30 C
Phnom Penh

នគរ​បាល​ឃាត់​ខ្លួនជន​ជួញ​ដូរ​ក្រលៀន​ឆ្លង​ដែន​ពីរ​នាក់​ឪពុក​​​និង​កូន​ស្រី

ដោយ ឌឹ ខេមបូឌា ដេលី

បទវិភាគ

ស្ត្រីម្នាក់​ដែល​ជាប់​ចោទ​ពីបទ​​បញ្ចុះ​បញ្ចូលប្រជា​ពល​រដ្ឋ​ងាយ​រងគ្រោះ​ឲ្យ​លក់​ក្រលៀន​របស់​ខ្លួន​​ទៅ​អ្នក​ជំងឺ​នៅ​តាម​មន្ទីរពេទ្យ​​ថៃ ត្រូវ​បាន​ចាប់​ខ្លួន​ក្នុងរាជ​ធានី​ភ្នំពេញ​កាលពី​យប់​ថ្ងៃ​អង្គារ​។ ក្នុង​ចំណោម​ជន​រង​គ្រោះ​ប្រាំ​នាក់​ មាន​ពីរ​នាក់​ជា​​បង​ប្អូន​ប្រុស​​បង្កើត​របស់​ជន​​​ល្មើស​​​​និង​ម្នាក់​ទៀត​ជា​​បង​ប្អូន​ជីដូន​មួយ​។

ស្ត្រី​​​​ជា​​​ជន​​​ល្មើស​​​ដែល​មាន​ឈ្មោះ​ យ៉ែម អាស៊ីសាស់ អាយុ​២៩​ឆ្នាំ​ហៅ ស៊ីនួន ត្រូវ​បាន​​នគរ​បាល​ប្រ​ឆាំង​ការ​ជួញ​ដូរ​មនុស្សចាប់​ខ្លួន​នៅ​ក្បែរ​ផ្ទះ​របស់​នាង​ក្នុង​ខណ្ឌ​ជ្រោយចង្វា តាម​ពាក្យ​បណ្ដឹង​របស់​ជន​រង​គ្រោះ​ម្នាក់​ ដែល​ម៉ូតូ​របស់​ខ្លួន​ត្រូវ​បាន​នាង​​​យក​ទៅ​រក្សា​ទុក​​ដើម្បី​ទារ​ប្រាក់​លោះ ខណៈពេល​នាង​ព្យាយាម​កាត់​យក​ចំណែក​​របស់​ខ្លួន​​​​នៃ​តម្លៃ​ក្រលៀន​១៣.០០០​ដុល្លារ ​ដែល​នាង​បាន​ចរចាជា​មួយ​អ្នក​ទិញ​​ក្រលៀន​របស់​បុរស​នេះ​។

បុរស​ឈ្មោះ ញ៉ែម ផល្លា អាយុ​៤០​ឆ្នាំ​ដែល​ត្រូវ​ជា​ឪពុក​ចុង​របស់​ ស៊ីនួន ក៏ត្រូវ​បាន​ចាប់​ខ្លួន​ដែរ​ នៅពេល​​គាត់​​ទៅ​សួរ​សុខ​ទុក្ខ​នាង​ក្នុង​មន្ទីរ​ឃុំឃាំង​នៅ​យប់​ថ្ងៃ​អង្គារ​ដដែល​នោះ។ បុរស​នេះ​ជាប់​ចោទ​ពីបទ​សម​គំនិត​ជួយ​ ស៊ីនួន រត់​ការ​ធ្វើ​ឯកសារ​ក្លែង​បន្លំ​ប្ដូរ​ឈ្មោះ​ជន​រង​គ្រោះ​ទៅ​ជា​សាច់​ញាតិ​របស់​អ្នក​ទិញ​ក្រលៀន ទើប​ក្រុម​គ្រូពេទ្យ​ថៃ​ អនុញ្ញាត​ឲ្យ​មាន​ការ​វះកាត់​យក​ក្រលៀន​ចេញ​។

វរសេនីយ៍ទោ កែវ ធា នាយការិយាល័យ​ប្រឆាំង​ការ​ជួញដូរ​មនុស្ស និង​ការ​ពារ​អនីតិ​ជន​នៃ​ស្នង​ការដ្ឋាន​នគរ​បាល​រាជ​ធានីភ្នំពេញ​ បាន​មាន​ប្រសាសន៍​ថា ” ស្ត្រី​ខ្មែរ​អុីស្លាម​ម្នាក់ ដែល​មាន​មុខ​របរ​ជា​អ្នក​លក់​កាហ្វេ និង​ឪពុក​ចុង​របស់​នាង ​ត្រូវ​បាន​នគរ​បាល​ប្រឆាំង​ការ​ជួញដូរ​មនុស្ស​រាជធានី​ឃាត់​ខ្លួន​កាលពី​យប់​ថ្ងៃ​អង្គារ ហើយនឹង​ត្រូវ​បញ្ជូន​ខ្លួន​​ទៅ​តុលាការ​ដើម្បី​ធ្វើ​​ការ​ចោទ​ប្រកាន់ពី​បទ​ជួញដូរ​មនុស្ស​ និង​បទ​​​បន្លំ​ស្នើ​សុំ​ឯកសារ​។ យោងតាម​ច្បាប់​​ ទោះ​បី​ជា​មនុស្សណា​​ម្នាក់​យល់​ព្រម​លក់​ក្រលៀន​របស់​ខ្លួន​ក៏ដោយ ក៏​ការ​វះ​យក​ក្រលៀន​ចេញ​ គឺ​ជារឿង​ខុស​ច្បាប់​”។

ស៊ីនួន និង​ ញ៉ែម ផល្លា នឹង​ត្រូវ​បញ្ជូនខ្លួន​ទៅ​សាលា​ដំបូង​រាជ​ធានី​ភ្នំពេញ​នៅ​ថ្ងៃ​នេះ ដើម្បីធ្វើ​ការ​ចោទ​ប្រកាន់​។ យោង​តាម​លោក កែវ ធា បាន​ឲ្យ​ដឹង​ថា ស៊ីនួន បាន​ដំណើរ​ការ​របរ​​រក​ស៊ី​ធ្វើ​ជា​អ្នក​ចរចា​ទិញលក់​​ក្រលៀន​អស់​រយៈ​ពេល​ជិត​មួយ​ឆ្នាំ​មក​ហើយ ហើយ​បាន​ព្យាយាម​បោក​បញ្ឆោត​អ្នក​ដែល​ជិត​ស្និទ្ធ​នឹង​នាង​។ លោក​មាន​ប្រសាសន៍​ថា ការ​ចាប់​ខ្លួននេះ​ធ្វើ​ឡើង​ក្រោយ​ពី​ការ​ស៊ើប​អង្កេត​រយៈពេល​១០​ថ្ងៃ​ បន្ទាប់ពីទទួល​បាន​ពាក្យ​បណ្ដឹង​​ពី​យុវជន​ម្នាក់ឈ្មោះ​​ មុត សាទីរិន ​អាយុ​២៣​ឆ្នាំ ត្រូវ​​ជា​ប្អូនជីដូនមួយ​របស់​ ស៊ីនួន ដែល​ជា​ជន​រង​គ្រោះទី៥។

លោក កែវ ធា ​មាន​ប្រសាសន៍​ទៀត​ថា ” ស៊ីនួន ជាមនុស្ស​ម្នាក់​ដែល​បាន​បញ្ចុះ​បញ្ចូល​​​​មនុស្ស​ក្មេងៗ​ ហើយ​នាង​ជា​មនុស្សម្នាក់​ដែល​បាន​ចរចា​តម្លៃ​រវាង​អ្នក​ជំងឺ​ និង​អ្នក​លក់​។ ជន​សង្ស័យ​ទទួល​បាន​ប្រាក់​មួយ​ចំនួន​ពី​ជន​រង​គ្រោះសម្រាប់​ការ​លក់​ក្រលៀន​របស់ពួកគេ​”។

យោងតាម​នគរ​បាល​​បាន​ឲ្យ​ដឹង​ថា ស៊ីនួន បាន​ចរចា​តម្លៃ​ជាមួយអ្នក​ជំងឺ​ដែល​ទន្ទឹង​​រង់​ចាំ​ក្រលៀន​ ហើយបន្ទាប់មក​ ទទួលបាន​ចំណែក​ប្រាក់​បាន​ពី​ការ​លក់ក្រលៀននោះ។ អ្នក​​ទទួល​ក្រលៀន​ទាំង​អស់នោះ គឺ​សុទ្ធ​តែ​ជា​​ប្រ​ជា​ជន​​ខ្មែរ ​ដែល​ត្រូវ​បាន​បញ្ជូនទៅ​កាន់​ទីក្រុង​បាង​កក​ ដើម្បីធ្វើការ​វះ​កាត់​។

លោក​ កែវ ធា មាន​ប្រសាសន៍​ថា ជន​រងគ្រោះ​របស់​ ស៊ីនួន ទទួលបាន​​​ប្រាក់​ចន្លោះ​ពី​១០.០០០​ដុល្លារ​ទៅ​១៣.០០០​ដុល្លារ​សម្រាប់​ក្រលៀន​ម្ខាង​របស់​ពួកគេ​។ ប៉ុន្តែ​ផែន​ការ​របស់​នាង​​បាន​បរា​ជ័យ​​កាលពី​ថ្ងៃ​ទី៥ ខែមិថុនា នៅពេល​ សាទីរិន ដែល​និយាយ​ថា គេ​សន្យា​ឲ្យ​ខ្លួន​៥.០០០​ដុល្លារ​ថ្លៃ​ក្រលៀនបាន​​​ចុះ​ឈ្មោះ​ចូល​មន្ទីរ​ពេទ្យ​អន្តរជាតិ​បំរ៉ុង​​រ៉ាត ក្នុង​ក្រុង​បាងកក ដើម្បីវះកាត់​ក្រលៀន​របស់​ខ្លួន​។ នៅទីនោះ សាទីរិន បានជួប​ស្ត្រី​អ្នក​ទទួល​ក្រលៀន​របស់​ខ្លួន​ដោយ​ចៃ​ដន្យ​។ សាទីរិន និយាយ​ថា “អ្នក​ជំងឺ​​នោះ​បាន​ប្រាប់​ខ្ញុំ​ថា គាត់​ចំណាយ​១៣.០០០​ដុល្លារ​ដើម្បី​ទិញ​ក្រលៀន​ម្ខាង​ ប៉ុន្តែ​ [ស៊ីនួន​] បាន​ប្រាប់​ខ្ញុំ​ថា គាត់​លក់​បាន​តែ​៥.០០០​ដុល្លារ​ប៉ុណ្ណោះ”។ ជា​ផ្នែក​នៃ​របររកសីុ​នេះ ស៊ីនួន យក​ទ្រព្យ​សម្បត្តិ​របស់​ជន​រង​គ្រោះ​ទៅ​រក្សា​ទុក​​ នៅពេល​ពួក​គេ​ធ្វើ​ដំណើរ​ទៅ​ក្រុង​បាង​កក​ ដើម្បី​វះកាត់​។

គេ​មិន​ដឹង​ច្បាស់​ថា តើ​ការ​ជួប​គ្នា​នៅ​ក្នុង​​មន្ទីរ​ពេទ្យបំរ៉ុងរ៉ាត ​​បាន​ធ្វើ​ឲ្យអ្នកទទួល​ក្រលៀន​មិន​ធ្វើ​តាម​ការ​ព្រម​ព្រៀង​​បង់​ប្រាក់​ឲ្យ​ ស៊ីនួន ឬយ៉ាង​ណា​នោះទេ ប៉ុន្តែ​នៅពេល​ សាទីរិន វិលត្រឡប់​មក​ក្រុង​ភ្នំពេញវិញដោយ​គ្មាន​​ក្រលៀន​ម្ខាង​ ស៊ីនួន មិន​ព្រម​ប្រគល់​ម៉ូតូ​របស់​ខ្លួនដែល​ត្រូវយក​ទៅ​​រក្សា​ទុក​ជា​របស់​បញ្ចាំ មក​វិញ​ឡើយ​​។

សាទីរិន និយាយ​ថា ” គាត់​ខឹង​ខ្ញុំ​ ពីព្រោះ​ប្រាក់ទាំង​អស់​ដែល​បាន​ពីការ​លក់​ក្រលៀន​របស់​ខ្ញុំ​មិន​ត្រូវ​បានផ្ទេរ​ចូល​គណនី​របស់​គាត់​​”។ សាទីរិន និយាយ​ទៀត​ថា ខ្លួន​ទទួល​បាន​​សាច់ប្រាក់​៧.០០០​ដុល្លារ​ពី​ស្ត្រី​ដែល​ទទួល​ក្រលៀន​របស់ខ្លួន។ នៅ​ថ្ងៃទី​១១ ខែមិថុនា សាទីរិន បាន​ប្ដឹង​នគរ​បាល​ថា ម៉ូតូ​របស់​ខ្លួន​ត្រូវ​បាន​គេ​ឃាត់​ទុក​ដើម្បី​ទារ​ប្រាក់លោះ​​។ រូប​គេ​និយាយ​ថា ស៊ីនួន មិន​ត្រឹម​តែ​លួង​លោម​រូប​គេ​​ប៉ុណ្ណោះទេ សូម្បី​តែ​បង​ប្អូន​ប្រុស​បង្កើត​ពីរ​នាក់​របស់​នាង និង​អ្នក​ជិត​ខាង​ម្នាក់ ក៏​នាង​បញ្ចុះ​បញ្ចូល​​ឲ្យ​លក់​ក្រលៀន​ទៅ​ប្រជា​ពល​រដ្ឋ​ខ្មែរ ​ដែល​ត្រូវ​បាន​បញ្ជូនទៅ​ទីក្រុង​បាង​កក ​ដើម្បី​ប្ដូរ​ក្រលៀន​ដែរ​​​។

រូប​គេ​និយាយ​ថា បង​ប្អូនជីដូន​មួយ​របស់​​ខ្លួន​បាន​​ព្យាយាម​លួង​លោមខ្លួន​ឲ្យចូល​ក្នុង​ស៊ង​ផែនការ​នេះ​ចាប់​តាំង​ពីឆ្នាំ​២០១១​មកម្លេ៉ះ ហើយ​ថា ទើបតែ​ពេល​ថ្មីៗ​នេះ​ប៉ុណ្ណោះ​ដែល​រូប​គេ​គិត​ពិចារណា​ទទួល​យក​សំណើ​នេះពេល​ត្រឡប់​​មកពី​ប្រទេស​ម៉ាឡេស៊ីវិញ​​ ក្រោយ​ធ្វើ​ការ​ជា​កម្មករ​សំណង់​នៅទីនោះ​​​អស់​រយៈពេល​ពីរ​ឆ្នាំ​។

សាទីរិន ជាកូន​ទី២​ក្នុង​ចំណោម​បង​ប្អូន​បង្កើត​ប្រាំ​នាក់​ក្នុង​គ្រួសារ​មួយ​ដែល​គ្មាន​ឪពុក​និយាយ​ថា ស៊ីនួន បាន​មកជួប​គេ​ម្ដង​ទៀត​នៅ​ឆ្នាំ​នេះ បន្ទាប់ពី​ក្រុម​គ្រូពេទ្យ​ពិនិត្យ​ឃើញ​ថា ម្ដាយ​របស់​ខ្លួន [សាទីរិន]​ មាន​​ក្រួស​​ក្នុង​តម្រង​​​នោម និង​គីស​ក្នុង​ដៃ​ស្បូន។

រូប​គេ​និយាយ​ថា ” [ស៊ីនួន​] បាន​មក​បញ្ចុះ​បញ្ចូល​ខ្ញុំ​ម្ដង​ទៀត​ឲ្យ​លក់​​​ក្រលៀន​ម្ខាង​ដើម្បី​បាន​ប្រាក់​ព្យាបាល​ម្ដាយ​របស់​ខ្ញុំ។​​​ គាត់​និយាយ​ថា បើ​ខ្ញុំ​មិន​លក់​ក្រលៀនទេ ធ្វើ​ម៉េច​ខ្ញុំ​អាច​ព្យាបាល​ម្ដាយ​របស់​​ខ្ញុំបាន? ខ្ញុំ​មាន​ការ​ស្ទាក់​ស្ទើរ​ក្នុងការ​លក់​ក្រលៀន​របស់​ខ្ញុំ​ ប៉ុន្តែ​គ្មាន​វិធី​ផ្សេង​ដើម្បី​ជួយ​សង្គ្រោះ​ម្ដាយ​របស់​ខ្ញុំឡើយ​”៕ សុខុ​ម​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស