទោះជាយ៉ាងណា លោក ប៉ុល ពិថី បានមានប្រសាសន៍ថា លោកគ្មានតួលេខបច្ចុប្បន្នភាពសម្រាប់ឆ្នាំនេះទេ។
កាលពីខែកុម្ភៈ មន្ត្រីនៅអាកាសយានដ្ឋានអន្តរជាតិភ្នំពេញ បានចាប់ខ្លួនមនុស្សប្រាំនាក់ រួមទាំងជនជាតិចិនពីរនាក់ផង ពីបទព្យាយាមនាំស្ត្រីខ្មែរទៅកាន់ប្រទេសចិន កន្លែងដែលមានការរៀបចំឲ្យពួកគេធ្វើការនៅតាមផ្ទះបន។
កាលពីខែមីនា សាលាដំបូងរាជធានីភ្នំពេញ បានចោទប្រកាន់មនុស្សបីនាក់ពីបទប្រើប្រាស់លិខិតឆ្លងដែនក្លែងក្លាយសម្រាប់ស្ត្រីខ្មែរ ដើម្បីបញ្ជូនពួកគេទៅកាន់ប្រទេសចិនឲ្យរៀបការជាមួយបុរសចិន។ នៅពេលមានការឃាត់ខ្លួននៅអាកាសយានដ្ឋាននេះ ជនរងគ្រោះពីរនាក់ក្នុងចំណោមជនរងគ្រោះទាំងនោះមានអាយុក្រោម១៨ឆ្នាំ។
ក្រោយមកនៅក្នុងខែដដែលនោះ ក្រុមគ្រួសាររបស់ស្ត្រីបួននាក់មកពីខេត្តរតនគិរី និងខេត្តតាកែវ បានដាក់ពាក្យបណ្ដឹងដាច់ដោយឡែកពីគ្នាដើម្បីស្វះស្វែងឲ្យមានអន្តរាគមន៍បញ្ជូនសាច់ញាតិរបស់ខ្លួនដែលត្រូវគេបញ្ជូនទៅកាន់ប្រទេសចិនឲ្យត្រឡប់មកមាតុភូមិវិញ ដោយអះអាងថា ស្ត្រីទាំងនោះត្រូវបានប្ដីជនជាតិចិនរបស់ពួកគេធ្វើបាប និងចាត់ទុកដូចជាទាសករ។
ស្ត្រីដែលបានវិលត្រឡប់ពីប្រទេសចិនវិញនិយាយថា បុរសៗនៅទីនោះចំណាយប្រាក់រហូតដល់ទៅ១៥.០០០ដុល្លារឲ្យមេអណ្ដើករៀបចំចាត់ចែងអាពាហ៍ពិពាហ៍ និងបញ្ជូនកូនក្រមុំខ្មែរឲ្យពួកគេ។
កាលពីម្សិលមិញ អង្គការសិទ្ធិមនុស្សក្នុងស្រុកលីកាដូ បានស្វាគមន៍ MoU ដែលនឹងចេញជារូបរាងក្នុងពេលឆាប់ៗនេះ ប៉ុន្តែបានលើកឡើងថា អាជ្ញាធរគួរតែប្រុងប្រយ័ត្ននៅក្នុងប្រតិបត្តិការតាមវែកមុខជនល្មើស ពីព្រោះជាញឹកញាប់ជនជួញដូរមនុស្សទាំងនោះមានខ្នងបង្អែកក្រាស់។
លោក អំ សំអាត ប្រធានផ្នែកបច្ចេកទេសស៊ើបអង្កេតនៅអង្គការលីកាដូ បានមានប្រសាសន៍ថា ” ការជួញដូរស្ត្រីខ្មែរទៅកាន់ប្រទេសចិន គឺជាបទល្មើសដែលមានការរៀបចំទុកជាមុន ដូច្នេះយើងសង្ឃឹមថា MoU រវាងប្រទេសទាំងពីរនឹងត្រូវបានអនុវត្តឲ្យតឹងរ៉ឹងនៅពេលចូលជាធរមាន”។
ចន្លោះពីខែសីហា ឆ្នាំ២០១៣ ដល់ខែមិថុនាឆ្នាំនេះ អង្គការលីកាដូបានលើកឡើងថា ខ្លួនទទួលបានពាក្យបណ្ដឹងចំនួន២៦ ដែលរួមមានស្ត្រីសរុប៣៧នាក់ដែលត្រូវបានគេធ្វើបាប ឬលក់ឲ្យធ្វើជាស្ត្រីពេស្យា បន្ទាប់ពីត្រូវគេបញ្ជូនទៅកាន់ប្រទេសចិនឲ្យធ្វើជាកូនក្រមុំ។ លោក អំ សំអាត បានមានប្រសាសន៍ថា ក្នុងចំណោមនោះ ស្ត្រីខ្មែរប្រាំមួយនាក់ត្រូវបានបញ្ជូនត្រឡប់មកកាន់មាតុប្រទេសវិញកាលពីឆ្នាំមុន ហើយបីនាក់ទៀតបានវិលមកស្រុកជួបជុំក្រុមគ្រួសារវិញនៅឆ្នាំនេះ៕ សុខុម